Церковный календарь
Новости


2018-06-21 / russportal
Архіеп. Аверкій. Возможно ли един. христіанъ внѣ благодати и истины? (1975)
2018-06-21 / russportal
Архіеп. Аверкій (Таушевъ). Слово новопострижен. иноку Игнатію (1975)
2018-06-20 / russportal
Ген. П. Н. Красновъ. Романъ "Амазонка пустыни". Глава 31-я (1922)
2018-06-20 / russportal
Ген. П. Н. Красновъ. Романъ "Амазонка пустыни". Глава 30-я (1922)
2018-06-20 / russportal
Сводъ Основныхъ Госуд. Законовъ Россійской Имперіи (1912)
2018-06-20 / russportal
Предисловіе къ изданію Свода Законовъ Россійской Имперіи (1912)
2018-06-19 / russportal
Ген. П. Н. Красновъ. Романъ "Амазонка пустыни". Глава 29-я (1922)
2018-06-19 / russportal
Ген. П. Н. Красновъ. Романъ "Амазонка пустыни". Глава 28-я (1922)
2018-06-19 / russportal
Слова свт. Ѳеофана Затворника. Слово 14-е (1859)
2018-06-19 / russportal
Слова свт. Ѳеофана Затворника. Слово 13-е (1859)
2018-06-18 / russportal
В. О. Ключевскій. "Курсъ Русской Исторіи". Лекція 26-я (1908)
2018-06-18 / russportal
В. О. Ключевскій. "Курсъ Русской Исторіи". Лекція 25-я (1908)
2018-06-17 / russportal
Ген. П. Н. Красновъ. Романъ "Амазонка пустыни". Глава 27-я (1922)
2018-06-17 / russportal
Ген. П. Н. Красновъ. Романъ "Амазонка пустыни". Глава 26-я (1922)
2018-06-17 / russportal
Слова свт. Ѳеофана Затворника. Слово 12-е (1859)
2018-06-17 / russportal
Слова свт. Ѳеофана Затворника. Слово 11-е (1859)
Новости въ видѣ
RSS-канала: .
Сегодня - четвергъ, 21 iюня 2018 г. Сейчасъ на порталѣ посѣтителей - 11.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ЧЕТВЕРТУЮ ВЕЛИКАГО ПОСТА.

Недѣ́ля четве́ртая святы́хъ посто́въ.

Въ суббо́ту ве́чера стихи́ры воскре́сны 3, и восто́чны [Анато́ліевы4, и мине́и 3.
Иніи же послѣ́днѣйшіи опредѣли́ша пѣ́тися послѣ́дованію свята́го Іоа́нна Лѣ́ствичника.
Стихи́ры, гла́съ 8. Подо́бенъ: О, пресла́внаго чудесе́!

Отче Іоа́нне преподо́бне, вы́ну вои́стинну Бо́жія въ горта́ни возноше́нія носи́лъ еси́, поуча́яся дѣ́тельнѣйшимъ Богодухнове́ннымъ словесе́мъ, всему́дре, и отту́ду истека́емою благода́тію обогати́лся еси́, бы́въ блаже́нъ, нечести́выхъ всѣ́хъ совѣ́тованія низвраща́я.

Подо́бенъ:

Отче Іоа́нне пресла́вне, сле́зъ исто́чники ду́шу очи́стивъ и всено́щными стоя́ніи Бо́га уми́лостививъ, воспери́лся еси́ къ любле́нію сего́, блаже́нне, и красотѣ́, ея́же досто́йно ны́нѣ наслажда́ешися, непреста́нно ра́дуяся, со страда́льцы твои́ми, богому́дре преподо́бне.

Подо́бенъ:

Отче Іоа́нне преподо́бне, воспери́въ у́мъ къ Бо́гу вѣ́рою, мірска́го смѣше́нія омерзи́лъ еси́ непостоя́нное и, кре́стъ тво́й воспріи́мъ, Всеви́дцу послѣ́довалъ еси́, тѣ́ло необузда́нное, по́двигами обуче́нія, по́мыслу порабо́тивъ, крѣ́постію Боже́ственнаго Ду́ха.

Сла́ва, гла́съ 5:

Преподо́бне о́тче, гла́са Ева́нгелія Госпо́дня послу́шавъ, мíръ оста́вилъ еси́, бога́тство и сла́ву нивочто́же вмѣни́въ. Отону́дуже всѣ́мъ возопи́лъ еси́: возлюби́те Бо́га, и обря́щете благода́ть вѣ́чную; ничто́же предпочти́те па́че любве́ Его́, да егда́ пріи́детъ во сла́вѣ Свое́й, обря́щете упокое́ніе со всѣ́ми святы́ми. Ихже моли́твами, Христе́, сохрани́, и спаси́ ду́ши на́ша.

И ны́нѣ, богоро́диченъ 1-й, гла́са.

На стихо́внѣ стихи́ры осмогла́сника.
Сла́ва, преподо́бнаго, гла́съ 2. Самогла́сенъ:

На земли́ а́нгела и на небесѣ́хъ человѣ́ка Бо́жія, мíра благоукраше́ніе, наслажде́ніе благи́хъ, добродѣ́телей по́стническихъ похвалу́, Іоа́нна почти́мъ, насажде́нъ бо въ дому́ Бо́жіи, процвѣте́ пра́ведно и, я́ко ке́дръ въ пусты́ни, умно́жи стада́ Христо́ва слове́сныхъ ове́цъ, въ преподо́біи и пра́вдѣ.

И ны́нѣ, богоро́диченъ, гла́съ то́йже: О, чудесе́ но́ваго...
Ны́нѣ отпуща́еши...

Тропа́рь, гла́съ 1:

Пусты́нный жи́тель и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Іоа́нне; посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя, и ду́ши вѣ́рою притека́ющихъ ти́. Сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


НА УТРЕНИ,
По обы́чномъ послѣ́дованіи, кано́ны: воскре́сный, съ богоро́дичнымъ, на 6, и настоя́щій тріо́ди на 4, и свята́го на 4.

Кано́нъ трипѣ́снца, гла́съ 5.
Пѣ́снь 1.

Ирмо́съ: Спаси́телю Бо́гу, [въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися].

Уподо́бихся, Христе́, въ ру́цѣ разбо́йниковъ впа́дшему и біе́ньми е́ле жи́ву отъ си́хъ оста́вленному, Спа́се, и а́зъ си́це уя́звленъ е́смь грѣхи́ мои́ми.

Не пре́зри мене́ неду́гующа лю́то, вопія́ше, Спа́се, рыда́я, на разбо́йники бога́тство изнури́вый Твое́; и а́зъ си́це молю́ся: уще́дри и спаси́ мя.

Уврачева́вый мя́, убіе́нъ иму́ща у́мъ грѣхи́ въ я́звахъ отъ разбо́йниковъ — непра́ведныхъ и лука́выхъ помышле́ній, Христе́ Спа́се, спаси́ мя, я́ко Многоми́лостивый.

Богоро́диченъ: Пречи́стая Ма́ти Христо́ва, вопло́щшагося изъ Тебе́ и отъ нѣ́дръ Роди́теля не отлу́чшася Бо́га, непреста́нно моли́, отъ вся́каго обстоя́нія спасти́, я́же созда́.

Иный кано́нъ, преподо́бнаго, гла́съ 8.

Ирмо́съ: Во́ду проше́дъ, я́ко су́шу, [и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ].

Во Свѣ́тъ невеще́ственный и у́мный, отъ печа́ли веще́ственныхъ восте́къ, Іоа́нне преподо́бне, моли́твами твои́ми ко Го́споду, просвѣти́ мя.

Яко воздержа́нія сла́дость сса́въ, отри́нулъ еси́ го́ресть сласте́й, тѣ́мже па́че ме́да и со́та услажда́еши, о́тче, чу́вства на́ша.

[Сла́ва:] Возше́дъ на высоту́ добродѣ́телей, до́лѣ плѣ́жущія поплева́въ сла́сти, сла́дость яви́лся еси́ спасе́нія, преподо́бне о́тче, ста́ду твоему́.

[И ны́нѣ,] богоро́диченъ: Прему́дрость и Сло́во Отчее несказа́нно ро́ждшая, души́ моея́ лю́тую уврачу́й я́зву и се́рдца болѣ́знь укроти́.

Катава́сія: Отве́рзу уста́ моя́...

Пѣ́снь 3.

Ирмо́съ: Утверди́ ны, Бо́же, [Твое́ю си́лою, и низложи́ ерети́ческая шата́нія, и вознеси́ ро́гъ на́шъ].

Путе́мъ житія́, Христе́, лю́тѣ путеше́ствуя, уя́звленъ е́смь отъ разбо́йникъ въ страсте́хъ, но возста́ви мя́, молю́ся.

Разби́ша у́мъ мо́й разбо́йницы и оста́виша мя́ въ я́звахъ е́ле жи́ва прегрѣше́ній мои́хъ, но исцѣли́ мя, Го́споди.

Обнажи́ша мя́, Спа́се Христе́, за́повѣдей Твои́хъ стра́сти, и сластьми́ уязви́хся, но изле́й на мя́ ми́лость.

Богоро́диченъ: Моли́ непреста́нно, Чи́стая, Проше́дшаго изъ чре́слъ Твои́хъ, изба́витися ле́сти діа́воли, пою́щимъ Тя́ Ма́терь Бо́жію.

Иный.

Ирмо́съ: Ты́ еси́ утвержде́ніе [притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й].

Попали́лъ еси́ у́глемъ обуче́нія пресла́вно страсте́й те́рніе, и согрѣва́еши мона́шествующихъ состоя́нія.

Мѵ́ро освяще́нія отъ по́стническихъ, преподо́бне, арома́тъ, ве́сь сложи́лся еси́ въ воню́ благоуха́нія Бо́жія.

[Сла́ва:] Въ зако́нѣхъ обуче́нія поуча́яся, стра́сти потопи́лъ еси́, я́коже ины́я ны́нѣ фараони́ты, тече́ніемъ сле́зъ твои́хъ.

[И ны́нѣ,] богоро́диченъ: Уста́ви мое́ непостоя́нное помышле́ній, Чи́стая, смуще́ніе, Ма́ти Бо́жія, къ Сы́ну Твоему́ направля́ющи движе́ніе.

Сѣда́ленъ, гла́съ 5. Подо́бенъ: Стра́нное.

Пречи́стый Кре́стъ Тво́й, Спа́се на́шъ, я́ко ору́жіе спасе́нія содержа́ще, тѣ́мъ Тебѣ́ вопіе́мъ: спаси́ ны пострада́вый во́лею о на́съ, всѣ́хъ Бо́же, я́ко Многоми́лостивый.

Сла́ва, преподо́бнаго, гла́съ 4. Подо́бенъ: Вознесы́йся.

Добродѣ́тельми къ небеси́ возсія́вый, водруже́нъ я́вѣ, возше́лъ еси́ къ Боговидѣ́нія неизмѣ́римой глубинѣ́, благоче́стно, вся́ у́бо побѣди́въ де́монскія ко́зни, покрыва́еши же человѣ́ки отъ вре́да си́хъ, Іоа́нне — лѣ́ствице добродѣ́телей, и ны́нѣ мо́лишися спасти́ся рабо́мъ твои́мъ.

И ны́нѣ, богоро́диченъ. Подо́бенъ:

На престо́лѣ херуви́мскомъ Сѣдя́й и въ нѣ́дрѣхъ Отчихъ Водворя́яйся, я́ко на престо́лѣ сѣди́тъ святѣ́мъ Свое́мъ Влады́чице, въ нѣ́дрѣхъ Твои́хъ пло́тски: Бо́гъ бо воцари́выйся та́ко надъ всѣ́ми язы́ки, и разу́мно ны́нѣ пое́мъ Ему́; Его́же и Ты́, Чи́стая, моли́, спасти́ся рабо́мъ Твои́мъ.

Пѣ́снь 4.

Ирмо́съ: Услы́шахъ, Го́споди, слу́хъ Тво́й [и убоя́хся, разумѣ́хъ смотре́ніе Твое́ и просла́вихъ Тя́, Еди́не Человѣколю́бче].

Разбо́йницы окрадо́ша мое́ дѣя́ніе боже́ственное, и оста́виша мя́ я́звами му́чима.

Извлеко́ша мя́, Спа́се, за́повѣдей Твои́хъ, непостоя́нная помышле́нія моя́, отону́дуже уя́звленъ е́смь прегрѣше́ньми.

Леви́тъ ра́нами уя́звленна, я́ко ви́дѣ мя́, ми́мо и́де, Спа́се мо́й, но Ты́ мя спаси́.

Богоро́диченъ: Госпо́дственно прославля́емъ Тя́, Богоро́дице Безневѣ́стная, и къ Твоему́ приста́нищу, вѣ́рніи, прибѣга́емъ.

Иный.

Ирмо́съ: Услы́шахъ, Го́споди, [смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́].

Яко цвѣ́тникъ благово́ннѣйшій и добродѣ́телей ра́й одушевле́нный, воздержа́ніе процвѣ́лъ еси́, и́мже вся́ напита́лъ еси́, чту́щія тя́.

Законоположи́теля обуче́нія и мона́ховъ пра́вило кротча́йшее, я́ко Моисе́я тя и Дави́да, вои́стинну стяжа́вше, о́тче, ублажа́емъ.

[Сла́ва:] Насажде́нъ на вода́хъ воздержа́нія, яви́лся еси́, блаже́нне, розга́, о́тче, благоцвѣту́щая, благоче́стія гро́зды произнося́щая.

[И ны́нѣ,] богоро́диченъ: Подъ лѣ́томъ быва́ема, отъ Отца́ безлѣ́тно возсія́вша, Богома́ти, на́мъ родила́ еси́, Его́же моли́ спасти́ пою́щія Тя́.

Пѣ́снь 5.

Ирмо́съ: Утренююще, вопіе́мъ Ти́: [Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́, ино́го не вѣ́мы].

Іису́се, посѣти́ ра́ны души́ моея́, я́коже дре́вле въ ру́цѣ впа́дшаго разбо́йничи, и уврачу́й болѣ́знь мою́, Христе́, молю́ся.

Болѣ́зненно я́звами изнемого́хъ, Христе́ мо́й, прегрѣше́ній, и отту́ду на́гъ лежу́ добродѣ́телей боже́ственныхъ, молю́, спаси́ мя.

Іере́й, я́коже ви́дѣ мя́, и леви́тъ не возмо́же я́вѣ, мимоидо́ша бо мя́, но Са́мъ, я́ко благоутро́бенъ, ны́нѣ спасе́ніе по́далъ и спа́слъ еси́.

Богоро́диченъ: Не пре́зри, Влады́ко, окая́ннаго мене́, молю́ся, уя́звленнаго умо́мъ болѣ́зненно отъ разбо́йникъ, но уще́дри моли́твами, Спа́се, Ро́ждшія Тя́.

Иный.

Ирмо́съ: Вску́ю мя́ отри́нулъ еси́ [отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся].

Погаси́въ вся́ стра́сти росо́ю подвиго́въ твои́хъ, о́тче блаже́нне, оби́льно возже́гъ огне́мъ любве́ и вѣ́ры воздержа́нія свѣти́льникъ, и просвѣще́ніе безстра́стія, и дне́ сы́нъ бы́лъ еси́.

Вѣ́ры гро́здъ, боже́ственнымъ земледѣ́ліемъ твои́мъ, о́тче, воспита́лъ еси́, и въ точи́ла вложи́лъ еси́, и воздѣ́лалъ еси́ труды́ обуче́нія и, ча́шу испо́лнь духо́вную воздержа́нія, весели́ши сердца́ ста́да твоего́.

[Сла́ва:] Претерпѣ́въ до́брѣ прило́ги и я́звы проти́вныхъ враго́въ, яви́лся еси́ сто́лпъ терпѣ́нія, утвержда́я ста́до твое́ па́лицею боже́ственною, на па́жити воздержа́нія и на водѣ́ воспитова́я, блаже́нне.

[И ны́нѣ,] богоро́диченъ: Рѣ́чемъ Твои́хъ усте́нъ, Всечи́стая, послѣ́дующе, Тя́ ублажа́емъ: съ Тобо́ю бо вои́стинну вели́чія сотвори́вый Госпо́дь возвели́чи Тя́, и и́стинную Бо́жію Ма́терь рожде́йся изъ чре́ва Твоего́ показа́.

Пѣ́снь 6.

Ирмо́съ: Обы́де мя́ бе́здна, [гро́бъ мнѣ́ ки́тъ бы́сть, а́зъ же возопи́хъ Тебѣ́, Человѣколю́бцу, и спасе́ мя десни́ца Твоя́, Го́споди].

Страстьми́ ижди́хъ житіе́ боже́ственное, Влады́ко, и вся́ко прегрѣше́ньми лю́тѣ уя́звенъ, прибѣго́хъ къ Тебѣ́, уще́дри мя́, молю́ся.

Расхи́тиша бога́тство мое́ и, я́коже ме́ртва, мя́ оста́виша разбо́йницы, страстьми́ у́мъ мо́й уязви́вше, но уще́дривъ, спаси́ мя́, Го́споди.

Яко ви́дѣ леви́тъ мою́ ра́нъ болѣ́знь, я́звъ не терпя́, мимои́де мя́, Са́мъ же, Человѣколю́бче, излія́лъ ми́ еси́ бога́тую Твою́ ми́лость.

Богоро́диченъ: Купину́ Тя неопали́мую, и Го́ру, и Лѣ́ствицу одушевле́нную, и Две́рь небе́сную, досто́йно сла́вимъ, Марíе Пресла́вная, правосла́вныхъ похвало́.

Иный.

Ирмо́съ: Очи́сти мя́, Спа́се, [мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́].

Прія́лъ еси́ въ души́ Боже́ственное бога́тство Ду́ха: непоро́чную моли́тву, чистоту́, че́стность, бдѣ́ніе всегда́шнее, воздержа́нія труды́, и́миже до́мъ позна́лся еси́ Бо́жій.

Вещества́ е́же до́лѣ, прему́дре, прете́клъ еси́ ху́дость, невеще́ственною же моли́твою у́мъ воспери́въ, и вы́шняго упокое́нія яви́лся еси́ наслѣ́дникъ, соверше́нства ра́ди житія́.

[Сла́ва:] По́тами по́стническими у́гліе стрѣ́лъ вра́жіихъ угаси́лъ еси́ вои́стинну и, о́гнь вѣ́ры возсія́въ, попали́лъ еси́ невѣ́рія ересе́й шата́нія.

[И ны́нѣ,] богоро́диченъ: Возсія́ отъ Сіо́на вы́шняго благолѣ́піе, предложе́ніемъ пло́ти по соедине́нію неизрече́нному, изъ Тебе́, Неискусобра́чная, обложе́нное, и мíръ просвѣ́ти.

Конда́къ, гла́съ 4. Подо́бенъ: Яви́лся еси́ дне́сь.

На высотѣ́ Госпо́дь воздержа́нія и́стинна тя́ положи́, я́коже звѣзду́ неле́стную, свѣтоводя́щую концы́, наста́вниче Іоа́нне, о́тче на́шъ.

Икосъ:

До́мъ Бо́жій я́ко вои́стинну самаго́ себе́ содѣ́лалъ еси́, о́тче, боже́ственными твои́ми добродѣ́тельми я́вѣ украси́въ, я́ко зла́то свѣ́тлое, вѣ́ру, наде́жду и любо́вь и́стинную, Боже́ственныя зако́ны излага́я, воздержа́ніемъ обучи́вся, я́ко безпло́тный, ра́зумъ, му́жество, цѣлому́дріе стяжа́въ, смире́ніе, и́мже возне́слся еси́. Тѣ́мже и просвѣти́лся еси́ моли́твами непреста́нными, и небе́сная прія́лъ еси́ селе́нія, наста́вниче Іоа́нне, о́тче на́шъ.

Та́же чте́тся синакса́рій дневны́й.
Посе́мъ житіе́ преподо́бнаго отца́ на́шего Іоа́нна Лѣ́ствичника, въ мíрѣ сконча́вшагося.

Стихи́: Иже пло́тію и живы́й, ме́ртвъ сы́й Іоа́ннъ,
                  Вѣ́чно живе́тъ, и ме́ртвъ я́влься бездыха́нный;
                  Списа́ніе оста́вль — лѣ́ствицу восхожде́нія,
                  Показу́етъ своего́ пу́ть восхожде́нія.
                  Іоа́ннъ у́мре въ тридеся́тый де́нь.

Иже шестина́десяти лѣ́тъ сы́й и остроу́мный сы́й, принесе́ себе́ Бо́гу же́ртву свяще́ннейшую, на Сина́йскую го́ру возше́дъ. Та́же по девятина́десятихъ лѣ́тѣхъ, воста́въ, прихо́дитъ въ безмо́лвія по́прище отъ пяти́ зна́меній Киріа́ка; во оби́тель Пале́стры дости́гъ, на мѣ́сто, глаго́лемое Ѳо́ла, четы́редесять лѣ́тъ пожи́въ, при́сно разжига́емь любо́вію и огне́мъ боже́ственныя любве́. Ядя́ше у́бо вся́, я́же непоро́чно присто́яху за́повѣди, но умѣ́ренно зѣло́, и въ се́мъ го́рдости ро́гъ сломля́я всепрему́дро. Но исто́чникъ сле́зъ его́ кíй у́мъ изре́клъ бы? Сна́ же причаща́шеся, ели́ко ума́ существу́ бдѣ́ніемъ не вреди́тися. Тече́ніе же его́ — моли́тва бя́ше при́сная и къ Бо́гу любо́вь безмѣ́рная. Си́ми всѣ́ми богоуго́дно пожи́въ исправле́ньми, и лѣ́ствицу списа́вый, словеса́ уче́нія изложи́въ, и испо́лненъ бла́гости досто́йно, упоко́ися въ Го́сподѣ, мно́га и ина́я списа́нія оста́вивъ.

Его́же моли́твами, Бо́же, поми́луй и спаси́ на́съ.

Пѣ́снь 7.

Ирмо́съ: Превозноси́мый отце́въ [Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́].

Разбо́йницы обпадо́ша на мя́ окая́ннаго, и я́звами оста́виша ме́ртва, я́коже бездыха́нна мя́; тѣ́мже молю́ся Ти́: Бо́же, посѣти́ мя.

Умъ мо́й плѣни́ша помышле́нія непостоя́нная, и уязви́вше страстьми́, ме́ртва мя́ оста́виша мно́жествомъ прегрѣше́ній, но, Спа́се, исцѣли́ мя.

Яко ви́дѣ леви́тъ мя́, ра́нами боля́ща, не терпя́ я́звъ неисцѣ́льнаго ра́ди, мимои́де мя́, Спа́се мо́й, но Са́мъ уврачу́й мя́.

Богоро́диченъ: Ты́, отъ Дѣ́вы воплоти́выйся, спа́слъ мя́ еси́, я́звамъ мои́мъ возлива́я бога́тую ми́лость, Христе́, щедро́тъ Твои́хъ; сего́ ра́ди Тя́ сла́влю.

Иный.

Ирмо́съ: Отъ Іуде́и доше́дше, [о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́].

На зла́цѣ вы́шняго Ца́рствія ста́до, о́тче, воспита́лъ еси́ и, жезло́мъ догма́тъ звѣ́ри отгна́въ ересе́й, воспѣ́лъ еси́: оте́цъ на́шихъ Бо́же, благослове́нъ еси́.

Въ го́рній вше́лъ еси́ и невѣ́стническій черто́гъ Ца́рства Христо́ва, оде́ждею облече́нъ, досто́йною Зва́вшаго, въ не́мже и возле́глъ еси́, вопія́: оте́цъ на́шихъ Бо́же, благослове́нъ еси́.

[Сла́ва:] Невла́жная грѣхми́ рѣка́ яви́лся еси́ воздержа́нія, о́тче, по́мыслы потопля́я и скве́рну очища́я, вопію́щихъ вѣ́рою: оте́цъ на́шихъ Бо́же, благослове́нъ еси́.

[И ны́нѣ,] богоро́диченъ: Изъ чре́ва Твоего́ про́йде воплоти́выйся, Дѣ́во, всѣ́хъ Госпо́дь; тѣ́мже Тя́, Богоро́дицу, му́дрствующе правосла́вно, Сы́ну Твоему́ зове́мъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, [въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки].

Отъ разбо́йникъ — по́мысловъ мои́хъ, Спа́се, растли́хъ житіе́ мое́ согрѣше́ній я́звами. Тѣ́мже Боже́ственнаго обнажи́хся о́браза — Тебе́, Человѣколюби́ваго Бо́га, но уще́дри мя́.

Прише́лъ еси́ на зе́млю отъ вы́шнихъ, Спа́се, уще́дривъ біе́ньми ура́неннаго мя́ всего́ прегрѣше́ній я́звами, Ще́дре, и излія́лъ еси́ на мя́, Христе́, ми́лость Твою́.

Тѣ́ло и ду́шу Ты́, Влады́ко Спа́се, изба́ву да́лъ еси́ за мя́, и спа́слъ мя́ еси́, мече́мъ грѣхо́въ уязвле́наго, въ неисцѣ́льныхъ я́звахъ, я́ко Ми́лостивый.

Богоро́диченъ: Тя́, па́че ума́, богому́жнымъ сло́вомъ ро́ждшую Го́спода и дѣ́вствующую, вся́ дѣла́, Дѣ́во, благослови́мъ и превозно́симъ во вся́ вѣ́ки.

Иный.

Ирмо́съ: Царя́ Небе́снаго, [Его́же пою́тъ во́и а́нгельстіи, хвали́те и превозноси́те во вся́ вѣ́ки].

Сто́лпъ тя́ одушевле́нный, я́ко вои́стинну, и о́бразъ воздержа́нія, о́тче, стяжа́вше, вси́ твою́ па́мять почита́емъ, Іоа́нне.

Мно́жество ра́дуется мона́ховъ, и лику́етъ преподо́бныхъ собо́ръ и пра́ведныхъ, вѣне́цъ бо досто́йно съ ни́ми прія́лъ еси́.

[Благослови́мъ Отца́, и Сы́на, и Свята́го Ду́ха, Го́спода.]

Укра́шенъ добродѣ́тельми, въ невѣ́стникъ неизрече́нныя сла́вы соше́лъ еси́, пѣ́снь воспѣва́я Христу́ во вѣ́ки.

[И ны́нѣ,] богоро́диченъ: По́мощи я́же отъ Тебе́ тре́бующія не пре́зри, Дѣ́во, пою́щія и превознося́щія Тя́ во вѣ́ки.

Пѣ́снь 9.

Ирмо́съ: Иса́іе, лику́й, [Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ].

За́повѣди Твоя́, Влады́ко, не сохрани́въ ра́зумомъ мои́мъ, въ стра́сти вше́дъ сласте́й, обнажи́хся благода́ти, и я́звами изве́рженъ на́гъ; тѣ́мже молю́ Тя, Спа́се, спаси́ мя.

Ниже́ леви́тъ возмо́же отмы́ти стру́пы моя́; но прише́лъ еси́ ко мнѣ́, Бла́же, сострада́тельно, и излія́лъ еси́ ми́лость Твои́хъ щедро́тъ, Спа́се, на мя́, я́ко всеизря́дный Вра́чь исцѣля́я мя́.

Яко сы́й Благоутро́бенъ, уще́дривъ, спа́слъ еси́, Христе́, я́звами люте́ отъ разбо́йникъ, Спа́се, убіе́на мя́; ду́шу же и тѣ́ло Свое́, я́ко динаря́ два́, да́лъ еси́ избавле́ніе.

Богоро́диченъ: Па́че ума́ рождество́ Твое́, Богома́ти: безъ му́жа бо зача́тіе въ Тебѣ́, и дѣ́вственно рожде́ніе бы́сть, и́бо Бо́гъ е́сть рожде́йся; Его́же велича́юще, Тя́, Дѣ́во, ублажа́емъ.

Иный.

Ирмо́съ: Чи́стую сла́вно почти́мъ, [лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ].

Вра́чь боля́щихъ въ прегрѣше́ніихъ, отъ Бо́га, блаже́нне, губи́тель же яви́лся еси́ и прогони́тель лука́выхъ духо́въ, тѣ́мже тя́ ублажа́емъ.

Зе́млю, я́коже тли́ жили́ще, оста́вилъ еси́, о́тче, и въ земли́ всели́лся еси́ кро́ткихъ, и съ ни́ми весели́шися, Боже́ственныя наслажда́яся сла́дости.

[Сла́ва:] Дне́сь де́нь пра́зднственный, вся́ бо созыва́етъ мона́шествующихъ стада́, въ ли́къ духо́вный, на трапе́зу и снѣ́дь нетле́нныя жи́зни.

[И ны́нѣ,] богоро́диченъ: Въ Тебѣ́ всели́вся, Всенепоро́чная, пре́жде родонача́льники злонра́вно прельсти́вшаго человѣкоубíйцу низложи́вый, роди́ся, и вся́ ны́ спасе́.

Ексапостила́рій воскре́сенъ.
И преподо́бнаго. Подо́бенъ: Жены́ услы́шите.

Мíра благостра́стія, я́коже вре́днаго, уклони́лся еси́ и, безбра́шіемъ пло́ть увяди́въ, обнови́лъ еси́ души́ крѣ́пость, преподо́бне, и сла́вою обогати́лся еси́ небе́сною, пресла́вне; тѣ́мже не преста́й моля́ся о на́съ, Іоа́нне.

[Сла́ва, и ны́нѣ,] богоро́диченъ:

Госпо́дственно Богоро́дицу Тя́ исповѣ́дуемъ, Влады́чице, Тобо́ю спасе́ни: и́бо Бо́га родила́ еси́ неизрече́нно, разо́ршаго Кресто́мъ сме́рть, къ Себѣ́ же привле́кшаго преподо́бныхъ собо́ры; съ ни́миже Тя́ восхваля́емъ, Дѣ́во.

На хвали́техъ, воскре́сны осмогла́сника и восто́чны [Анато́ліевы].

Та́же глаго́лемъ сти́хъ: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гихъ Твои́хъ до конца́.

И пое́мъ самогла́сенъ, гла́съ 1:

Пріиди́те, дѣ́лаимъ въ та́йномъ виногра́дѣ, плоды́ покая́нія въ не́мъ творя́ще, не въ бра́шнѣхъ и питіи́хъ тружда́ющеся, но въ моли́твахъ и постѣ́хъ добродѣ́тели исправля́юще; си́ми угожда́емый Госпо́дь дѣ́ла дина́рь подае́тъ, и́мже ду́ши избавля́етъ до́лга грѣхо́внаго, еди́нъ Многоми́лостивый.

Сла́ва: па́ки то́йже. И ны́нѣ: Преблагослове́нна еси́...

Славосло́віе вели́кое, и отпу́стъ. Сла́ва, и ны́нѣ: стихи́ра ева́нгельская. И оглаше́ніе, и ча́съ 1-й, и про́чее послѣ́дованіе, я́ко обы́чно.


НА ЛИТУРГІИ,

Изобрази́тельная и блаже́нны гла́са. Проки́менъ Апо́стола, рядова́го гла́са. И преподо́бнаго, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [хвале́ніе Его́ въ це́ркви преподо́бныхъ]. Апо́столъ дне́, ко Евре́емъ, зача́ло 314. И другíй, преподо́бнаго, ко Ефесе́емъ, зача́ло 229. Аллилу́ія, гла́са и преподо́бнаго, [гласъ 4.] Сти́хъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ]. Ева́нгеліе отъ Ма́рка, зача́ло 40. И преподо́бнаго, отъ Матѳе́я, зача́ло 10. Кинони́къ: Хвали́те Го́спода съ небе́съ, [хвали́те Его́ въ вы́шнихъ]. Другíй: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 232 – 237.

Служба въ субботу 4-й недѣли поста // Къ оглавленію Постной Тріоди // Служба въ понедѣльникъ 5-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.