Церковный календарь
Новости


2018-07-21 / russportal
2-й Всезаруб. Соборъ 1938 г. Докладъ (4-й) К. Н. Николаева (1939)
2018-07-21 / russportal
Помѣстный Соборъ 1917-1918 гг. Дѣяніе 30-е (25 октября 1917 г.)
2018-07-20 / russportal
2-й Всезаруб. Соборъ 1938 г. Докладъ (3-й) К. Н. Николаева (1939)
2018-07-20 / russportal
Помѣстный Соборъ 1917-1918 гг. Дѣяніе 38-е (11 ноября 1917 г.)
2018-07-18 / russportal
Ген. П. Н. Красновъ. "За чертополохомъ". Часть 2-я. Глава 1-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 41-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 40-я (1922)
2018-07-18 / russportal
Ген. П. Н. Красновъ. "За чертополохомъ". Часть 1-я. Глава 39-я (1922)
2018-07-18 / russportal
Н. А. Соколовъ. Убійство въ Алапаевскѣ Вел. Кн. Елизаветы Ѳедоровны (1925)
2018-07-17 / russportal
С. Павловъ. Екатеринбургское злодѣяніе 17-го іюля 1918 года (1947)
2018-07-16 / russportal
В. К. Абданкъ-Коссовскій. Страшная годовщина 17 іюля 1918 г. (1942)
2018-07-16 / russportal
Поиски отвѣта на вопросъ о судьбѣ останковъ Царской Семьи (1995)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 38-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 37-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 36-я (1922)
2018-07-15 / russportal
Ген. П. Н. Красновъ. "За чертополохомъ". Часть 1-я. Глава 35-я (1922)
Новости въ видѣ
RSS-канала: .
Сегодня - воскресенiе, 22 iюля 2018 г. Сейчасъ на порталѣ посѣтителей - 4.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ПЯТЫЯ СЕДМИЦЫ ВЕЛИКАГО ПОСТА.

ВО ВТОРНИКЪ ПЯТЫЯ СЕДМИЦЫ ВЕЧЕРА,
Стихосло́вимъ вмѣ́сто Ко Го́споду... каѳи́сму 19-ю.
На Го́споди воззва́хъ... поста́вимъ стихо́въ 6 и пое́мъ стихи́ры подо́бны трипѣ́снца 3 и въ мине́и 3.
Подо́бны господи́на Іо́сифа, гла́съ 8. Подо́бенъ: Что́ вы́ нарече́мъ?

Бра́шно любо́вь творя́ще, воздержа́ніемъ стра́сти удержи́мъ, вѣ́рніи, и Бо́гу, на́съ ра́ди возне́сшемуся на Крестѣ́ и копіе́мъ пробо́дшемуся въ ре́бра, пожи́ти благоуго́дно веде́мся, да пи́щи наслади́мся вѣ́чныя и лу́чшія, сла́вяще Спа́са ду́шъ на́шихъ.

Подо́бенъ:

Дре́вомъ дре́вле сме́рть обрѣто́хомъ, ны́нѣ же па́ки жи́знь — Дре́вомъ Кре́стнымъ, страсте́й у́бо стремле́нія умертви́мъ, вѣ́рніи, и дости́гнути спаси́тельное Воскресе́ніе всѣ́хъ Благодѣ́теля мо́лимъ, дѣя́ньми боже́ственными сія́юще и добродѣ́тельми украша́еми, сла́вяще Спа́са ду́шъ на́шихъ.

Ина стихи́ра подо́бна, господи́на Ѳео́дора, гла́съ 2. Подо́бенъ: Па́че ума́ благи́хъ.

Живоно́сный Тво́й Кре́стъ похваля́емъ, Го́споди, и на́съ ра́ди свяще́нная пло́ти Твоея́ Страда́нія: копіе́ же, заколе́нія, посмѣя́нія, оплева́нія, біе́нія, и зауше́нія съ багряни́цею, и вѣне́цъ терноплете́нный, и́миже отъ кля́твы вся́ изба́вивъ, спа́слъ еси́ ны́. Тѣ́мже мо́лимъ Тя́: посто́въ вре́мя ми́рно сконча́ти пода́ждь на́мъ.

Проки́менъ, псало́мъ 89-й, гла́съ 4: Го́споди, прибѣ́жище бы́лъ еси́ на́мъ* въ ро́дъ и ро́дъ. Сти́хъ: Пре́жде, да́же гора́мъ не бы́ти и созда́тися земли́ и вселе́ннѣй, [и отъ вѣ́ка и до вѣ́ка Ты́ еси́].

Бытія́ чте́ніе. [Глава́ 15.]

Бы́сть сло́во Госпо́дне ко Авра́му въ видѣ́ніи но́щію, глаго́ля: не бо́йся, Авра́ме, Азъ защища́ю тя́, мзда́ твоя́ мно́га бу́детъ зѣло́. Глаго́ла же Авра́мъ: Влады́ко Го́споди, что́ ми́ да́си? Азъ же отпуща́юся безча́денъ, сы́нъ же Масе́къ, домоча́дицы моея́, се́й Дама́скъ Еліе́зеръ. И рече́ Авра́мъ: поне́же мнѣ́ не да́лъ еси́ сѣ́мене, домоча́децъ же мо́й наслѣ́дникъ мо́й бу́детъ. И а́біе гла́съ Госпо́день бы́сть къ нему́, глаго́лющій: не бу́детъ се́й наслѣ́дникъ тво́й, но и́же изы́детъ изъ тебе́, то́й бу́детъ наслѣ́дникъ тебѣ́. Изведе́ же его́ во́нъ и рече́ ему́: воззри́ на не́бо и изочти́ звѣ́зды, а́ще возмо́жеши исчести́ я́. И рече́: та́ко бу́детъ сѣ́мя твое́. И вѣ́рова Авра́мъ Бо́гу и вмѣни́ся ему́ въ пра́вду. Рече́ же къ нему́: Азъ (е́смь) Бо́гъ, изведы́й тя́ отъ страны́ Халде́йскія, я́ко да́ти тебѣ́ зе́млю сію́ наслѣ́дствовати. И рече́: Влады́ко Го́споди, по чесому́ уразумѣ́ю, я́ко наслѣ́дити ю́ и́мамъ? Рече́ же къ нему́: возми́ Мнѣ́ ю́ницу трилѣ́тну, и ко́зу трилѣ́тну, и овна́ трилѣ́тна, и го́рлицу, и го́лубя. Взя́ же о́нъ вся́ сія́ и раздѣли́ я́ на по́лы, и положи́ я́ противоли́чна еди́на къ друго́му, пти́цъ же не раздѣли́. Слетѣ́ша же пти́цы на тѣлеса́, расте́саная и́хъ, и сѣ́де бли́зу и́хъ Авра́мъ. Заходя́щу же со́лнцу, у́жасъ нападе́ на Авра́ма и се́ стра́хъ те́менъ ве́лій нападе́ на́нь. И рече́но бы́сть ко Авра́му: вѣ́дый увѣ́си, я́ко пресе́льно бу́детъ сѣ́мя твое́ въ земли́ не свое́й, и порабо́тятъ я́, и озло́бятъ я́, и смиря́тъ я́ лѣ́тъ четы́реста. Язы́ку же, ему́же порабо́таютъ, сужду́ Азъ; по си́хъ же изы́дутъ сѣ́мо со имѣ́ніемъ мно́гимъ. Ты́ же оты́деши ко отце́мъ твои́мъ въ ми́рѣ, препита́нъ въ ста́рости до́брѣй.

Проки́менъ, псало́мъ 90-й, гла́съ 4: Живы́й въ по́мощи Вы́шняго* въ кро́вѣ Бо́га Небе́снаго водвори́тся. Сти́хъ: Рече́тъ Го́сподеви: Засту́пникъ мо́й еси́ [и Прибѣ́жище мое́, Бо́гъ мо́й и упова́ю на Него́].

При́тчей чте́ніе. [Глава́ 15.]

Устнѣ́ му́дрыхъ связу́ются чу́вствомъ, сердца́ же безу́мныхъ не тве́рда. Же́ртвы нечести́выхъ — ме́рзость Го́сподеви, обѣ́ты же правоходя́щихъ прія́тны Ему́. Ме́рзость Го́сподеви путіе́ нечести́выхъ, гоня́щія же пра́вду лю́битъ. Наказа́ніе незло́биваго познава́ется отъ мимоходя́щихъ, ненави́дящіи же обличе́нія скончава́ются сра́мно. Адъ и па́губа я́вна предъ Го́сподемъ, ка́ко не и сердца́ человѣ́ковъ? Не возлю́битъ ненака́занный облича́ющихъ его́, съ му́дрыми же не побесѣ́дуетъ. Се́рдцу веселя́щуся, лице́ цвѣте́тъ, въ печа́лехъ же су́щу, сѣ́туетъ. Се́рдце пра́вое и́щетъ чу́вства, уста́ же ненака́занныхъ уразумѣ́ютъ зла́я. На вся́ко вре́мя о́чи злы́хъ пріе́млютъ зла́я, до́бріи же безмо́лвствуютъ при́сно. Лу́чше части́ца ма́лая со стра́хомъ Госпо́днимъ, не́жели сокро́вища ве́лія безъ боя́зни. Лу́чше учрежде́ніе отъ зе́лій съ любо́вію и благода́тію, не́жели представле́ніе тельце́въ со враждо́ю. Му́жъ я́рый устроя́етъ бра́ни, долготерпѣли́вый же и бу́дущую укроща́етъ. Терпѣли́вый му́жъ угаси́тъ суды́, нечести́вый же воздвиза́етъ па́че. Путіе́ пра́здныхъ по́стлани те́рніемъ, му́жественныхъ же угла́ждени.

На стихо́внѣ самогла́сны, гла́съ 5, еди́ножды:

Поползну́вся отъ пра́ваго пути́ Твоего́, отъ страсте́й окая́нный низпадо́хся въ ро́въ, леви́тъ же со свяще́нникомъ ви́дѣвше мя́, претеко́ша. Ты́ же, Христе́, поми́ловалъ еси́ мя́, и ору́жіемъ Креста́ грѣхо́вное рукописа́ніе растерза́въ, безстра́стіемъ уясни́лъ еси́ и Отцу́ сосѣда́теля сотвори́лъ еси́. Тѣ́мже зову́ Тебѣ́: Непостижи́ме Го́споди, сла́ва Тебѣ́!

Ина стихи́ра, гла́съ 8, еди́ножды:

Изъ Іерусали́ма снидо́хъ, поползну́вся отъ напи́санныхъ въ не́мъ язы́комъ за́повѣдей Твои́хъ; во Іерихо́нъ же иды́й подража́тельнымъ стремле́ніемъ, въ не́мъ дре́вле ра́ди зло́бы отъ Тебе́, ко убíйству изда́вшихся лю́демъ Твои́мъ преслуша́ніемъ, душетлѣ́ннымъ прилучи́хся страсте́мъ, я́коже разбо́йникомъ. Отъ ни́хъ уя́звена и́сполу умерщвле́нна, гвоздьми́ и копіе́мъ пло́тію Уязви́выйся во́лею грѣха́ ра́ди человѣ́ча, и о́бщее Соверши́вый Кресто́мъ спасе́ніе во Іерусали́мѣ, исцѣли́ мя́, Го́споди, и спаси́ мя́.

Му́чениченъ:

Му́ченицы Твои́, Го́споди, забы́вше су́щая въ житіи́, неради́вше и о му́кахъ бу́дущія ра́ди жи́зни, сея́ наслѣ́дницы яви́шася, тѣ́мже и со а́нгелы ра́дуются. Тѣ́хъ моли́твами да́руй лю́демъ Твои́мъ ве́лію ми́лость.

Сла́ва, и ны́нѣ, крестобогоро́диченъ:

Го́споди, егда́ Тя́ со́лнце ви́дѣ на Дре́вѣ ви́сима, Со́лнца Пра́вды, лучи́ сокры́, и луна́ свѣ́тъ во тму́ преложи́, Всенепоро́чная же Ма́ти Твоя́ утро́бою уязвля́шеся.


ВЪ СРЕДУ 5-Я СЕДМИЦЫ, НА УТРЕНИ,
Тро́ичны. Та́же каѳи́смы 20-я, 1-я, 2-я.

По 1-мъ стихосло́віи сѣда́льны кре́стныя осмогла́сника два́ съ крестобогоро́дичнымъ.

По 2-мъ же стихосло́віи настоя́щій сѣда́ленъ господи́на Іо́сифа, гла́съ 8. Подо́бенъ: Повелѣ́нное та́йно.

Дре́ва вкуси́въ Ада́мъ не въ лѣ́поту, невоздержа́нія го́рцѣ плоды́ объя́тъ; возне́сжеся на Дре́во, сего́ изба́вилъ еси́, Ще́дре, осужде́нія лю́таго. Тѣ́мже Ти́ вопіе́мъ: да́ждь на́мъ воздержа́тися, Влады́ко, отъ плода́ тлетво́рнаго и твори́ти во́лю Твою́, я́ко да обря́щемъ ми́лость. [Два́жды.]

[Сла́ва, и ны́нѣ,] крестобогоро́диченъ:

Отъ крове́й Твои́хъ чи́стыхъ Воплоще́нна и па́че смы́сла отъ Тебе́, Чи́стая, Рожде́нна, на Дре́вѣ ви́сима посредѣ́ злодѣ́ю ви́дящи, утро́бами болѣ́зновала еси́ и, ма́терски рыда́ющи, вопія́ла еси́: увы́ Мнѣ́, Ча́до Мое́! ко́е Боже́ственное и неизрече́нное смотре́ніе Твое́, и́мже оживи́лъ еси́ созда́ніе Твое́? Воспѣва́ю благоутро́біе Твое́!

По 3-мъ стихосло́віи сѣда́ленъ господи́на Ѳео́дора, гла́съ 2. Подо́бенъ: Пречи́стому Твоему́ Образу.

Дре́во Всесвято́е, Кре́стное воспѣва́юще, кра́йнѣй бла́гости Твое́й покланя́емся при́сно, Христе́ Бо́же: на се́мъ бо упраздни́лъ еси́ си́лы вра́жія и да́лъ еси́ зна́меніе вѣ́рующимъ въ Тя́. Тѣ́мже благода́рно вопіе́мъ Ти́: всѣ́хъ сподо́би благоду́шно ми́рно живу́щихъ испо́лнити по́стное вре́мя. [Два́жды.]

[Сла́ва, и ны́нѣ,] крестобогоро́диченъ:

Непоро́чнаго Па́стыря Тя́ зря́щи Агница, на Дре́во воздви́жена, рыда́ющи ма́терски, вопія́ше: Сы́не, на сме́рть Тя́ осуди́ша неблагода́рніи лю́діе, за е́же о́блакъ просте́рлъ еси́ въ прехожде́ніе и́хъ. Увы́ Мнѣ́, безча́дствуюся безму́жная! Но воста́ни и возсія́й, Со́лнце, и просла́влюся въ сынѣ́хъ земноро́дныхъ.

Кано́нъ мине́и и настоя́щій трипѣ́снецъ господи́на Іо́сифа. И стихосло́вится пѣ́снь.

Пѣ́снь 3, гла́съ 8.

Ирмо́съ: Небе́снаго кру́га [Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче].

Осуди́въ вражду́, на Крестѣ́ просте́рлъ еси́ Твои́, Правосу́де, дла́ни. Ны́нѣ же осужде́нна мя́ су́ща прегрѣше́ньми, спаси́ блу́днаго, Спа́се, огорчи́вшаго Тя́, Долготерпѣли́ваго.

Ско́тское возжелѣ́хъ страстотво́рное житіе́, Твои́хъ за́повѣдей удали́хся, Спа́се Преблагíй, стра́нными порабоще́нъ и нечи́стыми гра́жданы. Ны́нѣ же обраща́ющася пріими́ и спаси́ мя́.

Гугни́ваго я́коже дре́вле слу́ха отве́рзлъ еси́, отве́рзи души́ моея́ ушеса́ нра́вомъ оглуше́нна, и внуши́ти Твое́ спаси́тельное сло́во, Іису́се, сподо́би мя́, еди́не Человѣколю́бче.

Богоро́диченъ: Спаси́тельная врата́, къ Бо́гу мо́сте, христіа́нъ предста́тельнице, Пречи́стая Влады́чице, обстои́ма мя́ напа́стьми житія́ и обурева́ема, Отрокови́це, окорми́.

Иный, господи́на Ѳео́дора, гла́съ 2.

Ирмо́съ: Непло́дствовавшій мо́й у́мъ [плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ].

За милосе́рдіе щедро́тъ возше́дъ на Кре́стъ, извле́клъ еси́ мя́ изъ ро́ва страсте́й и возне́слъ еси́, Христе́, въ небе́сная.

Просте́ръ на Крестѣ́ дла́ни Твои́, Христе́, язы́ки вся́ удале́нныя отъ Тебе́ объя́лъ еси́ бли́зъ ста́ти держа́вы Твоея́.

[Сла́ва,] тро́иченъ: Тріѵпоста́сная Еди́нице, Пресу́щная Тро́ице, Божество́ еди́но, Отче и Сы́не и Ду́ше Пра́вый, спаси́ чту́щія Тя́.

[И ны́нѣ,] богоро́диченъ: Кто́ хвали́ти Тя́ отъ земны́хъ по достоя́нію возмо́жетъ, Ма́ти Дѣ́во? Ты́ бо въ жена́хъ еди́на яви́лася еси́ Избра́нная и Всеблаже́нная.

Сла́ва Тебѣ́, Бо́же на́шъ, сла́ва Тебѣ́.

Возне́слся еси́ на Крестѣ́, прободе́нъ бы́лъ еси́ въ ре́бра, же́лчи вкуси́лъ еси́ мене́ ра́ди, Іису́се, отъ преступле́нія огорчи́вшаго Тя́.

Ирмо́съ: Непло́дствовавшій мо́й у́мъ плодоно́сенъ, Бо́же, покажи́ ми, Дѣ́лателю до́брыхъ, Насади́телю благи́хъ, благоутро́біемъ Твои́мъ.

Пѣ́снь 8.

Ирмо́съ: Седмери́цею пе́щь [халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки].

Неусы́пнымъ о́комъ воззрѣ́въ на мя́, уще́дри, уны́нія дрема́ніемъ одержи́ма и сну́ рабо́тающа, сла́стнымъ на одрѣ́ страсте́мъ, на Крестѣ́ главу́ Твою́ преклони́вый, и во́лею усну́вый, и тму́ разори́вый, Христе́, грѣха́, Свѣ́тъ сы́й пра́вды.

Богатотво́рными дарова́ніи украси́вся отъ креще́нія, па́че нищету́ злы́хъ возлюби́хъ, и чу́ждь бы́хъ добродѣ́телей окая́нный а́зъ, въ страну́ дале́че отше́дъ зло́бы. Тѣ́мже обрати́въ, пріими́ мя́, Спа́се, Твои́мъ Кресто́мъ огражда́я во вся́ вѣ́ки.

Пія́нство страсте́й отри́ни и сле́зъ взыщи́, чисти́тельное поще́ніемъ, душе́, вино́ се́рдце веселя́щее, и сла́сти увяда́ющее, и плотскíя пе́щи испепеля́ющее, и потщи́ся Пригвозди́вшемуся тебе́ ра́ди на Дре́вѣ Христу́ сраспя́тися и жи́ти во вѣ́ки.

Богоро́диченъ: Богороди́тельнице Всечи́стая, души́ моея́ я́звы и грѣхо́вная гное́нія очи́сти, исто́чники омыва́ющи отъ ре́бръ Рождества́ Твоего́ и отъ ни́хъ очища́ющи струя́ми, къ Тебѣ́ бо взыва́ю, и къ Тебѣ́ прибѣга́ю, и Тя́ призыва́ю, Благода́тную.

Иный.

Ирмо́съ: Гла́сы а́нгельскими [на небесѣ́хъ сла́вимаго Бо́га восхва́лимъ, глаго́люще, земноро́дніи, во вся́ вѣ́ки].

Распе́ншагося пло́тски и Божество́мъ не пострада́вша Іису́са пою́тъ а́нгели, и мы́, земноро́дніи, во вся́ вѣ́ки.

Въ распя́тіи Твое́мъ, Христе́, поно́сную сме́рть пріе́мъ прокля́тую, спа́слъ ны́ еси́, отъ тли́ изба́вивый.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Херуви́мски Тя́, о Тро́ице, — Свя́тъ, Свя́тъ Свя́тъ, — пою́ Еди́но Божество́, безнача́льное, про́стое и всѣ́ми непостижи́мое.

[И ны́нѣ,] богоро́диченъ: Похвала́ми Тя́, Чи́стая, свѣ́тло почита́ютъ вси́ ро́ди, Зижди́теля бо родила́ еси́. О, чу́до стра́шное и дѣ́ло всеблаже́нное!

Сла́ва Тебѣ́, Бо́же на́шъ, сла́ва Тебѣ́.

Вся́ претерпѣ́лъ еси́ пострада́ти о еди́номъ, е́же спасти́ся мнѣ́, Христе́. Пою́ Твое́ распя́тіе, гво́здія и заколе́ніе во вся́ вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Гла́сы а́нгельскими на небесѣ́хъ сла́вимаго Бо́га восхва́лимъ, глаго́люще, земноро́дніи, во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, [и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ].

Зря́ Тя́ просте́рта на Крестѣ́, зари́ сокрыва́ше со́лнце, вся́ же земля́ тре́петомъ колеба́шеся, Всецарю́, во́лею ви́дящи стра́ждуща, естество́мъ Тя́ безстра́стна. Тѣ́мже Тя́ молю́: стра́сти души́ моея́, я́ко Вра́чь, Христе́, исцѣли́.

Пути́ спаси́тельныя оста́вивъ, во а́дъ веду́щія ше́ствовахъ, тму́ глубо́кую имѣ́я о́крестъ сла́сти, и страсте́й поползнове́нія, и бу́рю искуше́ній. Тѣ́мже Тя́ молю́: Твои́мъ Кресто́мъ спаси́ мя́, Христе́, я́ко еди́нъ Многоми́лостивъ.

Зимо́ю содержи́мь искуше́ній, и страсте́й треволне́ніи потопля́емь, и сласте́й бу́рею обурева́емь лю́тѣ, поще́нія пучи́ну достиго́хъ кро́ткую и ти́хую, въ не́йже мя́ окорми́въ Твои́мъ Кресто́мъ, Ще́дре, ко спасе́нію устреми́.

Богоро́диченъ: Зачала́ еси́, Дѣ́во, безъ сѣ́мене, вся́ческая содѣ́лавшаго Сло́ва Бо́жія, безъ хотѣ́ній плотски́хъ, безъ истлѣ́нія же родила́ еси́, безъ болѣ́зней ма́терскихъ. Тѣ́мже Тя́, Богоро́дицу, и язы́комъ, и се́рдцемъ исповѣ́дающе, велича́емъ.

Иный.

Ирмо́съ: Дѣ́вство Твое́, Богоро́дице [нескве́рная, е́же не опали́ Огнь Боже́ственный, велича́емъ].

Во́лею претерпѣ́лъ еси́ распя́тися, Спа́се на́шъ, да пода́си всѣ́мъ жи́знь, отъ сме́рти избавля́я.

Дре́вомъ умертви́хся и Кре́стнымъ Дре́вомъ ожи́хъ, на не́мже Христо́съ мо́й пригвозди́вся, врага́ моего́ умертви́.

[Сла́ва,] тро́иченъ: Яко су́щу Сы́ну съ Роди́телемъ и Ду́ху Свято́му ссу́щу, единому́дренно поклони́мся.

[И ны́нѣ,] богоро́диченъ: Чу́до пресла́вное и ужа́сное слы́шаніе! Ка́ко и, я́ко Ма́ти, ражда́еши, Чи́стая, и не позна́ла еси́, я́ко Дѣ́ва, тлѣ́нія?

Сла́ва Тебѣ́, Бо́же на́шъ, сла́ва Тебѣ́.

Пою́ копіе́ Твое́, воспѣва́ю и гво́зди Твоя́, гу́бу, тро́сть, Кре́стъ, и́миже спа́слъ мя́ еси́, Іису́се Бо́же.

Ирмо́съ: Дѣ́вство Твое́, Богоро́дице нескве́рная, е́же не опали́ Огнь Боже́ственный, велича́емъ.

Свѣти́ленъ гла́са.

На стихо́внѣ самогла́сенъ, гла́съ 3:

Высоту́ добродѣ́телей оста́вивши, душе́ моя́, во глубину́ грѣхо́вную снизшла́ еси́, въ лука́вныя разбо́йники впа́дши; стру́повъ же смердя́щихъ полна́ су́щи, лежи́ши пове́ржена недоумѣ́нна. Тѣ́мже возопíй Христу́ Бо́гу, за тя́ распе́ншемуся и ра́ны во́лею пріе́мшему: попецы́ся о мнѣ́, Го́споди, и спаси́ мя́!

Иный, гла́съ 8:

Разбо́йническими помышле́ньми уязви́вся окая́нный и е́ле жи́въ бы́хъ, Го́споди, проро́ческій же ли́къ презрѣ́, е́ле жи́ва ви́дѣвъ су́ща и хитростьми́ человѣ́ческими неисцѣ́льна. Тѣ́мже лю́тѣ боля́, во смире́ніи се́рдца зову́ Ти́, Христе́ Бо́же: изле́й, я́ко Благоутро́бенъ, на мя́ вели́кую Твою́ ми́лость!

Му́чениченъ:

Му́ченицы Христо́вы непобѣди́міи, побѣди́вше пре́лесть си́лою Кре́стною, воспрія́сте благода́ть вѣ́чныя жи́зни, мучи́телей преще́нія не убоя́стеся, му́ками ураня́еми веселите́ся, и ны́нѣ кро́ви ва́ша бы́ша исцѣле́нія ду́шъ на́шихъ. Моли́те спасти́ся душа́мъ на́шимъ.

Сла́ва, и ны́нѣ, крестобогоро́диченъ:

Всечи́стая, я́ко ви́дѣ Тя́ пло́тію ви́сима на Дре́вѣ, се́рдцемъ уязвля́шеся и восклица́ше слезя́щи, Сло́ве: гдѣ́ заше́лъ еси́, Вселюбе́знѣйшій Іису́се Мо́й, Сы́не Мо́й и Го́споди? Не оста́ви Мя́ еди́ну, Христе́, ро́ждшую Тя́!

На 1-мъ часѣ́ каѳи́сма 3-я, на 3-мъ часѣ́ — 4-я, на 6-мъ часѣ́ — 5-я.


НА 6-МЪ ЧАСѢ,
Тропа́рь проро́чества, гла́съ 1:

Болѣ́зньми святы́хъ, и́миже о Тебѣ́ пострада́ша, умоле́нъ бу́ди, Го́споди, и вся́ на́ша болѣ́зни исцѣли́, Человѣколю́бче, мо́лимся.

Проки́менъ, псало́мъ 91-й, гла́съ 4. Бла́го е́сть исповѣ́датися Го́сподеви* и пѣ́ти и́мени Твоему́, Вы́шній. Сти́хъ: Возвѣща́ти зау́тра ми́лость Твою́ и и́стину Твою́ на вся́ку но́щь.

Проро́чества Иса́іина чте́ніе. [Глава́ 41.]

Та́ко глаго́летъ Госпо́дь: Азъ Бо́гъ пе́рвый и въ гряду́щая Азъ е́смь. Ви́дѣша язы́цы и убоя́шася, концы́ земнíи прибли́жишася и пріидо́ша вку́пѣ. Судя́й кíйждо бли́жнему и бра́ту помощи́, и рече́тъ: превозмо́же му́жъ древодѣ́латель и кова́чь, бія́й мла́томъ, вку́пѣ прокова́яй, овогда́ у́бо рече́тъ: «спая́ніе добро́ е́сть», утверди́ша я́ гвоздьми́, положа́тъ я́, и не подви́гнутся. Ты́ же, Изра́илю, ра́бе Мо́й, Іа́кове, его́же избра́хъ, сѣ́мя Авраа́мле, его́же возлюби́хъ, его́же поя́хъ отъ коне́цъ земли́, и отъ стра́жбъ ея́ призва́хъ тя́, и реко́хъ ти́: ра́бъ Мо́й еси́, избра́хъ тя́ и не оста́вихъ тебе́. Не бо́йся, съ тобо́ю бо е́смь, не прельща́ю, Азъ бо е́смь Бо́гъ тво́й, укрѣпи́вый тя́, и помого́хъ ти́, и утверди́хъ тя́ десни́цею Мое́ю пра́ведною. Се́ постыдя́тся и посра́мятся вси́ сопротивля́ющіися тебѣ́, бу́дутъ бо я́ко не су́щіи, и поги́бнутъ вси́ сопе́рницы твои́. Взы́щеши и́хъ и не обря́щеши человѣ́ковъ, и́же поруга́ются тебѣ́, бу́дутъ бо а́ки не бы́вшіи, и не бу́дутъ ра́тующіи тебѣ́. Яко Азъ — Бо́гъ тво́й, держа́й десни́цу твою́, глаго́ляй тебѣ́: не бо́йся, Іа́кове, ма́лый Изра́илю, Азъ помого́хъ ти́, глаго́летъ Бо́гъ тво́й, избавля́яй тя́ Святы́й Изра́илевъ.

Проки́менъ, псало́мъ 92-й, гла́съ 6: Госпо́дь воцари́ся,* въ лѣ́поту облече́ся. Сти́хъ: Облече́ся Госпо́дь въ си́лу и препоя́сася.

На 9-мъ часѣ́ каѳи́сма 6-я.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 245 – 250.

Служба во вторникъ 5-й недѣли поста // Къ оглавленію Постной Тріоди // Служба въ четвертокъ 5-й недѣли поста


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.