Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 16.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СУББОТУ ПЯТЫЯ СЕДМИЦЫ ВЕЛИКАГО ПОСТА (СУББОТУ АКАѲИСТА).

ВЪ ПЯТОКЪ ВЕЧЕРА,
Стихосло́вимъ каѳи́сму 18-ю. По обы́чномъ же стихосло́віи, на Го́споди воззва́хъ.., поста́вимъ стихо́въ 10 и пое́мъ самогла́сенъ, гла́съ 6, два́жды:

Яко отъ Іерусали́ма Твои́хъ Боже́ственныхъ за́повѣдей исходя́, и къ страсте́мъ Іерихо́нскимъ дости́гъ, сла́вою безче́стія жите́йскихъ попече́ній привлече́нъ, въ разбо́йническія впадо́хъ по́мыслы, сыноположе́нія благода́ти ри́зы отъ ни́хъ совлеко́хся и ра́нами, я́ко безду́шенъ, лежу́. Свяще́нникъ же, прише́дъ, я́зву ви́дѣвъ, не вня́тъ, и леви́тъ, и то́й, возгнуша́вся, ми́мо и́де. Ты́ же, Го́споди, отъ Дѣ́вы неизрече́нно вопло́щся, излія́ніемъ отъ спаси́тельнаго ребра́ Твоего́, во́льнѣ излія́вшіяся кро́ве и воды́, я́коже еле́й иска́павъ, Христе́ Бо́же, стру́пы я́звъ мои́хъ мя́гкостію стягни́ и къ небе́сному совокупи́ ли́ку, я́ко Милосе́рдъ.

Му́чениченъ: Му́ченицы Твои́, Го́споди, не отверго́шася Тебе́, ни отступи́ша отъ за́повѣдей Твои́хъ, тѣ́хъ моли́твами поми́луй на́съ.

Та́же пое́мъ стихи́ры подо́бны Пресвяты́я Богоро́дицы 3, творя́ще я 7, гла́съ 6. Подо́бенъ: Всю́ отло́жше.

Совѣ́тъ превѣ́чный открыва́я Тебѣ́, Отрокови́це, Гавріи́лъ предста́, Тебе́ лобза́я и вѣща́я: ра́дуйся, земле́ ненасѣ́янная; ра́дуйся, купино́ неопали́мая; ра́дуйся, глубино́ неудобозри́мая; ра́дуйся, мо́сте, къ небесе́мъ преводя́й, и лѣ́ствице высо́/л. 278 об./кая, ю́же Іа́ковъ ви́дѣ; ра́дуйся, боже́ственная ру́чко ма́нны; ра́дуйся, разрѣше́ніе кля́твы; ра́дуйся, Ада́мово воззва́ніе: съ Тобо́ю Госпо́дь.

Явля́ешимися я́ко человѣ́къ, — глаго́летъ нетлѣ́нная Отрокови́ца ко архистрати́гу, — и ка́ко вѣща́еши глаго́лы па́че человѣ́ка? Со Мно́ю бо, ре́клъ еси́, Бо́гу бы́ти, и всели́тися во утро́бу Мою́. И ка́ко бу́ду, глаго́ли Ми́, село́ простра́нное и мѣ́сто свяще́нія, херуви́мы превосходя́щаго? Да не прельсти́ши мене́ ле́стію, не позна́хъ бо сла́сти, бра́ку е́смь неприча́стна, ка́ко у́бо Отроча́ рожду́?

Бо́гъ, идѣ́же хо́щетъ, побѣжда́ется естества́ чи́нъ, — глаго́летъ безпло́тный, — и я́же па́че человѣ́ка содѣва́ются, мои́мъ вѣ́руй и́стиннымъ глаго́ломъ, Всесвята́я Пренепоро́чная. — Она́ же возопи́: бу́ди Мнѣ́ ны́нѣ по глаго́лу твоему́, и рожду́ Безпло́тнаго, пло́ть отъ Мене́ заи́мствовавшаго, я́ко да возведе́тъ человѣ́ка, я́ко еди́нъ Си́ленъ, въ пе́рвое достоя́ніе, съ растворе́ніемъ.

Сла́ва, и ны́нѣ, гла́съ 2:

Еже отъ вѣ́ка та́инство открыва́ется дне́сь, и Сы́нъ Бо́жій Сы́нъ человѣ́чь быва́етъ: да ху́ждшее воспріи́мъ, пода́стъ ми́ лу́чшее. Солга́ся дре́вле Ада́мъ, и Бо́гъ возжелѣ́въ (бы́ти), не бы́сть: Человѣ́къ быва́етъ Бо́гъ, да бо́га Ада́ма содѣ́лаетъ. Да весели́тся тва́рь, да ликовству́етъ естество́, я́ко арха́нгелъ Дѣ́вѣ со стра́хомъ предстои́тъ, и е́же, ра́дуйся, прино́ситъ, печа́ли сопроти́вное. За милосе́рдіе ми́лости вочеловѣ́чивыйся, Бо́же на́шъ, сла́ва Тебѣ́.

Аще ли не соверша́ется послѣ́дованіе Преждесвяще́нныхъ, пое́мъ стихи́ры Богоро́дицы на 8. На стихо́внѣ самогла́сенъ дне́, два́жды, и му́чениченъ. Сла́ва, и ны́нѣ: Язы́ка, его́же не вѣ́дяше... Пи́санъ на хвали́техъ въ суббо́ту.

Вхо́дъ. Свѣ́те ти́хій...

Проки́менъ, псало́мъ 102-й, гла́съ 4: Ще́дръ и ми́лостивъ Госпо́дь,* долготерпѣли́въ и многоми́лостивъ. Сти́хъ: Благослови́, душе́ моя́, Го́спода и, вся́ вну́тренняя моя́, и́мя свято́е Его́.

/л. 279/

Бытія́ чте́ніе. [Глава́ 22.]

Бы́сть по глаго́лѣхъ си́хъ: Бо́гъ искуша́ше Авраа́ма и рече́ ему́: Авраа́ме, Авраа́ме! И рече́: се́ а́зъ! И рече́: пойми́ сы́на твоего́ возлю́бленнаго, его́же возлюби́лъ еси́, Исаа́ка, и иди́ на зе́млю высо́ку, и вознеси́ его́ та́мо во всесожже́ніе, на еди́ну отъ го́ръ, и́хже ти́ реку́. Воста́въ же Авраа́мъ у́тро, осѣдла́ осля́ свое́, поя́тъ же съ собо́ю два́ о́трочища и Исаа́ка, сы́на своего́, и растни́въ дрова́ во всесожже́ніе, воста́въ, и́де и пріи́де на мѣ́сто, е́же рече́ ему́ Бо́гъ, въ тре́тій де́нь. И воззрѣ́въ Авраа́мъ очи́ма свои́ма, ви́дѣ мѣ́сто издале́че. И рече́ Авраа́мъ отроко́мъ свои́мъ: ся́дите здѣ́ со осля́темъ, а́зъ же и дѣ́тищъ по́йдемъ до о́ндѣ и, поклони́вшеся, возврати́мся къ ва́мъ. Взя́ же Авраа́мъ дрова́ всесожже́нія и возложи́ на Исаа́ка, сы́на своего́, взя́ же въ ру́ки и о́гнь и но́жъ, и идо́ста о́ба вку́пѣ. Рече́ же Исаа́къ ко Авраа́му, отцу́ своему́: о́тче! Онъ же рече́: что́ е́сть, ча́до? Рече́ же: се́ о́гнь и дрова́, гдѣ́ е́сть овча́, е́же во всесожже́ніе? Рече́ же Авраа́мъ: Бо́гъ у́зритъ Себѣ́ овча́ во всесожже́ніе, ча́до. Ше́дше же о́ба вку́пѣ. Пріидо́ста на мѣ́сто, е́же рече́ ему́ Бо́гъ. И созда́ та́мо Авраа́мъ же́ртвенникъ, и возложи́ дрова́, и связа́въ Исаа́ка, сы́на своего́, возложи́ его́ на же́ртвенникъ верху́ дро́въ. И простре́ Авраа́мъ ру́ку свою́, взя́ти но́жъ закла́ти сы́на своего́. И воззва́ и́ а́нгелъ Госпо́день съ небесе́ и рече́: Авраа́ме, Авраа́ме! Онъ же рече́: се́ а́зъ! И рече́: да не возложи́ши руки́ твоея́ на о́трочища, ниже́ да сотвори́ши ему́ что́: ны́нѣ бо позна́хъ, я́ко бои́шися ты́ Бо́га и не пощадѣ́лъ еси́ сы́на твоего́ возлю́бленнаго Мене́ ра́ди. И воззрѣ́въ Авраа́мъ очи́ма свои́ма ви́дѣ: и се́ ове́нъ еди́нъ, /л. 279 об./ держи́мый рога́ма въ са́дѣ Саве́къ; и и́де Авраа́мъ, и взя́ овна́, и вознесе́ его́ во всесожже́ніе вмѣ́сто Исаа́ка, сы́на своего́. И нарече́ Авраа́мъ и́мя мѣ́сту тому́: Госпо́дь ви́дѣ; да реку́тъ дне́сь: на горѣ́ Госпо́дь яви́ся. И воззва́ а́нгелъ Госпо́день Авраа́ма втори́цею съ небесе́, глаго́ля: Мно́ю Самѣ́мъ кля́хся, глаго́летъ Госпо́дь, его́же ра́ди сотвори́лъ еси́ глаго́лъ се́й и не пощадѣ́лъ еси́ сы́на твоего́ возлю́бленнаго Мене́ ра́ди. Вои́стинну, благословя́, благословлю́ тя́ и, умножа́я, умно́жу сѣ́мя твое́, я́ко звѣ́зды небе́сныя и я́ко песо́къ вскра́й мо́ря, и наслѣ́дитъ сѣ́мя твое́ гра́ды супоста́товъ. И благословя́тся о сѣ́мени твое́мъ вси́ язы́цы земнíи, зане́же послу́шалъ еси́ гла́са Моего́.

Проки́менъ, псало́мъ 103-й, гла́съ 4: Яко возвели́чишася дѣла́ Твоя́, Го́споди,* вся́ прему́дростію сотвори́лъ еси́. Сти́хъ: Благослови́, душе́ моя́, Го́спода. Го́споди Бо́же мо́й, возвели́чился еси́ зѣло́.

При́тчей чте́ніе. [Главы́ 17 и 18.]

Бра́тія въ ну́ждахъ поле́зни да бу́дутъ, сего́ бо ра́ди ражда́ются. Му́жъ безу́менъ пле́щетъ и ра́дуется себѣ́, я́коже поруча́яйся испору́читъ дру́га своего́, на свои́хъ же устна́хъ о́гнь сокро́виществуетъ. Грѣхолю́бецъ ра́дуется сва́ромъ, а жестокосе́рдый не усря́щетъ благи́хъ. Му́жъ удобопрело́жный язы́комъ впаде́тъ въ зла́я, се́рдце же безу́мнаго — болѣ́знь стяжа́вшему е́. Не весели́тся оте́цъ о сы́нѣ ненака́заннѣмъ, сы́нъ же му́дръ весели́тъ ма́терь свою́. Се́рдце веселя́щееся благоимѣ́тися твори́тъ, му́жу же печа́льну засы́шутъ ко́сти. Пріе́млющему да́ры непра́ведно въ нѣ́дра не предуспѣва́ютъ путіе́, нечести́вый же уклоня́етъ пути́ пра́вды. Лице́ разу́мно /л. 280/ му́жа прему́дра, о́чи же безу́мнаго на конца́хъ земли́. Гнѣ́въ отцу́ — сы́нъ безу́менъ и болѣ́знь ро́ждшей его́. Тщеты́ твори́ти му́жу пра́ведну не добро́, ниже́ преподо́бно навѣ́товати власте́мъ пра́веднымъ. Иже щади́тъ глаго́лъ произнести́ же́стокъ — разу́менъ; долготерпѣли́вый же му́жъ — прему́дръ, лу́чше и́щущаго нау́ки. Несмы́сленному вопроси́вшу о му́дрости, му́дрость вмѣни́тся, нѣ́ма же кто́ себе́ твори́тъ, возмни́тся разу́менъ бы́ти. Вины́ и́щетъ му́жъ, хотя́ отлучи́тися отъ друго́въ, на вся́кое же вре́мя поноси́мь бу́детъ. Не тре́буетъ прему́дрости му́жъ скудоу́менъ, зане́ па́че во́дится безу́міемъ. Егда́ пріи́детъ нечести́вый во глубину́ зо́лъ, неради́тъ, нахо́дитъ же ему́ безче́стіе и поноше́ніе. Вода́ глубока́ — сло́во въ се́рдцѣ му́жа, рѣка́ же изска́чущая и исто́чникъ жи́зни. Чуди́тися лицу́ нечести́ваго не добро́, ниже́ преподо́бно уклоня́ти пра́ведное на судѣ́.

И про́чее послѣ́дованіе Преждесвяще́нныхъ.

На трапе́зѣ піе́мъ вино́, труда́ ра́ди бдѣ́ннаго, хотя́щаго бы́ти. Повече́ріе же ма́лое и полу́нощницу, пое́мъ въ ке́лліяхъ. Кано́нъ ме́ртвенъ гла́са пое́мъ во гробни́цѣ.


/л. 280 об./

ВЪ СУББОТУ ПЯТЫЯ СЕДМИЦЫ, НА УТРЕНИ,

Зна́менаетъ въ ча́съ 4-й но́щи, моле́бнаго ра́ди послѣ́дованія ака́ѳиста. И собра́вшеся въ це́рковь, благослови́вшу іере́ю, начина́емъ у́треню, я́коже предписа́ся нача́ло у́трени въ четверто́къ Вели́каго кано́на. [Ли́стъ 254].

По шестопса́лміи: Бо́гъ Госпо́дь.., во гла́съ 8, и пое́мъ три́жды тропа́рь ко́сно, гла́съ 8:

Повелѣ́нное та́йно, пріе́мъ въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́, вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ пріе́мша ра́бій зра́къ, ужаса́юся зва́ти Тебѣ́: ра́дуйся Невѣ́сто неневѣ́стная.

Та́же стихосло́вимъ каѳи́сму псалти́ра 16: Рече́ Госпо́дь Го́сподеви моему́... И по исполне́ніи сея́, ектенія́ ма́лая, и пое́мъ конда́къ на средѣ́, со сладкопѣ́ніемъ, ко́сно.

Гла́съ 8:

Взбра́нной Воево́дѣ побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная.

/л. 281На не́мже кади́тъ діа́конъ святы́я ико́ны и бра́тію, по чи́ну. На про́чихъ же, то́чію настоя́теля и ли́ки. И чте́мъ и́косовъ и кондако́въ 6. Стои́мъ на чте́ніи. Тíи же и́косы су́ть по алфави́ту, сíесть 24, и глаго́лются отъ іере́я во свято́мъ олтарѣ́.

Икосъ 1.

[Α] Ангелъ предста́тель съ небесе́ по́сланъ бы́сть рещи́ Богоро́дицѣ: радуйся! И, со безпло́тнымъ гла́сомъ, воплоща́ема Тя́ зря́, Го́споди, ужаса́шеся и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Ада́ма воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная.

Конда́къ 2.

[Β] Ви́дящи Свята́я Себе́ въ чистотѣ́, глаго́летъ Гавріи́лу де́рзостно: пресла́вное твоего́ гла́са, неудобопрія́тельно души́ Мое́й явля́ется; безсѣ́меннаго бо зача́тія рождество́ ка́ко глаго́леши, зовы́й: Аллилу́ія.

Икосъ 2.

[Γ] Ра́зумъ недоразумѣва́емый разумѣ́ти Дѣ́ва и́щущи, возопи́ къ служа́щему: изъ боку́ чи́сту, Сы́ну ка́ко е́сть роди́тися мо́щно, рцы́ Ми? — Къ Не́йже о́нъ рече́ со стра́хомъ, оба́че зовы́й си́це: Ра́дуйся, совѣ́та неизрѣче́ннаго таи́бнице; ра́дуйся, молча́нія прося́щихъ вѣ́ро. Ра́дуйся, чуде́съ Христо́выхъ нача́ло; ра́дуйся, велѣ́ній Его́ глави́зно. Ра́дуйся лѣ́ствице небе́сная, е́юже сни́де Бо́гъ; ра́дуйся, мо́сте, преводя́й су́щихъ отъ земли́ на не́бо. Ра́дуйся, а́нгеловъ многосло/л. 281 об./ву́щее чу́до; ра́дуйся, бѣсо́въ многоплаче́вный стру́пе. Ра́дуйся, Свѣ́тъ неизрѣче́нно роди́вшая; ра́дуйся, е́же ка́ко, ни еди́наго же научи́вшая. Ра́дуйся, прему́дрыхъ превосходя́щая ра́зумъ; ра́дуйся, вѣ́рныхъ озаря́ющая смы́слы. Ра́дуйся, Невѣ́сто неневѣ́стная.

Конда́къ 3.

[Δ] Си́ла Вы́шняго осѣни́ тогда́ къ зача́тію Браконеиску́сную, и благопло́дная Тоя́ ложесна́, я́ко село́ показа́ сла́дкое, всѣ́мъ хотя́щимъ жа́ти спасе́ніе, внегда́ пѣ́ти си́це: Аллилу́ія.

Икосъ 3.

[Ε] Иму́щи богопрія́тную Дѣ́ва утро́бу, востече́ ко Елисаве́ти; младе́нецъ же о́ноя а́біе позна́въ сея́ цѣлова́ніе, ра́довашеся, и игра́ньми я́ко пѣ́сньми вопія́ше къ Богоро́дицѣ: Ра́дуйся, о́трасли неувяда́емыя розго́; ра́дуйся, плода́ безсме́ртнаго стяжа́ніе. Ра́дуйся, дѣ́лателя дѣ́лающая Человѣколю́бца; ра́дуйся, Сади́теля жи́зни на́шея ро́ждшая. Ра́дуйся, ни́во, растя́щая гобзова́ніе щедро́тъ; ра́дуйся, трапе́зо, нося́щая оби́ліе очище́ній. Ра́дуйся, я́ко ра́й пи́щный процвѣта́еши; ра́дуйся, я́ко приста́нище душа́мъ гото́виши. Ра́дуйся, прія́тное моли́твы кади́ло; ра́дуйся, всего́ мíра очище́ніе. Ра́дуйся, Бо́жіе ко сме́ртнымъ благоволе́ніе; ра́дуйся, сме́ртныхъ къ Бо́гу дерзнове́ніе. Ра́дуйся, Невѣ́сто неневѣ́стная.

Конда́къ 4.

[Ζ] Бу́рю вну́трь имѣ́я помышле́ній сумни́тельныхъ, цѣлому́дренный Іо́сифъ смяте́ся, къ Тебѣ́ зря́ небра́чнѣй, и бракоокра́дованную помышля́я, Непоро́чная; увѣ́дѣвъ же Твое́ зача́тіе отъ Ду́ха Свя́та, рече́: Аллилу́ія.

И па́ки конда́къ:

Взбра́нной Воево́дѣ [побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная].

Чте́мъ отъ сло́ва ака́ѳиста, на дая́нія два́. Та́же стихосло́вимъ непоро́чны. И ектенія́. И па́ки глаго́лемъ конда́къ: Взбра́нной Воево́дѣ... И другíя и́косы и кондаки́ 6:

/л. 282/

Икосъ 4.

[Η] Слы́шаша па́стыріе а́нгеловъ пою́щихъ плотско́е Христо́во прише́ствіе, и те́кше я́ко къ Па́стырю, ви́дятъ Сего́, я́ко а́гнца непоро́чна, во чре́вѣ Марíинѣ упа́сшася, Юже пою́ще, рѣ́ша: Ра́дуйся, Агнца и Па́стыря Ма́ти; ра́дуйся, дво́ре слове́сныхъ ове́цъ. Ра́дуйся, неви́димыхъ враго́въ муче́ніе; ра́дуйся, ра́йскихъ две́рей отверзе́ніе. Ра́дуйся, я́ко небе́сная сра́дуются земны́мъ; ра́дуйся, я́ко земна́я сликовству́ютъ небе́снымъ. Ра́дуйся, апо́столовъ немо́лчная уста́; ра́дуйся, страстоте́рпцевъ непобѣди́мая де́рзосте. Ра́дуйся, тве́рдое вѣ́ры утвержде́ніе; ра́дуйся, свѣ́тлое благода́ти позна́ніе. Ра́дуйся, Еюже обнажи́ся а́дъ; ра́дуйся, Еюже облеко́хомся сла́вою. Ра́дуйся, Невѣ́сто неневѣ́стная.

Конда́къ 5.

[Θ] Боготе́чную звѣзду́ узрѣ́вше волсви́, тоя́ послѣ́доваша зари́, и я́ко свѣти́льникъ держа́ще ю́, то́ю испыта́ху крѣ́пкаго Царя́ и дости́гше Непостижи́маго, возра́довашася, Ему́ вопію́ще: Аллилу́ія.

Икосъ 5.

[Ι] Ви́дѣша о́троцы халде́йстіи на руку́ Дѣви́чу, созда́вшаго рука́ма человѣ́ки, и Влады́ку разумѣва́юще Его́, а́ще и ра́бій прія́тъ зра́къ, потща́шася дарми́ послужи́ти Ему́, и возопи́ти Благослове́ннѣй: Ра́дуйся, звѣзды́ незаходи́мыя Ма́ти; ра́дуйся, заре́ та́инственнаго дне́. Ра́дуйся, пре́лести пе́щь угаси́вшая; ра́дуйся, Тро́ицы таи́нники просвѣща́ющая. Ра́дуйся, мучи́теля безчеловѣ́чнаго измета́ющая отъ нача́льства; ра́дуйся, Го́спода Человѣколю́бца показа́вшая Христа́. Ра́дуйся, ва́рварскаго избавля́ющая служе́нія; ра́дуйся, тимѣ́нія изъима́ющая дѣ́лъ. Ра́дуйся, огня́ поклоне́ніе угаси́вшая; ра́/л. 282 об./дуйся, пла́мене страсте́й измѣня́ющая. Ра́дуйся, вѣ́рныхъ наста́внице цѣлому́дрія; ра́дуйся, всѣ́хъ родо́въ весе́ліе. Ра́дуйся, Невѣ́сто неневѣ́стная.

Конда́къ 6.

[Κ] Проповѣ́дницы богоно́сніи бы́вше волсви́, возврати́шася въ Вавило́нъ, сконча́вше Твое́ проро́чество, и проповѣ́давше Тя́ Христа́ всѣ́мъ, оста́виша Ирода я́ко бляди́ва [лжи́ва], не вѣ́дуща пѣ́ти: Аллилу́ія.

Икосъ 6.

[Λ] Возсія́вый во Еги́птѣ просвѣще́ніе и́стины, отгна́лъ еси́ лжи́ тму́: и́доли бо его́, Спа́се, не терпя́ще Твоея́ крѣ́пости, падо́ша. Си́хъ же изба́вльшіися вопія́ху къ Богоро́дицѣ: Ра́дуйся, исправле́ніе человѣ́ковъ; ра́дуйся, низпаде́ніе бѣсо́въ. Ра́дуйся, пре́лести держа́ву попра́вшая; ра́дуйся, и́дольскую ле́сть обличи́вшая. Ра́дуйся, мо́ре, потопи́вшее фарао́на мы́сленнаго; ра́дуйся, ка́меню, напои́вшій жа́ждущія жи́зни. Ра́дуйся, о́гненный сто́лпе, наставля́яй су́щія во тмѣ́; ра́дуйся, покро́ве мíру, ши́ршій о́блака. Ра́дуйся, пи́ще, ма́нны пріе́мнице; ра́дуйся, сла́дости святы́я служи́тельнице. Ра́дуйся, земле́ обѣтова́нія; ра́дуйся, изъ нея́же тече́тъ ме́дъ и млеко́. Ра́дуйся, Невѣ́сто неневѣ́стная.

Конда́къ 7.

[Μ] Хотя́щу Симео́ну отъ ны́нѣшняго вѣ́ка преста́витися преле́стнаго, вда́лся еси́ я́ко младе́нецъ тому́, но позна́лся еси́ ему́ и Бо́гъ соверше́нный. Тѣ́мже, удиви́ся Твое́й неизрѣче́ннѣй прему́дрости, зовы́й: Аллилу́ія.

И па́ки конда́къ:

Взбра́нной Воево́дѣ [побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная].

Та́же чте́мъ про́чее сло́ва ака́ѳиста. Псало́мъ 50-й. И кано́ны: свята́го оби́тели, со ирмосо́мъ, на 6, и Пресвяты́я Богоро́дицы на 6.

[Кано́нъ благода́рный Пресвятѣ́й Богоро́дицѣ,] творе́ніе господи́на Іо́сифа, его́же краестро́чіе: Ра́дости прія́телище, Тебѣ́ подоба́етъ ра́доватися еди́нѣй.
[Аще ли хра́мъ /л. 283Богоро́дицы, пое́мъ кано́нъ пра́здника Богоро́дицы, со ирмосо́мъ, на 12: ирмосы́ по два́жды, тропари́ на 10.] Гла́съ 4.

Пѣ́снь 1.

Ирмо́съ: Отве́рзу уста́ моя́ [и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́].

[Χ] Христо́ву кни́гу одушевле́нную, запечатлѣ́нную Тя́ Ду́хомъ, вели́кій арха́нгелъ, Чи́стая, зря́, возглаша́ше Ти́: ра́дуйся, ра́дости прія́телище, Еюже прама́терняя кля́тва разрѣши́тся.

[Α] Ада́мово исправле́ніе, ра́дуйся, Дѣ́во Богоневѣ́сто, а́дово умерщвле́ніе; ра́дуйся, Всенепоро́чная, пала́то всѣ́хъ Царя́; ра́дуйся, престо́ле о́гненный Вседержи́теля.

[Ρ] Цвѣ́те неувяда́емый, ра́дуйся, еди́на прозя́бшая я́блоко благово́нное; ра́дуйся, ро́ждшая благоуха́ніе еди́наго Царя́; ра́дуйся, неискуобра́чная, мíрови спасе́ніе.

[Α] Чистоты́ сокро́вище, ра́дуйся, Еюже отъ паде́нія на́шего воста́хомъ; ра́дуйся, сладкоуха́нный кри́не Влады́чице, вѣ́рныхъ благоуха́яй, кади́ло благово́нное, и мѵ́ро многоцѣ́нное.

Катава́сія: Отве́рзу уста́ моя́ и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пѣ́снь 3.

Ирмо́съ: Твоя́ пѣсносло́вцы, Богоро́дице, [живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би].

[Σ] Кла́съ прозя́бшая Боже́ственный, я́ко ни́ва неора́нная я́вѣ, ра́дуйся, одушевле́нная трапе́зо, Хлѣ́бъ Живо́тный вмѣ́щшая; ра́дуйся, живо́тныя воды́ исто́чниче неистоща́емый, Влады́чице.

[Δ] Юнице Юнца́ ро́ждшая непоро́чнаго, ра́дуйся, вѣ́рнымъ; ра́дуйся, Агнице, ро́ждшая Бо́жіяго Агнца, взе́млющаго мíра всего́ прегрѣше́нія; ра́дуйся, те́плое очисти́лище.

[Ο] Утро свѣтлѣ́йшее, ра́дуйся еди́на, Со́лнца нося́щая Христа́; Свѣ́та жили́ще, ра́дуйся, тму́ разруши́вшая, и мра́чныя бѣ́сы отню́дъ отгна́вшая.

[Χ] Ра́дуйся, две́ре еди́на, Еюже Сло́во про́йде еди́но, вереи́ и врата́ а́дова, Влады́чице, Рождество́мъ Твои́мъ сокруши́вшая; ра́дуйся, Боже́ственный вхо́де спаса́емыхъ, Богоневѣ́сто.

/л. 283 об.Катава́сія: Твоя́ пѣсносло́вцы, Богоро́дице, живы́й и незави́стный исто́чниче, ли́къ себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ектенія́ ма́лая. И по возгла́сѣ, конда́къ: Взбра́нной Воево́дѣ... И чте́мъ другíя ше́сть и́косовъ и кондако́въ.

Икосъ 7.

[Ν] Но́вую показа́ тва́рь, я́влься Зижди́тель, на́мъ отъ Него́ бы́вшимъ, изъ безсѣ́менныя прозя́бъ утро́бы, и сохрани́въ ю́, я́коже бѣ́, нетлѣ́нну, да чу́до ви́дяще, воспои́мъ ю́, вопію́ще: Ра́дуйся, цвѣ́те нетлѣ́нія; ра́дуйся, вѣ́нче воздержа́нія. Ра́дуйся, воскресе́нія о́бразъ облиста́ющая; ра́дуйся, а́нгельское житіе́ явля́ющая. Ра́дуйся, дре́во свѣтлоплодови́тое, отъ него́же пита́ются вѣ́рніи; ра́дуйся, дре́во благосѣнноли́ственное, и́мже покрыва́ются мно́зи. Ра́дуйся, во чре́вѣ нося́щая Изба́вителя плѣне́ннымъ; ра́дуйся, ро́ждшая Наста́вника заблу́ждшимъ. Ра́дуйся, Судіи́ Пра́веднаго умоле́ніе; ра́дуйся, мно́гихъ согрѣше́ній проще́ніе. Ра́дуйся, оде́ждо наги́хъ дерзнове́нія; ра́дуйся, любы́ вся́ко жела́ніе побѣжда́ющая. Ра́дуйся, Невѣ́сто неневѣ́стная.

Конда́къ 8.

[Ξ] Стра́нное рождество́ ви́дѣвше, устрани́мся мíра, у́мъ на небеса́ прело́жше: сего́ бо ра́ди высо́кій Бо́гъ на земли́ яви́ся смире́нный человѣ́къ, хотя́й привлещи́ къ высотѣ́, Тому́ вопію́щія: Аллилу́ія.

Икосъ 8.

[Ο] Ве́сь бѣ́ въ ни́жнихъ, и вы́шнихъ ника́коже отступи́ неопи́санное Сло́во: снисхожде́ніе бо Боже́ственное, не прехожде́ніе же мѣ́стное бы́сть, и рождество́ отъ Дѣ́вы богопрія́тныя, слы́шащія сія́: Ра́дуйся, Бо́га невмѣсти́маго вмѣсти́лище; ра́дуйся, честна́го та́инства две́ри. Ра́дуйся, невѣ́рныхъ сумни́тельное слы́шаніе; ра́дуйся, вѣ́рныхъ извѣ́стная похвало́. /л. 284Ра́дуйся, колесни́це пресвята́я Су́щаго на херуви́мѣхъ; ра́дуйся, селе́ніе пресла́вное Су́щаго на серафи́мѣхъ. Ра́дуйся, проти́вная въ то́жде собра́вшая; ра́дуйся, дѣ́вство и рождество́ сочета́вшая. Ра́дуйся, Еюже разрѣши́ся преступле́ніе; ра́дуйся, Еюже отве́рзеся ра́й. Ра́дуйся, ключу́ Ца́рствія Христо́ва; ра́дуйся, наде́ждо бла́гъ вѣ́чныхъ. Ра́дуйся, Невѣ́сто неневѣ́стная.

Конда́къ 9.

[Π] Вся́кое естество́ а́нгельское удиви́ся вели́кому Твоего́ вочеловѣ́ченія дѣ́лу: непристу́пнаго бо я́ко Бо́га, зря́ше всѣ́мъ присту́пнаго Человѣ́ка, на́мъ у́бо спребыва́юща, слы́шаща же отъ всѣ́хъ: Аллилу́ія.

Икосъ 9.

[Ρ] Вѣтíя многовѣща́нныя, я́ко ры́бы безгла́сныя ви́димъ о Тебѣ́, Богоро́дице: недоумѣва́ютъ бо глаго́лати, е́же ка́ко и Дѣ́ва пребыва́еши, и роди́ти возмогла́ еси́? Мы́ же, та́инству дивя́щеся, вѣ́рно вопіе́мъ: Ра́дуйся, прему́дрости Бо́жія прія́телище; ра́дуйся, промышле́нія Его́ сокро́вище. Ра́дуйся, любому́дрыя нему́дрыя явля́ющая; ра́дуйся, хитрослове́сныя безслове́сныя облича́ющая. Ра́дуйся, я́ко обуя́ша лю́тіи взыска́теле; ра́дуйся, я́ко увядо́ша баснотво́рцы. Ра́дуйся, аѳине́йская плете́нія растерза́ющая; ра́дуйся, ры́барскія мре́жи исполня́ющая. Ра́дуйся, изъ глубины́ невѣ́дѣнія извлача́ющая; ра́дуйся, мно́ги въ ра́зумѣ просвѣща́ющая. Ра́дуйся, кораблю́ хотя́щихъ спасти́ся; ра́дуйся, приста́нище жите́йскихъ пла́ваній. Ра́дуйся, Невѣ́сто неневѣ́стная.

Конда́къ 10.

[Σ] Спасти́ хотя́ мíръ, Иже всѣ́хъ Украси́тель, къ сему́ самообѣтова́нъ пріи́де, и Па́стырь сы́й я́ко Бо́гъ, на́съ ра́ди /л. 284 об./ яви́ся по на́мъ человѣ́къ: подо́бнымъ бо подо́бное призва́въ, я́ко Бо́гъ слы́шитъ: Аллилу́ія.

И па́ки конда́къ:

Взбра́нной Воево́дѣ [побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная].

Сѣда́ленъ, гла́съ 1. Подо́бенъ: Гро́б Тво́й.

Вели́кій во́инъ невеще́ственныхъ а́нгеловъ, во гра́дъ Назаре́тъ, предста́въ, Царя́ возвѣща́етъ Твоего́, Чи́стая, и вѣко́въ Го́спода: ра́дуйся, глаго́ля Тебѣ́, благослове́нная Марíе, непостижи́мая и несказа́нная глубино́, человѣ́ковъ воззва́ніе.

Сла́ва, и ны́нѣ: то́йже. И па́ки чте́ніе.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, [во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й].

[Ε] Во гла́сѣхъ пѣ́ній, Дѣ́во, Тебѣ́ вопіе́мъ, Всепѣ́тая: ра́дуйся, ту́чная горо́ и усыре́нная Ду́хомъ; ра́дуйся, свѣ́щниче, и ста́мно, ма́нну нося́щая, услажда́ющая всѣ́хъ благочести́выхъ чу́вства.

[Ι] Очисти́лище мíру, ра́дуйся, Пречи́стая Влады́чице; ра́дуйся лѣ́ствице, отъ земли́ всѣ́хъ возвы́сившая благода́тію; ра́дуйся мо́сте, вои́стинну преводя́й всѣ́хъ отъ сме́рти къ животу́ пою́щихъ Тя́.

[Ο] Небе́съ превы́шшая, ра́дуйся, земли́ основа́ніе во Твои́хъ ложесна́хъ, Пречи́стая, нетру́дно носи́вшая; ра́дуйся червлени́це, багряни́цу Боже́ственную омочи́вшая, отъ крове́й Твои́хъ, Царе́ви си́ламъ.

[Ν] Законода́вца ро́ждшая и́стиннаго, ра́дуйся, Влады́чице, беззако́нія всѣ́хъ ту́не очища́ющаго; недовѣ́домая глубино́, высото́ неизрече́нная, браконеиску́сная, Еюже мы́ обожи́хомся.

[Σ] Тя́, испле́тшую мíрови нерукоплете́нный вѣне́цъ, пѣсносло́вимъ, ра́дуйся, Тебѣ́ Дѣ́во зову́ще, храни́лище всѣ́хъ и огражде́ніе, и утвержде́ніе, и свяще́нное прибѣ́жище.

Катава́сія: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

Пѣ́снь 5.

Ирмо́съ: Ужасо́шася вся́ческая [о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая].

[Ο] Пу́ть ро́ждшая жи́зни, ра́дуйся, Пренепоро́чная, отъ пото́па /л. 285/ грѣхо́внаго мíръ спа́сшая; ра́дуйся, Богоневѣ́сто, слы́шаніе и глаго́ланіе стра́шное; ра́дуйся, пребыва́ніе Влады́ки тва́ри.

[Ι] Крѣ́пость и утвержде́ніе человѣ́ковъ, ра́дуйся, Пречи́стая, мѣ́сто освяще́нія сла́вы, умерщвле́ніе а́дово, черто́же всесвѣ́тлый; ра́дуйся, а́нгеловъ ра́досте, ра́дуйся, по́моще вѣ́рно моля́щихся Тебѣ́.

[Π] Огнеобра́зная колесни́це Сло́ва, ра́дуйся Влады́чице, одушевле́нный раю́, дре́во посредѣ́ иму́щи жи́зни Го́спода, Его́же сла́дость оживотворя́етъ вѣ́рою причаща́ющихся, и тли́ подклони́вшихся.

[Ρ] Укрѣпля́еми си́лою Твое́ю, вѣ́рно вопіе́мъ Ти́: ра́дуйся, гра́де всѣ́хъ Царя́, пресла́вная и достослы́шанная, о Не́йже глаго́лана бы́ша я́вѣ, горо́ несѣко́мая; ра́дуйся, глубино́ неизмѣ́римая.

[Ε] Простра́нное селе́ніе Сло́ва, ра́дуйся, Пречи́стая, сосу́де, Боже́ственный би́серъ произве́дшая; ра́дуйся, всечу́дное всѣ́хъ къ Бо́гу примире́ніе, блажа́щихъ Тя́, Богоро́дице, всегда́.

Катава́сія: Ужасо́шася вся́ческая о Боже́ственнѣй сла́вѣ Твое́й, Ты́ бо, Неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га и родила́ еси́ Безлѣ́тнаго Сы́на, всѣ́мъ воспѣва́ющимъ Тя́ ми́ръ подава́ющая.

Здѣ́ престае́тъ кано́нъ свята́го оби́тели.

Пѣ́снь 6.

Ирмо́съ: Боже́ственное сіе́ и всечестно́е [соверша́юще пра́зднество, богому́дріи, Богома́тере, пріиди́те рука́ми воспле́щимъ, отъ Нея́ ро́ждшагося Бо́га сла́вимъ].

[Π] Черто́же Сло́ва нескве́рный, вина́ всѣ́хъ обоже́нія, ра́дуйся, Пречи́стая, проро́ковъ оглаше́ніе; ра́дуйся, апо́столовъ удобре́ніе.

[Ε] Отъ Тебе́ роса́ ука́ну, пла́мень многобо́жія угаси́вшая, тѣ́мъ вопіе́мъ Ти́: ра́дуйся, руно́ одушевле́нное, е́же Гедео́нъ, Дѣ́во, предви́дѣ.

[Ι] Се́ Тебѣ́, (Дѣ́во), ра́дуйся, зове́мъ; приста́нище на́мъ бу́ди вла́ющимся, и оти́шіе въ пучи́нѣ скорбе́й, и собла́зновъ всѣ́хъ бори́теля.

[Χ] Ра́дости вина́, облагодати́ на́шъ по́мыслъ, е́же зва́ти /л. 285 об./ Тебѣ́: ра́дуйся, неопали́мая купино́, о́блаче всесвѣ́тлый, вѣ́рныя непреста́нно осѣня́ющій.

Та́же четверопѣ́снецъ, его́же краестро́чіе: Сія́ пѣ́снь Іо́сифова, гла́съ 6.

Пѣ́снь 6. Ирмо́съ: Жите́йское мо́ре, воздвиза́емое...

Пострада́вше, му́ченицы, и, я́ко ка́меніе избра́нное, по земли́ валя́ющеся, зижди́тельство вся́кое врага́ соверше́нно преврати́ша и хра́ми Бо́га Жива́го яви́шася.

Ва́съ мо́лимъ, тече́ніе до́брое соверши́вшихъ, му́ченицы, поста́ тече́ніе тещи́ на́съ до́брѣ укрѣпи́те, добродѣ́телей соверше́ніемъ просія́вшихъ.

Рабы́ Твоя́, Влады́ко, преста́вльшіяся отъ земли́ къ Тебѣ́, Преблаго́му, Твоего́ Ца́рствія сотвори́ о́бщники, боже́ственныхъ му́ченикъ Твои́хъ свяще́нными хода́тайствы, Многоми́лостиве.

Богоро́диченъ: Еди́на Всепѣ́тая, пою́щимъ Тя вѣ́рно, грѣхо́въ оставле́ніе и дарова́ній Боже́ственныхъ ча́сть да́тися, Всесвято́му Сло́ву моли́ся, Ма́ти Дѣ́во.

Иный, гла́съ 5. Ирмо́съ: Отъ ки́та проро́ка...

Па́мять соверша́юще му́ченикъ, Го́сподеви возсле́мъ пѣ́сни, дне́сь Боже́ственно веселя́щеся.

Мече́въ и огня́ не убоя́вшеся, дерза́юще въ вѣ́рѣ, страстоте́рпцы, мучи́тели въ се́мъ уязви́сте.

Тро́иченъ: Тро́ицу Ли́цы воспѣва́ю Тя́, Еди́ницѣ по существу́ покланя́юся Тебѣ́, Отче, Сы́не и Ду́ше Святы́й.

Богоро́диченъ: Ангелъ и человѣ́къ благохвале́ніе еси́, я́ко родила́ е́си, Дѣ́во, Христа́, Спа́са душа́мъ на́шимъ.

Сти́хъ: Ди́венъ Богъ во святы́хъ Свои́хъ, Бо́гъ Изра́илевъ.

Сме́ртію живо́тъ премѣни́вше, ра́дуетеся, на небесѣ́хъ живу́ще, страстоте́рпцы пресла́вніи Христа́ Бо́га.

/л. 286Сти́хъ: Ду́ши и́хъ во благи́хъ водворя́тся.

Сме́ртію и живото́мъ облада́яй, вѣ́рою преста́вльшіяся отъ житія́, Христе́, со святы́ми Твои́ми упоко́й.

Ирмо́съ: Отъ ки́та проро́ка изба́вилъ еси́, мене́ же изъ глубины́ грѣхо́въ возведи́, Го́споди, и спаси́ мя.

Ектенія́ ма́лая. И па́ки пое́мъ конда́къ: Взбра́нной Воево́дѣ... И чте́мъ оста́вльшіяся ше́сть и́косовъ и кондако́въ.

Икосъ 10.

[Τ] Стѣна́ еси́ дѣ́вамъ, Богоро́дице Дѣ́во, и всѣ́мъ къ Тебѣ́ прибѣга́ющимъ, и́бо небесе́ и земли́ Творе́цъ устро́и Тя́, Пречи́стая, все́лься во утро́бѣ Твое́й, и вся́ приглаша́ти Тебѣ́ научи́въ: Ра́дуйся, сто́лпе дѣ́вства; ра́дуйся, две́рь спасе́нія. Ра́дуйся, нача́льнице мы́сленнаго назда́нія; ра́дуйся, пода́тельнице Боже́ственныя бла́гости. Ра́дуйся, Ты́ бо обнови́ла еси́ зача́тыя сту́дно; ра́дуйся, Ты́ бо наказа́ла еси́ окра́денныя умо́мъ. Ра́дуйся, тли́теля смы́словъ упражня́ющая; ра́дуйся, Сѣ́ятеля чистоты́ ро́ждшая. Ра́дуйся, черто́же безсѣ́меннаго уневѣ́щенія; ра́дуйся, вѣ́рныхъ Го́сподеви сочета́вшая. Ра́дуйся, до́брая младопита́тельнице дѣ́вамъ; ра́дуйся, невѣстокраси́тельнице ду́шъ святы́хъ. Ра́дуйся, Невѣ́сто неневѣ́стная.

Конда́къ 11.

[Υ] Пѣ́ніе вся́кое побѣжда́ется, спростре́тися тща́щееся ко мно́жеству мно́гихъ щедро́тъ Твои́хъ: равночи́сленныя бо песка́ пѣ́сни а́ще прино́симъ Ти́, Царю́ Святы́й, ничто́же соверша́емъ досто́йно, я́же да́лъ еси́ на́мъ, Тебѣ́ вопію́щимъ: Аллилу́ія.

Икосъ 11.

[Φ] Свѣтопріе́мную свѣщу́, су́щимъ во тмѣ́ я́вльшуюся, зри́мъ Святу́ю Дѣ́ву: невеще́ственный бо вжига́ющи о́гнь, наставля́етъ къ ра́зуму боже́ственному вся́, заре́ю у́мъ просвѣща́ющая, зва́ніемъ же почита́емая, си́ми: Ра́дуйся, луче́ у́м/л. 286 об./наго Со́лнца; ра́дуйся, свѣти́ло незаходи́маго Свѣ́та. Ра́дуйся, мо́лніе, ду́ши просвѣща́ющая; ра́дуйся, я́ко гро́мъ, враги́ устраша́ющая. Ра́дуйся, я́ко многосвѣ́тлое возсіява́еши просвѣще́ніе; ра́дуйся, я́ко многотеку́щую источа́еши рѣку́. Ра́дуйся, купѣ́ли живопису́ющая о́бразъ; ра́дуйся, грѣхо́вную отъе́млющая скве́рну. Ра́дуйся, ба́не, омыва́ющая со́вѣсть; ра́дуйся, ча́ше, че́рплющая ра́дость. Ра́дуйся, обоня́ніе Христо́ва благоуха́нія; ра́дуйся, животе́ та́йнаго весе́лія. Ра́дуйся, Невѣ́сто неневѣ́стная.

Конда́къ 12.

[Χ] Благода́ть да́ти восхотѣ́въ, долго́въ дре́внихъ, всѣ́хъ долго́въ Рѣши́тель человѣ́комъ, пріи́де Собо́ю ко отше́дшимъ Того́ благода́ти и, раздра́въ рукописа́ніе, слы́шитъ отъ всѣ́хъ си́це: Аллилу́ія.

Икосъ 12.

[Ψ] Пою́ще Твое́ рождество́, хва́лимъ Тя́ вси́, я́ко одушевле́нный хра́мъ, Богоро́дице: во Твое́й бо всели́вся утро́бѣ, содержа́й вся́ руко́ю Госпо́дь, освяти́, просла́ви и научи́ вопи́ти Тебѣ́ всѣ́хъ: Ра́дуйся, селе́ніе Бо́га и Сло́ва; ра́дуйся, Свята́я святы́хъ бо́льшая. Ра́дуйся, ковче́же позлаще́нный Ду́хомъ; ра́дуйся, сокро́вище живота́ неистощи́мое. Ра́дуйся, честны́й вѣ́нче Царе́й благочести́выхъ; ра́дуйся, честна́я похвало́ іере́евъ благоговѣ́йныхъ. Ра́дуйся, Це́ркве непоколеби́мый сто́лпе; ра́дуйся, Ца́рствія неруши́мая стѣно́. Ра́дуйся, Еюже воздви́жутся побѣ́ды; ра́дуйся, Еюже низпа́даютъ врази́. Ра́дуйся, тѣ́ла моего́ врачева́ніе; ра́дуйся, души́ моея́ спасе́ніе. Ра́дуйся, Невѣ́сто неневѣ́стная.

/л. 287/

Конда́къ 13.

[Ω] О, всепѣ́тая Ма́ти, ро́ждшая всѣ́хъ святы́хъ Святѣ́йшее Сло́во! Ны́нѣшнее пріе́мши приноше́ніе, отъ вся́кія изба́ви напа́сти всѣ́хъ, и бу́дущія изми́ му́ки о Тебѣ́ вопію́щихъ: Алли́луія.

Се́й конда́къ глаго́ли три́жды. И па́ки чте́тся 1-й и́косъ:

Ангелъ предста́тель [съ небесе́ по́сланъ бы́сть рещи́ Богоро́дицѣ: радуйся! И, со безпло́тнымъ гла́сомъ, воплоща́ема Тя́ зря́, Го́споди, ужаса́шеся и стоя́ше, зовы́й къ Не́й такова́я: Ра́дуйся, Еюже ра́дость возсія́етъ; ра́дуйся, Еюже кля́тва исче́знетъ. Ра́дуйся, па́дшаго Ада́ма воззва́ніе; ра́дуйся, сле́зъ Евиныхъ избавле́ніе. Ра́дуйся, высото́, неудобовосходи́мая человѣ́ческими по́мыслы; ра́дуйся глубино́, неудобозри́мая и а́нгельскима очи́ма. Ра́дуйся, я́ко еси́ Царе́во сѣда́лище; ра́дуйся, я́ко но́сиши Нося́щаго вся́. Ра́дуйся, звѣздо́, явля́ющая Со́лнце; ра́дуйся, утро́бо Боже́ственнаго воплоще́нія. Ра́дуйся, Еюже обновля́ется тва́рь; ра́дуйся, Еюже покланя́емся Творцу́. Ра́дуйся, Невѣ́сто неневѣ́стная].

И па́ки конда́къ:

Взбра́нной Воево́дѣ [побѣди́тельная, я́ко изба́вльшеся отъ злы́хъ, благода́рственная воспису́емъ Ти́ раби́ Твои́, Богоро́дице: но я́ко иму́щая держа́ву непобѣди́мую, отъ вся́кихъ на́съ бѣ́дъ свободи́, да зове́мъ Ти́: Ра́дуйся, Невѣ́сто неневѣ́стная].

Та́же чту́тся синакса́рія: пе́рвѣе мине́и, та́же настоя́щій.

Стихи́: Пѣ́сньми неусы́пными благода́рственно,
                  Гра́дъ во бра́нехъ бо́друю пое́тъ Предста́тельницу.

Въ се́й де́нь несѣда́льную пѣ́снь пра́зднуемъ Пресвяты́я Влады́чицы на́шея Богоро́дицы, вины́ ра́ди сицевы́:

Ираклíю, самодержа́вное Гре́ческое нача́льство пра́вящу, Хосро́й же, Пе́рсскій ца́рь, ви́дѣвъ гре́ческая ски́птра смири́вшася отъ Фо́ки царя́ мучи́теля, еди́наго отъ вельмо́жъ свои́хъ, Са́рвара и́менемъ, съ ты́сящами мно́гими во́инствъ посыла́етъ вся́ восто́чныя страны́ покори́ти себѣ́. Предвари́ бо и пре́жде, я́ко де́сять те́мъ христіа́нъ погуби́въ Хосро́й, я́ко жидово́мъ прекупля́ющимъ и́хъ отъ него́ и погубля́ющимъ.

Нача́льный же вельмо́жа Са́рваръ, восто́ки вся́ поплѣни́въ, пости́же и до сама́го Зла́таго гра́да, и́же ны́нѣ Скута́рь нарица́ется. Ца́рь бо Ираклíй, имѣ́ніемъ о́бщаго зла́та оскудѣ́въ, свяще́нныя сосу́ды церко́вныя на златни́цы претвори́въ, во отдая́ніе бо́льшее и соверше́ннѣйшее. По Евкси́нскому же мо́рю съ корабли́ въ Перси́дскія страны́ прише́дъ, потребля́етъ я́, и отню́дъ побѣжда́ется отъ него́ Хосро́й съ про́чими во́инствы. Пома́лѣ же и Сиро́й, сы́нъ Хосро́евъ, отъ отца́ своего́ отступи́въ, нача́льство себѣ́ пріе́млетъ, и отца́, Хосро́я, уби́въ, царю́ Ираклíю содружи́ся. Хага́нъ же, Ми́сонскій и Ски́ѳскій нача́льникъ, увѣ́дѣвъ о царѣ́, я́ко по мо́рю По́нтскому отше́лъ е́сть, разрѣши́въ ми́ръ на гре́ки, полки́ тмочи́сленныя подви́гъ, отъ за́падныхъ стра́нъ на Константи́нь гра́дъ прихо́дитъ, на Бо́га ху́льныя гла́сы возсыла́я. Абіе же ку́пно мо́ре у́бо корабльми́, зе́млю же пѣ́шими и вса́дники безчи́сленными испо́лнь бя́ше.

Се́ргій же, патріа́рхъ Константи́ня гра́да, лю́ди мно́го утѣша́ше не отпа́дати, ни разслабля́тися, но все́ упова́ніе отъ души́ на Бо́га возноси́ти и на Ма́терь Его́, Пречи́стую Богоро́дицу. Та́коже и Во́носъ патрикíй, и́же тогда́ гра́дъ пра́вляше, подо́бная на отвраще́ніе ра́тниковъ устроя́ше. Подоба́етъ бо и на́мъ съ по́мощію Вы́шнею и на прили́чная дѣ́йствовати. Патріа́рхъ же боже́ственныя ико́ны Богома́тере со всѣ́мъ мно́жествомъ нося́, обхожда́ше по стѣна́мъ свы́ше и отту́ду утвержде́ніе и́мъ подава́я. Яко у́бо Са́рваръ отъ восто́ка, Хага́нъ же отъ за́пада идя́ста, сожещи́ окре́стная гра́да. Патріа́рхъ же Нерукотворе́нную Христо́ву ико́ну, и Честна́я и Животворя́щая Дре́ва, къ сему́ же и честну́ю ри́зу Богома́тере нося́, по стѣна́мъ обхожда́ше. Хага́нъ же ски́ѳянинъ су́шею /л. 287 об./ стѣна́мъ Константи́ня гра́да напа́даетъ, со мно́жествомъ безчи́сленнымъ, крѣпкоизря́дно ору́жіи утвержде́ни. И толи́ко мно́жество бя́ше, я́ко еди́ному гре́чину съ десятьми́ ски́ѳяны я́вѣ бра́тися. Но Необори́мая Побо́рница, обрѣ́тшимися ма́лыми зѣло́ во́ины въ хра́мѣ Ея́, нарица́емѣмъ Пигíи, мно́жайшія и́хъ погуби́. Отсю́ду же гре́цы, дерзнове́ніе пріе́мше и восплеска́вше, отъ Воево́ды Необори́мыя, Бо́жія Ма́тере, и́хъ при́сно до конца́ побѣжда́ху. Воззрѣ́вше же и на примире́ніе, гра́ждане отраже́ни бы́ша. Отвѣща́ бо и́мъ Хага́нъ: не прельща́йтеся о Бо́зѣ, въ Него́же вѣ́руете, вся́чески бо у́трѣ гра́дъ ва́шъ пріиму́. Гра́ждане же, слы́шавше, ру́ки къ Бо́гу простира́ху.

Согласи́вшеся у́бо, Хага́нъ же и Са́рваръ су́шею и мо́ремъ на гра́дъ устремля́ются, козньми́ плѣни́ти жела́юще, но толи́ко побѣжде́ни бы́ша отъ гре́къ, я́коже недово́льнымъ бы́ти живы́мъ ме́ртвыя жещи́. Моно́ксила же ору́жниковъ испо́лнена, нѣ́дромъ глаго́лемымъ Ро́гомъ, ко хра́му Богома́тере, су́щему во Влахе́рнахъ, бу́ри внеза́пу си́льнѣ мо́рю припа́дши, и раздѣ́льшуся ему́ въ сѣче́ніе, съ корабли́ всѣ́ми враго́въ растлѣ́шася. И бя́ше ви́дѣти то́ пресла́вное изряднодѣ́йствіе Пречи́стыя и Богома́тере, всѣ́хъ при бре́зѣ мо́ря су́щимъ во Влахе́рнахъ изврѣ́. Лю́діе же, ели́ко ско́ро врата́ отве́рзше, вку́пѣ вся́ изби́ша, и дѣ́ти, и жены́ на ня́ вмужестви́вшіяся. Нача́льницы же и́хъ возврати́шася, пла́чуще ку́пно и рыда́юще.

Боголюби́віи у́бо лю́діе Константи́ня гра́да, Богома́тери благодаре́ніе даю́ще, всено́щную пѣ́снь и несѣда́льную Ей воспѣ́ша, я́ко о о́ныхъ бдѣ́вши и преесте́ственною си́лою содѣ́явши на враги́ побѣ́ду. Отто́лѣ у́бо на воспомина́ніе толи́каго и преесте́ственнаго чудесе́, Це́рковь сицевы́й пра́здникъ прія́тъ, Ма́тери Бо́жіи возлага́ти въ настоя́щее вре́мя, егда́ и побѣ́да Богома́терію бы́сть. Несѣда́льное же именова́ся, за е́же тогда́ та́ко дѣ́яти гра́дскому же кли́росу и лю́демъ всѣ́мъ.

По прехожде́ніи же три́десяти и шести́ лѣ́тъ, при ца́рствѣ Константи́на Погона́та, ага́ряне безчи́сленное во́инство водя́ще, па́ки на Константи́нь гра́дъ нападо́ша и се́дмь лѣ́тъ се́й борю́ще, егда́ и въ Ки́зическихъ страна́хъ презимова́ху, мно́гія своя́ погуби́ша. Та́же отре́кшеся бра́ни, и съ во́инствомъ свои́мъ возвраща́ющееся, и бы́вше въ мо́ри, нарица́емѣмъ Силе́о, вси́ потопи́шася, предста́тельствомъ Всечи́стыя и Богома́тере.

Но и въ тре́тіе па́ки, при Львѣ́ Иса́врѣ, ага́ряне па́че мно́жайшихъ те́мъ число́мъ, пе́рвѣе у́бо Пе́рсское разоря́ютъ ца́рство, та́же Еги́петъ и Ливíю. Обте́кше же и Индíю, Еѳіо́пію же и Испа́нію, напослѣ́докъ же и на са́мый Ца́рскій гра́дъ воюю́тъ, ты́сящію осмію́ со́тъ корабле́й носи́ми, окружи́вше у́бо его́, я́ко а́біе расхи́тити его́ жда́ху. Гражда́нстіи же свяще́нніи лю́діе, Честно́е Дре́во Честна́го и Животворя́щаго Креста́ и честну́ю ико́ну Богома́тере Одиги́тріи обнося́ще, стѣ́ну окружа́ху, со слеза́ми Бо́га умилостивля́юще.

Возмечта́ся у́бо, си́це ага́ряномъ на двѣ́ ча́сти раздѣли́тися: и о́віи у́бо на бо́лгары вою́ютъ, и та́мо па́даютъ вя́щше двою́ тму́; о́віи же оста́вльшеся на Ца́рь гра́дъ пріити́, возбрани́вшеся же отъ вери́ги, бы́вшія отъ Гала́ты до стѣ́нъ Царя́ гра́да. Восплы́вшимъ же нѣ́гдѣ до мѣ́ста, нарица́емаго Сосѳе́нъ, та́мо вѣ́тру сѣ́верну возвѣ́явшу, мно́ги корабли́ и́хъ сокруши́шася и погибо́ша. Оста́вльшіися же въ гла́дъ зѣ́льный впадо́ша, я́ко и пло́темъ человѣ́ческимъ при/л. 288/косну́тися, и ка́лъ мѣси́ти и я́сти. Та́же бѣжа́вше и во Еге́йскую пучи́ну дости́гше, кораблецы́ своя́ вся́ и самѣ́хъ себе́ глубинѣ́ морско́й преда́ша. Гра́дъ бо си́ленъ съ небесе́ спа́дъ, возврѣ́ніе мо́ря сотвори́въ, смо́лу корабле́й распусти́, и та́ко мно́жество безчи́сленное о́ное во́инство корабле́й поги́бе, тре́мъ то́кмо на возвѣще́ніе оста́вльшимся.

Си́хъ ра́ди у́бо всѣ́хъ преесте́ственныхъ чуде́съ Всечи́стыя и Богома́тере настоя́щій пра́здникъ пра́зднуемъ. Несѣда́льный же рече́ся, зане́ про́сто стоя́ще тогда́ вси́ лю́діе въ но́щь о́ную, Сло́ва Ма́тери пѣ́снь воспѣ́ша. И я́ко во всѣ́хъ ины́хъ сѣдѣ́ти отъ обы́чая иму́ще, въ настоя́щихъ Богома́тере, про́сти вси́ слу́шаемъ.

Твоея́ Побо́рницы же и Непобори́мыя Ма́тере моли́твами, Христе́ Бо́же, отъ облежа́щихъ напа́стей и на́съ изба́ви, и поми́луй на́съ, я́ко еди́нъ Человѣколю́бецъ. [Ами́нь.]

Пѣ́снь 7.

Ирмо́съ: Не послужи́ша тва́ри [богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́].

[Α] Воспѣва́емъ Тя́, вопію́ще: ра́дуйся, колесни́це Со́лнца у́мнаго, лозо́ и́стинная, Гро́здъ зрѣ́лый воздѣ́лавшая, вино́ источа́ющій, ду́ши веселя́щее, вѣ́рою Тя́ сла́вящихъ.

[Ι] Врача́ всѣ́хъ человѣ́ковъ ро́ждшая, ра́дуйся, Богоневѣ́сто, же́зле та́йный, Цвѣ́тъ неувяда́емый процвѣ́тшій; ра́дуйся, Влады́чице, Еюже ра́дости наполня́емся и жи́знь наслѣ́дствуемъ.

[Ρ] Вѣтíйствующій не мо́жетъ язы́къ, Влады́чице, пѣсносло́вити Тя́: па́че бо серафи́мовъ возвы́силася еси́, ро́ждши Царя́ Христа́. Его́же моли́, гра́ду сему́ изба́витися отъ мно́гихъ искуше́ній.

[Ε] Хва́лятъ Тя́, блажа́ще концы́, и любо́вію зову́тъ Тебѣ́: ра́дуйся, сви́тче, въ не́мже пе́рстомъ написа́ся Отчее Сло́во, Чи́стая. Его́же моли́, въ кни́ги живо́тныя, рабо́мъ Твои́мъ написа́тися, Богоро́дице.

[Ι] Мо́лимъ, раби́ Твои́, и приклоня́емъ колѣ́но се́рдца на́шего: приклони́ у́хо Твое́, Чи́стая, и спаси́ скорбми́ погружа́емыя при́сно, и соблюди́ отъ вся́каго вра́жія плѣне́нія Тво́й гра́дъ, Богоро́дице.

Иный, гла́съ 6. Ирмо́съ: Росода́тельну...

Пресвѣ́тлое собра́ніе боже́ственныхъ Твои́хъ му́чениковъ, Многоми́лостиве, во свѣ́тѣ Твое́мъ незаходи́мѣмъ ны́нѣ жи́тельствуетъ. Тѣ́хъ моли́твами просвѣще́ніе и грѣхо́въ очище́ніе пода́ждь всѣ́мъ, Христе́.

/л. 288 об.Ко́ль кра́сное вре́мя, е́же намъ да́лъ е́си воздержа́нія, Го́споди, въ не́мже уще́дри ду́ши на́ша, я́ко Бла́гъ, моли́твами святы́хъ страда́лецъ, кра́сныя и честны́я возлюби́вшихъ стра́сти Твоя́.

Преше́дшія многоболѣ́зненную бу́рю житія́ рабы́ Твоя́, устреми́ въ приста́нище, Влады́ко, жи́зни, вопи́ти со всѣ́ми избра́нными: благослове́нъ еси́, Го́споди, Бо́же оте́цъ на́шихъ.

Богоро́диченъ: Зако́на Да́теля, Приснодѣ́во, ро́ждшая моли́, беззако́нія отъя́ти вся́, во вре́мя ны́нѣ настоя́щее, до́брѣ произво́лившимъ обуча́тися боже́ственнаго поста́ тща́ніемъ.

Иный, гла́съ 5. Ирмо́съ: Благослове́нъ еси́, Бо́же...

Благослове́нъ еси́, Бо́же, показа́вый до́блія о Тебѣ́ стра́ждущія му́ченики, Препѣ́тый и Препросла́вленный.

Благослове́нъ еси́, Бо́же, страстоте́рпцы моли́твенники на́мъ къ Тебѣ́ подава́яй, Препѣ́тый и Препросла́вленный.

Тро́иченъ: Благослове́нъ еси́, Бо́же, Еди́нъ у́бо Естество́мъ, Ли́цы же Треми́ познава́емый, Препѣ́тый и Препросла́вленный.

Богоро́диченъ: Благослове́нъ еси́, Бо́же, рожде́йся безсѣ́менно и Ро́ждшую показа́вый чисто́тствующую, Препѣ́тый и Препросла́вленный.

Сти́хъ: Святы́мъ, и́же суть на земли́ Его́, удиви́ Госпо́дь вся́ хотѣ́нія Своя́ въ ни́хъ.

Благослове́нъ еси́, Бо́же, звѣ́ри укроти́вый и погаси́вый о́гнь въ сла́ву святы́хъ Твои́хъ, Препѣ́тый и Препросла́вленный.

Сти́хъ: Блаже́ни, я́же избра́лъ и прія́лъ еси́, Го́споди.

Благослове́нъ еси́, Бо́же, отъ сме́рти въ безконе́чный живо́тъ преложи́вый вѣ́рою въ житіи́ послужи́вшія Тебѣ́.

Ирмо́съ: Благослове́нъ еси́, Бо́же, ви́дяй бе́здны и на Престо́лѣ Сла́вы сѣдя́й, препѣ́тый и пресла́вный.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте дѣла́ и превозноси́те Его́ во вся́ вѣ́ки.

[Ν] Ложесны́ Сло́во прія́ла еси́, вся́ Нося́щаго носи́ла еси́, млеко́мъ пита́ла еси́, ма́ніемъ Пита́ющаго вселе́нную всю́, /л. 289/ Чи́стая. Ему́же пое́мъ: Го́спода по́йте дѣла́, и превозноси́те во вся́ вѣ́ки.

[Μ] Моисе́й уразумѣ́ въ купинѣ́ вели́кое та́инство Рождества́ Твоего́, о́троцы же прообрази́ша сіе́ я́вственнѣе, посредѣ́ огня́ стоя́ще и не опаля́еми, нетлѣ́нная Свята́я Дѣ́во. Тѣ́мъ Тя́ почита́емъ во вся́ вѣ́ки.

[Ο] Пре́жде пре́лестію обнажи́вшіися, въ ри́зу нетлѣ́нія облеко́хомся Рождество́мъ Твои́мъ, и сѣдя́щіи во тмѣ́ прегрѣше́ній, Свѣ́тъ ви́дѣхомъ, Свѣ́та жили́ще, Отрокови́це, тѣ́мъ Тя́ пое́мъ во вся́ вѣ́ки.

[Ν] Ме́ртвіи Тобо́ю оживля́ются, Жи́знь бо ѵпоста́сную родила́ еси́, нѣ́міи пре́жде, благоглаго́ливи быва́ютъ, прокаже́нніи очища́ются, неду́зи отгоня́ются, духо́въ возду́шныхъ мно́жества побѣжда́ются, Дѣ́во, человѣ́ковъ спасе́ніе.

[Η] Мíру ро́ждшая Спасе́ніе, Имже отъ земли́ на высоту́ взя́ти бы́хомъ, ра́дуйся, Всеблагослове́нная, покро́ве и держа́во, стѣно́ и утвержде́ніе пою́щимъ, Чи́стая: Го́спода по́йте дѣла́, и превозноси́те во вся́ вѣ́ки.

Иный. Ирмо́съ: Изъ пла́мене преподо́бнымъ ро́су...

Святы́хъ му́ченикъ исправле́ніемъ, небе́сніи у́мове преудиви́шася, тѣхъ моли́твами ми́лости Твоя́, Влады́ко, въ насъ бога́тно удиви́, Ще́дре.

Огнь Боже́ственною росо́ю попра́вшіи, страда́льцы Госпо́дни досточу́дніи, изба́вите на́съ огня́ му́чащаго, ко Влады́цѣ те́плыми ва́шими моли́твами.

Преблагíй Сло́ве, отше́дшія отъ на́съ правосла́вно, жи́зни сподо́би, я́же на небесѣ́хъ, и святы́я свѣ́тлости, добропобѣ́дныхъ му́ченикъ моли́твами.

Богоро́диченъ: Моли́твами, Ще́дре, Ро́ждшія Тя, и святы́хъ му́ченикъ, и апо́столъ /л. 289 об./ Твои́хъ, просвѣти́ на́ша ду́ши, е́же сла́вити Тя, въ весе́ліи душе́внѣмъ во вѣ́ки.

Иный. Ирмо́съ: Творца́ тва́ри, Его́же ужаса́ются а́нгели...

Ли́цы му́ченикъ святíи, помяни́те любо́вію воспѣва́ющія вы́ и превознося́щія Христа́ во вѣ́ки.

Мече́мъ усѣка́еми, ра́довахуся му́ченицы, пою́ще Христа́ и превознося́ще во вся вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Страннолѣ́пно раздѣля́ется Тро́ица и пребыва́етъ нераздѣ́льна, я́ко Бо́гъ, Юже превозно́симъ во вся́ вѣ́ки.

Богоро́диченъ: Дѣ́ва Младе́нца роди́, Бо́гъ бо изъ Нея́ вочеловѣ́чися, вся́ тварь да пое́тъ Его́ во вѣ́ки.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Столпи́ му́жества яви́шася, паде́ніемъ діа́волимъ ра́дующеся му́ченицы, пою́ще Христа́ и превознося́ще во вѣ́ки.

Сти́хъ: Ду́ши и́хъ во благи́хъ водворя́тся.

У Авраа́ма внѣ́дритися сподо́би, Го́споди, рабы́ Твоя́, вѣ́рою преста́вльшіяся къ Тебѣ́ и наде́ждею.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Творца́ тва́ри, Его́же ужаса́ются а́нгели, по́йте, лю́діе, и превозноси́те во вся́ вѣ́ки.

Пѣ́снь 9.

Ирмо́съ: Вся́къ земноро́дный [да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во].

[Ι] Да Тебѣ́, вѣ́рніи, ра́дуйся, зове́мъ, Тобо́ю ра́дости прича́стницы бы́вше присносу́щныя; изба́ви на́съ напа́стей, ва́рварскаго плѣне́нія, и вся́кія ины́я ра́ны, за мно́жество, Отрокови́це, прегрѣше́ній, находя́щія человѣ́комъ согрѣша́ющимъ.

[Ω] Яви́лася еси́ просвѣще́ніе на́ше и утвержде́ніе, тѣ́мже вопіе́мъ Ти́: ра́дуйся, звѣздо́ незаходи́мая, вводя́щая въ мíръ вели́кое Со́лнце; ра́дуйся, Еде́мъ отве́рзшая заключе́нный, Чи́стая; ра́дуйся, сосу́де, мѵ́ро неистощи́мое на Тя́ излія́нное пріе́мшій.

/л. 290/ [Σ] Ста́немъ благоговѣ́йно въ дому́ Бо́га на́шего, и возопіи́мъ: ра́дуйся, мíру Влады́чице; ра́дуйся, Марíе, Госпоже́ всѣ́хъ на́съ; ра́дуйся, еди́на непоро́чная въ жена́хъ и до́брая; ра́дуйся, сто́лпе о́гненный, вводя́щій въ вы́шнюю жи́знь человѣ́чество.

[Η] Голуби́це, Ми́лостиваго ро́ждшая, ра́дуйся, Приснодѣ́во; преподо́бныхъ всѣ́хъ, ра́дуйся, похвало́, страда́льцевъ вѣнча́ніе; ра́дуйся, всѣ́хъ пра́ведныхъ боже́ственное удобре́ніе, и на́мъ, вѣ́рнымъ, спасе́ніе.

[Φ] Пощади́, Бо́же, наслѣ́діе Твое́, грѣхи́ на́ша вся́ презрѣ́въ ны́нѣ, на сіе́ имѣ́я моля́щую Тя́, на земли́ безсѣ́менно Тебе́ Ро́ждшую, вели́кія ра́ди ми́лости восхотѣ́вшаго вообрази́тися, Христе́, въ человѣ́чество.

Иный. Ирмо́съ: Бо́га человѣ́комъ невозмо́жно...

Яко свѣ́тъ, я́ко со́лнце возсія́вше, всю́ зе́млю луча́ми благоче́стія, му́ченицы, и свѣти́лами чуде́съ просвѣти́ша и многобо́жія тму́ разгна́ша, и́хже моли́твами, Бо́же, поми́луй на́съ.

Во́инство му́чениковъ непобѣди́мое, всѣ́хъ на́съ укрѣпи́ до́брѣ подвиза́тися и соверши́ти поста́ по́прище, я́ко да Боже́ственнаго житія́ дѣ́ло соверши́вше, прича́стницы бу́демъ жи́зни, веселя́щеся.

Твоя́ да предвари́тъ бла́гость, Го́споди, отъ на́съ стра́шнымъ преста́вльшихся повелѣ́ніемъ Твои́мъ, да окружи́тъ и́хъ Твоя́ ми́лость, и да наста́витъ къ селе́ніемъ, просвѣще́ннымъ свѣ́томъ лица́ Твоего́.

Богоро́диченъ: Гла́сомъ а́нгеловымъ совѣ́та Отча Ангела, неизрече́нно, Богоро́дице, родила́ еси́, гла́сы у́бо рабо́въ Твои́хъ пріими́, я́же во вре́мя поста́ прино́симъ, и сія́ принеси́ Бо́гу, я́коже кади́ло.

Иный. Ирмо́съ: Иса́іе, лику́й...

Соверша́юще торжество́ му́ченическое, дне́сь, лю́діе, воскли́кнемъ пѣ́сньми, пою́ще Христу́ Подвигополо́жнику и побѣ́ды на враги́ и́мъ пода́вшему, Его́же въ пѣ́снехъ велича́емъ.

/л. 290 об.Ноготьми́ растерза́еми и усѣца́еми мече́мъ на у́ды, совокупи́стеся Христу́ любе́зно, всехва́льніи му́ченицы, тѣ́мъ и ны́нѣ на небесѣ́хъ веселя́щеся, о всѣ́хъ моли́теся.

Тро́иченъ: Еди́но Существо́мъ воспѣва́ю Тя́, Безнача́льная Тро́ице, Честна́я, Живонача́льная, Несѣко́мая Еди́нице, Отче Нерожде́нный, и Рожде́нный Сло́ве и Сы́не, Ду́ше Святы́й, на́съ спаси́, пою́щихъ Тя́.

Богоро́диченъ: Па́че ума́ рождество́ Твое́, Богома́ти, безъ му́жа бо зача́тіе въ Тебѣ́ и дѣ́вственно рожде́ніе бы́сть, и́бо Богъ е́сть роди́выйся, Его́же велича́юще, Тя́, Дѣ́во, ублажа́емъ.

Сти́хъ: Святы́мъ, и́же су́ть на земли́ Его́, [удиви́ Госпо́дь вся хотѣ́нія Своя́ въ нихъ].

До́блее во́инство Царя́ всѣ́хъ и Бо́га, му́чениковъ пѣ́сньми вѣнча́имъ, лю́діе: тíи бо побѣди́ша бѣсо́вскія полки́ я́вѣ, я́же воспѣва́юще, Влады́ку велича́емъ.

Сти́хъ: Блаже́ни, я́же избра́лъ и прія́лъ еси́, Го́споди.

Егда́ все́ созда́ніе Твое́ возста́виши суди́тися, Христе́, я́же прія́лъ еси́, и ны́нѣ рабы́ Твоя́ вѣ́рныя поми́луй, прости́, я́же въ житіи́ прегрѣше́нія и́хъ, и со святы́ми Твои́ми упоко́й я́ во вѣ́ки.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Ексапостила́рій. Подо́бенъ: Жены́, услы́шите.

Еже отъ вѣ́ка дне́сь открыва́ется та́инство: Бо́жіе Бо́гъ Сло́во, Сы́нъ Дѣ́вы Марíи за милосе́рдіе быва́етъ, и ра́дость Благовѣ́щенія Гавріи́лъ провѣщава́етъ, съ ни́мже вопіи́мъ вси́: ра́дуйся, Ма́ти Госпо́дня. [Три́жды.]

На хвали́техъ: Вся́кое дыха́ніе... Поста́вимъ стихо́въ 4 и пое́мъ стихи́ры, гла́съ 4. Подо́бенъ: Яко до́бля.

Сокрове́нное та́инство, и а́нгеломъ невѣ́домое, Гавріи́лъ увѣря́етъ арха́нгелъ, и къ Тебѣ́ ны́нѣ пріи́детъ, еди́нѣй нетлѣ́ннѣй и до́брѣй голуби́цѣ, и ро́да на́шего воззва́нію, /л. 291/ и возопіе́тъ Тебѣ́, Пресвята́я, е́же ра́дуйся; угото́вися сло́вомъ, Бо́га Сло́ва Твои́ми ложесна́ми прія́ти. [Два́жды.]

Свѣтоно́сная пала́та угото́вася Тебѣ́, Влады́ко, утро́ба чи́стая Богоотрокови́цы; гряди́ къ Се́й и сни́ди, уще́дри созда́ніе Твое́, зави́стно бра́нь пріе́мшее, и рабо́тою удержа́нное льсти́ваго, и добро́ту пе́рвую погуби́вшее, и Твоего́ спаси́тельнаго ча́ющее соше́ствія.

Гавріи́лъ арха́нгелъ къ Тебѣ́, Всенепоро́чная, явле́нно пріи́детъ и возопіе́тъ Тебѣ́: ра́дуйся, кля́твы разрѣше́ніе, па́дшихъ воста́ніе; ра́дуйся, еди́на избра́нная Бо́гу бы́вшая; ра́дуйся, колесни́це Со́лнца сла́вы; пріими́ Безпло́тнаго, во утро́бѣ Твое́й всели́тися хотя́щаго.

Сла́ва, и ны́нѣ, самогла́сенъ, гла́съ 4:

Язы́ка, его́же не вѣ́дяше, услы́ша Богоро́дица, глаго́лаше бо къ Не́й арха́нгелъ Благовѣ́щенія глаго́лы; отоню́дуже вѣ́рно пріи́мше цѣлова́ніе, зача́тъ Тя́ Превѣ́чнаго Бо́га. Тѣ́мже и мы́, ра́дующеся, вопіе́мъ Ти́: изъ Нея́ воплоти́выйся непрело́жно Бо́же, ми́ръ мíрови да́руй, и душа́мъ на́шимъ ве́лію ми́лость.

Славосло́віе вели́кое и отпу́стъ.




НА ЛИТУРГІИ,

Изобрази́тельная. И отъ кано́на ака́ѳиста, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо, отны́нѣ ублажа́тъ Мя́ вси́ ро́ди. Апо́столъ дне́, ко Евре́емъ, зача́ло 322. И Богоро́дицы, отъ того́же посла́нія, зача́ло 320. Аллилу́ія, гла́съ 8: Воскресни́, Го́споди, въ поко́й Тво́й, [Ты́ и Киво́тъ святы́ни Твоея́]. Сти́хъ: Помяни́, Го́споди, Дави́да и всю́ кро́тость его́. Ева́нгеліе дне́, отъ Ма́рка, зача́ло 35. И Богоро́дицы, отъ Луки́, зача́ло 54. Прича́стенъ: Ча́шу спасе́нія пріиму́ и и́мя Госпо́дне призову́.

На трапе́зѣ яди́мъ два́ варе́нія съ еле́емъ и піе́мъ вино́, благодаря́ще Всесвяту́ю Влады́чицу на́шу Богоро́дицу о бы́вшемъ отъ Нея́ чудеси́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 278 – 291.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.