Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 17.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ НЕДѢЛЮ ПЯТУЮ ВЕЛИКАГО ПОСТА.

Въ Недѣ́лю пя́тую святы́хъ посто́въ послѣ́дованіе подо́бнѣ, я́коже и въ про́чихъ Недѣ́ляхъ, въ не́йже пое́мъ и мине́и послѣ́дованіе случи́вшагося свята́го. Инíи же послѣ́днѣйшіи преда́ша пѣ́ти въ сію́ Недѣ́лю послѣ́дованіе преподо́бныя ма́тере на́шея Марíи Еги́петскія.

[ВЪ СУББОТУ ВЕЧЕРА,]
Во свѣти́льничномъ, по предначина́тельномъ псалмѣ́ и обы́чномъ стихосло́віи, на Го́споди воззва́хъ: поста́вимъ стихо́въ 10, и пое́мъ осмогла́сника стихи́ры воскре́сны 3, и восто́чны [анато́ліевы3, и препо́добныя стихи́ры подо́бны 3, творя́ще я́ на 4. Гла́съ 6. Подо́бенъ: Все́ отло́жше.

Тебѣ́ у́бо возбраня́ше честны́хъ взира́нія скве́рнъ пре́жде привлече́нное скверне́ніе; твое́ же чу́вство и твоя́, богому́драя, содѣ́янныхъ со́вѣсть, къ лу́чшимъ тебѣ́ обраще́ніе содѣ́яша. На ико́ну бо воззрѣ́вши благослове́нныя Богоотрокови́цы, всѣ́хъ пока́явшися прегрѣше́ній свои́хъ, всехва́льная, пре́жнихъ, въ дерзнове́ніи Честно́му Дре́ву поклони́лася еси́.

Мѣсто́мъ поклони́вшися ра́достно святы́мъ, добродѣ́тели напу́тное, спаси́тельнѣйшее отту́ду прія́ла еси́, и зѣло́ потекла́ еси́ до́брое ше́ствіе, и, струю́ преше́дши Іорда́нскую, въ жили́ще Предте́чево усе́рдно всели́лася еси́, и страсте́й сви/л. 292/рѣ́пство жи́тельствомъ омрачи́ла еси́, истончава́ющи въ дерзнове́ніи, приснопа́мятная ма́ти, плотска́я сво́йства.

Въ пусты́ню всели́вшися, твои́хъ страсте́й о́бразы отъ души́ отъя́ла еси́, богови́днѣйшее изображе́ніе въ души́ написа́вши, добродѣ́телей ви́ды, и толи́ко просія́ла еси́, я́ко и вода́ми легко́ преходи́ти, блаже́нная, и отъ земли́ взима́тися въ твои́хъ къ Бо́гу моле́ніихъ. И ны́нѣ въ дерзнове́ніи, всесла́вная Марíе, Христу́ предстоя́щи, моли́ся о душа́хъ на́шихъ.

Сла́ва, гла́съ 4:

Очудотвори́, Христе́, Креста́ Твоего́ си́ла, я́ко и я́же пре́жде блудни́ца, по́стническимъ по́двигомъ подвиза́ся, отню́дуже и немощно́е отве́ргши, до́блественно сопротивоста́ на діа́вола. Тѣ́мже, и по́честь побѣ́ды нося́щи, мо́лится о душа́хъ на́шихъ.

И ны́нѣ, богоро́диченъ 1-й гла́са.

На стихо́внѣ стихи́ры осмогла́сника. Сла́ва преподо́бныя, гла́съ 2:

Душе́вная ловле́нія, и стра́сти плотскíя мече́мъ воздержа́нія посѣ́кла еси́, по́мысла прегрѣше́нія молча́ніемъ обуче́нія подави́ла еси́, и струя́ми сле́зъ твои́хъ пусты́ню всю́ напои́ла еси́, и прозябла́ еси́ на́мъ покая́нія плоды́. Тѣ́мже твою́ па́мять, преподо́бная, пра́зднуемъ.

И ны́нѣ, богоро́диченъ, въ то́йже гла́съ:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

Отпусти́тельный воскре́сенъ. И преподо́бныя, гла́съ 8:

Въ тебѣ́, ма́ти, извѣ́стно спасе́ся, е́же по о́бразу, пріи́мши бо кре́стъ, послѣ́довала еси́ Христу́ и, дѣ́ющи, учи́ла еси́ презира́ти у́бо пло́ть, прехо́дитъ бо прилѣжа́ти же о души́ ве́щи безсме́ртнѣй. Тѣ́мже и со а́нгелы сра́дуется, преподо́бная Марíе, ду́хъ тво́й.

И богоро́диченъ, [гла́съ то́йже]:

Иже на́съ ра́ди рожде́йся [отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].

Ты́яжде и на Бо́гъ Госпо́дь... И про́чее послѣ́дованіе, я́ко обы́чно.



/л. 292 об./

НА УТРЕНИ,
По все́мъ обы́чнѣмъ послѣ́дованіи, кано́ны 3: воскре́сный съ богоро́дичнымъ на 6, настоя́щій тріо́ди на 4 и преподо́бныя на 4.

Кано́нъ на бога́таго и на Ла́заря. Гла́съ 8.
Пѣ́снь 1. Ирмо́съ: Во́ду проше́дъ...

Оста́вилъ мя́ еси́ бога́тству сласте́й, веселя́щемуся на вся́къ де́нь въ сла́дости бога́тому. Тѣ́мже Тя́ молю́, Спа́се: огня́ мя́, я́коже Ла́заря, изба́ви.

Одѣ́яхся, Спа́се, сластьми́, я́коже обложи́вый себѣ́ ви́ссонъ, и зла́то и злату́ю оде́жду, но мя́ во о́гнь, я́коже о́наго, да не по́слеши.

Веселя́шеся бога́тствомъ и сла́достію бога́тый, дре́вле въ житіи́ тлѣ́ннемъ, тѣ́мже на му́ки осуди́ся; ни́щій ороша́шеся Ла́зарь.

Богоро́диченъ: Чи́ни Тя́ а́нгелъ и человѣ́къ, Безневѣ́стная Ма́ти, хва́лятъ непреста́нно: Творца́ бо си́хъ, я́коже младе́нца, во объя́тіихъ Твои́хъ носи́ла еси́.

Другíй кано́нъ преподо́бныя, на 4. Гла́съ 6. Ирмо́съ: Волно́ю морско́ю...

Любо́вію свѣтоно́сную и боже́ственную твою́ па́мять пра́зднующему, свѣ́тъ низпосли́ ми́, предстоя́щая, преподо́бная, Свѣ́ту Непристу́пному Христу́, искуше́ній вся́ческихъ мя́ житія́ избавля́ющи.

Къ еги́птяномъ пло́тію отше́дый Неопи́санный и Превѣ́чный, изъ Еги́пта показу́етъ всесвѣ́тлую тя́ звѣзду́, вѣ́дый Госпо́дь вся пре́жде бытія́.

Боже́ственныхъ за́повѣдей, честна́я, не вѣ́дущи, боже́ственный о́бразъ Бо́жій окаля́ла еси́, Боже́ственнымъ же про́мысломъ па́ки очи́стила еси́, всехва́льная, обожи́вшися дѣя́ньми боже́ственными, преподо́бная, твои́ми.

Богоро́диченъ: О, Твоего́, Бо́же мо́й, мно́гаго благоутро́бія и неизрече́ннаго Твоего́ снизхожде́нія! Ка́ко пе́рвѣе блудни́цу, /л. 293/ Ма́тере Твоея́ мольба́ми, я́ко чи́стую и непоро́чную, а́нгеломъ уподо́билъ еси́?

Пѣ́снь 3. Ирмо́съ: Ты́ еси́ утвержде́ніе...

Ла́заря я́коже спа́слъ еси́ отъ пла́мене, Христе́, та́ко мене́ отъ огня́ изба́ви гее́нскаго, недосто́йнаго раба́ Твоего́.

Бога́тый страстьми́ и сластьми́ е́смь, Го́споди, Ла́зарь же убо́гій лише́ніемъ добродѣ́телей, но спаси́ мя́.

Въ червлени́цу и ви́ссонъ облача́шеся бога́тый сластьми́ и грѣха́ми, сего́ ра́ди пла́менствуется.

Богоро́диченъ: Да́ждь на́мъ по́мощь моли́твами Твои́ми, Всечи́стая, прило́ги отража́ющи лю́тыхъ обстоя́ній.

Иный. Ирмо́съ: Тебе́, на вода́хъ...

Ко врато́мъ поги́бели прибли́жшуюся дѣя́ньми безмѣ́стными, врата́ пре́жде а́дова сокруши́вый си́лою Божества́, врата́ покая́нія тебѣ́ отверза́етъ, всечестна́я, две́рь Сы́й Са́мъ живота́.

Ору́жіе грѣха́, Долготерпѣли́ве, пре́жде бы́вшую, ору́жію Креста́ Боже́ственнаго поклоне́ніемъ показа́лъ еси́, ору́жія бѣсо́въ вся́ и ко́зни вся́ко побѣжда́ющую, Благоутро́бне.

Цѣ́ну за всѣ́хъ Свою́ пре́жде излія́вый кровь, ба́нею сле́зъ чи́стую тя́ содѣ́ловаетъ, прока́зою лю́тою болѣ́вшую злѣ́йшаго дѣя́нія, вся́ко е́же бы́ти всѣмъ да́вый.

Богоро́диченъ: Сло́ва вся́каго е́сть вы́шшее, е́же на Тебѣ́, Дѣ́во: Сло́во бо Отчее въ Тебѣ́ боголѣ́пно всели́ся, разрѣше́ніе согрѣше́ній всѣ́мъ согрѣша́ющимъ сло́вомъ еди́нѣмъ подава́яй.

Сѣда́ленъ, гла́съ 8. Подо́бенъ: Прему́дрость и Сло́во.

Взыгра́нія вся́ плотска́я обузда́вши труды́ по́стническими, му́жественное яви́ла еси́ души́ твоея́ мудрова́ніе. Кре́стъ бо Госпо́день ви́дѣти возжела́вши, саму́ю себе́, всечестна́я, мíрови распя́ла еси́, отню́дуже и къ жела́нію а́нгельскаго жи́тельства любе́зно /л. 293 об./ упра́вила еси́ себе́, всеблаже́нная. Моли́ Христа́ Бо́га оставле́ніе согрѣше́ній дарова́ти, чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Небе́сная врата́ и ковче́гъ, всесвяту́ю го́ру, свѣтоза́рный о́блакъ воспои́мъ, неопали́мую купину́, слове́сный ра́й, Евино воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́яся мíрови и оставле́ніе дре́внихъ согрѣше́ній. Тѣ́мъ и вопіе́мъ Ей: моли́ся Сы́ну Твоему́ и Бо́гу согрѣше́ній оставле́ніе дарова́ти, благоче́стно покланя́ющимся всесвято́му Рождеству́ Твоему́.

Пѣ́снь 4. Ирмо́съ: Услы́шахъ, Го́споди...

Наслажда́шеся бога́тый бра́шномъ и одѣя́ньми, веселя́ся, Ла́зарь же насы́титися жела́ше сего́ трапе́зы крупи́цъ.

Пси́ у́бо облизова́ху язы́комъ ни́щаго Ла́заря стру́пы, сострада́тельнѣйшее быва́юще бога́таго ра́зума ко убо́гому.

Предъ враты́ валя́шеся дре́вле бога́таго, Спа́се, Ла́зарь му́чимь я́звами убо́жества, отону́дуже ны́нѣ прославля́ется.

Богоро́диченъ: Его́же родила́ еси́, Пречи́стая, моли́ спасти́ся воспѣва́ющимъ Тя́ отъ рабо́ты льсти́ваго, я́ко еди́на еси́ на́мъ Предста́тельница.

Инъ. Ирмо́съ: На Крестѣ́ Твое́ Боже́ственное истоща́ніе...

Яко Содѣ́тель человѣ́ческаго естества́, я́ко ми́лости исто́чникъ и благоутро́бія бога́тство, уще́дрилъ еси́, Человѣколю́бче, прибѣ́гницу Твою́ и исхи́тилъ еси́ сію́ губи́тельнаго звѣ́ря.

Кре́стъ ви́дѣти потща́вшися, кре́стнымъ просвѣще́ніемъ, Марíе, озари́лася еси́, Кресто́мъ бесѣ́довавшаго, ма́ніемъ Боже́ственнымъ, распе́ншися мíрови, досточу́дная.

Злы́хъ вина́ пе́рвѣе, сла́сть лука́вая, мно́гимъ бы́вши, а́ки со́лнце просія́вши, всѣмъ наста́вница, преподо́бная, яви́ся согрѣша́ющимъ.

/л. 294Богоро́диченъ: Умъ превозшла́ еси́ и небе́сный, мы́сленное Не́бо всѣ́хъ Царя́: зако́новъ бо естества́ внѣ́, Чи́стая, Законода́теля и Созда́теля всѣ́хъ родила́ еси́.

Пѣ́снь 5. Ирмо́съ: Вску́ю мя́ отри́нулъ еси́...

На Авраа́млихъ нѣ́дрѣхъ Ла́заря бога́тый егда́ узрѣ́ во свѣ́тѣ и сла́вѣ веселя́щася, — о́тче, — взыва́ше, — Авраа́ме, поми́луй мя́, во огни́ осужде́ннаго и язы́комъ лю́тѣ пла́менуема.

Наслади́лся еси́ бога́тствомъ житія́ веселя́ся, — Авраа́мъ глаго́лаше бога́тому, — отню́дуже му́чишися здѣ́ вѣ́чно во огни́ сы́й, ни́щій же въ весе́ліи несконча́емомъ ра́дуется Ла́зарь.

Житія́ пре́лестію бога́тый бы́хъ, я́коже бога́тый житіе́ все́ сластьми́ ижди́вый, Человѣколю́бче, но молю́ Твои́хъ щедро́тъ, е́же свободи́тимися огня́, я́коже спасе́ся Ла́зарь.

Богоро́диченъ: Ма́тернее дерзнове́ніе къ Сы́ну стяжа́вши, Всечи́стая, сро́днаго промышле́нія о на́съ не пре́зри, мо́лимся, я́ко Тя́ и еди́ну, христіа́не, ко Влады́цѣ умилостивле́ніе благопрія́тное предлага́емъ.

Иный. Ирмо́съ: Богоявле́нія Твоего́, Христе́...

Моисе́й просла́вися иногда́ на Сина́и, Бо́жія за́дняя та́инственно ви́дѣвъ пресла́вный, подпису́я стра́нное та́инство: маннопріе́млющія же ста́мны ны́нѣ, о́бразу пречи́стому те́плѣ припа́дши, Марíя а́нгельское житіе́ но́ситъ.

Хра́мъ благолѣ́пія Твоего́ вожделѣ́вши псало́мски ви́дѣти, у́мное же селе́ніе сла́вы Твоея́, Тво́й хра́мъ оскверни́вшая, у́мными моли́твами, Христе́, Твоего́ хра́ма неискусому́жныя бы́вшія, хра́мъ мя́ Вседѣ́тельнаго сотвори́ Ду́ха.

Удою пло́ти, очесы́ мно́гихъ улови́вшая, сла́стію кра́ткою, снѣ́дь же діа́волу си́хъ сотво́ршая, уловлена́ бы́сть всеи́стинно Боже́ственною благода́тію Креста́ Честна́го, сладча́йшая, Христо́ви снѣ́дь бы́вши.

/л. 294 об.Богоро́диченъ: Науче́нъ ли́къ проро́ческій та́инству е́же въ Тебѣ́, та́инственными богоглаго́ланьми, Пречи́стая, Тебе́ многообра́зно предглаго́ла; маннопріе́млющія же ста́мны ны́нѣ, о́бразу пречи́стому сія́ припа́дши, Марíя, спору́чница грѣ́шныхъ къ Бо́гу.

Пѣ́снь 6. Ирмо́съ: Очи́сти мя́, Спа́се...

Бога́тый себе́ пла́меню о́гненному осуди́ сла́стнымъ житіе́мъ, убо́гій же Ла́зарь нищету́ избра́въ въ се́мъ житіи́, сподо́бися несконча́емыя ра́дости.

Въ нѣ́дрѣхъ Авраа́млихъ Ла́зарь сподо́бися вѣ́чнаго живота́, наслажда́яся, огню́ же бога́тый душе́ю и тѣ́ломъ осуди́ся му́чася.

Осужде́нъ е́сть во о́гнь бога́тый, Ла́заря ра́ди. Не осуди́ мене́, окая́ннаго, молю́ся, Человѣколю́бче Го́споди, но, я́ко Ла́заря, свѣ́та мя́ Твоего́ сподо́би.

Богоро́диченъ: Да изба́вимся лю́тыхъ прегрѣше́ній моли́твами Твои́ми, Богома́ти Чи́стая, и да получи́мъ Боже́ственное просвѣще́ніе изъ Тебе́ несказа́нно вопло́щшагося Сы́на Бо́жія.

Иный. Ирмо́съ: Бе́здна послѣ́дняя...

Ра́дуются, Марíе, а́нгельская во́инства, ра́вное преподо́бная житіе́ си́мъ въ тебѣ́ зря́ще, и сла́ву Го́сподеви зову́тъ.

Ужаса́ются бѣсо́въ мра́чныхъ состоя́нія, терпѣли́ваго твоея́ крѣ́пости, я́ко жена́ пресла́вно, и нага́я, и еди́ная си́мъ возмогла́ еси́.

Просія́ла еси́, а́ки со́лнце, Марíе всехва́льная, и пусты́ню чудесы́ всю просвѣти́ла еси́. Тѣ́мже и мене́ свѣ́томъ уясни́.

Богоро́диченъ: Ангели, просвѣти́вшеся сла́вою Рождества́ Твоего́, на земли́ ми́ръ всѣ́мъ на́мъ и благоволе́ніе человѣ́комъ, Дѣ́во, возопи́ша.

/л. 295/

Конда́къ, гла́съ 3. Подо́бенъ: Дѣ́ва дне́сь.

Блуда́ми пе́рвѣе преиспо́лнена вся́ческими, Христо́ва невѣ́ста дне́сь покая́ніемъ яви́ся, а́нгельское жи́тельство подража́ющи, де́моны Креста́ ору́жіемъ погубля́етъ. Сего́ ра́ди Ца́рствія невѣ́ста яви́лася еси́, Марíе пресла́вная.

Икосъ:

Агницу Христо́ву и дще́рь пѣ́сньми восхва́лимъ ны́нѣ Марíю приснопа́мятную, я́вльшуюся еги́петское овча́, и пре́лести си́хъ всея́ избѣже́, и еди́на принесе́ся Це́ркви соверше́нное возраще́ніе, воздержа́ніемъ и моли́твою подвиза́ющися па́че мѣ́ры человѣ́ческаго естества́. Тѣ́мже и возвы́си ея́ и житіе́ и дѣя́ніе, еди́нъ Вседержи́тель, Марíи пресла́вныя.

Пѣ́снь 7. Ирмо́съ: Отъ Іуде́и доше́дше...

Іовъ я́коже дре́вле во гно́ищи черве́й и ка́лѣ лежа́ше, та́коже и предъ враты́ бога́таго Ла́зарь сѣдя́ше, вопія́: оте́цъ Бо́же, благослове́нъ еси́.

Валя́яся предъ враты́ немилосе́рдаго бога́таго дре́вле Ла́зарь, крупи́цъ жела́ше его́ трапе́зы, но никто́же дая́ше ему́, и, вмѣ́сто си́хъ, обрѣ́те Авраа́мля нѣ́дра.

Немилосе́рдаго бога́таго ча́сти, Христе́ мой, изба́ви мя́, молю́ся, и убо́гому Ла́зарю счини́въ мя́, вопи́ти Тебѣ́ благода́рно сподо́би: оте́цъ на́шихъ Бо́же, благослове́нъ еси́.

Богоро́диченъ: Изъ утро́бы дѣ́вственныя Воплоти́выйся, яви́лся еси́ на спасе́ніе на́ше. Тѣ́мже Твою́ Ма́терь вѣ́дуще Богоро́дицу, благода́рно зове́мъ: оте́цъ на́шихъ Бо́же, благослове́нъ еси́.

Иный. Ирмо́съ: Отроцы въ Вавило́нѣ...

Превели́кій во отцѣ́хъ, обхожда́ пусты́ню, Зоси́ма му́дрый, преподо́бную ви́дѣти сподо́бися: благослове́нъ еси́, зове́тъ же, Бо́же оте́цъ на́шихъ.

Что, о́тче, стра́нное вся́кія добродѣ́тели дѣ́тельныя ви́дѣти прише́лъ еси́ жени́ще? — преподо́бная вопія́ше ста́рцу. — Благослове́нъ еси́, зове́тъ же, Бо́же оте́цъ на́шихъ.

/л. 295 об.Умертви́вши блаже́нная страсте́й твои́хъ взыгра́нія, къ безстра́стія ны́нѣ устреми́лася еси́ приста́нищу, зову́щи: благослове́нъ еси́ Го́споди, Бо́же оте́цъ на́шихъ.

Богоро́диченъ: Зачала́ еси́ неизрече́нно, Дѣ́ва пребы́вши, Пречи́стая, и родила́ еси́ мíрови спасе́ніе, Христа́ Бо́га на́шего, тѣ́мже Тя́ вси́ пѣ́сньми, вѣ́рніи, велича́емъ.

Пѣ́снь 8. Ирмо́съ: Седмери́цею пе́щь...

Во оде́жду багря́ную, и ви́ссонъ и порфи́ру бога́тый дре́вле облача́шеся свѣ́тло, окая́нный. Убо́гій же Ла́зарь во вратѣ́хъ сего́ лю́тѣ лежа́ше, крупи́цъ па́дающихъ трапе́зы хотя́ насы́титися, и никто́же подая́ше ему́, тѣ́мже въ сла́вѣ Христу́ сца́рствуетъ.

Во вратѣ́хъ лежа́ше бога́таго Ла́зарь, согни́въ тѣ́ломъ ра́нами, и хотя́ше насыща́тися снѣ́ди, и никто́же дая́ше ему́, но и пси сострада́тельно язы́комъ облизова́ху гной и стру́пы его́, тѣ́мже въ раи́ сла́дости сподо́бися.

Въ сласте́хъ обогатѣ́хъ, я́коже дре́вле бога́тый, облача́яся на вся́къ де́нь въ багряни́цу, и а́зъ, Многоми́лостиве, въ сла́дости житія́ сего́ себе́ осужда́ю, сластьми́ и пре́лестьми. Тѣ́мже молю́ся Тебѣ́, отъ огня́ изба́витися Христе́ вѣ́чнаго, во вся́ вѣ́ки.

Тро́иченъ: Трисвѣ́тлое Божество́, еди́нственную сія́ющую зарю́, отъ еди́наго Тріѵпоста́снаго Естества́, Роди́теля безнача́льна, единоесте́ственна же Сло́ва Отцу́, и сца́рствующа единосу́щна Ду́ха, дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Иный. Ирмо́съ: Ужасни́ся, боя́йся, не́бо...

Глубины́ се́рдца испыту́яй, пре́жде бытія́ предвѣ́дый вся́ на́ша, ну́жнаго житія́ исхити́лъ еси́ прибѣ́гшую къ Тебѣ́, Спа́се, ну́ждно Твоему́ человѣколю́бію вопію́щую немо́лчно: свяще́нницы, благослови́те, лю́діе, превозноси́те во вся́ вѣ́ки.

/л. 296О, измѣне́нія честна́го, къ лу́чшему преложе́нія твоего́, честна́я! О, любве́ боже́ственныя, возненави́дѣвшія плотскíя сла́сти! О, вѣ́ры горя́щія и боже́ственныя, всехва́льная Марíе! Юже вѣ́рно хва́лимъ и превозно́симъ во вѣ́ки.

Обрѣла́ еси́ болѣ́зней возме́здіе и трудо́въ твои́хъ воздая́ніе, честна́я Марíе, и́миже низложи́ла еси́ убíйцу врага́, и ны́нѣ со а́нгелы зове́ши, пѣ́снь немо́лчно вопію́щи и превознося́щи Христа́ во вѣ́ки.

Богоро́диченъ: Всего́ обнови́ мя́ бла́гости ра́ди, во утро́бѣ Твое́й, Чи́стая, не растли́въ обоего́ естества́ сво́йствъ, я́ко всѣ́хъ вѣко́въ Влады́ка, отню́дуже Тя́, я́ко вину́ на́шего спасе́нія, пѣ́сньми пое́мъ во вся́ вѣ́ки.

Пѣ́снь 9. Ирмо́съ: Тя́ Неискусобра́чную...

Убо́гаго мя́ Ла́заря, Христе́, молю́ся, содѣ́лай, сласте́й возжелѣ́нія моя́ потребля́я, я́ко естество́мъ Богъ, добродѣ́тельми же мя́ бога́та сотвори́, да вѣ́рою въ пѣснопѣ́ніихъ велича́ю Тя́.

Бога́тый и немилосе́рдый, у́мъ мо́й презрѣ́хъ, вѣ́рою Твои́хъ за́повѣдей, Человѣколю́бче, предъ враты́ пове́рженъ лю́тѣ, но, я́ко сострада́теленъ и любоще́дръ, возста́ви, я́коже дре́вле четверодне́внаго дру́га Ла́заря.

Вси́ извыко́хомъ при́тчѣ Влады́чнѣй, вси́ у́бо, вѣ́рніи, возненави́димъ бога́таго немилосе́рдное, да му́ки избѣ́гнемъ и въ нѣ́дрѣхъ Авраа́млихъ при́сно лику́имъ.

Богоро́диченъ: Тя́, неви́димаго Бо́га носи́вшую объя́тіи, на небесѣ́хъ пѣва́емаго отъ вся́кія тва́ри, и Тобо́ю на́мъ да́рующаго всегда́ спасе́ніе, въ вѣ́рѣ велича́емъ.

Иный. Ирмо́съ: Не рыда́й Мене́, Ма́ти...

Удо́бь претерпѣ́ла еси́, ма́ти, пусты́нный тру́дъ, укрѣпля́ема держа́вною си́лою Христо́вою: скве́рная бо помышле́нія /л. 296 об./ находя́щая, струя́ми боже́ственныхъ сле́зъ угаси́ла еси́, чи́стая, по́стниковъ высото́, преподо́бныхъ похвало́.

Пресвѣтлѣ́йшими луча́ми просвѣща́етъ тя́, еди́на свѣ́тъ ро́ждшая Христа́ Дѣ́ва и Чи́стая, стра́шную враго́мъ тя́ поставля́етъ, честна́я, я́вственную же всѣ́мъ, Марíе, явля́етъ тя́, страда́лецъ красото́, преподо́бныхъ утвержде́ніе.

Оста́вивши му́дренно земна́я вся́, жили́ще честно́е Ду́ха яви́лася еси́; мірски́хъ у́бо лю́тыхъ свободи́тися, моли́ еди́наго Христа́ свободи́теля, вѣ́рно соверша́ющимъ боже́ственную па́мять твою́.

Богоро́диченъ: Зако́новъ естества́, Дѣ́во, па́че естества́ утаи́вшися, но́вое Отроча́ на земли́ родила́ еси́, Чи́стая, Законода́вца су́ща и Ве́тха де́ньми, мы́сленное не́бо всѣ́хъ Творца́, тѣ́мъ вѣ́рою и любо́вію Тя́ ублажа́емъ.

Свѣти́ленъ воскре́сный. Та́же преподо́бныя. Подо́бенъ: Не́бо звѣзда́ми.

Образъ покая́нія тебе́ иму́ще всепреподо́бная Марíе, Христа́ моли́, во вре́мени поста́, сему́ намъ дарова́тися, я́ко да въ вѣ́рѣ и любви́, тя пѣ́сньми восхва́лимъ.

Богоро́диченъ: Сла́досте а́нгеловъ, скорбя́щихъ ра́досте, христіа́нъ предста́тельнице, Дѣ́во Ма́ти Госпо́дня, заступи́ на́съ, и изба́ви вѣ́чныхъ му́къ.

На хвали́техъ стихи́ры воскре́сны осмогла́сника 4 и восто́чны [анато́ліевы4.

Та́же глаго́лемъ сти́хъ: Воскресни́ Го́споди Бо́же мо́й, да вознесе́тся рука́ Твоя́, [не забу́ди убо́гихъ Твои́хъ до конца́].

И пое́мъ самогла́сенъ, гла́съ 1.

Нѣ́сть Ца́рство Бо́жіе пи́ща и питіе́, но пра́вда и воздержа́ніе со свя́тостію. Тѣ́мже не бога́тіи вни́дутъ въ не́, но ели́цы сокро́вища своя́ въ ру́ки ни́щихъ влага́ютъ. Сія́ и Дави́дъ проро́къ учи́тъ, глаго́ля: пра́веденъ му́жъ, ми́луяй ве́сь де́нь, наслажда́яйся Го́сподеви и во свѣ́тѣ ходя́й, не по́ткнется. Сія́ же вся́ /л. 297/ къ наказа́нію на́шему писа́шася, я́ко да постя́щеся, благосты́ню твори́мъ, и да́стъ на́мъ Госпо́дь вмѣ́сто земны́хъ небе́сная.

Сла́ва, па́ки то́йже. И ны́нѣ: Преблагослове́нна еси́...
Славосло́віе вели́кое. И отпу́стъ. Сла́ва, и ны́нѣ, стихи́ра ева́нгельская, и ча́съ 1-й.




НА ЛИТУРГІИ,

Блаже́нна гла́са. Проки́менъ по гла́су Апо́стола. [И преподо́бныя, гла́съ 4: Ди́венъ Богъ во святы́хъ Свои́хъ, Бо́гъ Изра́илевъ.] Апо́столъ ко Евре́емъ, зача́ло 321 отъ полу́. И преподо́бныя, къ Гала́томъ, зача́ло 208. Аллилу́ія гла́са. [И преподо́бныя, гла́съ 1: Терпя́ потерпѣ́хъ Го́спода и вня́тъ ми́, и услы́ша моли́тву мою́.] Ева́нгеліе отъ Ма́рка, зача́ло 47. И преподо́бныя, отъ Луки́, зача́ло 33. Прича́стенъ: Хвали́те Го́спода съ небе́съ, [хвали́те Его́ въ вы́шнихъ. И преподо́бныя: Въ па́мять вѣ́чную бу́детъ пра́ведникъ, отъ слу́ха зла́ не убои́тся.] На трапе́зѣ же учрежда́емся, я́коже и въ пре́жнихъ Недѣ́ляхъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 291 об. – 297.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.