Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 16.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПОНЕДѢЛЬНИКЪ ШЕСТЫЯ СЕДМИЦЫ ВЕЛИКАГО ПОСТА (ВАІЙ).

ВЪ НЕДѢЛЮ ВЕЧЕРА,
На Го́споди воззва́хъ, поста́вимъ стихо́въ 10 и пое́мъ 4 умили́тельны гла́са осмогла́сника и трипѣ́снца подо́бны. Гла́съ 1. Подо́бенъ: Прехва́льніи му́ченицы.

Обнища́въ, бога́тый Христе́, человѣ́ки обогати́лъ еси́ безсме́ртіемъ и свѣ́тлостію. Тѣ́мже обнища́вшаго сластьми́ житія́, добродѣ́тельми мя́ обогати́, и убо́гому Ла́зарю сочини́, бога́таго мя́ муче́нія избавля́я и гее́нны предлежа́щія мнѣ́.

Зло́бою обогати́хся лю́тѣ, и сла́дость возлюби́хъ, и су́щихъ въ житіи́ наслади́хся сласте́й, Го́споди, и огню́ гее́нны подсужде́нъ бы́хъ: гла́домъ та́юща умо́мъ, я́ко Ла́заря презира́ема, предъ враты́ боже́ственныхъ дѣя́ній пове́ржена, уще́дри мя́, Влады́ко.

Ина стихи́ра, гла́съ то́йже. Подо́бенъ: Облакъ Тя́.

Шесту́ю отъ честны́хъ посто́въ седми́цу, усе́рдно начина́юще, Го́сподеви предпра́зднственное пѣ́ніе ва́ій принесе́мъ, вѣ́рніи: гряду́щему во сла́вѣ, си́лою Божества́ во Іерусали́мъ, умертви́ти /л. 297 об./ сме́рть; тѣ́мже угото́вимъ благоче́стно побѣ́дныя о́бразы, вѣ́тви добродѣ́тельныя, — оса́нна, — вопію́ще Творцу́ всѣ́хъ.

И мине́и 3. Сла́ва, и ны́нѣ, богоро́диченъ.
Вхо́дъ. Свѣ́те ти́хій...

Проки́менъ, гла́съ 8: Да́лъ еси́ достоя́ніе..., со стихи́ его́. Ищи́ въ Недѣ́лю 1-ю поста́, ли́стъ 129. И про́чая, я́коже обы́чно.

На стихо́внѣ самогла́сенъ дне́, два́жды, гла́съ 1:

Чу́денъ Спа́совъ на́съ ра́ди человѣколю́бивый нра́въ, хотя́щихъ у́бо бы́ти ра́зумъ, я́ко настоя́щихъ стяжа́въ, Ла́зарево и бога́таго житіе́ обличи́, обою́ коне́цъ смотря́юще: о́ваго у́бо бѣжи́мъ немилосе́рдія и безчеловѣ́чія; о́ваго же поревну́имъ терпѣ́нію и веледу́шію, во е́же съ ни́мъ во Авраа́млихъ нѣ́драхъ грѣ́емымъ вопи́ти: правосу́де Го́споди, сла́ва Тебѣ́.

Му́чениченъ: Моли́твами, Го́споди, всѣ́хъ святы́хъ и Богоро́дицы, Тво́й ми́ръ да́ждь на́мъ и поми́луй на́съ, я́ко еди́нъ Ще́дръ.

Сла́ва, и ны́нѣ, богоро́диченъ:

Небе́сныхъ чино́въ ра́дованіе, на земли́ человѣ́ковъ крѣ́пкое предста́тельство, Пречи́стая Дѣ́во, спаси́ ны, и́же къ Тебѣ́ прибѣга́ющія, я́ко на Тя́ упова́ніе по Бо́зѣ, Богоро́дице, возложи́хомъ.



[НА УТРЕНИ,]
Въ Понедѣ́льникъ Ва́ій, на у́трени, тро́ичны.

По 1-мъ стихосло́віи сѣда́льны умили́тельны осмогла́сника.

По 2-мъ же стихосло́віи сѣда́ленъ, гла́съ 1. Подо́бенъ: Ка́мени запеча́тану.

Ка́мень отвали́лъ еси́ ожесточе́нія, Го́споди, отъ моего́ се́рдца, умерщвле́нную страстьми́ воздви́гни ду́шу мою́, Благíй, принести́ Тебѣ́ ва́ія добродѣ́телей, я́ко побѣди́телю а́да, во умиле́ніи, Влады́ко, сподо́би, я́ко да вѣ́чный живо́тъ улучу́, пѣсносло́вя Твою́ держа́ву и благоутро́біе Твое́, еди́не Человѣколю́бче. [Два́жды.]

/л. 298Богоро́диченъ: Чу́до чуде́съ, Благода́тная, въ Тебѣ́ зря́щи тва́рь ра́дуется: зачала́ бо еси́ безсѣ́менно и родила́ еси́ неизрече́нно, Его́же чинонача́лія а́нгеловъ ви́дѣти не мо́гутъ, Того́, Богоро́дице, моли́ о душа́хъ на́шихъ.

По 3-мъ стихосло́віи сѣда́ленъ, гла́съ 1. Подо́бенъ: Ка́мени запеча́тану.

Шесту́ю седми́цу поста́ иму́ще, предпра́зднственное пѣ́ніе, ва́ія принесе́мъ Христу́, гряду́щему на́съ ра́ди всѣ́сти на жребя́ти о́сли, язы́ческое подклони́ти, я́ко Ца́рь, безслове́сіе Роди́телю. Вѣ́тви добродѣ́телей Тому́ вси́ угото́вимъ, я́ко да Воскресе́ніе Его́, ра́дующеся, у́зримъ.

Сла́ва, па́ки то́йже. И ны́нѣ, богоро́диченъ:

Ру́цѣ Твои́ боже́ственніи, и́миже Содѣ́теля носи́ла еси́, Дѣ́во Пресвята́я, воплоще́нна Божество́мъ, просте́рши, умоли́ изба́витися на́мъ отъ искуше́ній, и страсте́й, и бѣ́дъ, восхваля́ющимъ Тя́ любо́вію, и вопію́щимъ Тебѣ́: сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ Рождество́мъ Твои́мъ.

Трипѣ́снецъ, гла́съ 1.

Пѣ́снь 1. Ирмо́съ: Пѣ́снь побѣ́дную...

Стра́сти умертви́мъ воздержа́ніемъ и ду́хъ оживи́мъ боже́ственными дѣ́тельми, я́ко да у́зримъ Стра́сть Христо́ву честну́ю чи́стымъ умо́мъ.

Неми́лостиваго поревнова́вша бога́таго нра́вомъ, Ще́дре Человѣколю́бче, молю́ Тя́, сочини́ мя́ Ла́зарю убо́гому, избавля́я мя́ пла́мене и негаси́маго огня́.

Отъ всѣ́хъ пости́хся исправле́ній, въ сы́тость наслади́хся прегрѣше́ній, Го́споди, ны́нѣ у́бо а́лчуща мя́, спаси́тельнымъ и честны́мъ насы́ти бра́шномъ.

Богоро́диченъ: Мене́ осужде́ннаго во осужде́ніи, Пречи́стая Влады́чице, пове́рженнаго дѣ́лы мои́ми, спаси́, уще́дри, всеще́драго Бо́га ро́ждшая.

/л. 298 об.Иный, гла́съ 1. Ирмо́съ: Помо́гшему Бо́гу...

Цвѣтоно́сный пра́здникъ сря́щимъ, вѣ́рніи, предпра́зднствующе его́ дне́сь свѣ́тло, да живоно́сную сподо́бимся Стра́сть ви́дѣти.

Гряде́тъ и и́детъ Христо́съ ко Іерусали́му, я́ко Ца́рь, сѣдя́ на жребя́ти о́сли, язы́ческое подклони́ти безслове́сіе подъ яре́мъ Отцу́.

Тро́иченъ: Въ Божествѣ́ еди́номъ Тріѵпоста́сная Еди́нице, Отче нерожде́нне Бо́же, и Сы́не единоро́дне, и еди́не Святы́й Ду́ше, единоца́рственная держа́во, спаси́ вся́ ны́.

Богоро́диченъ: Пресла́вная возглаго́лашася о Тебѣ́ всю́ду, я́ко родила́ еси́ пло́тію всѣ́хъ Творца́, Богоро́дице Марíе безневѣ́стная и неискусобра́чная.

Сла́ва Тебѣ́, Бо́же на́шъ, сла́ва Тебѣ́.

Се́ гряде́тъ Христо́съ ко гра́ду Виѳсфагíи, ра́дуйся Ла́зарево оте́чество Виѳа́ніе, я́ко тебѣ́ пока́жетъ чу́до ве́ліе, Ла́заря возставля́я изъ ме́ртвыхъ.

Ирмо́съ: Помо́гшему Бо́гу во Еги́птѣ Моисе́ови и тѣ́мъ фарао́на со всево́инствомъ погрузи́вшему, побѣ́дную пѣ́снь пои́мъ, я́ко просла́вися.

Пѣ́снь 8. Ирмо́съ: Его́же ужаса́ются...

Непло́дными обогати́хся, окая́нный, помышле́ньми, ду́шу оскверни́хъ беззако́нными сластьми́, и тма́ окружа́етъ мя́ отча́янія, озари́ мнѣ́ сія́ніе, Бо́же мо́й, покая́нія.

Якоже дре́вле просвѣти́лъ еси́ слѣпа́го отъ рожде́нія, ду́шу мою́ озари́, не ви́дящую свѣ́та Твоего́, Ми́лостиве, но во тмѣ́ лю́таго забве́нія погре́бшуюся и попече́ній жите́йскихъ.

Пости́вся Илія́, отве́рзе небеса́ и ту́чами напои́ жа́ждущую зе́млю; пости́мся, струи́ почерпа́юще душе́вныхъ сле́зъ, я́ко да поми́луемся.

Богоро́диченъ: Яко одушевле́нная лоза́, процвѣла́ еси́ на́мъ Гро́здъ зрѣ́лый, источа́ющій на́мъ, Чи́стая Дѣ́во, вино́ оставле́нія и грѣхо́вное изсуша́ющее пія́нство.

/л. 299Иный. Ирмо́съ: Пѣ́снь Тебѣ́ прино́симъ...

Отве́рзеся преддве́ріе Ла́зарева животво́рія: Христо́съ бо гряде́тъ, я́ко отъ сна́ воздви́гнути уме́ршаго, побори́ти жи́знію сме́рть.

Ве́лія тебѣ́ похвала́, о Виѳа́ніе, я́ко Зижди́теля страннопрія́ти сподо́билася еси́, вопію́щи: благослови́те, дѣла́ Госпо́дня, Го́спода.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Тя́, Пресу́щная Трегу́бая Еди́нице, совокупля́емая въ раздѣле́ніи зра́комъ Ли́цъ, Отца́, и Сы́на, и Ду́ха Боже́ственнаго сла́вимъ.

Богоро́диченъ: Еже ра́дуйся, вѣща́емъ Тебѣ́ со а́нгеломъ, я́ко воздви́гла еси́ ра́дость, Спа́са мíра, Его́же моли́, Дѣ́во Всепѣ́тая.

Сла́ва Тебѣ́, Бо́же на́шъ, сла́ва Тебѣ́.

Пѣ́снь Тебѣ́ прино́симъ, я́ко на жребя́ти но́сишися, въ вы́шнихъ на херуви́мѣхъ восходя́й, да всѣ́хъ повине́ши, Христе́, держа́вѣ Твое́й.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Пѣ́снь Тебѣ́ прино́симъ безпло́тныхъ, я́коже о́троцы въ пещи́, и, пою́ще, глаго́лемъ: благослови́те, вся́ дѣла́ Госпо́дня, Го́спода.

Пѣ́снь 9. Ирмо́съ: Живопріе́мный исто́чникъ...

Умерщвле́нъ бы́въ мно́гими прегрѣше́ньми, небреже́нія во гро́бѣ одержи́мь е́смь, ка́мень отча́янія имѣ́яй надлежа́щій, его́же расто́ргъ, Христе́, Твое́ю ми́лостію, я́коже Ла́заря дре́вле, ны́нѣ воскреси́ мя́.

Бога́таго убѣжи́мъ подража́нія, осужде́ннаго въ пла́мень неугаси́мый, и Ла́заря возлю́бимъ въ болѣ́знехъ терпѣ́ніе, я́ко да отсю́ду на́съ отше́дшихъ Авраа́мъ въ нѣ́дро воспріи́метъ.

Страстоубíйцу по́стъ возлю́бимъ, въ моли́твахъ прилѣ́жно упраздни́мся, пла́чимъ, рыда́имъ и те́плѣ воздо́хнемъ, я́ко да на́съ Іису́съ утѣ́шитъ и Ца́рствія прича́стники содѣ́лаетъ.

Богоро́диченъ: Дѣ́вства боже́ственное сокро́вище, пра́отецъ еди́ное исправле́/л. 299 об./ніе, исто́чникъ, точа́щій благоутро́бія бе́здну, добро́ту Іа́ковлю, Богоро́дицу, Еюже спаса́еміи, воспои́мъ.

Иный. Ирмо́съ: Тебе́ ви́дѣнную...

Дне́сь Христу́ явля́ется, объ ону́ страну́ Іорда́на ходя́щу, болѣ́знь Ла́зарева и, я́ко Провѣ́децъ, глаго́летъ: болѣ́знь сія́ нѣ́сть ны́нѣ къ сме́рти.

Благоугото́вися, Виѳа́ніе, украси́ твоя́ боже́ственныя вхо́ды, разшири́ преддве́рія: се́ бо Влады́ка прихо́дитъ со апо́столы, овча́ Свое́ оживля́я.

Тро́иченъ: Тя́, Тріѵпоста́сную Еди́ницу, и Нераздѣ́льное Существо́, е́же шестокри́льная славосло́вятъ во́инства и человѣ́ческій ро́дъ пѣ́сньми велича́емъ.

Богоро́диченъ: Тя́ отъ Отца́ безлѣ́тно и отъ Ма́тере несказа́нно, въ лѣ́то ро́ждшагося во всѣ́хъ спасе́ніе, я́ко Творца́ и Влады́ку пѣ́сньми велича́емъ.

Сла́ва Тебѣ́, Бо́же на́шъ, сла́ва Тебѣ́.

Съ добротворе́нія вѣ́твьми и чистоты́ нося́ще ва́ія, угото́вимся вси́ Христа́ срѣ́сти, ко Іерусали́му гряду́щаго, я́ко Бо́га на́шего.

Ирмо́съ: Тебе́ ви́дѣнную две́рь Іезекíилемъ проро́комъ, е́юже никто́же про́йде, то́кмо Бо́гъ еди́нъ, Богоро́дице Дѣ́во, пѣ́сньми почита́емъ.

Досто́йно е́сть... И свѣти́ленъ гла́са.

На стихо́внѣ самогла́сенъ, два́жды, гла́съ 5:

Не осуди́ мене́, Христе́, въ пла́мени гее́нстѣмъ, я́коже бога́таго, ра́ди Ла́заря, но да́руй и мнѣ́ пла́чемъ прося́щу, ка́пли человѣколю́бія, Бо́же, и поми́луй мя́.

Му́чениченъ: Благослове́нно во́инство Царя́ Небе́снаго, а́ще бо и земноро́дніи бы́ша страстоте́рпцы, но а́нгельскій са́нъ потща́шася дости́гнути, о тѣлесѣ́хъ небре́гше и страстьми́ свои́ми безпло́тныхъ че́сти сподо́бишася, моли́твами и́хъ, Го́споди, спаси́ ду́ши на́ша.

/л. 300Сла́ва, и ны́нѣ, богоро́диченъ, гла́съ то́йже:

Обра́дованная, хода́тайствуй Твои́ми моли́твами и испроси́ душа́мъ на́шимъ мно́жество щедро́тъ и очище́ніе мно́гихъ прегрѣше́ній, мо́лимся.



НА 6-МЪ ЧАСѢ,
Тропа́рь проро́чества, гла́съ 6:

Се́й е́сть, Бо́же, стра́шный де́нь, его́же дости́гнути ве́чера не надѣ́емся, и сего́ ви́дѣти на́съ человѣколю́бно сподо́билъ еси́, Трисвяты́й, сла́ва Тебѣ́.

Проки́менъ, псало́мъ 104, гла́съ 6: Да возвесели́тся се́рдце и́щущихъ Го́спода. Сти́хъ: Исповѣ́дайтеся Го́сподеви и призыва́йте и́мя Его́.

Проро́чества Иса́іина чте́ніе. [Главы́ 48 и 49.]

Та́ко глаго́летъ Госпо́дь, изба́вивый тя́ Святы́й Изра́илевъ: Азъ е́смь Госпо́дь Бо́гъ тво́й; научи́хъ тя́, е́же обрѣсти́ тебѣ́ пу́ть, по нему́же по́йдеши. И а́ще бы еси́ послу́шалъ за́повѣдей Мои́хъ, то бы́лъ бы у́бо а́ки рѣка́ ми́ръ тво́й, и пра́вда твоя́, я́ко волна́ морска́я. И бы́ло бы я́ко песо́къ сѣ́мя твое́, и исча́дія чре́ва твоего́, я́ко пе́рсть земли́; ниже́ ны́нѣ потреби́шися, ниже́ поги́бнетъ и́мя твое́ предо Мно́ю. Изы́ди отъ Вавило́на, бѣжа́й отъ халде́евъ, гла́съ ра́дости возвести́те, и да слы́шано бу́детъ сіе́, возвѣсти́те да́же до послѣ́днихъ земли́, глаго́лите: изба́ви Госпо́дь раба́ Своего́ Іа́кова. И а́ще вжа́ждутъ, пусты́нею проведе́тъ и́хъ, и во́ду изъ ка́мене изведе́тъ и́мъ: разся́дется ка́мень, и потече́тъ вода́, и испію́тъ лю́діе Мои́. Нѣ́сть ра́доватися нечести́вымъ, глаго́летъ Госпо́дь. Послу́шайте Мене́, о́строви, и внемли́те язы́цы: вре́менемъ мно́гимъ стоя́ти бу́детъ, глаго́летъ Госпо́дь; отъ чре́ва ма́тере Моея́ нарече́ и́мя Мое́. И положи́ уста́ Моя́, я́ко ме́чъ о́стръ, и подъ кро́вомъ руки́ /л. 300 об./ Своея́ скры́ Мя́, положи́ Мя́, я́ко стрѣлу́ избра́нну, и въ ту́лѣ Свое́мъ скры́ Мя́. И рече́ Ми́: ра́бъ Мо́й еси́ Ты́, Изра́илю, и въ Тебѣ́ просла́влюся. Азъ же реко́хъ: вотще́ труди́хся, всу́е и ни во что́ да́хъ крѣ́пость Мою́. Сего́ ра́ди су́дъ Мо́й предъ Го́сподемъ и тру́дъ Мо́й — предъ Бо́гомъ Мои́мъ.

Проки́менъ, псало́мъ 105, гла́съ 6: Благослове́нъ Госпо́дь Бо́гъ Изра́илевъ отъ вѣ́ка и до вѣ́ка. Сти́хъ: Исповѣ́дайтеся Го́сподеви, я́ко бла́гъ, [я́ко въ вѣ́къ ми́лость Его́].

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 297 – 300 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.