Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 15.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВО ВТОРНИКЪ ШЕСТЫЯ СЕДМИЦЫ ВЕЛИКАГО ПОСТА (ВАІЙ).

ВЪ ПОНЕДѢЛЬНИКЪ ВАІЙ ВЕЧЕРА,
По обы́чномъ стихосло́віи, на Го́споди воззва́хъ.., поста́вимъ стихо́въ 6 и пое́мъ настоя́щія подо́бны трипѣ́снца, творе́ніе господи́на Іо́сифа, гла́съ 6. Подо́бенъ: Все́ отло́жше.

Мно́гими прегрѣше́ніи и сластьми́ житія́ неду́гующую стяжа́хъ ду́шу, окая́нный, и лежу́ на одрѣ́ всегда́ лѣ́ности, Влады́ко, и вопію́ Ти́: Ми́лостиве, прише́дъ, посѣ́ти, здра́віе мнѣ́ подая́ и ми́лость, и не оста́ви мя́, да не когда́ усну́ въ сме́рть, и возра́дуется вра́гъ о поги́бели мое́й, ища́й всегда́, Спа́се, во а́дову глубину́ низвести́ мя́.

Немилосе́рдому бога́тому въ безу́міи поревнова́въ, сла́достно веселю́ся, сластьми́ и страстьми́ погружа́яся, и ви́дя лежа́ща всегда́ предъ две́рьми покая́нія, я́коже Ла́заря, ума́ моего́, Го́споди, сего́ нечу́вственно прехожду́, гла́домъ же болѣ́знующа и острупля́ема страстьми́. Тѣ́мже гее́нскому пови́ненъ е́смь пла́мени, отъ него́же изба́ви мя́, Влады́ко, еди́не Многоми́лостиве.

Ина стихи́ра господи́на Ѳео́дора, гла́съ 5. Подо́бенъ: Го́споди, при Моисе́и.

Го́споди, объ ону́ страну́ Іорда́на, пло́тію проходя́, проре́клъ еси́ Ла́зареву болѣ́знь къ сме́рти не бы́ти, но о Твое́й, Бо́га на́шего, сла́вѣ быва́ти. Сла́ва вели́чію дѣ́лъ Твои́хъ и вседержи́тельству Твоему́, я́ко низложи́лъ еси́ сме́рть, за мно́гую ми́лость, Человѣколю́бче.

И мине́и. Сла́ва, и ны́нѣ, богоро́диченъ.

Проки́менъ, псало́мъ 106, гла́съ 4: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́. Сти́хъ: Да реку́тъ изба́вленніи Го́сподемъ, [и́хже изба́ви изъ руки́ врага́].

Бытія́ чте́ніе. [Глава́ 27.]

Бы́сть же, по внегда́ состарѣ́тися Исаа́кови и притупи́шася о́чи его́, е́же ви́дѣти, и призва́ Иса́ва, сы́на своего́ старѣ́йшаго, и рече́ ему́: сы́не мо́й! И рече́: се́ а́зъ. И рече́ Исаа́къ: се́, состарѣ́хся и не вѣ́мъ дне́ сконча́нія моего́; ны́нѣ у́бо возми́ ору́діе твое́, ту́лъ же и лу́къ, и изы́ди на по́ле и улови́ ми́ ло́въ, и сотвори́ ми́ снѣ́ди, я́коже люблю́ а́зъ, и принеси́ ми́, да я́мъ, я́ко да благослови́тъ тя́ душа́ моя́, пре́жде да́же не умру́. Реве́кка же слы́ша глаго́люща Исаа́ка ко Иса́ву, сы́ну своему́. Изы́де же Иса́въ на по́ле улови́ти ло́въ отцу́ своему́. Реве́кка же рече́ ко Іа́кову, сы́ну своему́ ме́ншему: се́, а́зъ слы́шахъ отца́ твоего́ бесѣ́дующа ко Иса́ву, бра́ту твоему́, глаго́люща: принеси́ ми́ ло́въ и сотвори́ ми́ снѣ́ди, да яды́й, благословлю́ тя́ предъ Го́сподемъ, пре́жде не́же умре́ти ми́. Ны́нѣ у́бо, сы́не мо́й, послу́шай мене́, я́коже а́зъ заповѣ́даю ти́: и ше́дъ во о́вцы, пойми́ мнѣ́ отту́ду два́ ко́злища мя́гка и добра́, и сотворю́ я́ снѣ́ди отцу́ твоему́, я́коже лю́битъ, и внесе́ши отцу́ твоему́, и бу́детъ я́сти, я́ко да благослови́тъ тя́ оте́цъ тво́й, пре́жде да́же не у́мретъ. Рече́ же Іа́ковъ къ Реве́кцѣ, ма́тери свое́й: Иса́въ, бра́тъ мо́й, е́сть му́жъ косма́тъ, а́зъ же му́жъ гла́дкій; да не ка́ко ося́жетъ мя́ оте́цъ мо́й, и бу́ду предъ ни́мъ я́ко презира́яй, и наведу́ на себе́ кля́тву, а не благослове́ніе. Рече́ же ему́ ма́ти: на мнѣ́ кля́тва твоя́, ча́до, то́чію послу́шай гла́са моего́, и ше́дъ, принеси́ ми́. Ше́дъ же, взя́, и принесе́ ма́тери; и сотвори́ ма́ти его́ снѣ́ди, я́коже любля́ше оте́цъ его́. И взе́мши Реве́кка оде́жду Иса́ва, сы́на своего́ старѣ́йшаго, до́брую, я́же бы́сть у нея́ въ дому́, облече́ о́ною Іа́кова, сы́на своего́ ме́ньшаго. И ко́жицами козля́чими обложи́ мы́шцы его́ и наго́е вы́и его́. И даде́ снѣ́ди и хлѣ́бы, я́же сотвори́, въ ру́цѣ Іа́кову, сы́ну своему́. И внесе́ отцу́ своему́, и рече́: о́тче! Онъ же рече́: се́ а́зъ; кто́ еси́ ты́, ча́до? И рече́ Іа́ковъ отцу́: а́зъ Иса́въ, пе́рвенецъ тво́й; сотвори́хъ, я́коже ре́клъ ми́ еси́; воста́въ, ся́ди и я́ждь отъ ло́ва моего́, я́ко да благослови́тъ мя́ душа́ твоя́. Рече́ же Исаа́къ сы́ну своему́: что́ сіе́, е́же ско́ро обрѣ́лъ еси́, о ча́до? Онъ же рече́: е́же даде́ Госпо́дь Бо́гъ тво́й предо мно́ю. Рече́ же Исаа́къ Іа́кову: прибли́жися ко мнѣ́, и осяжу́ тя́, ча́до, а́ще ты́ еси́ сы́нъ мо́й Иса́въ, или́ ни́? Прибли́жися же Іа́ковъ ко Исаа́ку, отцу́ своему́, и осяза́ его́, и рече́: гла́съ у́бо, гла́съ Іа́ковль; ру́цѣ же, ру́цѣ Иса́вовѣ. И не позна́ его́, бѣ́стѣ бо ру́цѣ его́, я́ко ру́цѣ Иса́ва, бра́та его́, косма́тѣ; и благослови́ его́. И рече́: ты́ ли еси́, сы́нъ мо́й Иса́въ? Онъ же рече́: а́зъ. И рече́: принеси́ ми́, и я́мъ отъ ло́ва твоего́, ча́до, да благослови́тъ тя́ душа́ моя́. И принесе́ ему́, и яде́; и принесе́ ему́ вино́, и пи́. И рече́ ему́ Исаа́къ, оте́цъ его́: прибли́жися ко мнѣ́ и облобыза́й мя́, ча́до. И прибли́жився, лобыза́ его́. И обоня́ воню́ ри́зъ его́ и благослови́ его́ и рече́: се́, воня́ сы́на моего́, я́ко воня́ ни́вы испо́лнены, ю́же благослови́ Госпо́дь. И да да́стъ тебѣ́ Бо́гъ отъ росы́ небе́сныя и отъ ту́ка земли́, и мно́жество пшени́цы и вина́; и да порабо́таютъ тебѣ́ язы́цы, и да покло́нятся тебѣ́ кня́зи; и бу́ди господи́нъ бра́ту твоему́, и покло́нятся тебѣ́ сы́нове отца́ твоего́; проклина́яй тя́ — про́клятъ; благословля́яй же тя́ — благослове́нъ. И бы́сть, по е́же преста́ти Исаа́ку благословля́ющу Іа́кова сы́на своего́, и бы́сть, егда́ изы́де Іа́ковъ отъ лица́ Исаа́ка отца́ своего́, Иса́въ, бра́тъ его́, пріи́де съ лови́твы. Сотвори́ же и то́й снѣ́ди, и принесе́ отцу́ своему́, и рече́ отцу́: да воста́нетъ оте́цъ мо́й, и да я́стъ отъ ло́ва сы́на своего́, я́ко да благослови́тъ мя́ душа́ твоя́. И рече́ ему́ Исаа́къ, оте́цъ его́: кто́ еси́ ты́? Онъ же рече́: а́зъ е́смь сы́нъ тво́й, пе́рвенецъ Иса́въ. Ужасе́ся же Исаа́къ у́жасомъ ве́ліимъ зѣло́, и рече́: кто́ у́бо улови́вый мнѣ́ ло́въ и принесы́й ми́, и ядо́хъ отъ всѣ́хъ, пре́жде не́же пріити́ тебѣ́? И благослови́хъ его́, и благослове́нъ бу́детъ. Бы́сть же, егда́ услы́ша Иса́въ глаго́лы отца́ своего́ Исаа́ка, возопи́ гла́сомъ ве́ліимъ и го́рькимъ зѣло́, и рече́: благослови́ у́бо и мене́, о́тче! Рече́ же ему́: прише́дъ бра́тъ тво́й съ ле́стію, взя́ благослове́ніе твое́. И рече́ (Иса́въ): пра́ведно нарече́ся и́мя ему́: Іа́ковъ. Запя́ бо мя́ се́ уже́ втори́цею: и пе́рвенство мое́ взя́, и ны́нѣ взя́ благослове́ніе мое́. И рече́ Иса́въ отцу́ своему́: не оста́вилъ ли еси́ (и) мнѣ́ благослове́нія, о́тче? Отвѣща́въ же Исаа́къ, рече́ Иса́ву: а́ще господи́на его́ сотвори́хъ тебѣ́ и всю́ бра́тію его́ сотвори́хъ рабы́ ему́; пшени́цею и вино́мъ утверди́хъ его́; тебѣ́ же что́ сотворю́, ча́до? Рече́ же Иса́въ ко отцу́ своему́: еда́ еди́но е́сть благослове́ніе у тебе́, о́тче? Благослови́ у́бо и мене́, о́тче! Умили́вшуся же Исаа́ку, возопи́ гла́сомъ ве́ліимъ Иса́въ, и воспла́кася. Отвѣща́въ же Исаа́къ, оте́цъ его́, рече́ ему́: се́, отъ ту́ка земли́ бу́детъ вселе́ніе твое́ и отъ росы́ небе́сныя свы́ше; и мече́мъ твои́мъ жи́ти бу́деши и бра́ту твоему́ порабо́таеши; бу́детъ же (вре́мя), егда́ низложи́ши и отрѣши́ши яре́мъ его́ отъ вы́и твоея́. И враждова́ше Иса́въ на Іа́кова о благослове́ніи, и́мже благослови́ его́ оте́цъ его́.

Проки́менъ, псало́мъ 107, гла́съ 7: Вознеси́ся на небеса́, Бо́же, и по все́й земли́ сла́ва Твоя́. Сти́хъ: Гото́во се́рдце мое́, Бо́же, гото́во се́рдце мое́, [воспою́ и пою́ во сла́вѣ мое́й].

При́тчей чте́ніе. [Глава́ 19.]

Иже храни́тъ за́повѣди, соблюда́етъ свою́ ду́шу, а нерадя́й о свои́хъ путе́хъ поги́бнетъ. Ми́луяй ни́ща взаи́мъ дае́тъ Бо́гови, по дая́нію же его́ возда́стся ему́. Наказу́й сы́на твоего́, та́ко бо бу́детъ благонаде́женъ, въ досажде́ніе же не взе́млися душе́ю твое́ю. Злоу́менъ му́жъ мно́го отщети́тся, а́ще же губи́тель е́сть, и ду́шу свою́ приложи́тъ. Слу́шай, сы́не, отца́ твоего́ наказа́нія, да му́дръ бу́деши въ послѣ́дняя твоя́. Мно́ги мы́сли въ се́рдцы му́жа, совѣ́тъ же Госпо́день во вѣ́къ пребыва́етъ. Пло́дъ му́жеви — ми́лостыня; лу́чше же ни́щъ пра́ведный, не́жели бога́тъ — лжи́въ. Стра́хъ Госпо́день въ живо́тъ му́жеви, а безстра́шный водвори́тся на мѣ́стѣхъ, идѣ́же не наблюда́ется ра́зумъ. Скрыва́яй въ нѣ́дрѣхъ ру́цѣ свои́ непра́ведно, ниже́ ко усто́мъ свои́мъ принесе́тъ я́. Губи́телю ра́ны пріе́млющу, безу́мный кова́рнѣе бу́детъ, а́ще же облича́еши му́жа разу́мна, уразумѣ́етъ чу́вство.

На стихо́внѣ самогла́сенъ дне́, два́жды, гла́съ 4:

Душевре́днаго лихои́мства свободи́, Спа́се, и съ Ла́заремъ убо́гимъ въ нѣ́дрѣхъ Авраа́мовыхъ причти́ на́съ, Ты́ бо въ ми́лостехъ бога́тъ, Сы́й, во́лею на́съ ра́ди обнища́лъ еси́ и отъ тли́ на нетлѣ́ніе преве́лъ еси́, я́ко ми́лостивъ Бо́гъ, и Человѣколю́бецъ.

Му́чениченъ: Святы́хъ му́ченикъ пріе́мый терпѣ́ніе и отъ на́съ пріими́ пѣ́ніе, Человѣколю́бче, да́руй на́мъ тѣ́хъ моли́твами ве́лію ми́лость.

Сла́ва, и ны́нѣ, богоро́диченъ:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́но Предста́тельство ду́шъ на́шихъ.



[НА УТРЕНИ,]
Во вто́рникъ ва́ій, на у́трени, тро́ичны гла́са.

По 1-мъ стихосло́віи сѣда́льны умили́тельны осмогла́сника два́, съ богоро́дичнымъ.

По 2-мъ стихосло́віи сѣда́ленъ господи́на Іо́сифа, гла́съ 6. Подо́бенъ: Ангельскія.

Грѣхо́внымъ неду́гомъ истаява́емь, на одрѣ́ отча́янія низлежу́, тѣ́мже мя́, Врачу́ боля́щихъ, посѣти́ Твои́мъ человѣколю́біемъ, и не оста́ви мя́ усну́ти лю́тѣ въ сме́рть, Всеще́дрый, да вопію́ Ти́ те́плѣ: ми́лости пода́телю, Го́споди, сла́ва Тебѣ́.

Сла́ва, то́йже. И ны́нѣ, богоро́диченъ:

Нача́ло спасе́нія Гавріи́лово провѣща́ніе къ Дѣ́вѣ бы́сть, слы́ша бо, е́же ра́дуйся, не отбѣже́ цѣлова́нія, не усумнѣ́ся, я́ко Са́рра въ сѣ́ни, но, си́це глаго́лаше: се́, раба́ Госпо́дня, бу́ди Мнѣ́ по глаго́лу твоему́.

По 3-мъ стихосло́віи сѣда́ленъ, господи́на Ѳео́дора, гла́съ 5. Подо́бенъ: Сія́етъ дне́сь.

Вчера́ и дне́сь болѣ́знь Ла́зарева, сію́ бо Христу́ явля́ютъ сро́дницы. Ра́достію, Виѳа́ніе, угото́вися, Жизнода́вца угости́ти и Царя́, съ на́ми вопію́щи: Го́споди, сла́ва Тебѣ́.

Сла́ва, то́йже. И ны́нѣ, богоро́диченъ, гла́съ то́йже:

Ма́ти Бо́жія Всесвята́я, Стѣно́ христіа́нъ, изба́ви лю́ди Твоя́ обы́чно, зову́щія Ти́ прилѣ́жно: противоста́ни скве́рнымъ и возносли́вымъ помысло́мъ, да вопіе́мъ Ти́: ра́дуйся, Приснодѣ́во.

Кано́нъ мине́и и трипѣ́снецъ господи́на Іо́сифа, гла́съ 6.
И стихосло́вится пѣ́снь.

Пѣ́снь 2.

Ирмо́съ: Ви́дите, ви́дите, я́ко Азъ е́смь Бо́гъ, ма́нну одожди́вый и во́ду изъ ка́мене источи́вый дре́вле въ пусты́ни лю́демъ Мои́мъ десни́цею еди́ною и крѣ́постію Мое́ю.

Во́лею обнища́лъ еси́, естество́мъ бога́тый, Христе́; взалка́лъ еси́ пости́вся, насыща́яй вся́кое живо́тно. Тѣ́мъ мя́ насы́ти а́лчущаго Твоея́ благода́ти и покажи́ та́мошнія трапе́зы, Сло́ве, о́бщника.

Ла́заря ни́щаго мя́ покажи́ грѣхо́въ, Христе́, и расточи́ бога́тство, е́же злѣ́ собра́хъ, и соверше́нное Твое́ любле́ніе, Ще́дре, испо́лнивъ, та́мошняго изба́ви мя́ муче́нія стра́шнаго.

Отроки обостри́въ си́льнѣйшія огня́, иногда́ въ Вавило́нѣ содѣ́ла по́стъ, тѣ́мъ поревнова́вши, о душе́ моя́, не уныва́й, и о́гнь сладостра́стей Ду́ха угаси́ши росо́ю.

Богоро́диченъ: Ра́дуйся! — Тебѣ́ вопіе́мъ, ро́ждшей ра́дость, Богоро́дице Дѣ́во обра́дованная, Бо́га. Его́же родила́ еси́, умоли́ изба́витися отъ бѣ́дъ и тли́, воспѣва́ющимъ Тя́ при́сно.

Иный, господи́на Ѳео́дора, гла́съ 5. Ирмо́съ: Ви́дите, ви́дите...

Ви́дите, ви́дите, я́ко Азъ е́смь Бо́гъ, объ ону́ страну́ Іорда́на ходя́й, слы́шавъ, я́ко Ла́зарь боли́тъ, и рекíй: я́ко не у́мретъ, но е́сть сіе́ о сла́вѣ Мое́й.

Рыда́ніемъ обложи́вшеся Ла́заревы сестры́, стра́сть Тебѣ́, Вѣдѣ́телю, всѣ́хъ явля́ютъ, но пребыва́еши ма́ло, да воздви́гнеши чу́до и пока́жеши ученико́мъ Твои́мъ стра́шная.

Тро́иченъ: Единоца́рственная, Тріѵпоста́сная Еди́нице, Госпо́дство и Ца́рство вѣко́въ, Тя́ сла́вятъ Отца́, и Сы́на, и Свята́го Ду́ха, мно́жество а́нгелъ и все́ естество́ человѣ́ческое.

Богоро́диченъ: Кто́ не диви́лся бы, зря́ въ Тебѣ́ Содѣ́теля, Дѣ́во, назда́вшаго Ада́ма па́дшаго, несказа́ннымъ соедине́ніемъ изъ Тебе́ пло́тію рожде́нна, неизмѣ́нно, во спасе́ніе на́ше.

Сла́ва Тебѣ́, Бо́же на́шъ, сла́ва Тебѣ́.

Ны́нѣ украси́ся, о Виѳа́ніе, ра́достію, сотвори́вши прія́телище Царя́ всѣ́хъ, я́ко пріи́детъ къ тебѣ́, да Ла́заря пока́жетъ па́ки теку́ща отъ тлѣ́нія въ живо́тъ.

Ирмо́съ: Ви́дите, ви́дите, я́ко Азъ е́смь Бо́гъ, въ пло́ть облекíйся во́лею Мое́ю, да спасу́ Ада́ма, отъ ле́сти па́дшаго въ преступле́ніе змíемъ.

Пѣ́снь 8. Ирмо́съ: Изъ пла́мене преподо́бнымъ...

Помышля́ю мно́жество согрѣше́ній, и уя́звленъ жа́ломъ со́вѣсти, я́коже въ пла́мени болю́, окая́нный, уще́дри мя́, Сло́ве Бо́жій, Твое́ю ми́лостію.

Презрѣ́въ Ла́зарева исправле́нія, неми́лостиваго бога́таго нра́вомъ позави́дѣхъ, Благоутро́бне Бо́же, обрати́въ мя́, уще́дри, да Тя́ сла́влю во вѣ́ки вся́.

Душе́вною болѣ́знію одержи́мь и умре́ти хотя́ отча́яніемъ, Твоего́, Іису́се, посѣще́нія тре́бую, оживотвори́вшаго Тебе́ призыва́ющія.

Богоро́диченъ: Пресвята́я Дѣ́во, Ты́ мя́ спаси́, мое́й не́мощи бу́ди по́мощь, Воли́теля ми́лости роди́вшая, Его́же превозно́симъ во вся́ вѣ́ки.

Иный. Ирмо́съ: Преподо́бніи Твои́ о́троцы...

Ра́дуйся, Виѳа́ніе, Ла́зарево оте́чество, въ тебѣ́ бо Христо́съ предста́въ, вели́чіе соверши́тъ, оживи́въ Ла́заря.

Ла́зарь болѣ́знуетъ, да Ты́ просла́вишися, Сы́не Бо́жій, о не́мъ, и пою́тъ Тя́ непреста́нно дѣла́ вся́, Го́спода.

Благослови́мъ Отца́, и Сы́на, и Свята́го Ду́ха, Го́спода.

[Трои́ченъ:] Тро́ицу Всесвяту́ю во Отцѣ́, и Сы́нѣ, и Ду́хѣ, воспѣва́юще, пое́мъ: благослови́те, дѣла́ Госпо́дня, Го́спода.

Богоро́диченъ: Неизрече́нное Твое́ Рождество́ вси́ пое́мъ, Чи́стая, и чту́ще Его́, я́ко Бо́га, благослови́мъ вся́ дѣла́, я́ко Содѣ́теля и Го́спода.

Сла́ва Тебѣ́, Бо́же на́шъ, сла́ва Тебѣ́.

Добродѣ́телей вѣ́тви къ срѣ́тенію Христо́ву гото́вяще, ны́нѣ зове́мъ: благослови́те, дѣла́ Госпо́дня, Го́спода.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Преподо́бніи Твои́ о́троцы въ пещи́, Христе́, воспѣва́юще, глаго́лаху: благослови́те, вся́ дѣла́, Госпо́дня Го́спода.

Пѣ́снь 9. Ирмо́съ: Бо́га человѣ́комъ...

Пре́жде вкуше́ніе го́рькое человѣ́ка первозда́ннаго лю́тѣ изъ рая́ изгна́ и сме́рти сѣ́ти припряже́. Пости́ся, о душе́ моя́, бѣ́гай подража́нія, бѣ́гай наслажде́нія сла́сти многоболѣ́зненныя.

Во у́мъ пріе́млю Твое́ суди́ще и пла́мень неугаси́мый, Судіе́ Пра́веднѣйшій, себе́ осужда́ю пре́жде суда́, ужасо́хся бо и трепе́щу, безмѣ́рно прегрѣши́въ Тебѣ́, я́ко и́нъ никто́же на земли́. Тѣ́мже молю́ Тя́: уще́дри мя́.

Страсте́й измы́емся омраче́нія, просвѣти́тельными моли́твами и, добродѣ́телей вѣ́тви нося́ще, срѣ́сти Христа потщи́мся, на жребя́ти ча́ема ны́нѣ всѣ́сти, гото́вящажеся страда́ти, за е́же спасти́ на́съ.

Богоро́диченъ: Изъ Тебе́, Дѣ́во Богоблагода́тная, въ нощи́ страсте́й одержи́мымъ, возсія́ свѣ́та и ми́ра Христо́съ пода́тель, отъ невня́тія разрѣша́яй преступле́ніе и избавле́ніе на́мъ я́вѣ да́руяй.

Иный. Ирмо́съ: Иса́іе, лику́й...

Ны́нѣ мертвогро́бная гото́ви, Ла́заре му́дре, сконча́ешися бо отъ жи́зни, у́тро умре́ти имы́й. Гро́бъ узри́, въ о́ньже всели́шися, но тебе́ Христо́съ па́ки оживи́тъ, воздви́гъ четверодне́вна.

Виѳа́ніе, лику́й, къ тебѣ́ бо пріи́детъ Христо́съ, чу́до соверша́я ве́ліе и стра́шное, связа́въ сме́рть, воскреси́тъ вся́ко, я́ко Бо́гъ, Ла́заря уме́ршаго и Зижди́теля велича́юща.

Тро́иченъ: Еди́но Существо́ Тя́ воспѣва́ю, Безнача́льная Тро́ице, Честна́я Живонача́льная, Несѣко́мая Еди́нице: Отче нерожде́нне, и рожде́нне Сло́ве и Сы́не, и Ду́ше Святы́й, спаси́ на́съ пою́щихъ Тя́.

Богоро́диченъ: Па́че ума́ Рождество́ Твое́, Богома́ти, безъ му́жа бо зача́тіе въ Тебѣ́ и дѣ́вственное рождество́ бы́сть, и́бо Бо́гъ е́сть рожде́йся, Его́же велича́юще, Тя́, Дѣ́во, ублажа́емъ.

Сла́ва Тебѣ́, Бо́же на́шъ, сла́ва Тебѣ́.

Пріиди́те, угото́вимъ Го́сподеви къ срѣ́тенію, вѣ́тви добродѣ́телей нося́ще Ему́: та́ко бо Его́ пріи́мемъ, я́коже во гра́дѣ Іерусали́мѣ въ души́ на́шей, покланя́ющеся и пою́ще Его́.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Свѣти́ленъ.

На стихо́внѣ самогла́сенъ дне́, два́жды, гла́съ 5:

Поползну́вшися прегрѣше́ньми, и плени́цами согрѣше́ній свя́зана, о душе́, что́ уныва́еши, что́ лѣни́шися? Бѣ́гай при́сно, я́коже Ло́тъ Содо́мы и Гомо́рры, нечистоты́ запале́нія; не возвраща́йся вспя́ть, и бу́деши, я́ко сто́лпъ со́льный; на горѣ́ спаса́йся добродѣ́телей, бѣ́гай при́сно немилосе́рднаго бога́таго, безутро́бія горе́нія. Въ нѣ́дра прейди́ Авраа́мова, я́ко Ла́зарь, смиренному́дріемъ возопíй: Упова́ніе мое́ и Прибѣ́жище мое́, Го́споди, сла́ва Тебѣ́.

Му́чениченъ: Страстоте́рпцы Твои́, Го́споди, чи́ны а́нгельскія подража́вше, я́ко безпло́тни му́ки претерпѣ́ша, единомы́сленное упова́ніе иму́ще, обѣща́нныхъ благи́хъ наслажде́ніе. Тѣ́хъ моли́твами, Христе́ Бо́же на́шъ, ми́ръ да́руй мíрови Твоему́ и душа́мъ на́шимъ ве́лію ми́лость.

Сла́ва, и ны́нѣ, богоро́диченъ:

Тебѣ́ мо́лимся, я́ко Бо́жіи Ма́тери, Благослове́нная, моли́ о спасе́ніи ду́шъ на́шихъ.



НА 6-МЪ ЧАСѢ,
Тропа́рь проро́чества, гла́съ 5:

Необори́мую Стѣ́ну да́лъ еси́ гра́ду на́шему, Ро́ждшую Тя́ Дѣ́ву; То́ю, Спа́се, отъ окружа́ющихъ злы́хъ изми́, мо́лимся, ду́ши на́ша.

Проки́менъ, псало́мъ 108, гла́съ 4: Помози́ ми́, Го́споди Бо́же мо́й, и спаси́ мя́ по ми́лости Твое́й. Сти́хъ: Бо́же, хвалы́ моея́ не премолчи́, [я́ко уста́ грѣ́шнича и уста́ льсти́ваго на мя́ отверзо́шася].

Проро́чества Иса́іина чте́ніе. [Глава́ 49.]

Та́ко глаго́летъ Госпо́дь: се́, да́хъ Тя́ въ завѣ́тъ ро́да, во свѣ́тъ язы́комъ, е́же бы́ти Тебѣ́ во спасе́ніе, да́же до послѣ́днихъ земли́. Та́ко глаго́летъ Госпо́дь, изба́вивый Тя́, Бо́гъ Изра́илевъ: освяти́те Уничижа́ющаго ду́шу Свою́, Гнуша́емаго отъ язы́къ рабо́въ кня́жескихъ. Ца́ріе у́зрятъ Его́, и воста́нутъ кня́зи и покло́нятся Ему́, Го́спода ра́ди, я́ко вѣ́ренъ е́сть Святы́й Изра́илевъ, и избра́хъ Тя́. Та́ко глаго́летъ Госпо́дь: во вре́мя прія́тно послу́шахъ Тебе́, и въ де́нь спасе́нія помого́хъ Ти́, и сотвори́хъ Тя́, и да́хъ Тя́ въ завѣ́тъ вѣ́чный язы́ковъ, е́же устро́ити зе́млю и наслѣ́дити наслѣ́дія пусты́ни, глаго́люща су́щимъ во у́захъ: изыди́те; и су́щимъ во тмѣ́: откры́йтеся. На всѣ́хъ путе́хъ пасти́ся бу́дутъ и на всѣ́хъ стезя́хъ па́жить и́хъ. Не вза́лчутъ, ниже́ вжа́ждутъ, ниже́ порази́тъ и́хъ зно́й, ниже́ со́лнце, но Ми́луяй и́хъ утѣ́шитъ и́хъ.

Проки́менъ, псало́мъ 109, гла́съ 4: Ты́ Іере́й во вѣ́къ, по чи́ну Мелхиседе́кову. Сти́хъ: Рече́ Госпо́дь Го́сподеви моему́: сѣди́ одесну́ю Мене́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 300 об. – 305 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.