Церковный календарь
Новости


2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 2-я (1993)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 1-я (1993)
2017-09-14 / russportal
Свт. Игнатій (Брянчаниновъ). Понятіе о ереси и расколѣ (1996)
2017-09-14 / russportal
Свт. Игнатій (Брянчаниновъ). Жизнь схимонаха Ѳеодора (1996)
2017-09-13 / russportal
Прот. Константинъ Зноско. Краткій обзоръ причинъ, пород. Литовскую церк. унію (1993)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 10-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 9-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 8-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 7-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 6-я (1987)
2017-09-12 / russportal
Іером. Серафимъ (Роузъ). "Душа послѣ смерти". Глава 9-я (1991)
2017-09-12 / russportal
Іером. Серафимъ (Роузъ). "Душа послѣ смерти". Глава 8-я (1991)
2017-09-12 / russportal
Прот. Григорій Дьяченко. Поуч. (2-е) на пер. мощей св. бл. кн. Александра Невскаго (1900)
2017-09-12 / russportal
Прот. Григорій Дьяченко. Поуч. (1-е) на пер. мощей св. бл. кн. Александра Невскаго (1900)
2017-09-11 / russportal
Прот. Григорій Дьяченко. Поученіе "Безмолвный обличитель убійцы" (1900)
2017-09-11 / russportal
Прот. Григорій Дьяченко. Поученіе "Возмездіе за грѣхъ" (1900)
Новости въ видѣ
RSS-канала: .
Сегодня - среда, 20 сентября 2017 г. Сейчасъ на порталѣ посѣтителей - 17.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ СРЕДУ ШЕСТЫЯ СЕДМИЦЫ ВЕЛИКАГО ПОСТА (ВАІЙ).

ВО ВТОРНИКЪ ВЕЧЕРА,
Обы́чное стихосло́віе. На Го́споди воззва́хъ.., поста́вимъ стихо́въ 6 и пое́мъ стихи́ры подо́бны господи́на Іо́сифа, гла́съ 2. Подо́бенъ: Егда́ отъ дре́ва.

Всѣ́ми прило́ги лука́ваго многостра́стное мое́ се́рдце изнемо́гшее, гро́бу сно́сится уны́нія лю́тѣ и, я́ко ка́менемъ, покрыва́ется нечу́вствіемъ, Спа́се. Дре́вомъ живоно́снаго Твоего́ Креста́ вся́ су́щія во а́дѣ ожи́вивый, возста́ви мя́, оживи́, я́ко да стра́хомъ Твое́ сла́влю Божество́.

Бога́тство сласте́й тлетво́рныхъ, лука́ваго дѣ́йствомъ всегда́ возлюби́хъ, су́етно веселя́ся несмы́сленный, ума́ же презрѣ́хъ, я́ко Ла́заря ина́го, стеня́ща, а́лчуща Боже́ственныхъ бра́шенъ, Сло́ве, пла́мене бу́дущаго изба́ви мя́ Твои́мъ благоутро́біемъ, я́ко да сла́влю Тя́, Человѣколю́бца.

Ина господи́на Ѳео́дора, гла́съ 3. Подо́бенъ: Поста́виша.

Дне́сь и́здше Ла́зарь и рыда́етъ сего́ Виѳа́нія, его́же, Спа́се на́шъ, воздвиза́еши отъ ме́ртвыхъ и предувѣря́еши друго́мъ Твои́мъ, Воскресе́нія Твоего́ стра́шное, а́дово умерщвле́ніе и Ада́мово оживле́ніе, сего́ ра́ди пое́мъ Тя́.

И мине́и 3. Сла́ва, и ны́нѣ, [кресто]богоро́диченъ.

Проки́менъ, псало́мъ 110, гласъ 4: Нача́ло прему́дрости — стра́хъ Госпо́день, [ра́зумъ же бла́гъ всѣ́мъ творя́щимъ и́]. Сти́хъ: Исповѣ́мся Тебѣ́, Го́споди, всѣ́мъ се́рдцемъ моимъ́, [въ совѣ́тѣ пра́выхъ и со́нмѣ].

Бытія́ чте́ніе. [Глава́ 31.]

Рече́ Госпо́дь ко Іа́кову: возврати́ся въ зе́млю отца́ твоего́ и въ ро́дъ тво́й; и бу́ду съ тобо́ю. Посла́въ же Іа́ковъ, призва́ Лíю и Рахи́ль на по́ле, идѣ́же бя́ху стада́. И рече́ и́мъ: ви́жду а́зъ лице́ отца́ ва́шего, я́ко нѣ́сть ко мнѣ́, я́коже вчера́ и тре́тіяго дне́; Бо́гъ же отца́ моего́ бѣ́ со мно́ю; и вы́ са́ми вѣ́сте, я́ко все́ю си́лою мое́ю рабо́тахъ отцу́ ва́шему, оте́цъ же ва́шъ оби́дѣ мя́, и измѣни́ мзду́ мою́ десяти́ а́гнцевъ; но не даде́ ему́ Бо́гъ зла́ сотвори́ти мнѣ́. Аще си́це рече́тъ: пе́стрыя бу́детъ твоя́ мзда́; и родя́тся вся́ о́вцы пе́стрыя. Аще же рече́тъ: бѣ́лыя бу́детъ твоя́ мзда́; и родя́тся вся́ о́вцы бѣ́лыя. И отъя́ Бо́гъ вся́ скоты́ отца́ ва́шего, и даде́ я́ мнѣ́. И бы́сть, егда́ зачина́ху о́вцы, во чре́вѣ пріе́млюще, и ви́дѣхъ очи́ма мои́ма во снѣ́, и се́ козлы́ и овны́ восходя́ще бя́ху на о́вцы и ко́зы, бѣлова́тыя и пе́стрыя, и пепелови́дныя пе́стрыя. И рече́ ми́ а́нгелъ Бо́жій во снѣ́: Іа́кове! Азъ же рѣ́хъ: что́ е́сть? И рече́: воззри́ очи́ма твои́ма и ви́ждь козлы́ и овны́ восходя́щія на о́вцы и ко́зы бѣ́лыя, и пе́стрыя, и пепелови́дныя пе́стрыя; ви́дѣхъ бо, ели́ка тебѣ́ Лава́нъ твори́тъ. Азъ е́смь Бо́гъ, яви́выйся тебѣ́ на мѣ́стѣ Бо́жіи, идѣ́же пома́залъ Ми́ еси́ та́мо сто́лпъ и обѣтова́лъ Ми́ еси́ та́мо обѣ́тъ; ны́нѣ у́бо воста́ни и изы́ди отъ земли́ сея́, и иди́ въ зе́млю рожде́нія твоего́, и бу́ду съ тобо́ю. И отвѣща́вше Рахи́ль и Лíя, реко́стѣ ему́: еда́ е́сть на́мъ еще́ ча́сть или́ наслѣ́діе въ дому́ отца́ на́шего? Не я́ко ли чужíя вмѣни́хомся ему́? Продаде́ бо на́съ и снѣде́ снѣ́дію сребро́ на́ше. Все́ бога́тство и сла́ва, ю́же отъя́ Бо́гъ отъ отца́ на́шего, на́мъ бу́детъ и ча́домъ на́шимъ; ны́нѣ у́бо, ели́ка тебѣ́ рече́ Бо́гъ, твори́.

Проки́менъ, псало́мъ 111, гла́съ 4: Ми́лостивъ, и ще́дръ, и пра́веденъ, [бла́гъ му́жъ ще́дря и дая́]. Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

При́тчей чте́ніе. [Глава́ 21.]

Сы́не, твори́ти пра́ведная и и́стинствовати уго́дна Бо́гу, па́че не́жели же́ртвъ кро́вь. Велему́дрый во укори́знѣ — дерзосе́рдъ, свѣти́ло же нечести́выхъ — грѣси́. Помышле́нія тщали́ваго во изоби́ліи, и вся́къ неради́вый въ лише́ніи. Дѣ́лаяй сокро́вища язы́комъ лжи́вымъ, су́етная го́нитъ въ сѣ́ти сме́ртныя. Всегуби́тельство на нечести́выя устремля́ется, не хотя́тъ бо твори́ти пра́ведная. Къ стро́потнымъ стро́потныя пути́ посыла́етъ Бо́гъ, чи́ста бо и пра́ва дѣла́ Его́. Лу́чше жи́ти во у́глѣ непокрове́нномъ, не́жели въ пова́пленныхъ, съ непра́вдою, и въ хра́минѣ о́бщей. Душа́ нечести́ваго не поми́луется ни отъ еди́наго отъ человѣ́ковъ. Тщету́ пріе́млющу невозде́ржному, кова́рнѣйшій бу́детъ незло́бивый, разумѣва́яй же му́дрый пріи́метъ ра́зумъ. Разумѣва́етъ пра́ведный сердца́ нечести́выхъ и уничтожа́етъ нечести́выя въ злы́хъ. Иже затыка́етъ ушеса́ своя́, е́же не послу́шати немощна́го, и то́й призове́тъ и не бу́детъ послу́шаяй его́. Дая́ніе та́йно отвраща́етъ гнѣ́вы, щадя́й же даро́въ воздвиза́етъ я́рость крѣ́пкую. Весе́ліе пра́ведныхъ твори́ти су́дъ, преподо́бный же нечи́стъ у злодѣ́евъ. Му́жъ, заблужда́яй отъ пути́ пра́вды, въ со́нмищи исполи́новъ почíетъ. Му́жъ ску́денъ лю́битъ весе́ліе, любя́й же вино́ и еле́й не обогати́тся. Отре́біе же пра́веднику — беззако́нникъ. Лу́чше жи́ти въ земли́ пу́стѣ, не́же жи́ти съ жено́ю сварли́вою, и язы́чною и гнѣвли́вою. Сокро́вище вожделѣ́нно почíетъ во устѣ́хъ му́драго, безу́мніи же му́жи пожира́ютъ е́. Пу́ть пра́вды и ми́лостыни обря́щетъ живо́тъ и сла́ву.

На стихо́внѣ самогла́сенъ дне́, два́жды, гла́съ 1:

Въ багряни́цу самоде́ржства боготка́нную и въ червлени́цу нетлѣ́нія одѣ́явшися, о душе́ моя́, свое́ досто́инство поруга́ла еси́, бога́тство и наслажде́ніе, грѣ́хъ сотвори́вши, и презира́ющи своего́ сплеме́нника, я́коже презрѣ́ ни́щаго Ла́заря бога́тый. Но да не со о́нѣмъ му́чена бу́деши, обнища́й ду́хомъ, и, обнища́вшему тебе́ ра́ди, Го́сподеви возопíй: багряни́цею поруга́нія пре́жде распя́тія оболкíйся, и на́гъ на Крестѣ́ распны́йся мене́ ра́ди, Твоего́ Ца́рствія одѣя́ніемъ, отъ студа́ вѣ́чнаго, Христе́, изба́ви мя́.

Му́чениченъ: О, до́брыя ку́пли ва́шея, святíи! Яко кро́ви да́сте и небеса́ наслѣ́довасте, и вре́менно искуси́вшеся, вѣ́чно ра́дуетеся. Вои́стинну до́брая ва́ша ку́пля: тлѣ́нная бо оста́вльше, нетлѣ́нная воспрія́сте и, со а́нгелы лику́юще, пое́те непреста́нно Тро́ицу Единосу́щную.

Сла́ва, и ны́нѣ, крестобогоро́диченъ. Подо́бенъ: Прехва́льніи му́ченицы.

Ме́чь про́йде, о Сы́не, — Дѣ́ва глаго́лаше, на Дре́вѣ я́ко узрѣ́ Христа́ ви́сяща, — Мое́ се́рдце, и терза́етъ, Влады́ко, я́коже дре́вле Симео́нъ Мнѣ́ предрече́, но воста́ни, и спросла́ви, Безсме́ртне, Ма́терь и рабу́ Твою́, молю́ся.



[НА УТРЕНИ,]
Въ сре́ду ва́ій, на у́трени, тро́ичны гла́са.

По 1-мъ стихосло́віи сѣда́льны кре́стны осмогла́сника, два́, съ крестобогоро́дичнымъ.

По 2-мъ же стихосло́віи сѣда́ленъ господи́на Іо́сифа, гла́съ 2. Подо́бенъ: Ка́мень гро́бный.

Яко ка́менемъ отягче́нъ мно́гими грѣха́ми, во гро́бѣ лежу́ небреже́нія, Ще́дре, отъ него́же мя́ возведи́, Благоутро́бне Го́споди. [Два́жды.]

[Сла́ва, и ны́нѣ,] крестобогоро́диченъ. Подо́бенъ: Милосе́рдія.

Честны́мъ Кресто́мъ Сы́на Твоего́ соблюда́еми, Влады́чице Чи́стая Богоро́дице, вся́кій прило́гъ бори́теля вси́ удо́бь отража́емъ. Тѣ́мже Тя́ по до́лгу прославля́емъ, я́ко Ма́терь Свѣ́та, и еди́ну наде́жду ду́шъ на́шихъ.

По 3-мъ стихосло́віи сѣда́ленъ, господи́на Ѳео́дора, гла́съ 3. Подо́бенъ: Красотѣ́ дѣ́вства.

Дне́сь Ла́зарь уме́рый погреба́ется, и рыда́ніе пою́тъ сего́ сро́дницы, я́коже Прови́децъ и Бо́гъ, стра́сть предре́клъ еси́: Ла́зарь у́спе, — ученико́мъ провѣща́я, — но ны́нѣ иду́ воскреси́ти, его́же созда́хъ. Сего́ ра́ди Тебѣ́ вси́ вопіе́мъ: сла́ва держа́вѣ крѣ́пости Твоея́. [Два́жды.]

[Сла́ва, и ны́нѣ,] крестобогоро́диченъ:

Неискусобра́чная Чи́стая и Ма́ти Твоя́, Христе́, зря́щи Тя́ ме́ртва ви́сяща на Дре́вѣ, Ма́терски рыда́ющи, глаго́лаше: что́ Ти́ воздаде́ евре́йскій беззако́нный собо́ръ безблагода́тный, мно́гихъ и вели́кихъ Твои́хъ даро́въ, Сы́не Мо́й, наслажде́йся? Пою́ Твое́ Боже́ственное снизхожде́ніе.

Кано́нъ въ мине́и и трипѣ́снецъ господи́на Іо́сифа, гла́съ 2.

Пѣ́снь 3. Ирмо́съ: Непло́дствовавшій мо́й у́мъ...

Си́лою Креста́ Твоего́ укрѣпи́въ у́мъ мо́й, изнемо́гшій прило́гми лука́выми, къ хотѣ́нію Твоему́ напра́ви, Го́споди.

Уны́нія дрема́ніемъ, на одрѣ́ спя́ща мя́ сласте́й, воздви́гни, Го́споди, и Твои́мъ Страсте́мъ покло́нника покажи́.

Просвѣти́вшеся душа́ми, посто́мъ чи́сты усрѣ́сти по́йдемъ Христа́, ко Іерусали́му гряду́щаго пло́тію.

Богоро́диченъ: Неопали́вшаяся Огне́мъ Божества́, Чи́стая, попали́ моя́ ве́щная стремле́нія страсте́й, я́ко да вѣ́рно, Чи́стая, сла́влю Тя́.

Иный. Гла́съ 3. Ирмо́съ: Непло́дная душе́...

Дне́сь Ла́зарь уме́рый, не утаи́ся всеви́дящаго о́ка Іису́сова, тѣ́мже сказу́етъ сіе́ ученико́мъ, вопія́: Ла́зарь, дру́гъ на́шъ, у́спе, воскреси́ти его́ иду́.

Во Іуде́ю, Го́споди, па́ки ити́ ре́къ, ученики́ устраши́лъ еси́, но де́рзостно вопія́ше Ѳома́: Живо́тъ е́сть, и́демъ, а́ще у́бо и у́мремъ, а́біе оживе́мъ.

Тро́иченъ: Тро́ице Единосу́щная, Вседержи́телю Отче, Сы́не Собезнача́льный, съ Сопресто́льнымъ Боже́ственнымъ Ду́хомъ, еди́но поклоне́ніе, Бо́жество несозда́нное, Тебе́ пое́мъ вси́ человѣ́цы.

Богоро́диченъ: Дѣ́во Ма́ти Пречи́стая, Ко́реню Іессе́овъ, отъ него́же Христо́съ возсія́, живоно́сный Цвѣ́тъ земноро́дныхъ, Еюже изба́вихомся тли́ и сме́рти, Тя́ пое́мъ вси́, Чи́стая.

Сла́ва Тебѣ́, Бо́же на́шъ, сла́ва Тебѣ́.

Ра́дуйся, Сіо́не, ны́нѣ гряде́тъ Ца́рь тво́й кро́токъ, я́коже проро́къ возопи́, и но́ситъ жребя́ Сего́ пло́тски, руко́ю Свое́ю вся́ содержа́щаго; пое́мъ держа́ву Его́.

Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.

Пѣ́снь 8. Ирмо́съ: Въ купинѣ́ Моисе́ю...

Смире́нныя моея́ души́ тя́жкій ка́мень лю́таго уны́нія отвали́, Христе́, и воздви́гни мя́ отъ гро́ба нечу́вствія въ сла́ву Твою́, Сло́ве.

Сме́рть дру́га Твоего́ предсказа́лъ еси́ друго́мъ, за милосе́рдіе ми́лости, Прови́дче и Бо́же, его́же имѣ́лъ еси́ воздви́гнути изъ гро́ба четверодне́вна къ Твоему́ славосло́вію.

Во Іуде́ю па́ки, Христе́, гряде́ши, и́щущую Жи́зни Тя́ Дре́во, дре́вомъ уби́ти, жела́я обезсме́ртвити умерщвле́нныя дре́ва снѣ́дію.

Богоро́диченъ: Въ Тебѣ́, Дѣ́во Чи́стая, ви́дѣна бы́ша вся́ ше́ствія Бо́га, сохра́ншаго Твою́ чистоту́ по рождествѣ́, запечатлѣ́нну я́вѣ во вся́ вѣ́ки.

Иный. Ирмо́съ: Изъ Безнача́льнаго Отца́...

Ла́зарь дне́сь уме́рый изно́сится, дру́гъ Христо́въ, и рыда́ютъ су́щіи съ Марíею и Ма́рѳою вси́; Христо́съ же ра́достію прихо́дитъ къ нему́, показа́ти лю́демъ, я́ко То́й е́сть Живо́тъ всѣ́хъ.

Яко изъ горы́ Елео́нскія, отъ высоты́ ми́лостыней, добродѣ́телей вѣ́твіе, лю́діе, сѣку́ще, пріиди́те, угото́вимъ къ на́мъ мы́сленно прише́ствіе Христо́во, пою́ще, благословя́ще Его́ и превознося́ще во вся́ вѣ́ки.

Благослови́мъ Отца́, и Сы́на, и Свята́го Ду́ха, Го́спода.

Тро́иченъ: Тріѵпоста́сная Еди́нице, Отче, Сы́не и Ду́ше Живы́й, еди́но Божество́, еди́но Ца́рство, Тя́ хва́лятъ Незаходи́маго Свѣ́та а́нгельская во́инства, и мы́, земнíи, пое́мъ, благослови́мъ и превозно́симъ во вся́ вѣ́ки.

Богоро́диченъ: Се́ вси́ ро́дове блажи́мъ Тя́, Пречи́стая, вели́чія Твоя́ зря́ще: Ты́ бо ражда́еши преесте́ственно всѣ́хъ Творца́, Бо́га су́ща и Человѣ́ка. Тѣ́мже Тя́ благослови́мъ и превозно́симъ во вѣ́ки.

Сла́ва Тебѣ́, Бо́же на́шъ, сла́ва Тебѣ́.

Со о́троки и мы́ усря́щимъ Христа́ Бо́га, вмѣ́сто ва́ій принося́ще ми́лостыню, въ моли́твѣ серде́чнѣй, съ вѣ́твьми, — оса́нна, — вопію́ще, — благослови́те и превозноси́те Его́ во вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Изъ Безнача́льнаго Отца́ рожде́ннаго пре́жде вѣ́къ Бо́га и въ послѣ́дняя отъ Богоро́дицы въ пло́ть обле́кшася, я́ко соверше́нна Человѣ́ка и Бо́га и́стинна, по́йте, благослови́те и превозноси́те во вся́ вѣ́ки.

Пѣ́снь 9. Ирмо́съ: Отъ земноро́дныхъ кто́...

Даніи́лъ, посто́мъ огражде́нъ, загради́ уста́ звѣре́й. Сему́ ревну́ющи, душе́ моя́, рыка́ющаго, я́коже льва́, змíя и и́щущаго бра́шно сотвори́ти вся́кую ду́шу, Кре́стною по́мощію отжени́.

Сло́ве Бо́жій, умерщвле́нную грѣха́ми ду́шу мою́ и затворе́нную во гро́бѣ преступле́нія, животода́тельнымъ Твои́мъ сло́вомъ воскреси́въ, принести́ Тебѣ́ вѣ́тви добродѣ́телей, Побѣди́телю сме́рти, сподо́би.

Не́бо, я́ко престо́лъ имѣ́яй, и подно́жіе — зе́млю, Бо́га Отца́ Сло́во, на жребя́ти носи́мь, во гра́дъ вхо́дитъ святы́й, изъ у́стъ младе́нецъ хвалу́ кра́сную, я́ко Ца́рь, всѣ́хъ соверши́ти.

Богоро́диченъ: Въ жена́хъ Ты́ еди́на украси́лася еси́, о Пречу́дная Чи́стая! Краснѣ́йшее Сло́во роди́вши, па́че всѣ́хъ человѣ́къ я́вльшагося Краснѣ́йша, Того́ у́бо моли́ скве́рну очи́стити, Дѣ́во, се́рдца моего́.

Иный. Ирмо́съ: На Сина́йстѣй горѣ́...

Надгро́бныя сле́зы излива́ютъ Ла́заревы сестры́, зря́щія сро́дника дне́сь подъ ка́менемъ го́рькимъ. Христо́съ же мо́й, издале́ча сіе́ сказу́я, глаго́лаше апо́столомъ Свои́мъ: ра́дуюся ва́съ ра́ди, не бѣ́хъ бо пло́тію та́мо.

Па́ки гряде́тъ къ тебѣ́, убíйце Іуде́е, Христо́съ, спаси́тельную Стра́сть жела́я испо́лнити, я́ко Бо́гъ. Его́же иска́ла еси́ ка́меніемъ уби́ти, се́ къ тебѣ́ самозва́нъ хотя́ прихо́дитъ ко убíйству твоему́, во е́же спасти́ на́съ.

Тро́иченъ: Божество́ Еди́ница и Тро́ица е́сть. О, пресла́внаго обраще́нія! Соединя́емая Естество́мъ, дѣли́тся Ли́цы, сво́йственно; несѣко́ма бо сечѣ́тся, Еди́но су́щи Трои́тся; сія́ Оте́цъ е́сть, Сы́нъ, и Ду́хъ Живы́й, соблюда́ющая все́.

Богоро́диченъ: Дѣторо́дную дѣ́ву кто́ слы́ша и ма́терь безъ му́жа? Марíе, соверша́еши чу́до, но скажи́ ми́, ка́ко? — Не испыту́й глубины́ Богорожде́нія Моего́: сіе́ всеи́стинное, па́че человѣ́ча ума́, постиже́ніе.

Сла́ва Тебѣ́, Бо́же на́шъ, сла́ва Тебѣ́.

Отъ фи́никъ ва́ія спле́тше мы́сленно, и чу́вственно срѣ́теніе Влады́цѣ сотвори́мъ, гряду́щему къ на́мъ, и́бо благослове́нъ Гряды́й во и́мя Го́спода же и Отца́, я́ко Сы́нъ и́стинный.

Ирмо́съ: На Сина́йстѣй горѣ́, ви́дѣ Тя́ въ купинѣ́ Моисе́й, неопа́льно Огнь Божества́ заче́ншую во чре́вѣ; Даніи́лъ же Тя́ ви́дѣ го́ру несѣко́мую; же́злъ прозя́бшій, Иса́ія взыва́ше, отъ ко́рене Дави́дова.

Свѣти́ленъ гла́са.

На стихо́внѣ стихи́ра самогла́сна дне́, два́жды, гла́съ 1:

Изра́иль въ порфи́ру и червлени́цу облача́шеся, оде́ждами свяще́нными и ца́рскими сія́я, зако́номъ же и проро́ки богатѣ́я, зако́нными слу́жбами веселя́шеся, но Тебе́, обнища́вшаго, распе́нъ внѣ́ вра́тъ, Благодѣ́телю, и жи́ва по распя́тіи отмета́яся, въ нѣ́драхъ Бо́га Отца́ присносу́щнаго, жа́ждетъ ка́пли благода́ти, я́коже бога́тый неми́лостивый отъ Ла́заря убо́гаго, и́же въ порфи́рѣ и червлени́цѣ, въ негаси́мый о́гнь вше́дъ, и, ви́дя, болѣ́знуетъ, пе́рвѣе крупи́цъ и́стины ску́дныя лю́ди язы́ческія, ны́нѣ въ нѣ́дрѣхъ вѣ́ры Авраа́ма грѣ́ющіяся, Твоея́ кро́ве багряни́цу съ червлени́цею креще́нія нося́щія, и Твои́ми оби́лующія и наслажда́ющіяся дарова́ніи, и глаго́лющія: Христе́ Бо́же на́шъ, сла́ва Тебѣ́.

Му́чениченъ: Ва́съ, прехва́льніи му́ченицы, ни ско́рбь, ни тѣснота́, ни гла́дъ, ни гоне́ніе, ниже́ ра́ны, ни я́рость звѣре́й, ни ме́чь, ниже́ о́гнь претя́й, разлучи́ти отъ Бо́га возмого́ша, любо́вію же па́че къ Нему́, я́ко въ чужди́хъ, подви́гшеся тѣлесѣ́хъ, естество́ забы́сте, сме́рть презрѣ́вше. Тѣ́мже и по достоя́нію болѣ́зней ва́шихъ мзду́ прія́сте, небе́снаго Ца́рствія наслѣ́дницы бы́сте, моли́теся о душа́хъ на́шихъ.

Сла́ва, и ны́нѣ, крестобогоро́диченъ. Подо́бенъ: Всехва́льніи му́ченицы.

Ви́дящи ви́сима, Христе́, чи́сто Ро́ждшая Тя́, Повѣ́сившаго на вода́хъ зе́млю, Человѣколю́бче, взыва́ше: увы́ Мнѣ́, что́ стра́нное видѣ́ніе, ка́ко за́йде добро́та Твоя́, Сладча́йшій Сы́не, безмѣ́рная? Велича́ю Твою́ ми́лость, я́ко стра́ждеши во́лею за всѣ́хъ.



НА 6-МЪ ЧАСѢ,
Тропа́рь проро́чества, гла́съ 5:

Ми́лости Твоя́, Го́споди, сотвори́ съ на́ми, и не преда́ждь на́съ беззако́ніемъ на́шимъ, Святы́й Влады́ко Вседержи́телю, Тебѣ́ мо́лимся.

Проки́менъ, псало́мъ 112, гла́съ 4: Хвали́те, о́троцы, Го́спода, хвали́те и́мя Госпо́дне. Сти́хъ: Бу́ди и́мя Госпо́дне благослове́но отъ ны́нѣ и до вѣ́ка.

Проро́чества Иса́іина чте́ніе. [Глава́ 58.]

Та́ко глаго́летъ Госпо́дь: возопíй крѣ́постію и не пощади́, я́ко трубу́ возвы́си гла́съ тво́й, и возвѣсти́ лю́демъ Мои́мъ грѣхи́ и́хъ и до́му Іа́ковлю беззако́нія и́хъ. Мене́ де́нь отъ дне́ и́щутъ и разумѣ́ти пути́ Моя́ жела́ютъ, я́ко лю́діе, пра́вду сотвори́вшіи и суда́ Бо́га своего́ не оста́вившіи; про́сятъ ны́нѣ у Мене́ суда́ пра́ведна и прибли́житися ко Го́споду жела́ютъ, глаго́люще: что́, я́ко пости́хомся, и не уви́дѣлъ еси́? Смири́хомъ ду́ши на́ша, и не увѣ́дѣлъ еси́? Во дни́ бо поще́ній ва́шихъ обрѣта́ете во́ли ва́ша и вся́ подру́чныя ва́ша томите́. Аще въ судѣ́хъ и сва́рѣхъ постите́ся и біе́те пястьми́ смире́ннаго, вску́ю Мнѣ́ постите́ся, я́коже дне́сь, е́же услы́шану бы́ти съ во́племъ гла́су ва́шему? Не сицева́го поста́ Азъ избра́хъ, и дне́, е́же смири́ти человѣ́ку ду́шу свою́. Ниже́ а́ще сляче́ши, я́ко се́рпъ, вы́ю твою́, и вре́тище и пе́пелъ посте́леши — ниже́ та́ко нарече́те по́стъ прія́тенъ. Не такова́го (бо) поста́ Азъ избра́хъ, глаго́летъ Госпо́дь, но разрѣша́й вся́къ соу́зъ непра́вды, разруша́й обдолже́нія наси́льныхъ писа́ній, отпусти́ сокруше́нныя въ свобо́ду и вся́кое писа́ніе непра́ведное раздери́. Раздробля́й а́лчущимъ хлѣ́бъ тво́й, и ни́щія безкро́вныя введи́ въ до́мъ тво́й; а́ще ви́диши на́га, одѣ́й, и отъ сво́йственныхъ пле́мене твоего́ не пре́зри. Тогда́ разве́рзется ра́но свѣ́тъ тво́й, и исцѣле́нія твоя́ ско́ро возсія́ютъ, и преды́детъ предъ тобо́ю пра́вда твоя́, и сла́ва Бо́жія обы́метъ тя́. Тогда́ воззове́ши, и Бо́гъ услы́шитъ тя́, и еще́ глаго́лющу ти́, рече́тъ: се́ пріидо́хъ. Аще оты́меши отъ себе́ соу́зъ, и рукобіе́ніе и глаго́лъ ропта́нія, и да́си а́лчущему хлѣ́бъ отъ души́ твоея́ и ду́шу смире́нную насы́тиши, тогда́ возсія́етъ во тмѣ́ свѣ́тъ тво́й и тма́ твоя́ бу́детъ, я́ко полу́дне. И бу́детъ Бо́гъ тво́й съ тобо́ю при́сно.

Проки́менъ, псало́мъ 113, гла́съ 6. Благослове́ни вы́ Го́сподеви, сотво́ршему не́бо и зе́млю. Сти́хъ: Не́бо небесе́ Го́сподеви, зе́млю же даде́ сыново́мъ человѣ́ческимъ.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 306 – 310 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.