Церковный календарь
Новости


2017-11-20 / russportal
Архіеп. Аверкій (Таушевъ). Будемъ ли мы, наконецъ, каяться? (1975)
2017-11-20 / russportal
Архіеп. Аверкій (Таушевъ). Готовимся ли мы къ Великому посту? (1975)
2017-11-20 / russportal
Генералъ П. Н. Красновъ. Мысли о конницѣ (1933)
2017-11-20 / russportal
Генералъ П. Н. Красновъ. Сибирскіе казаки (1934)
2017-11-20 / russportal
"Пропов. хрестоматія". Поученіе (2-е) на соборъ св. Архистратига Михаила (1965)
2017-11-20 / russportal
"Пропов. хрестоматія". Поученіе (1-е) на соборъ св. Архистратига Михаила (1965)
2017-11-18 / russportal
Ген. П. Н. Красновъ. "Старая Академія". Глава 8-я (1932)
2017-11-18 / russportal
Ген. П. Н. Красновъ. "Старая Академія". Глава 7-я (1932)
2017-11-18 / russportal
Л. Д. Перепелкина. Юліанскій календарь - 1000-лѣтняя икона времени на Руси (1989)
2017-11-18 / russportal
Проф. П. В. Верховской. Патріархъ Тихонъ (1919)
2017-11-17 / russportal
Ген. П. Н. Красновъ. "Старая Академія". Глава 6-я (1932)
2017-11-17 / russportal
Ген. П. Н. Красновъ. "Старая Академія". Глава 5-я (1932)
2017-11-17 / russportal
Ген. П. Н. Красновъ. №100 (Къ юбилею "Часового") (1933)
2017-11-17 / russportal
Генералъ П. Н. Красновъ. Подъ какимъ лозунгомъ? (1933)
2017-11-17 / russportal
Слова преп. Симеона Новаго Богослова. Слово 36-е (1882)
2017-11-17 / russportal
Слова преп. Симеона Новаго Богослова. Слово 35-е (1882)
Новости въ видѣ
RSS-канала: .
Сегодня - вторникъ, 21 ноября 2017 г. Сейчасъ на порталѣ посѣтителей - 16.
Церковно-богослужебныя книги

ТРІОДІОНЪ, СІЕСТЬ ТРИПѢСНЕЦЪ,
Съ Бо́гомъ Святы́мъ, обдержа́й подоба́ющее ему́ послѣ́дованіе.
[Изданіе Кіево-Печерской Успенской Лавры. Кіевъ, 1864.]

СЛУЖБА ВЪ ПЯТОКЪ ШЕСТЫЯ СЕДМИЦЫ ВЕЛИКАГО ПОСТА (ВАІЙ).

ВЪ ЧЕТВЕРТОКЪ ВЕЧЕРА,
Обы́чное стихосло́віе. На Го́споди воззва́хъ.., поста́вимъ стихо́въ 6 и пое́мъ стихи́ры подо́бны господи́на Іо́сифа, гла́съ 4. Подо́бенъ: Зва́нный свы́ше.

Апо́стольская дво́ица свяще́ннѣйшая, Еди́наго Тя́ отъ Тро́ицы вѣ́дущи, Христе́, ны́нѣ Тобо́ю посыла́ется привести́ жребя́, подъяре́мнича сы́на, я́коже пи́сано е́сть, на не́мже, смиря́яся, вся́деши, Благоутро́бне, въ вы́шнихъ во́лею сѣда́лище всѣ́мъ, лю́бящимъ Тя́, уготовля́я, и въ безслове́сныя прони́кшія, умовре́дно, Сло́ве, стра́сти, слове́сныя содѣва́еши, оса́нна Тебѣ́ взыва́ющія.

Пріими́, Сіо́не, Царя́: се́ тебѣ́ Кротча́йшій во́лею предста́нетъ, Воскреси́вый Ла́заря и Разруши́вый сме́рти го́рькое ца́рство. Мно́жество богособра́нное свяще́нныхъ мона́ховъ съ просто́ю ча́дію собери́теся, усрѣ́сти съ ва́іемъ Христа́, зову́ще: благослове́нъ Гряды́й спасти́ ро́дъ человѣ́чь Стра́стію Креста́, и безстра́стіе всѣ́мъ пода́ти за бла́гость.

Ина стихи́ра подо́бна господи́на Ѳео́дора, гла́съ 8. Подо́бенъ: Иже во Еде́мѣ.

На серафи́мѣхъ стра́шныхъ въ вы́шнихъ, Христе́, носи́мый, я́ко Бо́гъ же и всѣ́хъ Творе́цъ, Са́мъ на жребя́ на земли́ всѣ́сти и́деши, я́ко сы́й по на́мъ человѣ́чески. Виѳа́нія весели́тся, пріи́мши Тя́, Спа́се; Іерусали́мъ ра́дуется, я́ко ча́яй Тя́ прія́ти; сме́рть умертви́ся, предощути́вши Ла́заря пріити́ изъ ме́ртвыхъ; и мы́ съ ва́іями срѣ́теніе соверша́юще въ ра́дости, воспѣва́имъ держа́ву бла́гости Твоея́, Го́споди.

И въ мине́и 3. Сла́ва, и ны́нѣ, [кресто]богоро́диченъ.

Проки́менъ, псало́мъ 119, гла́съ 6: Ко Го́споду, внегда́ скорбѣ́ти ми́, воззва́хъ и услы́ша мя́. Сти́хъ: Го́споди, изба́ви ду́шу мою́ отъ усте́нъ непра́ведныхъ и отъ язы́ка льсти́ва.

Бытія́ чте́ніе. [Глава́ 46.]

Воста́въ Изра́иль са́мъ и вся́ су́щая его́, пріи́де ко кла́дязю кля́твенному и пожре́ же́ртву Бо́гу отца́ своего́ Исаа́ка. Рече́ же Бо́гъ ко Изра́илю въ видѣ́ніи но́щію, глаго́ля: Іа́кове, Іа́кове! Онъ же рече́: что́ е́сть? Онъ же рече́ ему́: Азъ е́смь Бо́гъ отце́въ твои́хъ; не убо́йся изы́ти во Еги́петъ: въ язы́къ бо ве́лій сотворю́ тя́ та́мо. И Азъ сни́ду съ тобо́ю во Еги́петъ, и Азъ возведу́ тя́ до конца́, и Іо́сифъ возложи́тъ ру́ки своя́ на о́чи твои́. Воста́ же Іа́ковъ отъ кла́дязя кля́твеннаго; и взя́ша сы́нове Изра́иля отца́ своего́, и стяжа́ніе, и жены́ своя́ на колесни́цы, я́же посла́ Іо́сифъ взя́ти его́. И взе́мше имѣ́нія своя́ и все́ стяжа́ніе, е́же стяжа́ша въ земли́ Ханаа́нстѣй, внидо́ша во Еги́петъ Іа́ковъ и все́ сѣ́мя его́ съ ни́мъ. Сы́нове и сы́нове сыно́въ его́ съ ни́мъ, дще́ри и дще́ри дще́рей его́, и все́ сѣ́мя свое́ введе́ во Еги́петъ.

Проки́менъ, псало́мъ 120, гла́съ 6: Госпо́дь да сохрани́тъ тя́ отъ вся́каго зла́, сохрани́тъ ду́шу твою́ Госпо́дь. Сти́хъ: Возведо́хъ о́чи мои́ въ го́ры, отню́дуже пріи́детъ по́мощь моя́.

При́тчей чте́ніе. [Глава́ 23.]

Сы́не, а́ще прему́дро бу́детъ се́рдце твое́, возвесели́ши мое́ се́рдце. И пребу́дутъ въ словесѣ́хъ твои́хъ устнѣ́ къ мои́мъ устна́мъ, а́ще пра́ва бу́дутъ. Да не ревну́етъ се́рдце твое́ грѣ́шникомъ, но въ стра́сѣ Госпо́дни бу́ди ве́сь де́нь. Аще бо соблюде́ши я́, бу́дутъ ти́ вну́цы и упова́ніе твое́ не отсту́питъ. Слу́шай, сы́не, и прему́дръ быва́й, и исправля́й мы́сли твоего́ се́рдца. Не бу́ди винопíйца, ниже́ прилага́йся къ сложе́ніемъ и купова́ніемъ мя́съ. Вся́къ бо пія́ница и блудни́къ обнища́етъ, и облече́тся въ раздра́нная и въ ру́бища вся́къ сонли́вый. Слу́шай, сы́не, отца́, роди́вшаго тя́, и не презира́й, егда́ состарѣ́ется, ма́ти твоя́. Истину стяжи́ и не отри́ни му́дрости, и уче́нія, и ра́зума. До́брѣ воспитова́етъ оте́цъ пра́веденъ, о сы́нѣ же прему́дрѣмъ весели́тся душа́ его́. Да весели́тся оте́цъ и ма́ти о тебѣ́, и да ра́дуется ро́ждшая тя́. Да́ждь ми́, сы́не, твое́ се́рдце, о́чи же твои́ моя́ пути́ да соблюда́ютъ. Сосу́дъ бо сокруше́нъ чуждíй до́мъ и студене́цъ тѣ́сенъ чуждíй. Се́й бо вско́рѣ поги́бнетъ и вся́кій законопресту́пникъ потреби́тся. Кому́ го́ре, кому́ молва́, кому́ су́дове, кому́ го́рести и сва́ры, кому́ сокруше́нія вотще́, кому́ си́ни о́чи? Не пребыва́ющимъ ли въ винѣ́, и не назира́ющимъ ли, гдѣ́ пи́рове быва́ютъ?! Не упива́йтеся вино́мъ, но бесѣ́дуйте къ человѣ́комъ пра́веднымъ и бесѣ́дуйте въ прохо́дѣхъ. Аще бо на ча́ши и сткля́ницы вда́си о́чи твои́, послѣди́ и́маши ходи́ти нажа́йшій бѣли́льнаго дре́ва. Послѣди́ же, я́ко отъ змíя уя́звенъ, простре́тся, и я́коже отъ кера́ста разлива́ется ему́ я́дъ. Очи твои́ егда́ у́зрятъ (жену́) чужду́ю, уста́ твоя́ тогда́ возглаго́лютъ стро́потная, и возля́жеши, я́ко въ се́рдцѣ мо́ря, и я́коже ко́рмчій во мно́зѣ волне́ніи. Рече́ши же: би́ша мя́, и не поболѣ́хъ, и поруга́шася ми́, а́зъ же не разумѣ́хъ, когда́ у́тро бу́детъ, да ше́дъ взыщу́, съ ни́ми же сни́дуся. Сы́не, не ревну́й муже́мъ злы́мъ, ниже́ возжелѣ́й бы́ти съ ни́ми: лжа́мъ бо поуча́ется се́рдце и́хъ и болѣ́зни устнѣ́ и́хъ глаго́лютъ. Съ прему́дростію зи́ждется до́мъ и съ ра́зумомъ исправля́ется, съ чу́вствіемъ исполня́ются сокро́вища отъ вся́каго бога́тства честна́го и до́браго. Лу́чше му́дрый крѣ́пкаго, и му́жъ, ра́зумъ имѣ́яй, земледѣ́льца вели́ка.

На стихо́внѣ самогла́сенъ дне́, два́жды, гла́съ 8:

Бога́таго неми́лостиваго подо́бія и непода́тнаго нра́ва изба́ви мя́, Христе́ Бо́же, Кресто́мъ Твои́мъ очище́ніе грѣхо́въ на́шихъ сотвори́вый. Ла́заря же ни́щаго благода́рственному терпѣ́нію ревни́теля покажи́ и нѣ́дръ патріа́рха Авраа́ма не отчужди́ мене́, вели́кія ра́ди Твоея́ ми́лости.

Му́чениченъ: Му́ченицы Госпо́дни, вся́кое мѣ́сто освяща́ете и вся́къ неду́гъ врачу́ете, и ны́нѣ моли́те изба́витися сѣте́й вра́жіихъ душа́мъ на́шимъ, мо́лимся.

Сла́ва, и ны́нѣ, крестобогоро́диченъ. Подо́бенъ: О, пресла́внаго чудесе́!

О, пресла́внаго чудесе́! О, та́инства но́ваго! О, ужа́снаго начина́нія! — Дѣ́ва глаго́лаше, на Крестѣ́ Тя́ я́ко ви́дѣ посредѣ́ двою́ разбо́йнику обѣ́шена, Его́же неболѣ́зненно ужа́сно породи́, пла́каше глаго́лющи, — увы́ Мнѣ́, Ча́до любе́знѣйшее, ка́ко Тя́ лю́тый наро́дъ и неблагода́рный ко Кресту́ пригвозди́?!



[НА УТРЕНИ,]
Въ пято́къ ва́ій, на у́трени, тро́ичны гла́са.

По 1-мъ стихосло́віи сѣда́льны кре́стныя осмогла́сника.

По 2-мъ же стихосло́віи глаго́лемъ настоя́щій сѣда́ленъ господи́на Іо́сифа, гла́съ 4. Подо́бенъ: Ско́ро предвари́.

Дво́ица посыла́ется учени́къ привести́ жребя́, я́коже пи́сано е́сть, на не́же Христо́съ всѣ́дъ, Красе́нъ, вни́детъ хвалу́ отъ младе́нецъ прія́ти Боже́ственную. Сего́ у́бо срѣ́сти и́демъ тща́тельно, вѣ́тви добродѣ́телей Тому́ принося́ще дѣя́ній.

Сла́ва, то́йже. И ны́нѣ, крестобогоро́диченъ. Подо́бенъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній во вре́мя поста́ на́мъ дарова́ти.

По 3-мъ стихосло́віи сѣда́ленъ господи́на Ѳео́дора, гла́съ 8. Подо́бенъ: Воскре́съ изъ ме́ртвыхъ.

Дво́ица учени́къ посыла́ется дне́сь жребя́ привести́ Влады́цѣ всѣ́хъ: гряде́тъ всѣ́сти, Носи́мый серафи́мскими мно́жествы. Начина́етъ боя́тися Ла́заремъ міроде́ржица всея́дица сме́рть, пе́рвѣе плѣни́вшая ро́дъ человѣ́ческій.

Сла́ва, то́йже. И ны́нѣ, крестобогоро́диченъ. Подо́бенъ:

При Стра́сти Сы́на, Чи́стая, стоя́щи, рыда́ющи го́рько, восклица́ше пѣ́сньми: ка́ко Тя́ не мо́лчно а́нгельскими пѣ́сньми славосло́вимаго, дѣ́ти евре́йстіи, увы́ Мнѣ́, Пила́тову суди́щу, Сы́не, предста́виша? Пѣсносло́влю Твое́, Сло́ве, мно́гое и неизрече́нное благоутро́біе.

Кано́нъ мине́и и трипѣ́снецъ господи́на Іо́сифа, гла́съ 4. И стихосло́вится пѣ́снь.

Пѣ́снь 5. Ирмо́съ: Возсія́й ми́, Го́споди, свѣ́тъ...

На Крестѣ́, Го́споди, Твое́мъ усну́въ, преложи́лъ еси́ на со́нъ, Влады́ко, сме́рть. Вопи́лъ бо еси́: дру́гъ Ла́зарь у́спе, но по́йдемъ возбуди́ти его́ ны́нѣ.

Проро́къ проповѣ́данія исполня́я прорече́нія, въ пророкоубíйственный гра́дъ, Христе́ Ще́дрый, прише́лъ еси́, убіе́нъ бы́ти во́лею, убіе́нна мя́ тлѣ́ю, спаса́я.

Тѣ́ло непокори́вое Сло́ву повину́вше воздержа́ніемъ и мольба́ми, мона́си и простíи лю́діе, Христа́ усря́щите на жребя́ все́дша, гряду́ща же пострада́ти.

Богоро́диченъ: Кропле́ніемъ ми́лости Твоея́ напо́й, Пречи́стая, изсо́хшую мою́ мы́сль, пла́менемъ грѣха́, и угаше́нный се́рдца моего́ вожжи́ свѣ́щникъ, Две́ре Свѣ́та.

Иный господи́на Ѳео́дора, гла́съ 8. Ирмо́съ: Мра́къ души́ моея́...

Дво́ицу учени́къ Твои́хъ, внегда́ хотѣ́лъ еси́ дости́гнути въ Виѳа́нію, Христе́, посыла́еши привести́ Тебѣ́ жребя́, на не́же никто́же отъ человѣ́къ всѣ́де: кромѣ́ бо Тебе́, Спа́се, никто́же безслове́сныя язы́ки повину́.

Сни́деся іуде́овъ отъ Іерусали́ма въ Виѳа́нію мно́жество и съ сро́дницами Ла́заревыми дне́сь стра́ждутъ, нау́тріе же разумѣ́вше сего́ изъ гро́ба ска́чуща, дви́жутся на убіе́ніе Христо́во.

Тро́иченъ: Тро́ице Пресвята́я, Отче и Сы́не и Ду́ше Вседѣ́тельный, блаже́нное Божество́, безнача́льное Существо́, и трисія́нный Свѣ́те, всезри́тельная Держа́во, рабы́ Твоя́ сохрани́.

Богоро́диченъ: На Крестѣ́ Тя́ ви́дящи пригвожде́нна гвоздьми́, Христе́, Ма́ти Твоя́, и изъ ре́бръ живо́тныхъ теку́щую кро́вь и во́ду, уязвля́шеся Ма́тернимъ милосе́рдіемъ, Сы́на бо Тя́ позна́ Своего́.

Сла́ва Тебѣ́, Бо́же на́шъ, сла́ва Тебѣ́.

Се́ угото́вася Христо́съ предста́ти Іерусали́му, и́же въ гора́хъ вси́ и пусты́няхъ, собери́теся мона́си, Того́ ра́достію усрѣ́сти со все́ю поднебе́сною.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Пѣ́снь 8. Ирмо́съ: Земля́ и вся́, я́же на не́й...

Воскресе́ніе и Живо́тъ иму́ще, жены́, любе́зное, что́ рыда́ете го́рько? Идетъ оживи́ти бли́жняго дру́га Свои́мъ Воскресе́ніемъ, воста́ніе всѣ́хъ провозвѣща́яй, всѣ́хъ Благодѣ́тель.

Жили́ща мона́ховъ собери́теся, я́ко а́гнцы слове́сніи, Началопа́стыря Христа́ усря́щите, ны́нѣ вѣ́тви нося́ще: предгряде́тъ во́лею, я́ко Агнецъ закла́тися Госпо́дь, я́ко да отъ во́лча и́зметъ мучи́тельства.

Гряду́щу Ти́ къ Виѳсфагíи, топта́ніе Твои́хъ но́гъ вра́гъ ощуща́ше а́дъ, и нога́ма Ла́заревыма прикаса́шеся, глаго́ля: а́ще восхо́щетъ зва́ти тя́ Жи́знь, не облѣни́ся, но изы́ди; разумѣ́хъ бо мое́ разруше́ніе вско́рѣ.

Богоро́диченъ: Свяще́нніи гла́си Тя́ проро́ковъ проповѣ́дуютъ обра́зно: две́рь, и го́ру, и сѣ́нь, зе́млю святу́ю, свѣ́тлый о́блакъ, изъ него́же су́щимъ во тмѣ́ и сѣ́ни сѣдя́щимъ возсія́ Со́лнце, Дѣ́во, еди́нъ Свѣтода́тель.

Иный. Ирмо́съ: Ангели и небеса́...

Дво́ица учени́къ по́сланная привести́ подъяре́мника на о́блацѣхъ Восходя́щему, Его́же вся́ пою́тъ и превозно́сятъ во вся́ вѣ́ки.

При две́рехъ Христо́съ, про́чее, Виѳа́ніе, не сѣ́туй, въ ра́дость бо преложи́тъ пла́чь тво́й, твое́ воспита́ніе воздви́гъ Ла́заря изъ гро́ба, пою́ща и превознося́ща Христа́ во вѣ́ки.

Благослови́мъ Отца́, и Сы́на, и Свята́го Ду́ха, Го́спода.

[Тро́иченъ:] Еди́нъ Бо́гъ у́бо Тро́ица, ни Отцу́ изступи́вшу въ сыновство́, ниже́ Сы́ну премѣни́вшуся во исхожде́ніе, но сво́йственная и обое́, Свѣ́тъ Бо́га Три́, сла́влю во вѣ́ки.

Богоро́диченъ: Еди́на, Нетлѣ́нная, ражда́еши, еди́на дои́ши Младе́нца, Небра́чная, еди́на Зижди́теля ражда́еши и Влады́ку Твоего́, а́ще и Ма́терь и Раба́: Тя́, Дѣ́во Ма́ти, пое́мъ во вѣ́ки.

Сла́ва Тебѣ́, Бо́же на́шъ, сла́ва Тебѣ́.

Сады́ добродѣ́телей и чу́вственно вѣ́твьми, я́ко сугу́ба Христа́, угото́вимся вси́ прія́ти, носи́ма на жребя́ти, Его́же превозно́симъ во вся́ вѣ́ки.

Хва́лимъ, благослови́мъ, покланя́емся Го́сподеви, [пою́ще и превознося́ще во вся́ вѣ́ки].

Ирмо́съ: Ангели и небеса́, на престо́лѣ сла́вы Сѣдя́щаго и я́ко Бо́га непреста́нно Сла́вимаго, благослови́те, по́йте и превозноси́те Его́ во вѣ́ки.

Пѣ́снь 9. Ирмо́съ: Яко сотвори́ Мнѣ́...

Се́ предвозгласи́лъ еси́, Іису́се: взы́демъ ко гра́ду свято́му, и рука́ма убíйцъ вои́стинну преда́мся Кресту́, уби́тися пло́тію.

Отъ сме́рти хотя́, Сло́ве, восхи́тити дру́га Твоего́, пло́тію умертви́тися на́съ ра́ди пригвожда́ешися, человѣ́ки обезсмертвля́я вѣ́рныя, еди́не Безсме́ртне.

Ва́ія цѣлому́дрія принесе́мъ Христу́, на жребя́ти смири́вшуся пло́тію, и рце́мъ Ему́: на Стра́сть прише́дый, благослове́нъ еси́, Спа́се.

Богоро́диченъ: Стра́шное Твое́ рожде́ніе, Богоро́дице Ма́ти Христа́, тѣ́мже Тя́ блажи́мъ вѣ́рно и сла́вимъ че́стно, ро́дове родо́въ во вѣ́ки, ами́нь.

Иный. Ирмо́съ: Проявле́нное на горѣ́...

Ны́нѣ посыла́я ученики́ Христо́съ рече́: отрѣши́вше Мнѣ́ жребя́, приведи́те всѣ́сти, да разрѣшу́ язы́ки отъ безслове́сія и покорю́, я́ко Сы́нъ, Отцу́.

Гряде́тъ Госпо́дь, отве́рзи твоя́ две́ри, Виѳа́ніе, пріими́ вѣ́рою Влады́ку, и́бо гряде́тъ воскреси́ти отъ гро́ба Ла́заря, я́ко еди́нъ Всеси́ленъ.

Тро́иченъ: Трисія́нное, Го́споди, Твоего́ единонача́лія, свѣ́тлыми сія́ньми у́мъ на́шъ облиста́я, отъ ле́сти многообра́зныя обраща́етъ на́съ къ соедини́тельному обоже́нію.

Богоро́диченъ: Ра́дуйся, Пала́то всѣ́хъ Царя́, Еюже Ца́рство небе́сное отве́рзеся су́щимъ на земли́, Богоро́дице Дѣ́во, и со а́нгелы житіе́.

Сла́ва Тебѣ́, Бо́же на́шъ, сла́ва Тебѣ́.

Въ пусты́няхъ и гора́хъ и въ верте́пѣхъ су́щіи, пріиди́те, собери́теся съ на́ми, ваіено́сцы, срѣ́сти Царя́ и Влады́ку: гряде́тъ бо спасти́ ду́ши на́ша.

Ирмо́съ: Проявле́нное на горѣ́ законополо́жнику во огни́ и купинѣ́ Рождество́ Приснодѣ́вы въ на́ше, вѣ́рныхъ, спасе́ніе, пѣ́сньми немо́лчными велича́емъ.

Свѣти́ленъ гла́са.

На стихо́внѣ самогла́сенъ дне́, два́жды, гла́съ 1. Творе́ніе Льва́ царя́.

Презрѣ́вши, душе́ моя́, Боже́ственныхъ пома́заній, объя́та была́ еси́ ко́зньми врага́, свои́мъ хотѣ́ніемъ преда́вшися тли́, и отягчи́вшися отъ грѣха́ мно́гаго, боготка́нную оде́жду оскверни́ла еси́ и неукра́шену ца́рскому бра́ку сотвори́ла еси́. Но да не со грѣхо́мъ привлече́шися, и покрове́нна оде́ждею страсте́й возле́гши, вины́ вхо́да возда́си и черто́га изгна́на бу́деши, Спа́су возопíй: Стра́шное Око, пріимы́й е́же е́смь, и е́же бы́лъ еси́ не оста́вивый, и пре́жде Креста́ хлами́дою поруга́нія, мене́ ра́ди облекíйся, вре́тище мое́ расто́ргни, и въ весе́ліе облецы́, и тмы́ внѣ́шнія и пла́ча вѣ́чнаго изба́ви мя́ и поми́луй мя́.

Му́чениченъ: Страстоте́рпцы Христо́вы, пріиди́те, лю́діе вси́, почти́мъ пѣ́сньми и пѣ́ньми духо́вными, свѣти́ла мíра и проповѣ́дники вѣ́ры, исто́чники приснотеку́щія, изъ ни́хже истека́ютъ вѣ́рнымъ исцѣле́нія. Тѣ́хъ моли́твами, Христе́ Бо́же на́шъ, ми́ръ да́руй мíрови Твоему́ и душа́мъ на́шимъ ве́лію ми́лость.

Сла́ва, гла́съ 8:

Душеполе́зную соверши́вше Четыредеся́тницу, и святу́ю седми́цу Стра́сти Твоея́, про́симъ ви́дѣти, Человѣколю́бче, е́же просла́вити въ не́й вели́чія Твоя́ и неизрече́нное на́съ ра́ди смотре́ніе Твое́, единому́дренно воспѣва́юще: Го́споди, сла́ва Тебѣ́.

И ны́нѣ, па́ки то́йже. И про́чее послѣ́дованіе, я́ко обы́чно.




НА 6-МЪ ЧАСѢ,
Тропа́рь проро́чества, гла́съ 3:

Нестерпи́мый е́сть, Го́споди, гнѣ́въ на грѣ́шники преще́нія Твоего́, и нѣ́смы досто́йни воззрѣ́ти и проси́ти отъ Тебе́ ми́лости, да не я́ростію Твое́ю, ни гнѣ́вомъ Твои́мъ погуби́ши на́съ, и́хже отъ земли́ руко́ю Твое́ю созда́лъ еси́.

Проки́менъ, псало́мъ 121, гла́съ 4: До́му ра́ди Го́спода Бо́га на́шего взыска́хъ блага́я тебѣ́. Сти́хъ: Возвесели́хся о ре́кшихъ мнѣ́: въ до́мъ Госпо́день по́йдемъ.

Проро́чества Иса́іина чте́ніе. [Глава́ 66.]

Весели́ся, Іерусали́ме, и торжеству́йте въ не́мъ вси́ лю́бящіи его́, и живу́щіи въ не́мъ ра́дуйтеся вку́пѣ съ нимъ ра́достію, вси́ ели́цы пла́касте о не́мъ. Да ссе́те и насы́титеся отъ сосца́ утѣше́нія его́, да сса́вше, насладите́ся отъ вхо́да сла́вы его́. Яко сія́ глаго́летъ Госпо́дь: се́, Азъ уклоня́ю на ня́, а́ки рѣку́ ми́ра, и а́ки пото́къ наводня́емый, сла́ву язы́ковъ. Дѣ́ти и́хъ на ра́мена взя́ты бу́дутъ и на колѣ́ну утѣ́шатся. Якоже а́ще кого́ ма́ти утѣша́етъ, та́ко и Азъ утѣ́шу вы́ и во Іерусали́мѣ утѣ́шитеся. И у́зрите, и возра́дуется се́рдце ва́ше, и ко́сти ва́ша, я́ко трава́, прозя́бнутъ, и позна́ется рука́ Госпо́дня боя́щимся Его́ и запрети́тъ непокаря́ющимся. Се́ бо Госпо́дь, я́ко о́гнь пріи́детъ, и я́ко бу́ря колесни́цы Его́, возда́ти я́ростію отмще́ніе Свое́ и преще́ніе во пла́мени о́гненнѣ. Огне́мъ бо Госпо́днимъ суди́тися бу́детъ вся́ земля́ и мече́мъ Его́ вся́ка пло́ть: мно́зи я́звени бу́дутъ отъ Го́спода. Очища́ющіися и освяща́ющіися въ вертогра́дѣхъ, и въ преддве́ріихъ яду́щіи мя́со свино́е, и ме́рзости и мы́ши, вку́пѣ поги́бнутъ, рече́ Госпо́дь. И Азъ дѣла́ и́хъ и помышле́нія и́хъ вѣ́мъ, и гряду́ собра́ти вся́ наро́ды и язы́ки, и пріи́дутъ и у́зрятъ сла́ву Мою́. И оста́влю на ни́хъ зна́меніе, и послю́ отъ ни́хъ спасе́ныхъ во язы́ки: въ Ѳарси́съ, и въ Фу́дъ, и въ Лу́дъ, и въ Мосо́хъ, и въ Ѳове́ль, и во Елла́ду, и во о́стровы да́льнія, и́же не слы́шаша и́мене Моего́, ниже́ ви́дѣша сла́ву Мою́, и возвѣстя́тъ сла́ву Мою́ во язы́цѣхъ. И приведу́тъ бра́тію ва́шу отъ всѣ́хъ язы́къ да́ръ Го́сподеви, съ ко́ньми и колесни́цами и съ носи́лами мско́въ, подъ сѣ́ньми во святы́й гра́дъ Іерусали́мъ, рече́ Госпо́дь, а́ки бы принесли́ сы́нове Изра́илевы же́ртвы своя́ Мнѣ́ со псалмы́ въ до́мъ Госпо́день. И отъ тѣ́хъ пойму́ Себѣ́ жерцы́ и леви́ты, рече́ Госпо́дь. Якоже бо не́бо но́во и земля́ нова́, я́же Азъ творю́, пребыва́ютъ предо Мно́ю, глаго́летъ Госпо́дь, та́ко ста́нетъ сѣ́мя ва́ше и и́мя ва́ше. И бу́детъ мѣ́сяцъ отъ мѣ́сяца, и суббо́та отъ суббо́ты, пріи́детъ вся́ка пло́ть поклони́тися предо Мно́ю во Іерусали́мъ, рече́ Госпо́дь. И изы́дутъ, и у́зрятъ тру́пы человѣ́ковъ, преступи́вшихъ Мнѣ́: че́рвь бо и́хъ не сконча́ется и о́гнь и́хъ не уга́снетъ; и бу́дутъ въ позо́ръ вся́кой пло́ти.

Проки́менъ, псало́мъ 122, гла́съ 6: Поми́луй на́съ, Го́споди, поми́луй на́съ. Сти́хъ: Къ Тебѣ́ возведо́хъ о́чи мои́, Живу́щему на небеси́.

Источникъ: Тріо́діонъ, сíесть трипѣ́снецъ. — Кíевъ: Въ тѵпогра́фіи Кíево-Пече́рской Успе́нской Ла́вры, 1864. — Л. 316 – 321.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.