Церковный календарь
Новости


2017-05-28 / russportal
"Тріодь Цвѣтная". Служба въ недѣлю 8-ю. День Святой Троицы. Пятидесятница (1864)
2017-05-28 / russportal
"Тріодь Цвѣтная". Служба въ субботу 7-й седмицы. Троицкая поминальная суббота (1864)
2017-05-28 / russportal
Прав. Іоаннъ Кронштадтскій. Слово (4-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (3-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (2-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (1-е) въ недѣлю свв. отцевъ Никейскаго Собора (1894)
2017-05-27 / russportal
Архіеп. Аверкій (Таушевъ). Рождественское привѣтствіе (1975)
2017-05-27 / russportal
Архіеп. Аверкій (Таушевъ). Духовный большевизмъ (1975)
2017-05-27 / russportal
И. А. Ильинъ. О признаніи революціи (1925)
2017-05-27 / russportal
И. А. Ильинъ. Отрицателямъ меча (1925)
2017-05-26 / russportal
Архіеп. Аверкій (Таушевъ). Миръ и непримиримость (1975)
2017-05-26 / russportal
Архіеп. Аверкій (Таушевъ). Къ 40-лѣтію паденія русскаго народа (1975)
2017-05-26 / russportal
И. А. Ильинъ. Подвигъ патріотическаго единенія (1925)
2017-05-26 / russportal
И. А. Ильинъ. Самообладаніе и самообузданіе (1925)
2017-05-25 / russportal
И. А. Ильинъ. Идея Корнилова (1925)
2017-05-25 / russportal
И. А. Ильинъ. Кто мы? (1925)
Новости въ видѣ
RSS-канала: .
Сегодня - воскресенiе, 28 мая 2017 г. Сейчасъ на порталѣ посѣтителей - 16.
Церковно-учительная литература

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

СЛОВО 53.
Во вто́рникъ 6-я недѣ́ли поста́, поуче́ніе отъ свята́го Ева́нгелія, истолко́вано святы́ми отцы́.

[Іоан., зач. 5.] Рече́ Госпо́дь о Нафана́илѣ: се́й вои́стинну израильтя́нинъ, въ не́мъ же льсти́ нѣ́сть. Нафана́илъ же рече́: Го́споди, ка́ко мя́ зна́еши? Госпо́дь же рече́ ему́: пре́жде да́же не возгласи́ тебе́ Фили́ппъ, су́ща подъ смоко́вницею ви́дѣхъ тя́. Толкова́ніе. Егда́ Госпо́дь имѣ́ второ́е лѣ́то по рождествѣ́ Свое́мъ, Нафана́илъ же бя́ше ро́ждься трею́ днíй. Иродъ же нача́тъ избива́ти младе́нцы. И убоя́вшися ма́ти Нафана́илова отнесе́ его́ въ пу́стъ виногра́дъ, и сохрани́ и́ въ бы́ліи подъ смоко́вницею. Ви́дѣвъ же Госпо́дь Нафана́ила подъ смоко́вницею лежа́ща: Госпо́дь бѣ́ во Еги́птѣ, а Нафана́илъ въ Виѳсаи́дѣ. Посла́ Госпо́дь а́нгела Своего́, глаго́ля: иди́, соблюди́ Нафана́ила, лежа́ща /с. 146/ подъ смоко́вницею, до́ндеже прише́дши ма́ти во́зметъ его́. И преста́вшу гоне́нію, прише́дши ма́ти обрѣ́те Нафана́ила смѣю́щася, и игра́юща ручи́цами, и взя́тъ его́ ра́дующися и сла́вящи Бо́га. — [Лук., зач. 49.] Рече́ Госпо́дь: никто́ же, возло́жь ру́ку свою́ на ра́ло, и зря́ вспя́ть, упра́вленъ е́сть въ Ца́рство небе́сное. Толкова́ніе. Се́ глаго́летъ о престу́пницѣхъ, отсту́пльше бо отъ пра́выя вѣ́ры, не мо́гутъ ся упра́вити. Та́ко и калуге́ри, уча́щеся мірски́хъ, согрѣша́юще по покая́ніи, я́ко пси́ на своя́ блево́тины возвраща́ются. — [Матѳ., зач. 94.] Рече́ Госпо́дь: го́ре ва́мъ, кни́жницы и фарисе́и лицемѣ́ри, я́ко вы́ прехо́дите мо́ре и су́шу, сотвори́ти еди́наго прише́льца, и егда́ бу́детъ, творите́ его́ сы́на гее́нны сугу́бѣйша ва́съ. Толкова́ніе. Се́ глаго́летъ о учи́телехъ, и о попѣ́хъ, и о духо́вныхъ дѣ́техъ. Свяще́ннику велича́ву, и го́рду, и гру́бу, и запо́йчиву и неразу́мливу недосто́итъ бы́ти, ни дѣте́й пріима́ти и дѣ́темъ духо́внымъ къ таковы́мъ на покая́ніе не досто́итъ приходи́ти. — [Матѳ., зач. 95.] Рече́ Госпо́дь: го́ре ва́мъ, кни́гчіи и фарисе́е слѣпíи, я́ко процѣ́жаете комары́, а верблю́ды пожира́ете. Толкова́ніе. Се́ глаго́летъ Госпо́дь о вла́стелехъ и о судія́хъ земны́хъ, судя́щихъ /с. 146 об./ на́ кривѣ, и мзды́ взима́ющихъ, винова́тыхъ оправля́юще, пра́выхъ же винова́ты творя́ще. Та́ко же и попо́ве, по да́ру проща́юще грѣхи́, и моли́твы творя́ще по мздѣ́, е́же не досто́итъ сего́ твори́ти. Та́кожде и епи́скопи попо́въ ста́вятъ недосто́йныхъ по мздѣ́. — [Матѳ., зач. 95.] Рече́ Госпо́дь: го́ре ва́мъ, вожди́ слѣпíи, я́ко очища́ете внѣ́шняя сткля́ницы, вну́тренняя же смра́да испо́лнь. Толкова́ніе. О си́хъ глаго́летъ Госпо́дь, а́ще кто́ пости́тся лицемѣ́ріемъ и все́ твори́тъ велича́яся, хвалы́ отъ человѣ́къ ища́, а въ та́йнѣ беззако́нія дѣ́етъ. Се́ же глаго́летъ и попо́мъ, и́же отъ недосто́йныхъ бога́тинъ приноше́ніе пріе́млютъ въ це́рковь Бо́жію, а ни́щихъ досто́йныхъ отрѣва́ютъ. — [Матѳ., зач. 36.] Рече́ Госпо́дь: бу́дите му́дри, я́ко змія́, и цѣ́ли, я́ко го́лубіе. Толкова́ніе. Се́ глаго́летъ Госпо́дь ко апо́столомъ и про́чимъ святы́мъ. Змія́ бо храни́тъ главу́, а тѣ́ло убіе́нію предае́тъ; та́ко и вы́ храни́те главу́, а тѣ́ло свое́ вдава́йте на по́стъ, и на вся́кія добродѣ́тельныя труды́, и на стра́сти [страда́ніе] и на убіе́ніе. Поне́же рече́но е́сть: не бо́йтеся отъ убива́ющихъ тѣ́ло, души́ же не могу́щихъ косну́тися. Го́лубь же цѣ́лъ е́сть, поне́же живе́тъ о человѣ́цѣхъ и въ хра́мѣхъ, та́ко и вы́, живу́ще о́ Бозѣ, /с. 147/ и пра́выя вѣ́ры держи́теся, и по церко́вному преда́нію ходи́те, и жи́ви бу́дете. Се́ же ко всѣ́мъ глаго́летъ.  — [Дѣян., зач. 44.] Святы́й апо́столъ Па́велъ глаго́летъ: по отше́ствіи мое́мъ вни́дутъ въ ва́съ во́лцы тя́жцы, нещадя́ще ста́да, и отъ самѣ́хъ ва́съ, воста́нутъ му́жіе, глаго́люще развраще́нная. Толкова́ніе. Во́лцы су́ть еретицы́, а ста́до — вѣ́рніи человѣ́цы. А и́же отъ самѣ́хъ ва́съ — суть бо и отъ апо́стольскаго ли́ка нѣ́колико и́хъ отступи́ша на иновѣ́ріе. — [Матѳ., зач. 99.] Рече́ Госпо́дь: моли́теся, да не бу́детъ бѣ́гство ва́ше въ зимѣ́ ни въ субо́ту. Толкова́ніе. Испыта́ніе возду́шныхъ мы́тникъ, и́же су́ть на возду́сѣ, то́ е́сть зима́, а субо́та е́сть пра́здность благи́хъ дѣ́лъ. Да добро́ е́сть живу́щимъ въ покая́ніи труди́тися до́брыми дѣ́лы и разрѣши́тися здѣ́ живуще отъ грѣ́хъ, да не испыта́ни бу́демъ на возду́сѣ ра́тными бѣ́сы, та́мо бо зима́ е́сть. — [Матѳ., зач. 17.] Рече́ Госпо́дь: а́ще отпуща́ете человѣ́комъ согрѣше́нія и́хъ, отпу́ститъ и ва́мъ Оте́цъ ва́шъ Небе́сный согрѣше́нія ва́ша. Толкова́ніе. Се́ глаго́летъ Госпо́дь ко всѣ́мъ вѣ́рнымъ, повелѣва́етъ оста́вити гнѣ́въ, и вся́ку вражду́ друго́мъ и бра́тіи, да и ва́мъ оста́вятся согрѣше́нія ва́ша. — [Іоан., зач. 44.] Рече́ Госпо́дь: въ ма́лѣ и не ви́дите Мене́, /с. 147 об./ и па́ки: вма́лѣ, и у́зрите Мя́. Толкова́ніе. Се о Страсте́хъ Спа́совѣхъ рече́но бы́сть: егда́ положе́нъ бы́сть Госпо́дь на́шъ Іису́съ Христо́съ во́ гробѣ, не ви́дѣша Его́; егда́ же воскре́се, уви́дѣша Его́ и возра́довашася зѣло́. — [Іоан., зач. 67.] Чесо́ ра́ди рече́ Госпо́дь три́жды: Си́моне Іо́нинъ, лю́биши ли Мя́? Толкова́ніе. Поне́же Си́монъ Пе́тръ три́щи отве́ржеся Го́спода. — [Матѳ., зач. 12.] Рече́ Госпо́дь: увѣща́йся съ сопе́рникомъ твои́мъ ско́ро, до́ндеже еси́ на пути́ съ ни́мъ. Толкова́ніе. Поне́же пока́ятися повелѣва́етъ и очи́ститися отъ грѣ́хъ пре́жде сме́рти: сіе́ бо житіе́ пу́ть е́сть кра́токъ и невѣ́домъ, а сопе́рникъ — дія́волъ, а пря́ — грѣси, — а конецъ пути — смерть. — [Матѳ., зач. 20.] Рече́ Госпо́дь: не осужда́йте, да не осужде́ни бу́дете. Толкова́ніе. Не восхища́йте суда́ Бо́жія: а́ще ли хо́щеши судія́ бы́ти, то́ суди́ мы́слію своя́ согрѣше́нія. Поста́ви же предъ собо́ю ду́шу и тѣ́ло свое́, и въ со́вѣсти души́ своея́ рцы́ мы́слію и умо́мъ, почто́ су́диши чюжíя грѣхи́ ма́лыя, во еди́нъ ча́съ согрѣши́вшихъ и вско́рѣ на покая́ніе приходя́щихъ? А ты́ тма́ми согрѣша́еши, и на покая́ніе не прихо́диши, и себе́ не су́диши. Не слы́шиши ли апо́стола Па́вла, глаго́люща: а́ще бы́хомъ са́ми себе́ разсужда́ли, /с. 148/ не бы́ осужде́ни бы́ли. Есть бо на́мъ, бра́тіе, чи́мъ пещи́ся, ко́ждо на́съ себѣ́ да внима́емъ и свои́мъ злы́мъ. Бо́гу же еди́ному дади́те пра́вити, свѣ́дущему соста́въ и си́лу, рожде́ніе и составле́ніе тѣлесе́ кому́ждо, я́ко же Са́мъ вѣ́сть. Инако бо су́дитъ Бо́гъ епи́скопа, и́нако царя́ и кня́зя, и́нако же игу́мена и и́нако попа́, и́нако учи́теля и и́нако ученика́, и́нако ста́рца и и́нако ю́ношу, и́нако бо́льна и и́нако здра́ва, и́нако свобо́дна и и́нако рабо́тна. И кто́ мо́жетъ судьбы́ Бо́жія испыта́ти и увѣ́дати? То́кмо созда́вый всѣ́хъ. Еже бо сотвори́тъ бра́тъ простото́ю, и а́ще нѣ́како и́мать дѣ́ла уго́дна Бо́гу, то за всю́ жи́знь свою́. Ты́ же су́диши, осужда́я его́, и му́ча свою́ ду́шу. Аще случи́тся ему́ соврати́тися, отку́ду ты́ увѣ́си, коли́ко за то́ подвиза́ся? И коли́ко сле́зъ пролія́ пре́жде дѣ́ла и послѣди́? И коли́ко до сконча́нія его́? И обря́щется согрѣше́ніе его́, я́ко пра́вда пре́дъ Богомъ. Ви́дѣвъ бо Бо́гъ покая́ніе его́ и, поми́ловавъ, прости́тъ его́; ты́ же, осужда́я его́, свою́ ду́шу губи́ши. Отку́ду у́бо вѣ́си, или́ разумѣ́еши, а́ще мо́жетъ, или́ /с. 148 об./ не мо́жетъ спасти́ся? И не то́кмо осужда́еши, но и укаря́еши, а са́мъ та́коже пло́ть еси́. Аще мерзи́тъ ти́ бра́тъ, я́ко же ненави́дѣти его́ согрѣша́юща, и то́ е́сть го́рше осужде́нія, е́же ненави́дѣти согрѣша́ющихъ, а самому́ пра́вду пре́дъ Богомъ мнѣ́тися. Аки Ка́инъ, бра́та уби́въ, рече́: что́ у́бо зло́ сотвори́хъ? Мня́ше бо, я́ко не вѣ́сть сего́ Бо́гъ. Хотя́щіи же спасти́ся, николи́ же вне́млютъ чужи́мъ грѣхо́мъ. Мы́ же, окая́нніи, а́ще ви́димъ, или́ слы́шимъ, кого́ грѣ́хъ сотво́рша, то́ не до своея́ па́кости ста́немъ, но и инѣ́мъ въ сердца́ влага́емъ, глаго́люще: слы́шалъ ли еси́ се́, я́ко о́нъ се́й согрѣши́? То и тѣ́мъ па́кости дѣ́емъ, влага́юще въ сердца́ и́хъ чюжíя грѣхи́, и обрѣта́емся помога́юще бѣсо́мъ, себѣ́ на па́губу. Аще бы́хомъ имѣ́ли любо́вь соверше́нну въ себѣ́, покрыва́юще чужíя грѣхи́, то мно́жество бы покры́то бы́ло на́шихъ грѣхо́въ и прощено́. Да не су́димъ, бра́тіе, чужи́хъ грѣхо́въ, но о свои́хъ пла́чемся, и су́димъ мно́гая своя́ согрѣше́нія. — [Лук., зач. 75.] Рече́ Госпо́дь: а́ще кто́ хо́щетъ зва́нъ бы́ти въ Ца́рство небе́сное, то́ зови́ тѣ́хъ, отъ ни́хъ же /с. 149/ ты́ не ча́еши зва́нія. Толкова́ніе. Вели́тъ зва́ти ни́щія и убо́гія, и тѣ́хъ накорми́ти и напои́ти. — [Матѳ., зач. 94.] Вопро́съ. Добро́ ли грѣхи́ своя́ исповѣ́дати отцу́ духо́вному? Толкова́ніе. Добро́ и поле́зно е́сть, но не безъ иску́са су́щимъ. Аще у́бо бу́детъ по́пъ гру́бъ, или́ невѣ́жда, или́ го́рдъ, или́ запо́йчивъ, или́ гнѣвли́въ, или́ мздои́мецъ, или́ зави́дливъ, или́ клеветни́къ, или́ сварли́въ, — къ таково́му не досто́итъ ка́ятися и исповѣ́дати грѣхо́въ. Тако́въ учи́тель, преоби́длива, и неради́ва, и лѣни́ва и осла́бна тя́ сотвори́тъ. Аще же обря́щеши му́жа духо́вна, разу́мна и кро́тка и ти́ха, то безъ сра́ма и безъ сомнѣ́нія исповѣ́ждься ему́, — таковы́й бо оте́цъ наста́витъ тя́ на и́стину. Вѣ́ренъ бо Бо́гъ оставля́ти грѣхи́ по зако́ну живу́щимъ. Мно́зи бо попо́ве невѣ́жествомъ и гру́бостію одержи́ми, не дадя́тъ пра́вымъ путе́мъ ходи́ти инѣ́мъ, ниже́ са́ми и́мъ хо́дятъ. О ни́хъ же рече́ Госпо́дь: го́ре ва́мъ, кни́жницы и фари́сеи, лицемѣ́ри го́рдіи, я́ко обхо́дите мо́ре и су́шу, и творите́ еди́наго прише́льца сы́на де́бри, огню́ сугу́бѣйша ва́съ. Го́ре ва́мъ, /с. 149 об./ вожди́ слѣпíи, я́ко спо́ну творите́ хотя́щимъ спасти́ся и въ ра́зумъ и́стинный пріити́. — [Лук., зач. 61.] Рече́ Госпо́дь: го́ре ва́мъ, кни́гчіямъ, я́ко накла́даете человѣ́комъ бремена́ тя́жка, а са́ми ни пе́рстомъ хотите́ дви́гнути. Толкова́ніе. То́ глаго́летъ іере́омъ, и́же зако́ну лю́ди уча́тъ, а са́ми не по зако́ну хо́дятъ: лю́ди епитимія́ми ну́дяще, а са́ми лѣни́во живу́ще. Бо́гу на́шему сла́ва, ны́нѣ и при́сно. [Ами́нь.]

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 145 об. – 149 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.