Церковный календарь
Новости


2017-04-23 / russportal
«Слѣдованная Псалтирь». Каѳисма 6-я (1874)
2017-04-23 / russportal
«Слѣдованная Псалтирь». Каѳисма 5-я (1874)
2017-04-23 / russportal
Прав. Іоаннъ Кронштадтскій. Пять поученій въ недѣлю Ѳомину (1894)
2017-04-23 / russportal
Прот. Григорій Дьяченко. Восемь поученій въ недѣлю Антипасхи (1900)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 16-е)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 15-е)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 14-е)
2017-04-22 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 13-е)
2017-04-22 / russportal
Книга «Златоустъ». Слово 69-е, въ недѣлю 3-ю по Пасхѣ (1910)
2017-04-22 / russportal
Книга «Златоустъ». Слово 68-е, въ недѣлю новую Антипасхи (1910)
2017-04-21 / russportal
"Тріодь Цвѣтная". Служба въ субботу 2-й седмицы по Пасхѣ (1864)
2017-04-21 / russportal
"Тріодь Цвѣтная". Служба въ пятокъ 2-й седмицы по Пасхѣ (1864)
2017-04-20 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 12-е)
2017-04-20 / russportal
Прот. Григорій Дьяченко. «Праздн. отдыхъ». Недѣля св. Пасхи (Сл. 11-е)
2017-04-20 / russportal
"Тріодь Цвѣтная". Служба въ четвертокъ 2-й седмицы по Пасхѣ (1864)
2017-04-20 / russportal
"Тріодь Цвѣтная". Служба въ среду 2-й седмицы по Пасхѣ (1864)
Новости въ видѣ
RSS-канала: .
Сегодня - понедѣльникъ, 24 апрѣля 2017 г. Сейчасъ на порталѣ посѣтителей - 21.
Церковно-учительная литература

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

СЛОВО 57.
Въ пято́къ 6-я недѣ́ли поста́, поуче́ніе Іоа́нна Златоу́стаго о покая́ніи, и ка́ко грѣхи́ оставля́ются.

Сія́ у́бо и мы́ помышля́юще, никогда́ же никого́ же да презира́емъ, и никогда́ же, согрѣша́юще, да отча́емся, ниже́ да лѣни́мся па́ки, но, согрѣша́юще, сокруше́нно помышле́ніе, а не про́сто глаго́лы произнесе́мъ. Ибо вѣ́мъ а́зъ мно́гихъ, и́же у́бо глаго́лютъ пла́катися грѣхо́въ, и ничто́же ве́ліе дѣ́лаютъ, но постя́тъ то́кмо и жесто́кими одѣва́ются ри́зами, имѣ́/л. 157 об./ній же па́ки корче́мствующихъ жела́ютъ, и гнѣ́вомъ вя́щше звѣре́й взе́млются, и о злоглаго́ланіяхъ ра́дуются па́че, не́жели о похвала́хъ друзíи. Не су́ть сія́ покая́ніе, но то́кмо о́бразъ и сѣ́нь о́наго, а не покая́ніе и́стинное. Тѣ́мъ же и о си́хъ добро́ рещи́, смотри́те, да не прельще́ни бу́демъ отъ сатаны́ и да не неразумѣва́емъ умышле́нія его́: о́выхъ у́бо грѣхми́, о́выхъ же покая́ніемъ погубля́етъ, ины́хъ же други́мъ о́бразомъ па́ки, внегда́ ничто́же отъ покая́нія оставля́етъ плодопріима́ти. Зане́же бо погуби́ти отъ пра́ваго не обрѣ́те, на и́нъ пре́йде пу́ть. Труды́ у́бо протяза́я, плоды́ же отъе́мля; и увѣщева́я, а́ки все́ испра́вльшихъ, о ины́хъ же неради́ти. Да не ту́не у́бо рыда́емъ себе́. Ма́лая къ таковы́мъ побесѣ́дуемъ жена́мъ: жена́мъ бо наипа́че сіе́ е́сть неду́гованіе. Добро́ у́бо и сіе́, е́же твори́те ны́нѣ, по́стъ, и до́лу лѣга́ніе, и пе́пелъ; но егда́ и́ная не бу́дутъ, отъ си́хъ по́льза ника́я же. Показа́ бо, ка́ко оставля́етъ грѣхи́ Бо́гъ. Почто́ у́бо о́ный оста́вльше пу́ть, и́нъ себѣ́ просѣца́ете? Согрѣши́ша ниневи́тяне иногда́, и сотвори́ша сія́, я́же и вы́ твори́те ны́нѣ, но уви́димъ, что́ и́хъ по́льзова. /л. 158/ Яко же бо къ неду́жнымъ мно́га бы́лія наво́дятъ вра́чеве, разу́мный же не сего́ смо́тритъ, я́ко сіе́ и сіе́ сотвори́лъ е́сть неду́жный, но что́ его́ по́льзова; та́ко и здѣ́ блюсти́ подоба́етъ. Что́ у́бо по́льзова ва́рвары о́ныя? Приложи́ша по́стъ къ я́звамъ, и къ зѣ́льному посту́ приложи́ша до́лу лега́ніе, и вре́тища одѣя́ніе, и пе́пелъ, и рыда́нія, приложи́ша и премѣне́ніе житія́. Увѣ́мы же у́бо, что́ отъ си́хъ сотвори́ло я́ здра́вы? И отку́ду увѣ́мы, рече́? Аще ко врачу́ пріи́демъ, а́ще его́ вопро́симъ, не скры́етъ бо отъ на́съ, но и зѣло́ рече́тъ. Наипа́че же да никто́же не неразумѣ́етъ, ниже́ вопроси́ти тре́буетъ, и́бо восписа́ бы́ліе возставля́ющее и́хъ. Ко́е у́бо сіе́ е́сть? Ви́дѣ, рече́, Бо́гъ, я́ко обрати́ся ко́ждо отъ пути́ своего́ лука́ваго и раска́яся о зло́бѣ, ю́же глаго́лаше сотвори́ти и́мъ. Не рече́, я́ко ви́дѣ по́стъ, и вре́тище и пе́пелъ. И сія́, не по́стъ отъе́мля, глаго́лю, не бу́ди то́, но е́же поста́ лу́чшее твори́ти поуча́я, е́же вся́кія зло́бы ошая́тися. Согрѣши́ и Давы́дъ. Увѣ́мы у́бо, ка́ко и се́й пока́яся? Три́ дни́ сѣдя́ше на пе́пелѣ. Но о́нъ не о грѣсѣ́ творя́ше, но о сы́нѣ, упива́яся еще́ стра́стію. Грѣ́хъ же и́нако /л. 158 об./ омы́ смиренному́дріемъ, сокруше́ніемъ се́рдца, умиле́ніемъ души́, е́же не ктому́ въ та́яжде впада́ти, е́же грѣ́хъ вы́ну помина́ти, е́же терпѣ́ти благода́рнѣ находя́щая вся́, е́же щади́ти опечаля́ющихъ, е́же не отмща́ти навѣ́тующимъ, но и хотя́щимъ сіе́ твори́ти, возбраня́ти. Егда́ у́бо Семе́й безчи́сленными проклина́ше и́ поноше́ньми, воево́дѣ, ту́ су́щу, негоду́ющему, глаго́лаше: оста́ви его́ проклина́ти мя́, я́ко Госпо́дь повелѣ́ ему́. Се́рдце бо сокруше́нно и смире́нно имя́ше, е́же наипа́че грѣхи́ его́ омыва́ше. Ибо се́ е́сть исповѣ́даніе, се́ покая́ніе. Аще ли же постя́щеся велича́вы бу́демъ, не то́кмо ничто́же по́льзовахомся, но и повреди́хомся. Смири́ у́бо се́рдце и ты́, да Бо́га привлече́ши: бли́зъ бо Госпо́дь сокруше́нныхъ се́рдцемъ. Не зри́ши ли въ до́мѣхъ свѣ́тлыхъ безче́ствованныя, ка́ко ниже́ ме́ншимъ рабо́мъ досажда́ющимъ и́хъ прекосло́вятъ, но терпя́тъ безче́стія ра́ди, и́мъ же одѣ́я и́хъ грѣ́хъ? Та́кожде и ты́ твори́: а́ще и укори́тъ тя́ нѣ́кто, да не свирѣ́пѣешися, но постони́, не о доса́дѣ, но о грѣсѣ́, вве́ргшемъ тя́ въ безче́стіе. Постони́, е́гда согрѣши́ши, не я́ко му́читися и́маши: сіе́ бо ничто́ же е́сть; /л. 159/ но я́ко прирази́лся еси́ своему́ Влады́цѣ, та́ко ти́хому, та́ко тебе́ лю́бящему, и жела́ющему твоего́ спасе́нія, я́ко и Сы́на преда́ти за тя́ не пощадѣ́. Си́хъ ра́ди постони́, и сіе́ твори́ безпреста́ни — се́ бо е́сть исповѣ́даніе, а не е́же, ны́нѣ у́бо свѣ́телъ, на у́тріе же сѣ́товенъ, та́же свѣ́телъ; но вы́ну пребыва́й, во е́же рыда́ти и сокруша́ти себе́. Блаже́ни бо, рече́, пла́чущіися, си́рѣчь, непреста́нно сіе́ творя́щіи. Пребыва́й, сіе́ творя́ бузпреста́ни, и себѣ́ внима́я, и сокруша́я си́ се́рдце, я́ко же а́ще кто́ пріи́скренняго сы́на погуби́въ, пла́чется. Раздери́те, рече́, сердца́ ва́ша, а не ри́зы ва́ша. Раздра́ное же не взима́ется, сокруше́нное не востае́тъ. Сего́ ра́ди и́нъ у́бо глаго́летъ: раздери́те; и́нъ же глаго́летъ: се́рдце сокруше́нно и смире́нно Бо́гъ не уничижи́тъ. Аще и му́дръ еси́, а́ще и бога́тъ, а́ще и си́ленъ, раздери́ се́рдце, не оставля́й ему́ великому́дрствовати, ниже́ гордѣ́тися, ниже́ надыма́тися; разсѣ́дшеебося не надыма́ется. И а́ще что́ бу́детъ взима́ющее, не возмо́жетъ дме́нія терпѣ́ти, за е́же раздра́тися: та́ко и ты́ смиренному́дрствуй. Помы́сли, /л. 159 об./ я́ко мыта́рь глаго́ломъ еди́нѣмъ оправда́ся, а́ще и ниже́ смиренному́дріе о́но бѣ́, но исповѣ́даніе и́стинное. Аще ли же сіе́ толи́ку и́мать крѣ́пость, кольми́ па́че смиренному́дріе. Оста́ви согрѣше́нія прегрѣши́вшимъ ти, и́бо и то́ грѣхи́ оставля́етъ. И о пе́рвомъ у́бо рече́: ви́дѣхъ, я́ко оты́де дря́хлъ, и исцѣли́хъ пути́ его́. И при Аха́вѣ сіе́ разрѣши́ло гнѣ́въ Бо́жій. О се́мъ же второ́мъ: оста́вите, и оста́вится ва́мъ. Есть па́ки и и́нъ пу́ть сіе́ на́мъ нося́щь врачева́ніе — зазрѣ́ніе согрѣше́нныхъ. Глаго́ли бо ты́ согрѣше́нія своя́ пре́жде, да оправди́шися. И е́же злостра́ждущу благодари́ти, разрѣша́етъ согрѣше́нія; всѣ́хъ же бо́льше ми́лостыня. Счисля́й про́чее бы́лія исцѣля́ющая ти́ ра́ны и вся́ возлага́й ча́сто: пе́рвое — смиренному́дріе; второ́е — исповѣ́даніе; тре́тіе — е́же непамятозло́бствовати; четве́ртое — е́же стра́ждущу злѣ́, благодари́ти; пя́тое — е́же ми́ловати имѣ́ньми и ве́щьми; шесто́е — е́же моли́тися терпѣли́вно. Си́це вдова́ суро́ваго и неми́лостиваго и безсту́днаго уми́лостивила судію́. Аще ли же она́ непра́веднаго, кольми́ па́че ты́ Кро́ткаго. /л. 160/ Седмо́е — е́сть и другíй съ си́ми пу́ть, е́же заступа́ти оби́димыхъ. Суди́те бо рече́, си́ру, и оправда́йте вдови́цу, и пріиди́те, и побесѣ́дуемъ, и а́ще бу́дутъ грѣси́ ва́ша, я́ко баго́ръ, я́ко снѣ́гъ убѣлю́. Ко́его бу́демъ отвѣ́та досто́йни, а́ще толи́кія иму́ще пути́ на́ небо возводя́щія, и толи́кая бы́лія цѣля́щая ра́ны, и по́слѣжде ба́ни въ тѣ́хъ же пребыва́емъ? Не пребу́демъ про́чее, но и́же у́бо не у́ па́дшіи, въ свое́й да пребыва́ютъ добротѣ́, па́че же вя́щше да ухищря́ютъ ю́. Аще бо и не обря́щутъ грѣхо́въ, сія́ исправле́нія бо́льшее творя́тъ благозра́чіе. Мы́ же, мно́гая согрѣши́вшіи, на исправле́ніе грѣхо́въ пріи́мемъ рече́нная, да суди́щу Христо́ву со дерзнове́ніемъ предста́немъ мно́гимъ. Его́ же бу́ди всѣ́мъ на́мъ причасти́тися, благода́тію и человѣколю́біемъ Го́спода на́шего Іису́са Христа́, Ему́ же сла́ва, че́сть и поклане́ніе съ Безнача́льнымъ Его́ Отце́мъ, и съ Пресвяты́мъ и Благи́мъ и Животворя́щимъ Ду́хомъ, ны́нѣ и при́сно, и во́ вѣки вѣко́мъ, ами́нь.

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 157 – 160.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.