Церковный календарь
Новости


2017-07-24 / russportal
Cвт. Іоаннъ Шанхайскій. Слово при открытіи общества "Правосл. Дѣло" (1994)
2017-07-24 / russportal
Еп. Григорій (Граббе). Догматика о. Архимандрита Іустина (Поповича) (1964)
2017-07-23 / russportal
Свщмч. Кипріанъ Карѳагенскій. Письмо (48-е), увѣщаніе къ мученичеству (1879)
2017-07-23 / russportal
Свщмч. Кипріанъ Карѳагенскій. Письмо (47-е), противъ еретиковъ (1879)
2017-07-23 / russportal
Слова преп. Симеона Новаго Богослова. Слово 28-е (1882)
2017-07-23 / russportal
Слова преп. Симеона Новаго Богослова. Слово 27-е (1882)
2017-07-22 / russportal
А. И. Купринъ. «Разсказы для дѣтей». Фіалки (1921)
2017-07-22 / russportal
А. И. Купринъ. «Разсказы для дѣтей». Скворцы (1921)
2017-07-22 / russportal
А. С. Пушкинъ. "Повѣсти Бѣлкина". Барышня-крестьянка (1921)
2017-07-22 / russportal
А. С. Пушкинъ. "Повѣсти Бѣлкина". Станціонный смотритель (1921)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 5-я (1903)
2017-07-22 / russportal
Преп. Епифаній Премудрый. Житіе преп. Сергія Радонежскаго. Глава 4-я (1903)
2017-07-21 / russportal
Повѣсть о явленіи образа Пресв. Богородицы въ Казани, и о чудесахъ, бывшихъ отъ него (1912)
2017-07-21 / russportal
"Проповѣдн. хрестоматія". Поученіе въ день Казанской иконы Божіей Матери (1965)
2017-07-20 / russportal
"Русскія дѣтскія сказки". Василиса Прекрасная (1921)
2017-07-20 / russportal
"Русскія дѣтскія сказки". Морозко (1921)
Новости въ видѣ
RSS-канала: .
Сегодня - вторникъ, 25 iюля 2017 г. Сейчасъ на порталѣ посѣтителей - 4.
Церковно-учительная литература

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

СЛОВО 68.
Въ недѣ́лю но́вую Антипа́схи. Кири́лла мни́ха сло́во о поновле́ніи Воскресе́нія Христо́ва, и о а́ртусѣ, и о испыта́ніи и о увѣре́ніи Ѳоминѣ́.

Вели́ка учи́теля и му́дра сказа́теля тре́буетъ це́ркви на украше́ніе пра́зднику. Мы́ же ни́щи сло́вомъ есмы́ и умо́мъ му́тни, не иму́ще огня́ Свята́го Ду́ха въ наслажде́ніе душеполе́зныхъ слове́съ. Оба́че любве́ ра́ди су́щихъ со мно́ю бра́тій, ма́ло нѣ́что ска́жемъ о поновле́ніи Христо́ва Воскресе́нія, а вы́ съ прилѣжа́ніемъ послу́шайте. Въ мину́вшую недѣ́лю Святы́я Па́схи удивле́ніе бѣ́ небеси́ и устраше́ніе преиспо́днимъ, обновле́ніе тва́ри и избавле́ніе мíру, разруше́ніе а́дово и попра́ніе сме́рти, воскресе́ніе ме́ртвымъ и погубле́ніе преле́стныя вла́сти діа́воли, спасе́ніе же ро́ду человѣ́ческому Христо́вымъ Воскресе́ніемъ, обнища́ніе ве́тхому зако́ну и порабоще́ніе субо́тѣ, обогаще́ніе Христо́вѣ Це́ркви и воцаре́ніе недѣ́ли. Въ мину́вшую недѣ́лю всему́ премѣне́ніе бы́сть: сотвори́бося небесе́мъ земля́, очище́на Бо́гомъ отъ бѣсо́вскихъ скве́рнъ, и а́нгели съ жена́ми раболѣ́пно служа́ху Воскресе́нію Христо́ву. /л. 207 об./ Обнови́ся тва́рь, у́же бо не нареку́тся Бо́гомъ стихíи, ни со́лнце, ни о́гнь, ни древеса́, ни исто́чницы. Отсе́лѣ не пріи́метъ а́дъ тре́бы закала́емыхъ отцы́ младе́нецъ, ни сме́рть по́чести: преста́ бо идолослуже́ніе и погуби́ся бѣсо́вское наси́ліе кре́стнымъ та́инствомъ. И не то́кмо спасе́ся ро́дъ человѣ́ческій, но и освяти́ся Христо́вою вѣ́рою. Ве́тхій же зако́нъ отню́дъ обнища́, отверже́ніемъ те́лчи кро́ви и ко́злихъ же́ртвъ: еди́нъ бо Христо́съ Са́мъ Себе́ ко Отцу́ за всѣ́хъ Же́ртву принесе́. Тѣ́мже и пра́здникъ субо́ты преста́, а недѣ́ли дана́ бы́сть благода́ть Воскресе́нія ра́ди, и ца́рствуетъ у́же во́ днехъ недѣ́ля, я́ко въ ту́ воскре́се Христо́съ отъ ме́ртвыхъ. Вѣнча́емъ, бра́тіе, цари́цу дне́мъ и да́ры че́стны принесе́мъ съ вѣ́рою. Дади́мъ по си́лѣ, я́коже мо́жемъ: о́въ — ми́лостыню, и беззло́біе, и любо́вь; другíй — дѣ́вство, чистоту́, и вѣ́ру пра́ву, и смире́ніе нелицемѣ́рно; инъ — псало́мское пѣ́ніе, и апо́стольское уче́ніе, и моли́тву съ воздыха́ніемъ къ Бо́гу. Са́мъ бо Госпо́дь Моѵсе́омъ глаго́летъ: не явля́йся предо Мно́ю то́щь въ де́нь пра́здника Моего́. Принесе́мъ Ему́ предрече́нныя добродѣ́тели, /л. 208/ да воспріи́мемъ Бо́жію ми́лость, и́бо не лиши́тъ бла́га приходя́щихъ съ вѣ́рою: сла́вящая бо Мя́, рече́, просла́влю. Похва́лимъ кра́сно сію́ но́вую недѣ́лю, въ ню́ же пра́зднуемъ поновле́ніе Воскресе́нія Христо́ва. Не бо́ е́сть та́же Па́сха дне́сь, но Антипа́сха нарече́ся: Па́сха бо избавле́ніе мíру е́сть отъ наси́лія діа́воля и свобожде́ніе отъ а́да преиспо́дняго ме́ртвымъ; Антипа́сха же е́сть поновле́ніе Воскресе́нія, о́бразъ иму́щи ве́тхаго зако́на, е́же завѣща́ Бо́гъ во Еги́птѣ Моѵсе́ови, глаго́ля: се́ избавля́ю лю́ди Моя́ отъ рабо́ты фарао́ни и свобожда́ю и́хъ отъ муче́нія приста́вникъ его́, да поновля́еши де́нь спасе́нія твоего́, въ о́ньже де́нь побѣди́хъ враги́ твоя́, Изра́илю. Се́ ны́нѣ и мы́ поновля́емъ, пра́зднующе побѣ́дный де́нь Христо́въ, въ о́ньже всему́ мíру спасе́ніе содѣ́я, побѣди́въ нача́льника вла́сти те́мныя. Того́ ра́ди а́ртусный хлѣ́бъ отъ Па́схи и до ны́нѣ въ це́ркви свяще́нъ бы́сть, и дне́сь на іере́йскихъ версѣ́хъ ло́мится, за опрѣсно́ки несе́нныя на глава́хъ левви́тъ отъ Еги́пта по пусты́ни, до́ндеже и Чермно́е мо́ре проидо́ша: и ту́ то́й хлѣ́бъ освяти́ша Го́сподеви, его́же вкуша́юще здра́ви быва́ху и враго́мъ стра́шни. /л. 208 об./ И они́ у́бо избы́вше тѣле́сныя рабо́ты, поновля́ху пра́зднующе де́нь опрѣсно́чный; мы́ же, Влады́кою спасе́ни отъ рабо́ты мы́сленнаго фарао́на — діа́вола, поновля́емъ побѣ́дный на враги́ де́нь, и сего́ свяще́ннаго ны́нѣ пріе́млюще хлѣ́ба, та́ко вкуша́емъ, я́коже и они́ хлѣ́ба небе́снаго и а́нгельскаго бра́шна. И храни́мъ его́ на вся́ку потре́бу бла́гу, на здра́віе тѣлеси́, и душа́мъ на спасе́ніе, и на прогна́ніе вся́каго неду́га. Дне́сь ве́тхая коне́цъ прія́ша, и се́ бы́ша вся́ нова́ — ви́димая же и неви́димая. Ны́нѣ небеса́ просвѣти́шася, отъ те́мныхъ о́блакъ, я́ко вре́тища, совле́кшеся, и свѣ́тлымъ возду́хомъ, сла́ву Госпо́дню исповѣ́дуютъ. Не сія́ глаго́лю ви́димая небеса́, но разу́мная — апо́столы, и́же дне́сь на Сіо́нѣ, вше́дша къ ни́мъ, позна́ша Го́спода, и всю́ печа́ль забы́вше и ско́рбь, и іуде́йскій стра́хъ отве́ргше, и Святы́мъ Ду́хомъ осѣни́вшеся, Воскресе́ніе Христо́во я́сно проповѣ́даютъ. Ны́нѣ со́лнце, красу́яся, восхо́дитъ къ высотѣ́ и, ра́дуяся, зе́млю огрѣва́етъ: взы́де бо на́мъ Пра́ведное Со́лнце отъ гро́ба — Христосъ, и вся́ вѣ́рующія въ Онь спаса́етъ. Ны́нѣ луна́ съ вы́шняго /л. 209/ соступи́вши степе́ни, бо́льшему свѣти́лу че́сть воздае́тъ. Уже ве́тхій зако́нъ, по писа́нію, и съ субо́тами преста́, и Це́рковь зако́ну Христо́ву съ недѣ́лею че́сть воздае́тъ. Ны́нѣ зима́ грѣхо́вная покая́ніемъ преста́ла е́сть и ле́дъ невѣ́рія богоразу́міемъ раста́яся. Зима́ у́бо язы́ческаго кумирослуже́нія, апо́стольскимъ уче́ніемъ и Христо́вою вѣ́рою преста́ла е́сть. Ле́дъ же Ѳомина́ невѣ́рія показа́ніемъ Христо́выхъ ре́бръ раста́яся. Дне́сь весна́ красу́ется, оживля́ющи земно́е естество́, и бу́рніи вѣ́три, ти́хо повѣва́юще, плоды́ гобзу́ютъ, и земля́, сѣ́мена пита́ющи, зеле́ную траву́ ражда́етъ. Весна́ у́бо — кра́сная вѣ́ра Христо́ва, я́же креще́ніемъ па́ки порожда́етъ человѣ́ческое естество́; бу́рніи же вѣ́три — грѣхотво́рніи по́мыслы, и́же покая́ніемъ претвори́шася на добродѣ́тель, душеполе́зныя плоды́ гобзу́ютъ; земля́ же естества́ на́шего, а́ки сѣ́мя сло́во Бо́жіе пріе́мши и, страхоболя́щи, ду́хъ спасе́нія ражда́етъ. Ны́нѣ новоражда́еміи а́гнцы и юнцы́, бы́стро пу́ть теку́ще, ска́чутъ и, ско́ро къ ма́теремъ возвраща́ющеся, веселя́тся; и па́стыри, свиря́юще, съ весе́ліемъ Христа́ хва́лятъ. /л. 209 об./ Агнцы глаго́лю — и́же отъ язы́къ кро́ткія лю́ди. А юнцы́ — кумирослужи́тели невѣ́рныхъ стра́нъ, и́же Христо́вымъ вочеловѣ́ченіемъ, и апо́стольскимъ уче́ніемъ, и чудесы́, ско́ро подъ зако́нъ е́мшеся и ко Христо́вѣ Це́ркви обрати́вшеся, млеко́ уче́нія ссу́тъ, и учи́тели бы́вше Христо́ва ста́да, о всѣ́хъ моля́щеся, Христа́ Бо́га сла́вятъ, во́лки и а́гнцы вся́ во еди́но ста́до собра́вшаго. Ны́нѣ древа́ лѣ́торасли испуща́ютъ и цвѣ́ты благоуха́нія процвѣта́ютъ, и се́ у́же вертогра́ди сла́дкую воню́ подаю́тъ, и дѣ́лателю съ наде́ждею тружда́ющеся, плодода́вца Христа́ призыва́ютъ. Бѣ́яхомъ бо пре́жде, а́ки древа́ дубра́вная, не иму́ще плода́, ны́нѣ же присади́ся Христо́ва вѣ́ра въ на́шемъ невѣ́ріи, и держа́щеся ко́рене Іессе́ова, я́ко цвѣ́ты добродѣ́тели пуща́юще, ра́йскаго па́ки бытія́ о Христѣ́ ожида́ютъ; да и святи́тели и игу́мени о Це́ркви тружда́ющеся, отъ Христа́ мзды́ ожида́ютъ. Ны́нѣ ра́таи сло́ва, слове́сныя юнцы́ къ духо́вному ярму́ приводя́ще, и кре́стное ра́ло въ мы́сленныхъ бразда́хъ углубля́юще, и бразду́ покая́нія че́рплюще, и сѣ́мя духо́вное изсыпу́юще, наде́ждами бу́дущихъ бла́гъ веселя́тся. Дне́сь вся́ /л. 210/ ве́тхая коне́цъ прія́ша, се́ бо вся́ бы́ша но́ва Воскресе́нія ра́ди. Ны́нѣ рѣ́ки апо́стольскія наводня́ются, и язы́ческія ры́бы пло́дъ пуща́ютъ, и рыбари́ Бо́жія вочеловѣ́ченія глубину́ испыта́вше, по́лну церко́вную мре́жу лови́твы обрѣта́ютъ. Рѣка́ми бо, рече́ проро́къ, разся́дется земля́, и у́зрятъ и разболя́тся лю́діе нечести́віи. Ны́нѣ мни́шескаго о́браза трудолюби́вая пчела́, свою́ му́дрость показу́ющи, вся́ удивля́етъ. Якоже бо они́ въ пусты́няхъ самоко́рмліемъ живу́ще, а́нгелы и человѣ́ки удивля́ютъ, та́ко и сíи на цвѣты́ излета́юще, ме́двеный со́тъ сотворя́ютъ, да человѣ́комъ сла́дость и Це́ркви потре́бная подаду́тъ. Ны́нѣ вся́ доброгла́сныя пти́цы церко́вныхъ лико́въ гнѣздящеся, веселя́тся; и пти́ца бо, рече́ проро́къ, обрѣ́те гнѣздо́ себѣ́ — олтари́ Твоя́, Го́споди Бо́же си́лъ. — Еже су́ть церко́вніи чи́ни, епи́скопи, и свяще́нницы, и игу́мени, діа́кони, и діяцы́ ко́ждо свою́ пѣ́снь пою́ще, сла́вятъ Го́спода гла́сы немо́лчными. Дне́сь понови́шася всѣ́хъ святы́хъ чи́нове, но́ву жи́знь о Христѣ́ пріе́млюще: проро́цы и патріа́рси труди́вшіися, почива́ютъ въ ра́йстѣй жи́зни; апо́столи со святи́тели пострада́вше, /л. 210 об./ прославля́ются на́ небеси и на земли́; му́ченицы и исповѣ́дницы, за Христа́ претерпѣ́вше стра́сти, со а́нгелы вѣнча́ются; цари́ и кня́зи благовѣ́рніи, послуша́ніемъ святы́хъ кни́гъ спаса́ются; дѣ́вственніи ли́цы и и́ночестіи соста́вы, сво́й кре́стъ терпѣ́ніемъ поне́сше, Пе́рвенцу Христу́ отъ земли́ на небеса́ возслѣ́дуютъ; по́стницы и пусты́нницы, отъ руки́ Госпо́дни труда́ мзду́ пріе́мше, въ го́рнемъ гра́дѣ со святы́ми веселя́тся. Дне́сь но́вымъ лю́демъ Воскресе́нія Христо́ва поновле́нія пра́здникъ, и вся́ но́вая Го́сподеви прино́сятся: отъ язы́къ — вѣ́ра, отъ христіа́нъ — тре́бы, отъ іере́й — Свята́я Приноше́нія, отъ міродержи́тель — боголю́бная ми́лостыня, отъ вельмо́жъ — церко́вное попече́ніе, отъ пра́ведникъ — смиренному́дріе, отъ грѣ́шникъ — и́стинное покая́ніе, отъ нечести́выхъ — обраще́ніе къ Бо́гу, отъ ненави́дящихъ — духо́вная любо́вь. Взы́демъ и мы́, бра́тіе, мы́сленно ны́нѣ въ Сіо́нскую го́рницу, я́ко та́мо апо́столи собра́шася, и Са́мъ Госпо́дь Іису́съ Христо́съ затворе́ннымъ две́ремъ, посредѣ́ и́хъ обрѣ́теся, ре́къ — ми́ръ ва́мъ! — и испо́лни я́ ра́дости. Возра́довашажеся ученицы́ ви́дѣвше Го́спода, и всю́ печа́ль тѣле́сную, и стра́хъ серде́чный отри́нуша, даде́бося /л. 211/ душа́мъ и́хъ духо́вная де́рзость позна́ніемъ своего́ Влады́ки, я́ко обнажи́ предъ всѣ́ми Своя́ ре́бра, и гвозди́нныя я́звы на ногу́ и на руку́, показу́етъ Ѳомѣ́. Не бѣ́ бо Ѳома́ со ученики́ въ пе́рвый прихо́дъ ви́дѣлъ Го́спода, и слы́шавъ Его́ воскре́сша, не я́ко лжу́ мня́ невѣ́роваше, но самови́децъ хотя́ бы́ти Христу́, та́ко глаго́лаше: а́ще не вложу́ руки́ моея́ въ ре́бра Его́ и въ я́звы гвозди́нныя своего́ пе́рста, не иму́ вѣ́ры. Тѣ́мъ и Госпо́дь, не понося́ ему́, си́це глаго́лаше: принеси́ ру́ку твою́, и ви́ждь прободе́ніе ре́бръ Мои́хъ, и вѣ́руй, я́ко Са́мъ Азъ е́смь. О Мнѣ́ бо и пре́жде тебе́ пыта́ша патріа́рси и проро́цы и, разумѣ́вше, вѣ́роваша Моему́ вочеловѣ́ченію. Испыта́й пе́рвое о Мнѣ́ Иса́іино писа́ніе: копіе́мъ, рече́, въ ре́бра прободе́нъ бы́сть. Въ ре́бра же прободе́нъ бы́хъ, да отъ ребра́ па́дшаго Ада́ма воскре́шу, а тебе́ ли невѣ́рующа пре́зрю? Осяза́й Мя́, я́ко Са́мъ Азъ е́смь. Его́же осяза́ пре́жде Симео́нъ, и вѣ́рою проша́ше отпуще́нія съ ми́ромъ. И не бу́ди невѣ́ренъ, я́коже Иродъ, и́же слы́шавъ Мое́ рождество́, и глаго́лаше волхво́мъ: гдѣ́ Христо́съ ражда́ется? да и а́зъ, ше́дъ, поклоню́ся Ему́. А въ се́рдцы свое́мъ /л. 211 об./ о убíйствѣ Мое́мъ мы́сляше. Но а́ще и младе́нцы изби́, но иско́маго не обрѣ́те: взы́щутъ бо Мене́, рече́, злíи, и не обря́щутъ. Вѣ́ру ими́ Ми́, Ѳомо́, и позна́й Мя́, я́коже Авраа́мъ, къ нему́ же подъ сѣ́нь со двѣма́ а́нгелома пріидо́хъ, и то́й позна́въ Мя́, Го́спода Мя́ нарече́, и о Содо́мѣ моля́шеся, да не погублю́, а́ще бы и до десяти́ бы́ло въ не́мъ пра́ведникъ. Не бу́ди невѣ́ренъ, я́ко Валаа́мъ, и́же Ду́хомъ Святы́мъ прорече́ за мíръ Мое́ уме́ртвіе, и па́ки, мзды́ ра́ди прельсти́вся, поги́бе. Вѣ́ру ими́ Ми́, Ѳомо́, я́ко Са́мъ Азъ е́смь, Его́же Іа́ковъ ви́дѣ въ нощи́ на лѣ́ствицѣ утвержа́ющася, и то́й же па́ки позна́ Мя́ Ду́хомъ, егда́ боря́хся съ ни́мъ въ Месопота́міи; тогда́ бо обѣща́хся ему́ вочеловѣ́читися отъ пле́мени его́. И не бу́ди невѣ́ренъ, я́ко Навуходоносо́ръ, и́же ви́дѣвъ Мя́ въ пещи́ о́троки отъ огня́ спа́сша, и́стинна Сы́на Бо́жія нарече́ Мя́, и па́ки къ свои́мъ пре́лестемъ уклони́вся, поги́бе. Вѣ́ру ими́ Ми́, Ѳомо́, я́ко Азъ е́смь, Его́же обра́зно ви́дѣ Иса́ія на престо́лѣ высо́цѣ, обстои́ма мно́жествомъ а́нгелъ. Азъ е́смь яви́выйся Іезекíилю посредѣ́ живо́тныхъ человѣ́ческимъ /л. 212/ о́бразомъ, ему́же и ва́съ прообрази́хъ коле́сы, живо́тныхъ придержа́щимися, и воздвиза́ющимися со Мно́ю. То́й бо живо́тный Ду́хъ бѣ́ тогда́ въ колесѣ́хъ, Его́же ны́нѣ въ ва́съ ду́нухъ Ду́хъ Святы́й. Азъ е́смь, Его́же ви́дѣ Даніи́лъ на о́блацѣхъ небе́сныхъ, въ подо́біи Сы́на Человѣ́ча соше́дша до Ве́тхаго Де́ньми: и То́й написа́ да́нную Ми́ вла́сть о́тъ Бога Отца́, и ца́рство на́ небеси и на земли́, ны́нѣшняго, и бу́дущаго безконе́чнаго вѣ́ка. Принеси́, о Близнече́, тво́й пе́рстъ, и ви́ждь ру́цѣ Мои́, и́маже слѣпы́мъ о́чи отверзо́хъ, и глухи́мъ слу́хъ дарова́хъ, и нѣмы́я доброглаго́ливы сотвори́хъ. Ви́ждь и но́зѣ Мои́, и́маже предъ ва́ми по́ морю ходи́хъ, и по во́здуху я́вственно ступа́хъ, и въ преиспо́дняя сше́дъ, тѣ́ма а́да попра́хъ, и съ Луко́ю и Клео́пою до Еммау́са пу́ть ше́ствовахъ. И не бу́ди невѣ́ренъ, но вѣ́ренъ. Отвѣща́ Ѳома́ глаго́ля: вѣ́рую, Го́споди, я́ко Ты́ Са́мъ еси́ Христо́съ Бо́гъ мо́й, о Не́мже писа́ша проро́цы, предзря́ще Ду́хомъ, Его́же прообрази́ въ зако́нѣ Моисе́й, Его́же отверго́шася со жрецы́ фарисе́и, Ему́же поруга́шася за́вистію съ кни́жники жи́дове, Его́же осуди́ съ Каіа́фою Пила́тъ на распя́тіе, Его́же Бо́гъ Оте́цъ изъ ме́ртвыхъ /л. 212 об./ воскреси́. Ви́жу ре́бра, отъ ни́хже источи́ кро́вь и во́ду: во́ду, да очи́стиши оскве́рньшуюся зе́млю; кро́вь же, да освяти́ши человѣ́ческое естество́. Ви́жу ру́цѣ Твои́, и́маже пре́жде сотвори́ всю́ тва́рь, и ра́й насади́, и человѣ́ка созда́, и́маже благослови́ патріа́рхи, и́маже пома́за цари́, и́маже освяти́ апо́столы. Ви́жу но́зѣ Твои́, и́маже прикосну́вшися блудница, отпуще́ніе грѣхо́въ прія́тъ, на ни́хже припа́дши вдови́ца пе́рвѣе, отъ ме́ртвыхъ своего́ сы́на съ душе́ю жи́ва прія́тъ, надъ си́ма нога́ма кровоточи́вая подо́лцѣ ри́зъ прикосну́вшися, исцѣлѣ́ отъ неду́га. И а́зъ, Го́споди, вѣ́рую, я́ко Ты́ еси́ Госпо́дь и Бо́гъ мо́й. И рече́ къ нему́ Іису́съ: я́ко ви́дѣвъ Мя́, вѣрова; блаже́ни не ви́дѣвше и вѣ́ровавше. Тѣ́мже, бра́тіе, вѣ́руемъ Христу́ Бо́гу на́шему распе́ншемуся, и поклони́мся Ему́, и воскре́сша Его́ просла́вимъ, и я́вльшемуся апо́столомъ вѣ́руемъ, и показа́вшему Ѳомѣ́ Своя́ ре́бра воспое́мъ, прише́дшаго оживи́ти на́съ похва́лимъ, и просвѣти́вшаго ны́ проповѣ́даемъ, и всѣ́хъ бла́гъ пода́вшаго на́мъ оби́ліе возвели́чимъ, Еди́наго отъ Тро́ицы позна́емъ, Го́спода Бо́га и Спа́са на́шего Іису́са Христа́, Ему́же сла́ва со Отце́мъ и Святы́мъ Ду́хомъ, ны́нѣ и при́сно и во́ вѣки вѣко́мъ. [Ами́нь.]

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 207 – 212 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.