Церковный календарь
Новости


2017-12-14 / russportal
П. Н. Красновъ. Повѣсть "Въ манчжурской глуши". Глава 20-я (1904)
2017-12-14 / russportal
П. Н. Красновъ. Повѣсть "Въ манчжурской глуши". Глава 19-я (1904)
2017-12-14 / russportal
П. Н. Красновъ. Повѣсть "Въ манчжурской глуши". Глава 18-я (1904)
2017-12-14 / russportal
П. Н. Красновъ. Повѣсть "Въ манчжурской глуши". Глава 17-я (1904)
2017-12-14 / russportal
П. Н. Красновъ. Повѣсть "Въ манчжурской глуши". Глава 16-я (1904)
2017-12-14 / russportal
П. Н. Красновъ. Повѣсть "Въ манчжурской глуши". Глава 15-я (1904)
2017-12-14 / russportal
Архіеп. Аверкій. Чего мы еще не потеряли и что должны хранить? (1975)
2017-12-14 / russportal
"Церковныя Вѣдомости" № 16-17. (1/14-15/28 ноября) 1922 года
2017-12-13 / russportal
П. Н. Красновъ. Повѣсть "Въ манчжурской глуши". Глава 14-я (1904)
2017-12-13 / russportal
П. Н. Красновъ. Повѣсть "Въ манчжурской глуши". Глава 13-я (1904)
2017-12-13 / russportal
П. Н. Красновъ. Повѣсть "Въ манчжурской глуши". Глава 12-я (1904)
2017-12-13 / russportal
П. Н. Красновъ. Повѣсть "Въ манчжурской глуши". Глава 11-я (1904)
2017-12-13 / russportal
П. Н. Красновъ. Повѣсть "Въ манчжурской глуши". Глава 10-я (1904)
2017-12-13 / russportal
П. Н. Красновъ. Повѣсть "Въ манчжурской глуши". Глава 9-я (1904)
2017-12-13 / russportal
Прав. Іоаннъ Кронштадтскій. Слово въ день св. ап. Андрея Первозваннаго (1908)
2017-12-13 / russportal
"Церковныя Вѣдомости" № 14-15. (1/14-15/28 октября) 1922 года
Новости въ видѣ
RSS-канала: .
Сегодня - четвергъ, 14 декабря 2017 г. Сейчасъ на порталѣ посѣтителей - 9.
Церковно-учительная литература

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

СЛОВО 79.
Въ недѣ́лю 1-ю по Пентико́стіи, поуче́ніе свята́го Іоа́нна Златоу́стаго на па́мять всѣ́хъ святы́хъ.

Отне́лѣ же Пятьдеся́тницу пра́здновахомъ и прише́ствіе Свята́го Ду́ха, не пре́йде седми́ днíй число́, ны́нѣ же приспѣ́ всѣ́хъ святы́хъ честна́я па́мять. Поне́же и Са́мъ Госпо́дь рече́: «Отче, хощу́, да идѣ́же Азъ, ту́ бу́дутъ и уго́ждьшіи Мнѣ́». Просла́ви бо Госпо́дь Бо́гъ на́ небеси и на земли́ святы́я Своя́: апо́столы же, проро́ки и му́ченики, святи́тели, и преподо́бныя, и священному́ченики, по́стники съ му́ченицами и съ преподо́бными жена́ми, и́хъ же па́мять чту́ще, потщи́мся въ за́повѣдехъ Бо́жіихъ бы́ти и пра́вду дѣ́яти, да и на́съ Госпо́дь Бо́гъ просла́витъ. Святíи бо таковíи же человѣ́цы бы́ли, я́ко же /л. 236/ и мы́, но непра́вду и зло́бу возненави́дѣша, сла́ву же мíра сего́ и бога́тство нивочто́же вмѣни́ша, и живота́ своего́ не пощади́ша, тѣ́мъ же и на́ небесѣхъ со а́нгелы пребыва́ютъ безъ ста́рости и безсме́ртни. Поне́же а́ще му́ченицы и имя́ху тѣ́ло сме́ртно, но ду́ши и́хъ со а́нгелы во сла́вѣ: Христо́ва бо сме́рть вельми́ просла́ви я́. Не тольма́ не́бо свѣ́тло укра́шено звѣзда́ми, я́ко же му́ченическая тѣлеса́ я́звами краси́ма. Кто́ же не диви́тся сему́? Біе́міи одолѣва́ютъ бію́щихъ, связу́еміи — разрѣше́нныхъ, жго́міи — жгу́щихъ. Му́ченицы бо вя́жеми, и многоразли́чно томи́ми, и му́чими, побѣди́ша му́чащихъ, мно́ги пріи́мше стра́сти. Проро́цы же и апо́столи мно́го бы́ша томи́ми и отъ святи́тельска чи́на мно́зи разли́чны му́ки отъ беззако́нникъ прія́ша и мно́га беззако́нніи святы́мъ сотвори́ша зла́я: наги́хъ бо водя́ще и, ру́ки о́пако связа́вше, бія́ху; и стру́жуще, изнемога́ху мучи́тели, а пріе́млющіи му́ки, побѣ́ду на діа́вола устроя́ху. Мно́ги же зло́бы мучи́тели злíи на святы́я устро́иша: о́выхъ бо къ дре́ву привяза́вше, ре́бра и́мъ прободо́ша; о́выхъ же изстрѣля́ша, а инѣ́мъ ру́цѣ и но́зѣ отсѣко́ша; инѣ́мъ же язы́ки отрѣ́заша, /л. 236 об./ и о́чи извертѣ́ша, и главы́ мече́мъ отсѣко́ша, и зу́бы сокруши́ша; инѣ́мъ же чрева́ разрѣ́заша, и ре́бра разврати́ша, и гру́ди разсѣко́ша, и, никогда́же почи́вше, бѣся́щеся окая́нніи мучи́тели; но и съ дре́ва сне́мше, на у́гліи о́гненнѣ и на сковрада́хъ желѣ́зныхъ растяго́ша, отъ тѣле́съ и́хъ сугу́бѣй кро́ви теку́щи. Мно́гихъ же тѣлеса́ огне́мъ сожго́ша. Святíи же сія́ вся́ съ ра́достію Го́спода ра́ди терпя́ху, ча́юще воздая́нія бу́дущихъ бла́гъ. И а́ще не бы́ Госпо́дь укрѣпля́лъ и́хъ, то́ не бы́ стерпѣ́ли толи́кія мно́гія му́ки. Яко же бо со́лнце восходя́щее многоза́рны лучи́ испуща́етъ, та́ко и святы́хъ тѣлеса́ бя́ху ра́нами укра́шена. Терпѣ́ніемъ бо вѣнцы́ воспрія́ша: и не то́кмо му́жы еди́ны, но и жены́ мно́ги Христа́ ра́ди стра́сти и му́ки прія́ша. Преподо́бніи же тѣ́снымъ путе́мъ ше́ствовавше, о́віи въ пусты́няхъ, инíи же въ гора́хъ и въ разсѣ́линахъ земны́хъ, а́лчбою, и жа́ждею, и нагото́ю озлобля́еми, и отъ бѣсо́въ тма́ми искуша́еми, сконча́шася. Діа́волъ же и а́ггели его́ вельми́ боя́хуся и трепета́ху, о́ну воспомяну́вше Госпо́дню Кро́вь, ея́ же ра́ди апо́столи, проро́цы и му́ченицы, и инíи мно́зи святíи кро́ви своя́ излія́ша и наслѣ́дницы /л. 237/ бы́ша Ца́рствія небе́снаго. Тѣ́мъ же, вѣ́рніи, потщи́мся до́брыми дѣ́лы почти́ти па́мять всѣ́хъ святы́хъ и поревну́емъ до́брымъ и́хъ дѣ́ломъ. Они́ бо всю́ жи́знь сію́ преоби́дѣша, мы́ же поне́ да оста́немся безъ вре́меннаго яде́нія и прокля́таго пія́нства. Они́ огню́ тѣлеса́ своя́ преда́ша, а мы́ поне́ отъ имѣ́нія на́шего подади́мъ неиму́щимъ и бѣ́днымъ. Они́ попра́ша у́глія о́гненная, а мы́ тѣлесе́ на́шего злы́я по́хоти да отрази́мъ. Они́ вся́ оста́виша, сла́ву и бога́тство свѣ́та сего́, ни живота́ пощади́вше Ца́рствія ра́ди небе́снаго, мы́ же поне́ десяти́ну стяжа́нія своего́ Бо́гови отдади́мъ, да ми́лостивъ бу́детъ и на́мъ Госпо́дь на́шъ въ де́нь су́дный. Да никто́же скорби́тъ о раздава́емыхъ, но па́че ра́дуйтеся о вѣ́чныхъ благи́хъ, угото́ванныхъ ми́лостивымъ. Дне́сь соше́дшеся, вѣ́рніи, почте́мъ добродѣ́тельно, пра́зднующе всѣ́хъ святы́хъ честну́ю па́мять, иму́ще ми́ръ и любо́вь между́ собо́ю, за́висть же и гнѣ́въ оста́вивше, и вся́ непра́вды, и вся́ зла́я дѣ́ла. Святíи бо мно́го труди́шася и мно́ги прія́ша стра́сти и бѣды́ Ца́рствія ра́ди небе́снаго, и мы́ сотвори́мъ повелѣ́нная на́мъ о́тъ Бога, да спасе́мся. Святíи бо, о́віи /л. 237 об./ на сковрада́хъ пеко́ми, а инíи на у́гліяхъ жго́ми, друзíи же въ котлѣ́хъ вари́ми; о́віи въ мо́ри потопля́еми, инíи же на колесѣ́хъ протяза́еми и стру́жеми; о́віи ка́меніемъ побива́еми, а инíи звѣре́мъ въ снѣ́дь помета́еми; о́віи во глубину́ рво́въ вмета́еми и по соста́вомъ раздробля́еми, и мно́ги безъ числа́ му́ки и стра́сти претерпѣ́вше, уго́дницы Бо́жіи бы́ша, жела́юще вѣ́чнаго поко́я и ра́дости. Мы́ же, вѣ́рніи, да пребу́демъ въ пра́вдѣ, за́повѣди Бо́жія творя́ще, да со всѣ́ми святы́ми наслѣ́дуемъ Ца́рство небе́сное о Христѣ́ Іису́сѣ Го́сподѣ на́шемъ, Ему́же сла́ва ны́нѣ, и при́сно, и во́ вѣки вѣко́мъ, ами́нь.

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 235 об. – 237 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.