Церковный календарь
Новости


2017-09-21 / russportal
Прот. Константинъ Зноско. "Истор. очеркъ церк. уніи". Часть 2-я. Глава 4-я (1993)
2017-09-21 / russportal
Прот. Константинъ Зноско. "Истор. очеркъ церк. уніи". Часть 2-я. Глава 3-я (1993)
2017-09-21 / russportal
Іером. Серафимъ (Роузъ). "Душа послѣ смерти". Приложеніе 3-е (1991)
2017-09-21 / russportal
Іером. Серафимъ (Роузъ). "Душа послѣ смерти". Приложеніе 2-е (1991)
2017-09-21 / russportal
Іером. Серафимъ (Роузъ). "Душа послѣ смерти". Приложеніе 1-е (1991)
2017-09-21 / russportal
Іером. Серафимъ (Роузъ). "Душа послѣ смерти". Глава 10-я (1991)
2017-09-21 / russportal
"Проповѣдн. хрестоматія". Поученіе на праздникъ Почаевской иконы Божіей Матери (1965)
2017-09-21 / russportal
"Проповѣдн. хрестоматія". Поученіе на Рождество Пресвятой Богородицы (1965)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 2-я (1993)
2017-09-14 / russportal
Прот. Константинъ Зноско. "Истор. очеркъ церк. уніи". Часть 2-я. Глава 1-я (1993)
2017-09-14 / russportal
Свт. Игнатій (Брянчаниновъ). Понятіе о ереси и расколѣ (1996)
2017-09-14 / russportal
Свт. Игнатій (Брянчаниновъ). Жизнь схимонаха Ѳеодора (1996)
2017-09-13 / russportal
Прот. Константинъ Зноско. Краткій обзоръ причинъ, пород. Литовскую церк. унію (1993)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 10-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 9-я (1987)
2017-09-13 / russportal
Прот. Михаилъ Польскій. "О почитаніи Пресв. Дѣвы Маріи". Глава 8-я (1987)
Новости въ видѣ
RSS-канала: .
Сегодня - четвергъ, 21 сентября 2017 г. Сейчасъ на порталѣ посѣтителей - 15.
Церковно-учительная литература

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

СЛОВО 80.
Въ недѣ́лю 2-ю по па́мяти всѣ́хъ святы́хъ, поуче́ніе свята́го Іоа́нна Златоу́стаго.

Азъ у́бо, дру́зи и бра́тіе, надѣ́яхся на вся́ку недѣ́лю бо́лѣе собра́ти люде́й въ це́рковь на послу́шаніе Боже́ственныхъ слове́съ, ны́нѣ же мнѣ́е прихо́дите. Но а́ще бы́хъ о себѣ́ глаго́лалъ, то́ до́брѣ твори́ли бы́сте не приходя́ще, ны́нѣ же Влады́чни за́повѣди возвѣща́ю ва́мъ. Яко же бо кто́ гра́моту царе́ву или кня́жу во́ градъ принесе́тъ подъ руко́ю его́ су́щимъ, не пыта́ютъ житія́ прине́сшаго, бога́тъ ли /л. 238/ или́ убо́гъ, пра́ведникъ ли или́ грѣ́шникъ, но тѣ́хъ то́чію что́мыхъ послу́шаютъ и тща́тся вся́ко, да бы́ ничто́ же и́хъ забы́ти. Аще ли кото́раго словесе́ кто́ недослы́шалъ, то вопроша́етъ слы́шавшаго; а́ще ли безчи́ненъ человѣ́къ молву́ твори́тъ, то бію́ще отго́нятъ его́, я́ко па́кость творя́щаго. Да а́ще земна́го кня́зя гра́мотамъ толи́ко внима́ніе быва́етъ, то́ кольми́ па́че подоба́етъ внима́ти на́мъ, идѣ́же а́нгеломъ Влады́ка бесѣ́дуетъ. Тѣ́мъ молю́ вы́, здѣ́ прише́дшихъ, да поуча́ете неприходя́щія, и увѣща́ете приходи́ти въ це́рковь, и со́ страхомъ стоя́ти внима́юще. Вы́ у́бо вкуси́сте отъ ме́да уче́нія, они́ же ника́ко же; «вкуси́те бо», рече́, «и увѣ́дите, я́ко бла́гъ Госпо́дь». Вѣ́сте бо, «я́ко отъ недосто́йнаго изводя́й досто́йнаго, я́ко уста́» су́ть Христо́ва. Поне́же у́бо сія́ изреко́хъ ва́мъ, послу́шайте, да поучу́ вы́ о моли́твѣ: то́ю бо исправля́ются вся́ до́брая дѣ́ла. Аще у́бо отъ умиле́нна се́рдца моли́тва исхо́дитъ, то́ я́ко благоуха́ніе къ Бо́гу восхо́дитъ. Того́ ра́ди проро́къ глаго́летъ: «да ся́ испра́витъ моли́тва моя́, я́ко кади́ло предъ Тобо́ю». Почто́, я́ко кади́лу, /л. 238 об./ мо́лится испра́витися моли́твѣ? Поне́же ѳиміа́мъ, егда́ на огнѣ́ бу́детъ, тогда́ и благоуха́ніе отъ себе́ испуща́етъ; та́кожде и моли́тва, егда́ отъ горя́ща се́рдца бу́детъ, то я́ко благоуха́ніе восхо́дитъ къ Бо́гу. Не разумѣ́сте ли пое́маго? Аще восхо́щете и бо́льше си́хъ поучу́ вы́, а́ще внима́ете; а́ще ли не внима́ете, и а́зъ у́бо умо́лкну и не хотя́, вы́ же осужде́ни бу́дете, я́ко уче́нія не послу́шасте и уча́щимъ ва́съ не внима́сте. Ка́ко бы́сте восхотѣ́ли въ толи́кій пу́ть ити́, ели́ко ю́жская цари́ца пре́йде, да слы́шитъ прему́дрость Соломо́ню? И се́ бо́лѣе Соломо́на е́сть здѣ́. Не мене́ ра́ди, а́зъ бо грѣ́шникъ е́смь, но Ева́нгельскаго ра́ди уче́нія. Повѣ́дите ми́, бра́тіе, а́ще восходя́щу со́лнцу сомжи́тъ кто́ о́чи свои́, не хотя́ ви́дѣти свѣ́та сего́, глаго́ля: «тма́ ми́ лу́чши е́сть свѣ́та сего́», то поми́луетъ ли его́ кто́, а не па́че ли возненави́дитъ и отве́ржется его́? То́ же и о словеси́ уче́нія да и́мате: свѣ́тъ бо сло́во Бо́жіе въ Писа́ніи нари́чется, и то́й бо́лѣе е́сть ви́димаго сего́ свѣ́та: си́мъ бо плотьстíи о́чи просвѣща́ются, а о́нымъ душе́вніи. Того́ ра́ди Давы́дъ глаго́летъ /л. 239/ къ Бо́гу: «свѣти́льникъ нога́ма мои́ма — зако́нъ Тво́й, и свѣ́тъ стезя́мъ мои́мъ». И па́ки Иса́ія глаго́летъ: «лю́діе, ходя́щіи во тмѣ́, ви́дѣша свѣ́тъ вели́къ». Кто́ у́бо поми́луетъ нехотя́щаго свѣ́та ви́дѣти? Ели́ко же ва́съ прихо́дите къ це́ркви, понужда́йте не приходя́щія приходи́ти. И никто́же глаго́ли, я́ко непра́зденъ е́смь во ины́хъ дѣ́лѣхъ, но помы́сли о́ны зва́нныя на ца́рьскую ве́черю, и́же мно́ги таковы́ извѣ́ты сотвори́ша: о́въ рече́, супру́гъ воло́въ купи́хъ, искуси́ти я́ хощу́; о́въ же села́ ку́пленаго согляда́ти хотя́ше; а и́нъ жену́ поя́тъ, и того́ ра́ди разгнѣ́вася на ни́хъ ца́рь. И вы́ еди́наго часа́ отдѣли́ти не мо́жете Го́сподеви? Но вопрошу́ вы́, отвѣща́йте ми́: а́ще зла́то, или́ сребро́ по вся́ дни́ раздава́лъ бы́хъ, или́ ме́дъ, или́ вино́, не са́ми ли на се́ приходи́ли бы́сте не позыва́еми, но дру́гъ дру́га зову́ще? Ны́нѣ же словеса́ Бо́жія раздава́ю ва́мъ, дража́йша па́че зла́та и ка́менія многоцѣ́нна, и сла́ждьша па́че ме́да и со́та, но вы́ лиша́етеся и́хъ самохотѣ́ніемъ, не приходя́ще къ це́ркви Бо́жіи. Тѣ́мъ же и злосло́влю, и укоря́ю не приходя́щихъ къ це́ркви, а не ва́съ, приходя́щихъ здѣ́ и вкуша́ющихъ /л. 239 об./ духо́внаго сего́ ме́да. Аще и́мате дру́ги, и бли́жнія, или́ жену́, и дѣ́ти, то позыва́йте вся́ въ це́рковь и поуча́йтеся душеполе́знымъ словесе́мъ, да здѣ́ богоуго́дно пожи́вше, вѣ́чныхъ бла́гъ наслѣ́дницы бу́демъ о Христѣ́ Іису́сѣ, Го́сподѣ на́шемъ. [Ами́нь.]

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 237 об. – 239 об.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.