Церковный календарь
Новости


2017-12-17 / russportal
П. Н. Красновъ. Очеркъ "Борьба съ Китаемъ". Глава 8-я (1901)
2017-12-17 / russportal
П. Н. Красновъ. Очеркъ "Борьба съ Китаемъ". Глава 7-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 6-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 5-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 4-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 3-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 2-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 1-я (1901)
2017-12-16 / russportal
Указъ Архіер. Сѵнода РПЦЗ отъ 30 авг. 1938 г. о положеніи Правосл. Церкви въ Польшѣ
2017-12-16 / russportal
К. Н. Николаевъ. Къ положенію Православной Церкви въ Польшѣ (1938)
2017-12-15 / russportal
П. Н. Красновъ. Рождественскій разсказъ "Письма матери" (1899)
2017-12-15 / russportal
П. Н. Красновъ. Повѣсть "Въ манчжурской глуши". Глава 23-я (1904)
2017-12-15 / russportal
П. Н. Красновъ. Повѣсть "Въ манчжурской глуши". Глава 22-я (1904)
2017-12-15 / russportal
П. Н. Красновъ. Повѣсть "Въ манчжурской глуши". Глава 21-я (1904)
2017-12-15 / russportal
Дѣянія 2-го Всезарубежн. Собора РПЦЗ. Протоколъ №2 (2/15 августа 1938 г.)
2017-12-15 / russportal
Дѣянія 2-го Всезарубежн. Собора РПЦЗ. Протоколъ №1 (1/14 августа 1938 г.)
Новости въ видѣ
RSS-канала: .
Сегодня - понедѣльникъ, 18 декабря 2017 г. Сейчасъ на порталѣ посѣтителей - 13.

АКАѲИСТЫ

Акаѳистъ Воскресенію Христову.

Кондакъ 1-й.

Возбранный Воеводо и Господи, вѣчныя смерти побѣдителю, яко избавлься отъ духовнаго умерщвленія, похвальная восписую Ти, возсозданный Тобою, рабъ Твой. Ты же, яко имѣяй побѣду надъ смертію, отъ смерти грѣховныя свободи насъ зовущихъ: Іисусе воскресшій, воскреси души наша!

Икосъ 1-й.

Ангели воскресеніе Твое, Христе Спасе, непрестанно поютъ на небесѣхъ, и насъ на земли сподоби чистымъ сердцемъ воспѣти Тебѣ сице:

Іисусе непостижимый, всѣхъ вѣрныхъ просвѣщаяй, просвѣти и мя заблудшаго.

Іисусе воскресшій, всѣхъ Собою оживляяй, оживи мя умершаго грѣхми.

Іисусе на небо вознесыйся и возносяй на Тя надѣющихся, совознеси и мя долу преклоннаго.

Іисусе сѣдяй одесную Отца и раздѣляяй славу съ любящими Тя, не лиши мя славы Твоея.

Іисусе хотяй пріити судити живымъ и мертвымъ, не осуди мя по дѣломъ моимъ, но сотвори со мною по милости Твоей.

Іисусе воскресшій, воскреси души наша!

Кондакъ 2-й.

Видя падшихъ человѣковъ, Господи, Ты вочеловѣчився совоскресилъ еси всѣхъ и, воскресивъ, даровалъ вся потребная ко спасенію: сице и мене умерщвленнаго грѣхми оживи зовуща: Аллилуіа.

Икосъ 2-й.

Разумъ не постигаетъ тайны Божественныя, како Источникъ жизни воскресаетъ, умерщвляя смерть; сего ради, точію сердцемъ испытующе радость воскресенія и тóю просвѣщаеми, со гласомъ веселія духовнаго взываемъ Ти сице:

Іисусе входяй дверемъ заключеннымъ, вниди въ домъ души моея.

Іисусе срѣтивый ученики на пути, срящи и мя на пути сея жизни.

Іисусе воспламенивый сердца ихъ Твоими словесы, воспламени и мое хладное сердце.

Іисусе давый Себе познати въ преломленіи хлѣба, даждь ми познати Тя въ Божественнѣй Евхаристіи.

Іисусе обѣщавый Духа Святаго ученикомъ Твоимъ, ниспосли и мнѣ сего Духа Утѣшителя отъ Отца.

Іисусе воскресшій, воскреси души наша!

Кондакъ 3-й.

Силою Божественною воскресивый Лазаря, воскреси и мене истлѣвшаго страстьми и многолѣтно лежащаго во гробѣ нераскаянія, да возставъ по гласу Твоему воспою спасаемый: Аллилуіа.

Икосъ 3-й.

Имѣяй власть надъ смертію, изъ ада души воззвалъ еси, Іисусе; воззови и мене изъ глубины грѣховныя, да и азъ, очистивъ чувствія, блистающу Ти во свѣтѣ неприступнѣмъ, радостно воспою побѣдную пѣснь тако:

Іисусе смерти побѣдителю, побѣди моя злыя страсти.

Іисусе жизни подателю, даждь ми жизнь спасительную.

Іисусе источниче радости, возвесели сердце мое во истинѣ Твоей.

Іисусе пятію хлѣбы пять тысящъ насытивый, хлѣбомъ небеснымъ напитай мя.

Іисусе надеждо падшихъ, изми мя изъ рова золъ моихъ.

Іисусе воскресшій, воскреси души наша!

Кондакъ 4-й.

Буря страстей смущаетъ и потопляетъ мя, но молю Тя Іисусе! яко Петру, простри ми руку помощи и, силою воскресенія Твоего воздвигнувъ мя, научи воспѣвати: Аллилуіа.

Икосъ 4-й.

Слышаще радостную вѣсть воскресенія Твоего, Іисусе, небеса достойно веселятся, земля же радуется; и мы празднующе вѣчное веселіе, дерзаемъ взывати Тебѣ сице:

Іисусе сѣдяй во свѣтѣ неприступнѣмъ, буди доступенъ всѣмъ по милосердію Твоему.

Іисусе любяй созданія Твоя, не забуди и мене послѣдняго.

Іисусе влекій къ Себѣ сердца, смягчи и мое окаянное сердце.

Іисусе вся благая прошенія исполняяй, исполни и мое прошеніе, во еже паче всего любити Тя.

Іисусе всяку каплю слезную пріемляй, не отрини и моихъ моленіи. Іисусе воскресшій, воскреси души наша!

Кондакъ 5-й.

Богопріятная жизнь источается отъ Тебе, о Іисусе Сыне Бога живаго; сего ради молю Тя, да не погубитъ мя человѣкоубійца и да не заградитъ уста моя, вопіющая Тебѣ: Аллилуіа.

Икосъ 5-й.

Видѣвше духомъ воскресшаго Господа, пріидите пиво піемъ новое, не отъ камене истекша, но отъ источника нетлѣннаго и живоноснаго гроба Спасителя, имже безплодную землю душъ нашихъ одождивъ, научи всѣхъ пѣти Ему сице:

Іисусе напаяяй насъ Своею кровію, даруй мнѣ неосужденно пріимати пречестную кровь сію.

Іисусе ниспосылаяй дождь на праведныя и грѣшныя, ороси и мя къ плодоношенію духовному.

Іисусе невозгнушавыйся грѣшницы покаявшіяся, даждь и мнѣ нозѣ Твои омыти слезами благодаренія.

Іисусе рекшій Ѳомѣ: блажени невидѣвшіи, но вѣровавшіи, даждь ми вѣру нелицемѣрную.

Іисусе рекій: ищите и обрящете, даруй ми обрѣсти Тя единаго на потребу.

Іисусе воскресшій, воскреси души наша!

Кондакъ 6-й.

Проповѣдуяй въ дусѣ неумолкающаго радованія Твое живоносное воскресеніе, Іисусе Боже мой, да буду и азъ грѣшный причастникъ сего воскресенія, поя Тебѣ непрестанно въ горнемъ Іерусалимѣ: Аллилуіа.

Икосъ 6-й.

Возсіявый всему міру воскресеніемъ Своимъ Господь Іисусъ Христосъ, нынѣ вся исполняетъ свѣта, небо же и землю и преисподняя; да празднуетъ убо вся тварь Христово востаніе, въ немже утверждаеми вопіемъ сице:

Іисусе вся исполняяй свѣтомъ Твоимъ, просвѣти и мои омраченныя очи.

Іисусе небо и землю сочетавый, возведи мя отъ земли на небо.

Іисусе снизшедый свѣтомъ Божества въ преисподняя, сниди въ преисподнюю души моея.

Іисусе изведый изъ темницъ адовыхъ ожидавшія Тя души, изведи и мя грѣшнаго изъ мрака унынія, яко животъ мой аду приближися.

Іисусе всѣмъ простираяй пречистѣи руцѣ Твои, объими и мя окаяннаго.

Іисусе воскресшій, воскреси души наша!

Кондакъ 7-й.

Хотяй открыти силу Божества Своего Господь покрывается печатію Каіафы, да не нарушивъ оныя предъ стрегущими, побѣдоносно востанетъ и научитъ пѣти: Аллилуіа.

Икосъ 7-й.

Дивно и непостижно есть, како вчера спогребшійся Тебѣ Христе, днесь совостаю духомъ, Тебѣ воскресшему, и воспѣваю тако:

Іисусе воскресшій, всѣмъ туне жизнь подаваяй, окрили умъ мой, да Тебѣ послѣдствуетъ.

Іисусе освятивый землю Твоими стопами, освяти мысль мою, къ Тебѣ возносящуюся.

Іисусе невозбранивый начертати пречистый образъ Твой, даждь и мнѣ имѣти выну въ души моей образъ Твоего воскресенія.

Іисусе пріявый двѣ лептѣ вдовицы, пріими отъ мене пѣснь сію.

Іисусе не осудивый блудницы, но на путь истины наставивый ю, не осуди и моихъ нечистыхъ устъ, въ пѣснопѣніи Тя лобызающихъ.

Іисусе воскресшій, воскреси души наша!

Кондакъ 8-й.

Странно Бога вочеловѣчшася и воскресша мысленно видяще, всякое житейское отложимъ попеченіе, яко да Царя всѣхъ подъимемъ и воспоемъ Ему: Аллилуіа.

Икосъ 8-й.

Весь былъ еси любовь къ падшимъ человѣкомъ, о Іисусе, и поставилъ еси на божественнѣй стражи богоглаголиваго Аввакума, да покажетъ свѣтоносна Ангела ясно глаголюща о воскресеніи Твоемъ; тѣмже и мы зовемъ Тебѣ сице:

Іисусе стрегомый воинами, посли паки Ангела хранителя на стражу души моея, егоже азъ отгоняю грѣхи моими.

Іисусе ослѣпивый очи стрегущимъ Тя, блистаніемъ Божества, отврати очи мои отъ суеты и просвѣти къ познанію истины.

Іисусе вопрошавый Апостола Петра, «любиши ли Мя?» даждь мнѣ имѣти образъ любве его.

Іисусе простивый тому Апостолу отреченіе, прости и мнѣ ежечасныя отреченія отъ повелѣній Твоихъ.

Іисусе давый власть вязати и рѣшити, разрѣши мя отъ неправдъ моихъ.

Іисусе воскресшій, воскреси души наша!

Кондакъ 9-й.

Все естество человѣческое Тобою воспріятое прославися воскресеніемъ Твоимъ, Іисусе, и даруеши тѣлесамъ нетлѣніе: тѣмже мы видяще сіе знаменіе въ останкахъ святыхъ, вопіемъ со умиленіемъ: Аллилуіа.

Икосъ 9-й.

Вѣтія богоглаголивыя утренюютъ духомъ, срѣтая Тя исходяща изъ гроба, и вмѣсто мѵра приносятъ Ти пѣснь яко солнцу правды и Владыцѣ, съ ними же наши молитвы пріими сицевыя:

Іисусе пріемый мѵро на Тя изліянное, пріими и мною изліянныя славословія.

Іисусе Солнце истины, просвѣти душу мою.

Іисусе рыбари содѣлавый ловцы человѣковъ, улови и мою злую волю въ Твое послушаніе.

Іисусе изъ Савла содѣлавый первоверховнаго Апостола, вразуми и мя заблуждающаго.

Іисусе молитвами Апостола сего и всѣхъ святыхъ Твоихъ пощади мя грѣшнаго.

Іисусе воскресшій, воскреси души наша.

Кондакъ 10-й.

Спасти хотяй родъ человѣческій Іисусе, снизшелъ еси на землю и Богъ сый воспріялъ еси немощи наша, да и въ нихъ явится сила Твоя, подвизающая пѣти: Аллилуіа.

Икосъ 10-й.

Царю воскресшій Іисусе Христе Спасителю нашъ! Ты снизшедый въ преисподняя земли и сокрушивый вереи вѣчныя, содержащія связанныя души, свободи и мене отъ узъ грѣха взывающа Тебѣ сице:

Іисусе вручивый возлюбленнаго ученика Матери Твоей, вручи и мя спасительному Ея смотренію.

Іисусе страданія Матере Твоея обративый въ радость, даждь и мнѣ окаянному терпѣливо понести крестъ мой.

Іисусе давый мірови заступницу Матерь Твою, даждь и мнѣ грѣшному быти подъ кровомъ Ея.

Іисусе младенцамъ невозбранивый прикасатися къ Тебѣ, даруй мнѣ ихъ незлобіе.

Іисусе рекій блудницѣ: «иди, и отселѣ не согрѣшай», даждь ми ктому не прогнѣвляти Тя.

Іисусе воскресшій, воскреси души наша.

Кондакъ 11-й.

Пѣніе умиленное о воскресеніи Твоемъ даруй мнѣ принести Тебѣ, о Спасителю мой! и въ немъ да пріиметъ душа моя елей исцѣленія отъ душевредныхъ мечтаній и да поетъ выну Тебѣ: Аллилуіа.

Икосъ 11-й.

Свѣтопріимно отъ воскресенія Твоего воспріявше лучи благодати, и чрезъ нихъ яко въ зерцалѣ видяще духовно Твое живоносное востаніе, покланаемся кресту Твоему честному и святое воскресеніе Твое поемъ и славимъ сице:

Іисусе преклонивый небеса, пріими поклоненіе наше благоутробно.

Іисусе уснувый плотію яко мертвъ, умертви наша плотскія похоти.

Іисусе всего Себе давый на спасеніе человѣковъ, даждь и мнѣ всецѣло предатися Тебѣ.

Іисусе возшедый на небеса уготовати мѣсто любящимъ Тя, всели и мя во обители Твоя.

Іисусе воскресшій, воскреси души наша!

Кондакъ 12-й.

Благодать даждь и мнѣ всѣхъ возлюбивый Іисусе и пріими мое моленіе, яко дань приносимую Тебѣ, и отжени отъ души моея вся лукавая, да неосужденно воспою Тебѣ: Аллилуіа.

Икосъ 12-й.

Поюще Твое всеславное воскресеніе, величаемъ Тя, о Іисусе Христе Боже нашъ! и вѣруемъ, яко даруеши всѣмъ животъ вѣчный; того ради въ сей нареченный и святый день, яко братія другъ друга объимемъ, ненавидящимъ насъ простимъ вся воскресеніемъ, и едиными усты и единѣмъ сердцемъ возопіимъ Тебѣ тако:

Іисусе благословляяй благословлящія Тя, благослови и нынѣ посильный трудъ мой.

Іисусе освящаяй на Тя уповающія, освяти желанія и намѣренія моя.

Іисусе обѣщавый быти съ вѣрными до скончанія вѣка, пребуди неотлучно и со мною грѣшнымъ.

Іисусе Слово Ѵпостаси Отчей, очисти недостойное мое слово къ Твоему пѣснопѣнію.

Іисусе Пасха спасительная, отъ смерти къ жизни приводящая, всели мя въ чертогъ Твой, просвѣтивъ одѣяніе души моея.

Іисусе воскресшій, воскреси души наша!

Кондакъ 13-й.

О, Іисусе Христе, смертію смерть поправый и сущимъ во гробѣхъ животъ даровавый! пріими въ воню благоуханія духовнаго сіе малое моленіе наше и сущимъ намъ во гробѣхъ нерадѣнія даруй животъ вѣчный, да поемъ Тебѣ. Аллилуіа.

Сей кондакъ глаголи трижды.
И паки чтется 1-й икосъ: Ангели воскресеніе Твое... И паки 1-й кондакъ: Возбранный Воеводо и Господи...


Источникъ: Акаѳистъ Воскресенію Христову. — Приложеніе къ Апрѣльской книжкѣ «Странника» за 1861 г. — СПб.: Въ типографіи духовнаго журнала «Странникъ», 1861. — 8 с.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г. Аппараты в интернет казино онлайн, слоты игровые автоматы играть бесплатно .