Церковный календарь
Новости


2017-12-17 / russportal
П. Н. Красновъ. Очеркъ "Борьба съ Китаемъ". Глава 8-я (1901)
2017-12-17 / russportal
П. Н. Красновъ. Очеркъ "Борьба съ Китаемъ". Глава 7-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 6-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 5-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 4-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 3-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 2-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 1-я (1901)
2017-12-16 / russportal
Указъ Архіер. Сѵнода РПЦЗ отъ 30 авг. 1938 г. о положеніи Правосл. Церкви въ Польшѣ
2017-12-16 / russportal
К. Н. Николаевъ. Къ положенію Православной Церкви въ Польшѣ (1938)
2017-12-15 / russportal
П. Н. Красновъ. Рождественскій разсказъ "Письма матери" (1899)
2017-12-15 / russportal
П. Н. Красновъ. Повѣсть "Въ манчжурской глуши". Глава 23-я (1904)
2017-12-15 / russportal
П. Н. Красновъ. Повѣсть "Въ манчжурской глуши". Глава 22-я (1904)
2017-12-15 / russportal
П. Н. Красновъ. Повѣсть "Въ манчжурской глуши". Глава 21-я (1904)
2017-12-15 / russportal
Дѣянія 2-го Всезарубежн. Собора РПЦЗ. Протоколъ №2 (2/15 августа 1938 г.)
2017-12-15 / russportal
Дѣянія 2-го Всезарубежн. Собора РПЦЗ. Протоколъ №1 (1/14 августа 1938 г.)
Новости въ видѣ
RSS-канала: .
Сегодня - понедѣльникъ, 18 декабря 2017 г. Сейчасъ на порталѣ посѣтителей - 13.

АКАѲИСТЫ

Акаѳистъ Пресвятѣй и Животворящей Троицѣ.

Тропарь, гласъ 8:

Благослове́нъ еси́, Трисвяты́й Го́споди Бо́же нашъ, Иже всю тварь Прему́дростію Твое́ю созда́вый, и па́дшій родъ человѣ́чь ми́лостію Свое́ю не оста́вивый, пока́явшимся же грѣ́шникомъ живо́тъ вѣ́чный дарова́ти обѣща́вый, Человѣколю́бче, сла́ва Тебе́!


Акаѳистъ.

Кондакъ 1.

Предвѣ́чный Царю́ вѣко́въ и Го́споди, всея́ тва́ри ви́димыя и неви́димыя Содѣ́телю, Ему́же, въ Тро́ицѣ Святѣ́й сла́вимому Бо́гу, вся́ко колѣ́но покланя́ется Небе́сныхъ, земны́хъ и преиспо́днихъ: тѣ́мже и мы, яко креще́нніи въ Трисвято́е Имя Твое, а́ще и недосто́йніи, хвале́бное сіе дерза́емъ принести́ Тебѣ пѣ́ніе: Ты же, яко Творе́цъ, Промысли́тель и Судія́ нашъ, вонми́ гла́су рабъ Твоихъ, и не отста́ви ми́лости Твоея отъ насъ, да изъ глубины́ души́ вы́ну зове́мъ Ти: Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Икосъ 1.

Арха́нгели и Ангели, Нача́ла и Вла́сти, Престо́ли и Госпо́дьствія, предстоя́ще самому́ Престо́лу Сла́вы Твоея́, не довлѣ́ютъ изрещи́ вели́чія соверше́нствъ Твоихъ: многоочи́тіи же Херуви́ми и шестокрила́тіи Серафи́ми, закрыва́юще ли́ца своя, то́чію съ тре́петомъ и любо́вію взыва́ютъ другъ ко другу: Святъ, Святъ, Святъ Господь Савао́ѳъ: намъ убо, и́же прахъ и пе́пелъ есмы́, кольми́ па́че удо́бѣе люби́ти молча́ніе: но, да не толи́кихъ щедро́тъ, въ созда́ніи и искупле́ніи на насъ излія́нныхъ, непа́мятливи яви́мся и неблагода́рніи, подража́юще го́рнему славосло́вію, съ вѣ́рою и любо́вію взыва́емъ:

Святъ, Святъ, Святъ еси Господи Боже нашъ неисповѣди́мая соверше́нствъ Высото́ и неизслѣ́димая та́инъ Пучи́но;

Святъ еси Го́споди Бо́же нашъ, вездѣ́ сый и вся исполня́яй, Еди́ный и То́йжде вчера, днесь и во вѣ́ки.

Святъ еси Го́споди Бо́же нашъ, вся могі́й, нарица́яй не су́щая я́ко су́щая, низводя́й да́же до а́да и па́ки возводя́й;

Святъ еси Го́споди Бо́же нашъ, испыту́яй сердца́ и утро́бы человѣ́ческія, исчита́яй звѣ́зды и всѣмъ имъ имена́ нарица́яй.

Святъ еси Го́споди Бо́же нашъ, Его́же вси путіе́ и́стинны и всѣ судьбы́ оправда́ны вку́пѣ и вожделѣ́нны;

Святъ еси Го́споди Бо́же нашъ, отдая́ грѣхи́ отце́въ на ча́да, ми́луяй же и награжда́яй въ ро́ды родо́въ.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 2.

Ви́дѣвъ Тя Иса́ія на Престо́лѣ высо́цѣ и превознесе́ннѣ, глаго́лаше: «О окая́нный азъ, яко человѣкъ сый и нечи́сты устнѣ́ имы́й, и Господа Савао́ѳа ви́дѣхъ очи́ма мои́ма». Егда́ же угль горя́щій, носи́мый отъ Ангела, прикосну́ся усто́мъ его, чи́стѣ восхваля́ше Тебе Отца, и Сына, и Святаго Духа, Единаго Бога. Попали́ убо, о Пресвятая Троице, огнемъ Божества Твоего те́рніе и нашихъ многихъ беззаконій, да чистымъ сердцемъ возопіе́мъ Тебе: Аллилуія.

Икосъ 2.

Ра́зумъ неуразумѣ́нный разумѣ́ти ища́ великій во проро́цѣхъ Моисей, глаго́лаше: «Яви́ мнѣ лице Твое, да разу́мно ви́жду Тя». Ты же къ нему: «За́дняя Моя у́зриши, лице́ же Мое не яви́тся Тебѣ: не бо́ у́зритъ человѣкъ лице́ Мое и живъ будетъ». Намъ же, аще и недосто́йнымъ, благоволилъ еси яви́ти Себе въ лицѣ́ Единороднаго Сына Твоего: тѣмже благода́рнѣ вопіе́мъ:

Святъ, Святъ, Святъ еси Господи Боже нашъ, Серафи́мовъ пламенногоря́щая Любы́ и Херуви́мовъ вы́ну свѣтя́щая Прему́дросте;

Святъ еси Господи Боже нашъ, Небесныхъ Престо́ловъ превы́шній Царю и премі́рныхъ Госпо́дьствій всеи́стинный Господи.

Святъ еси Господи Боже нашъ, Вы́шнихъ Силъ непобѣдимая Крѣ́посте и Го́рнихъ Властей Всемогущій Власти́телю;

Святъ еси Господи Боже нашъ, Архангеловъ всера́достное благовѣ́стіе и Ангеловъ неумолка́ющая про́повѣдь.

Святъ еси Господи Боже нашъ, разу́мныхъ Нача́лъ верхо́вное Всенача́ло, и всѣхъ прочихъ Небесныхъ чино́въ держа́вный Повели́телю;

Святъ еси Господи Боже нашъ, Единъ имѣ́яй безсмертіе и живы́й во Свѣ́тѣ Непристу́пнѣмъ, со избра́нными же Твои́ми, яко со дру́ги, лице́мъ къ лицу́ бесѣ́дуяй.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 3.

Силою неизрече́ннаго могу́щества Твоего вся соде́ржиши, Словомъ неизслѣ́димыя Премудрости Твоея вся стро́иши, Духомъ устъ Твоихъ вся живи́ши и ра́дуеши, о Трисо́лнечне Вседѣ́телю. Измѣ́рилъ еси не́бо дла́нію и зе́млю пя́дію, но́сиши и пита́еши всю тварь, вся по и́мени призыва́еши, и нѣсть могі́й утаи́тися власти́тельныя десни́цы и взо́ра Твоего́: сего́ ра́ди со всѣ́ми вы́шними и ни́жними си́лами, со умиле́ніемъ припа́дающе, зове́мъ Ти: Аллилуія.

Икосъ 3.

Имѣ́яй вся́кое созда́ніе рабо́тно повелѣ́нію Твоему, всюду явля́еши слѣды́ Промысла и неизче́тныхъ соверше́нствъ Твоихъ: тѣ́мже неви́димая Твоя и присносу́щную си́лу и Божество́ творе́ньми помышля́ема, ви́дяще, со удивле́ніемъ и ра́достію зове́мъ:

Святъ, Святъ, Святъ еси Господи Боже нашъ, власти́тельный Содѣ́телю видимыхъ и невидимыхъ, и любвеоби́льный Строи́телю настоя́щихъ и гряду́щихъ;

Святъ еси Господи Боже нашъ, отъ четы́рехъ стихі́й соста́вивый тварь и четы́рьми времены́ кругъ лѣ́та вѣнча́вый.

Святъ еси Господи Боже нашъ, повелѣ́вый со́лнцу свѣти́ти во дни и лунѣ со звѣзда́ми просвѣща́ти нощь;

Святъ еси Господи Боже нашъ, изводя́й вѣ́тры отъ сокровищъ, одѣва́яй небо о́блаки и посыла́яй дождь и ро́су въ прохлажде́ніе зно́я.

Святъ ecи Господи Боже нашъ, препоясу́яй хо́лмы ра́достію и до́лы весе́ліемъ, украша́яй кри́ны се́льныя и вѣнча́яй поля́ кла́сами;

Святъ ecи Господи Боже нашъ, посыла́яй пи́щу птенце́мъ вра́новымъ, напая́яй вся звѣ́ри се́льныя, и полага́яй щедро́ты Своя на всѣхъ дѣ́лѣхъ Свои́хъ.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 4.

Бу́рю внутрь имѣ́я душепа́губныя е́реси, вторы́й Іу́да, Арій безу́мный, отве́ржеся Тебе́, Сына Божія, Единаго отъ Пребоже́ственныя Тро́ицы бы́ти; мы же, аще и и́но лице́ Отчее, и́но Сыно́вне, и́но Святаго Духа, глаго́лемъ: но Отчее, Сыно́внее и Святаго Духа Едино Божество, ра́вну силу, соприсносу́щно вели́чество се́рдцемъ и устны́ исповѣ́дуемъ и, яко трисо́лнечнымъ свѣ́томъ въ купѣ́ли Креще́нія озаре́нніи, Отцу, и Сыну, и Святому Духу, Единому Богу покланя́емся, зову́ще: Аллилуія.

Икосъ 4.

Слы́шавше па́стыріе и учи́теліе Святыя Церкве Арія, яко лю́таго звѣря, вто́ргшася въ слове́сное Христо́во ста́до и восхища́юща о́вцы отъ и́стиннаго исповѣ́данія православныя вѣры, соше́дшеся въ Нике́и на Собо́рѣ, Бога, а не тварь, Христа исповѣ́даша, и ра́вна Отцу Сына и Святаго Духа чту́ще, громогла́снѣ возгласи́ша:

Святъ, Святъ, Святъ еси Господи Боже нашъ, Боже Отче, Боже Сыне, Боже Ду́ше Святый, Единый Истинный Боже, а не три бо́зи;

Святъ еси Господи Боже нашъ, несозда́нный Отче, несозда́нный Сы́не, несозда́нный Ду́ше Святый, Едине вку́пѣ несозда́нне, а не три осо́бь несозда́нны.

Святъ еси Господи Боже нашъ, Отецъ ражда́яй предвѣ́чно Сына, Сынъ ражда́емый безлѣ́тно отъ Отца, Духъ Святый, изъ Него́же отъ вѣкъ происходя́й, но не ражда́яся;

Святъ еси Господи Боже нашъ, Отецъ воззва́вый насъ отъ небытія́, Сынъ искупи́вый насъ па́дшихъ Кресто́мъ Своимъ, Духъ Святый освяща́яй и животворя́й всѣхъ Своею благода́тію.

Святъ еси Господи Боже нашъ, въ ду́хѣ, душѣ́ и тѣ́лѣ нашемъ трехча́стную ски́нію на вселе́ніе Свое основа́ти благоволи́вый и всеконе́чнѣ грѣхо́мъ разру́шитися ей въ насъ не попусти́вый;

Святъ еси Господи Боже нашъ, зна́меніе Тріѵпоста́снаго Существа́ Своего на всѣхъ дѣ́лѣхъ рукъ Своихъ, въ мі́рѣ ви́димѣмъ и неви́димѣмъ, положи́вый.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 5.

Пребезнача́льная и Вседѣ́тельная Тро́ице, созда́въ насъ по о́бразу и по подо́бію Твоему, заповѣ́дала еси твори́ти уго́дная предъ Тобою, мы же, окая́нніи, злу́ю во́лю нашу возлюби́вше, обѣ́ты Креще́нія отверго́хомъ, о́бразъ Твой помрачи́хомъ; нынѣ же па́ки къ Тебѣ прибѣга́емъ и мо́лимся: «Пода́ждь намъ благода́ть Твою, исхи́ти насъ изъ руки́ врагъ ви́димыхъ и неви́димыхъ и спаси́ ны, и́миже вѣ́си судьба́ми, да во вѣки вѣковъ зове́мъ Тебѣ: Аллилуіа».

Икосъ 5.

Ви́дя ра́зумъ превосходя́щая соверше́нства Твоя и неизрече́нная благодѣ́янія къ бѣ́днымъ сына́мъ Ада́млимъ (въ Тя бо, Тріеди́наго Бо́га, и́стинно вѣ́руяй, ме́ртвый ду́хомъ оживля́ется, оскверне́нный со́вѣстію очища́ется, поги́бшій спаса́ется), благода́рнымъ умо́мъ, благода́рнымъ се́рдцемъ, благода́рными усты́, отъ Тебе́ созда́нными, прекло́ньше колѣ́на, глаго́лемъ:

Святъ, Святъ, Святъ еси Господи Боже нашъ, въ Тріѵпоста́снѣмъ Совѣ́тѣ Твоемъ положи́вый сотвори́ти человѣ́ка и въ тѣло его, отъ пе́рсти взятое, дыха́ніе жи́зней изъ устъ Твоихъ вдохну́вый;

Святъ еси Господи Боже нашъ, о́бразомъ и подо́біемъ Твоимъ въ лицѣ́ Ада́ма всѣхъ насъ почты́й и рая́ сла́дости наслѣ́дники учини́вый.

Святъ еси Господи Боже нашъ, ра́зумомъ превы́ше всего́ ви́димаго вознесы́й насъ и тварь всю до́льнюю подъ но́зѣ на́ши покори́вый;

Святъ еси Господи Боже нашъ, дре́во жи́зни въ пи́щу намъ дарова́вый и да́ромъ безсме́ртія ны обогати́вый.

Святъ еси Господи Боже нашъ, преслу́шавшихъ за́повѣдь прароди́телей на́шихъ и по грѣхопаде́ніи не оста́вивый, но на упова́ніи спасе́нія пря́мо Еде́ма всели́вый;

Святъ еси Господи Боже нашъ, изведы́й и насъ изъ чре́ва ма́тере на́шея и благода́тію Ева́нгелія, по рожде́ніи, освяти́вый.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 6.

Проповѣ́дникъ пра́вды и ревни́тель Свята́го Имене Твоего, Илія́ досточу́дный, воззва́нъ отъ Ангела, ста́ въ горѣ́ Хори́вѣ: бысть же ду́хъ крѣ́покъ, низлага́яй го́ры, бысть трусъ ве́лій и огнь паля́щъ, но не въ сихъ Тя ви́дѣ, и по огни́ гласъ хла́да то́нка, и та́мо Господь; покрывъ у́бо лице́ ми́лотію, съ весе́ліемъ и стра́хомъ взыва́ше: Аллилуія.

Икосъ 6.

Возсія́лъ еси въ просвѣще́ніе всему́ мі́ру, сія́ніе трисвѣ́тлаго Божества́ Твоего, отгна́лъ еси вся и́дольская заблужде́нія, Тріѵпоста́сный Боже и Господи; весь же родъ человѣ́ческій отъ до́лгія тьмы язы́чества въ чу́дный свѣтъ Ева́нгелія приве́лъ еси, и́мже озаре́нніи, сла́вимъ вседержа́вный Про́мыслъ Твой о насъ, зову́ще:

Святъ, Святъ, Святъ еси Господи Боже нашъ, до конца́ растлѣ́нную грѣхо́мъ тварь вода́ми пото́пными потреби́вый и въ лицѣ́ Но́я обнови́вый весь родъ человѣ́чь;

Святъ еси Господи Боже нашъ, отлучи́вый отца́ вѣ́рующихъ Авраа́ма отъ смѣше́нія языкъ и въ пото́мствѣ его и́стинную Це́рковь основа́вый.

Святъ еси Господи Боже нашъ, изведы́й лю́ди Своя изъ Египта, препита́вый ихъ ма́нною въ пусты́нѣ и введы́й въ зе́млю, кипя́щую ме́домъ и млеко́мъ;

Святъ еси Господи Боже нашъ, воздвигі́й Дави́да, испо́лнивый Ду́хомъ Свои́мъ проро́ки и тѣ́ми среди́ Изра́иля вѣру въ Обѣтова́ннаго Искупи́теля сохрани́вый.

Святъ еси Господи Боже нашъ, плѣ́номъ вавило́нскимъ согрѣ́шшія лю́ди Своя наказа́вый и по сконча́ніи его па́ки Іерусалиму возгради́тися повелѣ́вый;

Святъ еси Господи Боже нашъ, Маккаве́и въ вѣ́рѣ и преда́ніихъ оте́ческихъ непоколеби́мыми до сме́рти показа́вый, и Церковь подзако́нную, яко невѣ́сту, до прише́ствія возлю́бленнаго Жениха́, цѣ́лу соблюды́й.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 7.

Хотя́ прояви́ти вели́чіе любве́ и милосе́рдія Твоего къ па́дшему ро́ду человѣ́ческому, егда́ пріи́де кончи́на лѣ́та, посла́лъ еси Единоро́днаго Сына Твоего ражда́ема отъ Жены́, быва́ема подъ зако́номъ, да подзако́нныя иску́питъ, Иже, пожи́въ на земли́ яко человѣ́къ и искупи́въ ны Крестомъ Своимъ, вознесе́ся на Небо, отню́дуже, исполня́яй обѣтова́ніе, низпосла́ намъ Пресвятаго Духа Своего, да зове́мъ вси: Аллилуія.

Икосъ 7.

Ди́вное вои́стинну и но́вое показа́лъ еси чу́до, ди́вный въ высо́кихъ, Господи, егда́, по низпосла́ніи Пресвята́го Ду́ха на избра́нныя ученики́ и Апо́столы, изве́лъ еси ихъ на про́повѣдь всему мі́ру, да возвѣстя́тъ вели́кое Имя Пресвятыя Троицы и плѣня́тъ вся язы́ки въ послуша́ніе вѣ́ры: тѣ́мже, чудя́щеся си́лѣ и дѣ́йствію богодухнове́нныхъ слове́съ ихъ, съ ра́достію зове́мъ:

Святъ, Святъ, Святъ еси Господи Боже нашъ, избра́вый немощна́я, худоро́дная и бу́ія мі́ра, да посрамя́тъ крѣ́пкія, сла́вныя и прему́дрыя;

Святъ еси Господи Боже нашъ, воодушеви́вый безчи́сленныя со́нмы му́чениковъ, да тьма́ми муче́ній и смерте́й запечатлѣ́ютъ и́стину Ева́нгелія и си́лу благода́ти Христо́вой.

Святъ еси Господи Боже нашъ, се́рдце равноапо́стольнаго Константи́на зна́меніемъ Креста преклони́вый и тѣмъ коне́цъ лю́тымъ гоне́ніемъ на христіа́нъ положи́вый;

Святъ еси Господи Боже нашъ седмію́ Вселе́нскими Собо́ры богоно́сныхъ отецъ, яко седмію́ столпы́, Церковь огради́вый и ерети́ческимъ треволне́ніемъ непристу́пну сотвори́вый.

Святъ еси Господи Боже нашъ, богому́дрымъ учи́телемъ и вели́кимъ подви́жникомъ благоче́стія, яко пресвѣ́тлымъ звѣзда́мъ на тве́рди Це́ркве, возсія́ти дарова́вый;

Святъ еси Господи Боже нашъ, и влады́ку земли́ Россі́йскія Влади́міра, къ свѣту и́стинныя вѣры наста́вивый и тѣмъ всю страну́ нашу отъ пре́лести многобо́жія свободи́вый.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 8.

Стра́нно и чу́дно у ду́ба Мамврі́йска узрѣ́въ Тя Авраа́мъ во о́бразѣ Тріе́хъ Муже́й, а́ки къ еди́ному бесѣ́доваше, глаго́ля: «Господи, аще обрѣто́хъ благода́ть предъ Тобо́ю, не мини́ раба Твоего». Тріе́мъ убо, въ Тріе́хъ я́вльшихся ему Ли́цахъ, Отцу, и Сыну, и Святому Духу, Единому же въ существѣ́ Богу, до земли́ поклони́ся зовы́й: Аллилуія.

Икосъ 8.

Весь еси вездѣ́ и всегда́, не то́чію могу́ществомъ неизче́тныя си́лы Твоея́, но и бога́тствомъ вседѣ́тельнаго промышле́нія Твоего о вся́цѣмъ созда́ніи Твоемъ: намъ же, я́коже рече́ Сынъ Твой, и власи́ главні́и вси изочте́ни суть у Тебе, да ни единъ отъ нихъ паде́тъ безъ воли Твоея́, тѣ́мже, упова́юще на Про́мыслъ Твой, со дерзнове́ніемъ и любовію зове́мъ:

Святъ, Святъ, Святъ еси Господи Боже нашъ, благоволи́вый всему ро́ду человѣ́ческому раздѣли́тися на племена́ и язы́ки, и коему́ждо ихъ мѣсто и время жительства указа́вый;

Святъ еси Господи Боже нашъ, Имже ца́ріе ца́рствуютъ и си́льніи пи́шутъ пра́вду, соблюда́яй избра́нныхъ Свои́хъ, яко зѣ́ницу о́ка.

Святъ еси Господи Боже нашъ, отъ Него́же исхо́дитъ вся́ка прему́дрость и ра́зумъ, вся́ка крѣ́пость и си́ла, вся́ко здра́віе и лѣ́пота;

Святъ еси Господи Боже нашъ, наводя́й и отъе́мляй бра́ни, вѣнча́яй побѣ́дою пра́вое ору́жіе, непра́вое же, посредѣ́ са́мыхъ побѣдъ, предопредѣля́яй къ сокруше́нію.

Святъ еси Господи Боже нашъ, дая́й зна́менія на Небеси́ и на земли́, посыла́яй огнь, я́зву и гладъ на лю́ди, да не до конца́ заблу́дятъ отъ путе́й Твоихъ;

Святъ еси Господи Боже нашъ, вознося́й смире́нныя отъ земли́, еже посади́ти со кня́зи люде́й Своихъ, и низлага́яй го́рдыя, яко не обрѣсти́ся мѣ́сту ихъ.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 9.

Вся́кое естество́, горѣ́ и ни́зу, непреста́нно сла́витъ Тя, предвѣ́чнаго Творца и Бога: на небеси еди́ни «Святъ, Святъ, Святъ», — день и нощь взыва́ютъ, друзі́и же вѣнцы́ своя къ подно́жію ногъ Твоихъ полага́ютъ: на земли́ же со все́ю тва́рію мы, яко укра́шенніи о́бразомъ присносу́щныя Твоея сла́вы, къ Тебѣ́ мо́лимся и отъ Тебе вели́кія и бога́тыя ми́лости ча́емъ, зову́ще: Аллилуія.

Икосъ 9.

Вѣті́и многовѣща́нныя, аще и много тружда́ются мы́слію во испыта́ніи о та́инствѣ Пресвяты́я Тро́ицы, но не мо́гутъ разумѣ́ти, ка́ко естество́мъ Единъ есть Богъ, въ Тріе́хъ же соверше́нныхъ Ли́цѣхъ: мы же вѣ́руемъ то́чію сему́ и исповѣ́дуемъ, ка́коже, не испыту́емъ, и неизче́тная благодѣя́нія къ намъ коего́ждо изъ Тріе́хъ Боже́ственныхъ Лицъ до́брѣ вѣ́дуще, съ вѣ́рою и благодаре́ніемъ зове́мъ:

Святъ, Святъ, Святъ еси Господи Боже нашъ, пра́веднымъ судо́мъ Твоимъ всѣмъ намъ въ зе́млю, отъ нея́же взя́ты есмы́, возврати́тися и па́ки, въ день воскресе́нія, изъ нея́ воста́ти положи́вый;

Святъ еси Господи Боже нашъ, солнцу, лунѣ и звѣзда́мъ нѣ́когда поме́ркнути, землѣ́ и всему́, е́же на ней, огне́мъ преобрази́тися предопредѣли́вый, да вмѣ́сто ихъ яви́тся небо но́во и земля́ нова́, въ ни́хже пра́вда живе́тъ.

Святъ еси Господи Боже нашъ, уста́вивый день, во́ньже предста́нутъ на судъ вся племена́ и язы́цы, да воспріи́метъ кі́йждо по дѣло́мъ свои́мъ;

Святъ еси Господи Боже нашъ, имѣ́яй въ день воздая́нія рещи́ пра́веднымъ: «Пріиди́те, благослове́нніи Отца́ Моего́, и наслѣ́дуйте Ца́рствіе, угото́ванное вамъ отъ сложе́нія мі́ра».

Святъ еси Господи Боже нашъ, отъ Него́же нераска́янніи грѣ́шницы услы́шатъ тогда со стра́хомъ: «Отъиди́те отъ Мене́, прокля́тіи, во о́гнь вѣ́чный, угото́ванный діа́волу и а́ггеломъ его́».

Святъ еси Господи Боже нашъ, обѣща́вый Церковь Свою до конца́ мі́ра непоколеби́му соблюсти́, во е́же неодолѣ́ннѣй бы́ти ей и отъ вратъ а́довыхъ.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 10.

Спасти́ хотя́ мі́ръ, яви́лася еси́ на Іорда́нстѣй рѣцѣ́ Пресвята́я и Пребоже́ственная Тро́ице: Отецъ во гла́сѣ съ Неба, свидѣ́тельствуяй о возлю́бленнѣмъ Сынѣ, Сынъ, во о́бразѣ человѣ́честѣмъ, пріе́мляй Креще́ніе отъ раба́, Духъ Святый, сходя́й на Креща́емаго въ ви́дѣ голуби́нѣ, тѣ́мже во Имя Еди́наго Бога, въ Три же Лица́ — Отца, Сына и Святаго Духа, научи́хомся просвѣща́ти Креще́ніемъ вся́каго гряду́щаго въ мі́ръ человѣ́ка, зовуще: Аллилуія.

Икосъ 10.

Царю́ Превѣ́чный, сія́яй со́лнце Свое на благі́я и злы́я, пра́ведныя любя́й, грѣ́шныя же ми́луяй, скве́рну душе́вную и тѣле́сную на́шу омы́й, оби́тель Свою въ насъ, а́ще и недосто́йныхъ рабѣ́хъ Твои́хъ, сотвори́ти благоволи́, потреби́ нечи́стая на́ша помышле́нія, изгла́ди неподо́бная дѣя́нія, напра́ви языкъ глаго́лати благоуго́дная предъ Тобо́ю, да чи́стымъ се́рдцемъ и устны́ со умиле́ніемъ зове́мъ:

Святъ, Святъ, Святъ еси Господи Боже нашъ, о Не́мже Апо́стольскій ликъ я́вѣ глаго́летъ, къ Нему́же проро́ческій собо́ръ вы́ну взира́етъ;

Святъ еси Господи Боже нашъ, Его́же полкъ му́ченическій боголѣ́пно исповѣ́дуетъ, и преподо́бныхъ во́инство Пресвято́е Имя славосло́витъ.

Святъ еси Господи Боже нашъ, о Не́мже пусты́нниковъ мно́жество при́сно воздыха́етъ, отъ Него́же по́стниковъ по́двиги вѣнча́ются;

Святъ еси Господи Боже нашъ, Ему́же святи́тели и па́стыри благода́рственное прино́сятъ пѣ́ніе, Имже вселе́нстіи учи́тели во спасе́ніе на́ше богому́дрствуютъ.

Святъ еси Господи Боже нашъ, пріими́ мольбу́ о насъ и предста́тельство всѣхъ святы́хъ, па́че же простира́ющую къ Тебѣ́ о насъ ру́цѣ Свои́ Дѣ́ву Пречи́стую;

Святъ еси Господи Боже нашъ, огради́ насъ Святы́ми Твои́ми Ангелы и отжени́ отъ насъ духо́въ зло́бы поднебе́сныхъ.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 11.

Пѣ́ніе вся́кое изнемога́етъ, тща́щееся принести́ до́лжное благодаре́ніе Тебѣ́, о всѣхъ и за вся, въ Троицѣ сла́вимому Богу: не обрѣта́ется бо ни ра́зума, могу́ща сраспростре́тися мы́слію ко мно́жеству щедро́тъ Твоихъ на насъ, ни сло́ва, во е́же досто́йнѣ изрещи́ я́: оба́че за вся, на́ми ви́димая и намъ подае́мая, бу́ди Тебѣ́, Пресвятая Троице, благодаре́ніе отъ насъ, честь и сла́ва, яковы́ же Ты Сама́ Твоего вели́чества досто́йны и Тебѣ уго́дны вѣ́си: мы́ же, покланя́ющеся Тебѣ, со смире́ніемъ и любо́вію зове́мъ: Аллилуія.

Икосъ 11.

Яко свѣтопода́тельна Тя во обѣтова́ніихъ Твоихъ свѣти́льника, су́щимъ намъ во тьмѣ́ невѣ́дѣнія о бу́дущемъ жре́біи на́шемъ я́вльшася, благода́рнѣ исповѣ́дующе, и поне́ еди́наго изъ блаже́нствъ, Единоро́днымъ Сыномъ Твоимъ возвѣще́нныхъ, улучи́ти жела́юще, всеуми́льно съ вѣрою вопіе́мъ:

Святъ, Святъ, Святъ еси Господи Боже нашъ, угото́вавый избра́ннымъ Свои́мъ бла́га, ихже о́ко не ви́дѣ, у́хо не слы́ша и я́же на се́рдце человѣ́ку не взыдо́ша;

Святъ еси Господи Боже нашъ, Его́же вси чи́стіи се́рдцемъ у́зрятъ, я́коже есть, и позна́ютъ, я́коже отъ Него́ са́ми позна́ни суть.

Святъ еси Господи Боже нашъ, въ Не́мже вси а́лчущіи и жа́ждущіи пра́вды обрѣту́тъ, николи́же оскудѣва́ющее насыще́ніе;

Святъ еси Господи Боже нашъ, отъ Него́же миротво́рцы, яко подража́тели вся умиротвори́вшаго Единоро́днаго Сына Твоего́, возлю́бленными сына́ми нареку́тся.

Святъ еси Господи Боже нашъ, у Него́же кро́тцыи наслѣ́дятъ зе́млю и ни́щіи ду́хомъ улуча́тъ неконча́емое Ца́рствіе;

Святъ еси Господи Боже нашъ, обѣща́вый вѣ́чное поми́лованіе ми́лующимъ и безконе́чное ра́дованіе пла́чущимъ.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 12.

Благода́ть Твою́ всеси́льную пода́ждь намъ, Пресвятая Тро́ице: пріими́ исповѣ́даніе грѣхо́въ на́шихъ предъ вели́чествомъ сла́вы Твоея́, при́зри на воздыха́нія на́ша, низпосли́ намъ ду́ха умиле́нія и щедро́тъ, да, очище́нніи душе́ю и се́рдцемъ, сподо́бимся неосужде́нно зва́ти къ Тебѣ на земли́, я́коже взыва́ютъ Ангели на Небеси́: Аллилуія.

Икосъ 12.

Пою́ще Твое всечеловѣколю́бное смотре́ніе, сла́вимъ Тя вси, Пребезнача́льная Тро́ице, вѣ́руемъ во Еди́наго Бога Отца, Бога Сына, и Бога Духа Святаго, ино́го, ра́звѣ Тебе́, Господа не вѣ́мы, къ Тебѣ́ припа́даемъ и Тебѣ́ мо́лимся вопію́ще:

Святъ, Святъ, Святъ еси Господи Боже нашъ, бу́ди намъ во спасе́ніе, да не убои́мся никоего́же зла, и въ защище́ніе живота́ на́шего, да не устраши́мся никоего́же врага́;

Святъ еси Господи Боже нашъ, грѣ́шныя ка́ющіяся спаса́яй, спаси́ убо и насъ, многогрѣ́шныхъ.

Святъ еси Господи Боже нашъ, умножа́яй всѣмъ ми́лость Твою, умно́жи ю́ и на насъ и поми́луй ны, яко не́мощни есмы́;

Святъ еси Господи Боже нашъ, продолжи́ намъ вѣкъ къ покая́нію и не осуди́ насъ на посѣче́ніе съ смоко́вницею безпло́дною.

Святъ еси Господи Боже нашъ, изба́ви ны искуше́ній, отъ мі́ра, пло́ти и діа́вола находя́щихъ, и укрѣпи́ въ вѣ́рѣ и любви́ къ Тебѣ́;

Святъ еси, Господи Боже нашъ, сподо́би ны лице́мъ къ лицу́ узрѣ́ти Тя и вни́ти въ свѣ́тлый черто́гъ Твой на бракъ Агнчій.

Святъ, Святъ, Святъ еси Господи Боже нашъ, поми́луй ны, па́дшее созда́ніе Твое, Имене ради Святаго Твоего.

Кондакъ 13.

О, Пресвята́я, Животворя́щая, Нераздѣли́мая и Вседѣ́тельная Тро́ице, Отче, Сыне, и Ду́ше Святый, Еди́не и́стинный Бо́же и Тво́рче нашъ! Ны́нѣшнее на́ше пріе́мши благодаре́ніе, низпосли́ намъ благода́ть и си́лу отъ высоты́ Свята́го Престо́ла Твоего́, да, попра́вше вся плотскі́я по́хоти, во вся́комъ благоче́стіи и чистотѣ́ поживе́мъ до конца́ дне́й на́шихъ, вы́ну восхваля́юще Пресвято́е Имя Твое и зову́ще: Аллилуія.

Сей кондакъ глаголется трижды. Таже икосъ 1: Арха́нгели и Ангели… И кондакъ 1: Предвѣ́чный Царю́ вѣко́въ и Го́споди…

Молитва къ Богу Отцу.

Всемогу́щій Влады́ко, прему́дрый и всеблагі́й Го́споди, Свѣтонача́льнаго Сы́на пребезнача́льный Роди́телю и Животворя́щаго Ду́ха Твоего́ вѣ́чный и присносу́щный Самоизводи́телю, Его́же вели́чество неизче́тно, сла́ва несказа́нна, и ми́лость безмѣ́рна, благодари́мъ Тя, я́ко воззва́лъ еси́ насъ отъ небытія́ и почти́лъ еси драгоцѣ́ннымъ о́бразомъ Твои́мъ, я́ко дарова́лъ еси́ намъ недосто́йнымъ не то́чію познава́ти и люби́ти Тя, но, е́же сла́достнѣйше есть, и Отцемъ свои́мъ нарица́ти Тя. Благодари́мъ Тя, Бо́же милосе́рдия и щедро́тъ, я́ко преступи́вшихъ за́повѣдь Твою́ не оста́вилъ еси насъ посреди́ грѣха́ и сѣ́ни сме́ртныя, но благоволи́лъ еси́ Единоро́днаго Твоего́ Сы́на, Имже и вѣ́ки сотворе́ны суть, посла́ти на зе́млю на́шего ра́ди спасе́нія, да вочеловѣ́ченіемъ Его и стра́шными страда́ньми мучи́тельства діа́воля и тли сме́ртныя свободи́мся. Благодари́мъ Тя Бо́же любве́ и силъ, я́ко, по вознесе́ніи на не́бо дража́йшаго Спаси́теля на́шего, умоле́нъ бывъ кресто́мъ Его, низпосла́лъ еси́ и Ду́ха Твоего́ Пресвята́го на избра́нныя Его ученики́ и Апо́столы, да, си́лою Богодухнове́нныя про́повѣди ихъ, озаря́тъ весь мі́ръ нетлѣ́ннымъ свѣ́томъ Ева́нгелія Христо́ва. Самъ у́бо, человѣколюби́вый Влады́ко, услы́ши ны́нѣ смире́нную моли́тву недосто́йныхъ чадъ Твои́хъ, да я́коже созда́лъ еси́ насъ за еди́ну Твою бла́гость, искупи́лъ еси ны за еди́но благоутро́біе Твое́, та́ко и спасе́ши насъ по еди́ному безприкла́дному милосе́рдію Твоему́: зане́ отъ дѣлъ на́шихъ ниже́ слѣда́ спасе́нія и́мамы, но ча́янія пра́ведныя ме́сти и отлуче́нія отъ пресвѣ́тлаго Лица́ Твоего́: а́ще бо и о еди́нѣмъ пра́зднѣмъ глаго́лѣ взы́скано бу́детъ, въ день суда́ и испыта́нія, о неисче́тныхъ на́шихъ беззако́ніихъ, и́миже согрѣши́хомъ предъ Тобо́ю, кі́й, бѣ́дніи, и́мамы возда́ти отвѣ́тъ? Сего́ ра́ди весьма́ отъ дѣлъ на́шихъ отча́явшеся оправда́нія, къ Твое́й еди́нѣй, всякъ умъ и вся́ко сло́во превосходя́щей, прибѣга́емъ бла́гости, ю́же а́ки тве́рдое основа́ніе наде́жды иму́ще, мо́лимъ Тя: согрѣши́хомъ, очи́сти Го́споди! беззако́нновахомъ, прости́ Влады́ко! прогнѣ́вахомъ Тя, примири́ся Долготерпѣли́ве! И сохрани́ про́чее умъ, со́вѣсть и се́рдце на́ше отъ сквернъ мірски́хъ, изба́ви и спаси́ ны отъ многомяте́жныя бу́ри страсте́й и грѣхопаде́ній, во́льныхъ же и нево́льныхъ, вѣ́домыхъ и невѣ́домыхъ, и въ ти́хое упра́ви приста́нище вѣ́ры, любве́ и упова́нія жи́зни вѣ́чныя. Помяни́ насъ въ ми́лости Твое́й, Го́споди, да́руй намъ вся, я́же ко спасе́нію, проше́нія, па́че же чи́стое и безгрѣ́шное житіе́: сподо́би насъ люби́ти Тя, и боя́тися отъ всего́ се́рдца на́шего, и твори́ти во всемъ во́лю Твою́ святу́ю, моли́твами Пречи́стыя Влады́чицы на́шея Богоро́дицы, и всѣхъ святы́хъ Твои́хъ, я́ко Бла́гъ и Человѣколю́бецъ Бо́гъ еси́, и Тебѣ́ сла́ву и благодаре́ніе и поклоне́ніе возсыла́емъ, съ Единоро́днымъ Твоимъ Сы́номъ, и со Пресвяты́мъ и Благи́мъ и Животворя́щимъ Твоимъ Ду́хомъ, ны́нѣ и при́сно, и во вѣ́ки вѣко́въ. Ами́нь.

Молитва къ Богу Сыну.

Единоро́дне Сы́не и Сло́ве Бо́жій, изво́ливый на́шего ра́ди спасе́нія воплоти́тися и смерть претерпѣ́ти, ны́нѣ же, и съ пречи́стою пло́тію Твое́ю, на Небесѣ́хъ на Престо́лѣ со Отце́мъ сѣдя́й, и всѣмъ мі́ромъ управля́яй, не забу́ди милосе́рдіемъ Твои́мъ насъ, до́лу су́щихъ и мно́гими напа́стьми и скорбьми́ искуша́емыхъ, и́же а́ще и весьма́ нечи́сти и недосто́йни есмы́, но въ Тебе́, Спаси́теля и Го́спода на́шего, вѣ́руемъ и ино́го хода́тая и наде́жды спасе́нія не вѣ́мы. Пода́ждь, о Искупи́телю Всеблагі́й, да па́мятуемъ вы́ну, коли́кихъ муче́ній души́ и тѣ́ла Твоего́ потре́бно бя́ше, во е́же удовли́ти за грѣхи́ на́ша вѣ́чнѣй пра́вдѣ Отца́ Твоего́, и ка́ко да́же до а́да со Креста́ низше́лъ еси́ пречи́стою душе́ю Твое́ю, да насъ вла́сти и мучи́тельства а́дова свободи́ши; па́мятуя же о семъ, да блюде́мся отъ страсте́й и грѣхо́въ, бы́вшихъ вино́ю лю́тыхъ страда́ній и сме́рти Твоея́, и да лю́бимъ пра́вду и добродѣ́тель, е́же вся́каго да́ра Тебѣ́ въ насъ прія́тнѣйше есть. Яко искуше́нный по вся́ческимъ, самъ вѣ́си, о Всеблагі́й, коль вели́ка есть не́мощь ду́ха и пло́ти на́шея, а врагъ нашъ си́ленъ и злохи́тръ, я́ко левъ рыка́яй хо́дитъ, искі́й кого́ поглоти́ти; не оста́ви у́бо насъ Свое́ю всеси́льною по́мощію, и бу́ди съ на́ми вы́ну, храня́ и покрыва́я, наставля́я и укрѣпля́я, ра́дуя и веселя́ духъ нашъ. Мы́ же, на ло́но любве́ и милосе́рдія Твоего́ поверга́ющеся, весь живо́тъ нашъ, вре́менный и вѣ́чный, Тебѣ́ предае́мъ, на́шему Влады́цѣ, Искупи́телю и Го́споду, моля́ изъ глубины́ души́, да, и́миже вѣ́си судьба́ми, сотвори́ши намъ прейти́ безбѣ́дно мра́чную житія́ сего́ земна́го юдо́ль, и дости́гнути богокра́снаго черто́га Твоего́, его́же обѣща́лъ еси́ угото́вати всѣмъ вѣ́рующимъ во и́мя Твое́, и послѣ́дующимъ Боже́ственнымъ стопа́мъ Твои́мъ. Аминь.

Молитва къ Богу Духу Святому.

Царю́ Небе́сный, Утѣ́шителю всеблагі́й, Ду́ше и́стины, отъ Отца́ предвѣ́чно исходя́й, и въ Сы́нѣ вы́ну почива́яй, незави́стный Исто́чниче дарова́ній Боже́ственныхъ, раздѣля́я ихъ коему́ждо, я́коже хо́щеши, и́мже и мы недосто́йніи освяти́хомся и назна́менани есмы́ въ день креще́нія на́шего. При́зри на моли́тву рабъ Своихъ, пріиди́ къ намъ, всели́ся въ ны, и очи́сти ду́ши на́ша, да бу́демъ угото́вани въ жили́ще Пресвяты́я Тро́ицы. Ей, о Всеблагі́й! не возгнуша́йся на́шея нечистоты́ и ранъ грѣхо́вныхъ, но исцѣли́ я всеврачу́ющимъ пома́заніемъ Твоимъ. Просвѣти́ нашъ умъ, да разумѣ́емъ суету́ мі́ра и я́же въ мі́рѣ, оживи́ на́шу со́вѣсть, да неумо́лкно возвѣща́етъ намъ, я́же подоба́етъ твори́ти и я́же отмета́ти, испра́ви и обнови́ се́рдце, да не источа́етъ про́чее день и нощь помышле́ній злыхъ и жела́ній неподо́бныхъ, укроти́ плоть и угаси́ росоно́снымъ дыха́ніемъ Твоимъ пла́мень страсте́й, и́мже помрача́ется въ насъ драгоцѣ́нный о́бразъ Бо́жій. Ду́ха пра́здности, уны́нія, любонача́лія и праздносло́вія отжени́ отъ насъ, пода́ждь же намъ ду́ха любве́ и терпѣ́нія, ду́ха кро́тости и смире́нія, ду́ха чистоты́ и пра́вды, да, испра́вивъ разсла́бленныя сердца́ и колѣ́на, нелѣ́ностно тече́мъ по пути́ за́повѣдей святы́хъ, и та́ко, избѣга́я вся́каго грѣха́ и исполня́я вся́ку пра́вду, сподо́бимся улучи́ти кончи́ну ми́рну и непосты́дну, вни́ти въ Іерусали́мъ небе́сный, и та́мо покланя́тися Тебѣ́, ку́пно со Отцемъ и Сыномъ, пою́ще во вѣки вѣко́въ: Тро́ице Свята́я, сла́ва Тебѣ.

Молитва ко Пресвятѣй Троицѣ.

Пресвята́я Тро́ице, Единосу́щная Держа́во, всѣхъ благи́хъ Вина́, что́ воздади́мъ Тебѣ́ за вся, я́же воздала́ еси́ намъ грѣ́шнымъ и недосто́йнымъ, пре́жде, не́же на свѣтъ произъидо́хомъ, за вся, я́же воздае́ши коему́ждо насъ по вся дни и я́же угото́вала еси́ всѣмъ намъ въ вѣ́цѣ гряду́щемъ? Подоба́ше у́бо за толи́кія благодѣя́нія и щедро́ты благодари́ти Тя не словесы́ то́чію, но па́че дѣ́лы, храня́ще и исполня́юще за́повѣди Твоя́: мы́ же, страсте́мъ на́шимъ и злымъ обы́чаемъ вне́мше, въ безчи́сленныя отъ ю́ности низверго́хомся грѣхи́ и беззако́нія. Сего ра́ди, я́ко нечи́стымъ и оскверне́ннымъ, не то́чію предъ трисвѣ́тлое Лице́ Твое́ безсту́дно яви́тися, но ниже́ Имене Твоего́ Пресвята́го изрещи́ довлѣ́яше намъ, а́ще бы не Ты Сама́ благоизво́лила, во отра́ду на́шу, возвѣсти́ти, я́ко чи́стыя и пра́ведныя лю́бящи, грѣ́шники ка́ющіяся ми́луеши и благоутро́бнѣ пріе́млеши. При́зри у́бо, о Пребоже́ственная Тро́ице, съ высоты́ Святы́я Сла́вы Твоея́ на насъ многогрѣ́шныхъ, и благо́е произволе́ніе на́ше, вмѣ́сто благи́хъ дѣлъ, пріими́: и пода́ждь намъ ду́ха и́стиннаго покая́нія, да возненави́дѣвше вся́кій грѣ́хъ, въ чистотѣ́ и пра́вдѣ, до конца́ дней на́шихъ поживе́мъ, творя́ще пресвяту́ю во́лю Твою́ и сла́вяще чи́стыми по́мыслы и благи́ми дѣя́ньми сладча́йшее и великолѣ́пое Имя Твое́. Аминь.

Источникъ: Собраніе акаѳістовъ. Томъ первый: Акаѳісты Пресвятѣй Троицѣ и Господу Іисусу. — М.: Сѵнодальная тѵпографія, 1901. — Л. 33 - 48 об., 53 об.- 59.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г. Купить недорогой кроссовер в "Долавто" .|домашние животные