Церковный календарь
Новости


2017-05-28 / russportal
"Тріодь Цвѣтная". Служба въ недѣлю 8-ю. День Святой Троицы. Пятидесятница (1864)
2017-05-28 / russportal
"Тріодь Цвѣтная". Служба въ субботу 7-й седмицы. Троицкая поминальная суббота (1864)
2017-05-28 / russportal
Прав. Іоаннъ Кронштадтскій. Слово (4-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (3-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (2-е) въ недѣлю свв. отцевъ Никейскаго Собора (1894)
2017-05-28 / russportal
Прав. Іоаннъ Кронштадтскій. Слово (1-е) въ недѣлю свв. отцевъ Никейскаго Собора (1894)
2017-05-27 / russportal
Архіеп. Аверкій (Таушевъ). Рождественское привѣтствіе (1975)
2017-05-27 / russportal
Архіеп. Аверкій (Таушевъ). Духовный большевизмъ (1975)
2017-05-27 / russportal
И. А. Ильинъ. О признаніи революціи (1925)
2017-05-27 / russportal
И. А. Ильинъ. Отрицателямъ меча (1925)
2017-05-26 / russportal
Архіеп. Аверкій (Таушевъ). Миръ и непримиримость (1975)
2017-05-26 / russportal
Архіеп. Аверкій (Таушевъ). Къ 40-лѣтію паденія русскаго народа (1975)
2017-05-26 / russportal
И. А. Ильинъ. Подвигъ патріотическаго единенія (1925)
2017-05-26 / russportal
И. А. Ильинъ. Самообладаніе и самообузданіе (1925)
2017-05-25 / russportal
И. А. Ильинъ. Идея Корнилова (1925)
2017-05-25 / russportal
И. А. Ильинъ. Кто мы? (1925)
Новости въ видѣ
RSS-канала: .
Сегодня - воскресенiе, 28 мая 2017 г. Сейчасъ на порталѣ посѣтителей - 22.

ПРАВОСЛАВНЫЙ МОЛИТВОСЛОВЪ

Молитвы утреннія.

Начало обычное:

Молитвами Пречистыя Твоея Матере, и всѣхъ святыхъ Твоихъ, Господи Іисусе Христе, Боже нашъ, помилуй насъ. Аминь.

Таже: Слава Тебѣ, Боже нашъ, слава Тебѣ.

Царю Небесный, Утѣ́шителю, Ду́ше истины, Иже вездѣ сый, и вся исполняяй, сокровище благихъ, и жизни Подателю, пріиди, и вселися въ ны, и очисти ны отъ всякія скверны, и спаси, Блаже, души наша.

Святый Боже, Святый крѣпкій, Святый безсмертный, помилуй насъ. Трижды.

Слава Отцу, и Сыну, и Святому Духу, и нынѣ и присно, и во вѣки вѣковъ, аминь.

Пресвятая Троице, помилуй насъ: Господи, очисти грѣхи наша: Владыко, прости беззаконія наша: Святый, посѣти и исцѣли немощи наша, имене Твоего ради.

Господи помилуй. Трижды.

Отче нашъ, Иже еси на небесѣхъ! да святится имя Твое: да пріидетъ Царствіе Твое: да будетъ воля Твоя, яко на небеси, и на земли. Хлѣбъ нашъ насущный даждь намъ днесь: и остави намъ долги наша, якоже и мы оставляемъ должникомъ нашимъ: и не введи насъ во искушеніе, но избави насъ отъ лукаваго.

Тропари сія:

Воставше отъ сна, припа́даемъ Ти, Блаже, и Ангельскую пѣснь вопіемъ Ти, сильне: святъ, святъ, святъ еси, Боже, Богородицею помилуй насъ.

Слава: Отъ одра и сна воздвиглъ мя еси, Господи, умъ мой просвѣти и сердце, и устнѣ мои отверзи, во еже пѣти Тя, Святая Троице: святъ, святъ, святъ еси, Боже, Богородицею помилуй насъ.

И нынѣ: Напрасно [1] Судія пріи́детъ, и коегождо дѣянія обнажатся: но страхомъ зовемъ въ полунощи: святъ, святъ, святъ еси, Боже, Богородицею помилуй насъ.

Господи помилуй, 12.

И молитву сію:

Отъ сна воставъ, благодарю Тя, Святая Троице, яко многія ради Твоея благости и долготерпѣнія, не прогнѣвался еси на мя лѣниваго и грѣшнаго, ниже́ погубилъ мя еси со беззаконьми моими: но человѣколюбствовалъ еси обычно, и въ неча́яніи [2] лежащаго воздвиглъ мя еси, во е́же у́треневати и славословити державу Твою. И нынѣ просвѣти мои очи мысленныя, отверзи моя уста поучатися словесемъ Твоимъ, и разумѣти заповѣди Твоя, и творити волю Твою, и пѣти Тя во исповѣданіи сердечнѣмъ, и воспѣвати всесвятое имя Твое, Отца, и Сына, и Святаго Духа, нынѣ и присио, и во вѣки вѣковъ. Аминь.

Пріидите, поклони́мся Цареви нашему Богу. Поклонъ.

Пріидите, поклони́мся и припаде́мъ Христу, Цареви нашему Богу. Поклонъ.

Пріидите, поклони́мся и припаде́мъ Самому Христу, Цареви и Богу нашему. Поклонъ.

Таже, псаломъ 50:

Помилуй мя, Боже, по вели́цѣй милости Твоей, и по множеству щедротъ Твоихъ очисти беззаконіе мое. Наипа́че омый мя отъ беззаконія моего и отъ грѣха моего очисти мя: яко беззаконіе мое азъ знаю, и грѣхъ мой предо мною есть вы́ну. Тебѣ Единому согрѣшихъ и лукавое предъ Тобою сотворихъ: яко да оправди́шися во словесѣхъ Твоихъ и побѣди́ши, внегда́ суди́ти Ти. Се́ бо въ беззаконіихъ зача́тъ есмь, и во грѣсѣ́хъ роди́ мя ма́ти моя. Се́ бо истину возлюбилъ еси, безвѣстная и тайная премудрости Твоея явилъ ми еси. Окропи́ши мя иссопомъ, и очищуся: омыеши мя, и паче снѣга убелюся. Слуху моему даси радость и веселіе: возрадуются кости смиренныя. Отврати лице Твое отъ грѣхъ моихъ и вся беззаконія моя очисти. Сердце чисто созижди во мнѣ, Боже, и духъ правъ обнови во утробѣ моей. Не отвержи мене отъ лица Твоего и Духа Твоего Святаго не отыми отъ мене. Воздаждь ми радость спасенія Твоего и Духомъ Владычнимъ утверди мя. Научу беззаконныя путемъ Твоимъ, и нечести́віи къ Тебѣ обратятся. Избави мя отъ крове́й, Боже, Боже спасенія моего: возрадуется языкъ мой правдѣ Твоей. Господи, устнѣ́ мои отверзеши, и уста моя возвѣстятъ хвалу Твою. Яко аще бы восхотѣлъ еси жертвы, далъ быхъ убо: всесожженія не благоволиши. Жертва Богу духъ сокрушенъ: сердце сокрушенно и смиренно Богъ не уничижитъ. Ублажи, Господи, благоволеніем Твоимъ Сіона, и да созиждутся стѣны Iерусалимскія: тогда благоволиши жертву правды, возношеніе и всесожегаемая: тогда возложа́тъ на олтарь Твой тельцы.

Сѵмволъ православныя вѣры:

Вѣрую во единаго Бога Отца Вседержителя, Творца небу и земли, видимымъ же всѣмъ и невидимымъ. И во единаго Господа Іисуса Христа, Сына Божія, Единороднаго, Иже отъ Отца рожденнаго прежде всѣхъ вѣкъ: Свѣта отъ Свѣта, Бога истинна, отъ Бога истинна, рожденна, несотворенна, единосущна Отцу, Имже вся быша. Насъ ради человѣкъ, и нашего ради спасенія сшедшаго съ небесъ, и воплотившагося отъ Духа Свята и Маріи Дѣвы, и вочеловѣчшася. Распятаго же за ны при Понтійстѣмъ Пилатѣ, и страдавша, и погребенна. И воскресшаго въ третій день по писаніемъ. И возшедшаго на небеса, и сѣдяща одесную Отца. И паки грядущаго со славою судити живымъ и мертвымъ, Егоже царствію не будетъ конца. И въ Духа Святаго, Господа, животворящаго, Иже отъ Отца исходящаго, Иже со Отцемъ и Сыномъ спокланяема и сславима, глаголавшаго пророки. Во едину, святую, соборную и Апостольскую Церковь. Исповѣдую едино крещеніе во оставленіе грѣховъ. Чаю воскресенія мертвыхъ, и жизни будущаго вѣка. Аминь.

Молитва первая святаго Макарія Великаго.

Боже, очисти мя грѣшнаго, яко николи́же сотворихъ благое предъ Тобою, но избави мя отъ лукаваго, и да будетъ во мнѣ воля Твоея: да неосужденно отверзу уста моя недостойная, и восхвалю имя Твое святое, Отца, и Сына, и Святаго Духа, нынѣ и присно, и во вѣки вѣковъ. Аминь.

Молитва вторая, тогожде святаго.

Отъ сна воставъ, полунощную пѣснь приношу Ти, Спа́се, и припа́дая вопію Ти: не даждь ми уснути во грѣховнѣй смерти, но ущедри мя распныйся волею, и лежащаго мя въ лѣности ускори́въ возстави, и спаси мя въ предстояніи и молитвѣ, и по снѣ нощнѣмъ, возсіяй ми день безгрѣшенъ, Христе Боже, и спаси мя.

Молитва третія, тогожде.

Къ Тебѣ, Владыко человѣколюбче, отъ сна воставъ прибѣгаю, и на дѣла Твоя подвизаюся милосердіемъ Твоимъ, молюся Тебѣ: помози мнѣ на всякое время, во всяцѣй вещи, и избави мя отъ всякія мірскія злыя вещи, и діавольскаго поспѣше́нія, и спаси́ мя, и введи въ Царство Твое вѣчное: Ты бо еси мой Сотворитель, и всякому благу промысленникъ и податель, о Тебѣ же все упованіе мое: и Тебѣ славу возсылаю, нынѣ и присно, и во вѣки вѣковъ. Аминь.

Молитва четвертая, тогожде.

Господи, Иже многою Твоею благостію, и великими щедротами Твоими, далъ еси мнѣ рабу Твоему мимошедшее время но́щи сея безъ напасти прейти отъ всякаго зла противна. Ты самъ, Владыко, всяческихъ Творче, сподоби мя истиннымъ Твоимъ свѣтомъ и просвѣщеннымъ сердцемъ творити волю Твою, нынѣ и присно, и во вѣки вѣковъ. Аминь.

Молитва пятая.

Господи Боже Вседержителю, пріемляй отъ небесныхъ Твоихъ силъ трисвятую пѣснь, пріими и отъ мене недостойнаго раба Твоего нощно́е сіе пѣніе: и даждь ми вся лѣта живота моего, и на всякій часъ, Тебѣ славу возсылати, Отцу, и Сыну, и Святому Духу, нынѣ и присно, и во вѣки вѣковъ. Аминь.

Молитва шестая святаго Василія Великаго.

Господи Вседержителю, Боже силъ и всякія плоти, въ вышнихъ живый и на смиренныя призираяй, сердца́ же и утробы испыту́яй, и сокровенная человѣковъ явѣ предвѣ́дый безначальный и присносущный Свѣте, у Негоже нѣсть премѣненія, или преложенія осѣненіе. Самъ безсмертный Царю, пріими моленія наша, яже въ настоящее время, на множество щедротъ Твоихъ дерзающе, отъ скверныхъ къ Тебѣ устенъ творимъ: и остави намъ прегрѣшенія наша, яже дѣломъ, и словомъ, и мыслію, вѣдѣніемъ, или́ невѣдѣніемъ согрѣшенная нами: и очисти ны отъ всякія скве́рны плоти и духа: и да́руй намъ бодреннымъ сердцемъ и трезвенною мыслію, всю настоящаго житія нощь прейти, ожидающымъ пришествія свѣтлаго и явленнаго дне, единороднаго Твоего Сына, Господа и Бога и Спаса нашего Іисуса Христа: въ оньже со славою Судія всѣхъ пріи́детъ, комуждо отдати по дѣломъ его: да не падше и облѣнившеся, но бодрствующе и воздви́жени, въ дѣланіе обрящемся готови, въ радость и Божественный чертогъ славы Его совнидемъ, идѣже празднующихъ гласъ непрестанный, и неизрѣченная сладость зрящихъ Твоего лица добро́ту неизрѣченную: Ты бо еси истинный Свѣтъ, просвѣщаяй и освящаяй всяческая, и Тя поетъ вся тварь во вѣки вѣковъ. Аминь.

Молитва седмая, тогожде святаго.

Тя благословимъ, вышній Боже и Господи милости, творящаго присно съ нами великая же и неизслѣдованная, славная же и ужасная, ихже нѣсть числа, подавшаго намъ сонъ во упокоеніе немощи нашея, и ослабленіе трудовъ многотрудныя плоти. Благодаримъ Тя, яко не погубилъ еси насъ со беззаконьми нашими, но человѣколюбствовавъ обычно, и въ нечаяніи [3] лежащыя ны воздвиглъ еси, во еже, славословити державу Твою. Тѣмже молимъ безмѣрную Твою благость, просвѣти наша мысли, очеса, и умъ нашъ отъ тяжкаго сна лѣности возстави: отверзи наша уста, и исполни я́ Твоего хваленія: яко да возможемъ непоколеблемо пѣти же и исповѣдатися Тебѣ, во всѣхъ и отъ всѣхъ славимому Богу, безначальному Отцу, со единороднымъ Твоимъ Сыномъ, и всесвятымъ и благимъ, и животворящимъ Твоимъ Духомъ, нынѣ и присно, и во вѣки вѣковъ. Аминь.

Молитва осмая святаго Іоанна Златоустаго.

Господи, не лиши мене небесныхъ Твоихъ благъ. Господи, избави мя вѣчныхъ мукъ. Господи, умомъ ли, или́ помышленіемъ, словомъ, или́ дѣломъ согрѣшихъ, прости мя. Господи, избави мя всякаго невѣдѣнія, и забвенія, и малодушія, и окамененнаго нечувствія. Господи, избави мя отъ всякаго искушенія. Господи, просвѣти мое сердце, еже помрачи лукавое похотѣніе. Господи, азъ яко человѣкъ согрѣшихъ, Ты же яко Богъ щедръ помилуй мя, видя немощь души моея. Господи, посли благодать Твою въ помощь мнѣ, да прославлю имя Твое святое. Господи Іисусе Христе, напиши мя раба Твоего въ книзѣ животнѣй, и даруй ми конецъ благій. Господи Боже мой, аще и ничтоже благо сотворихъ предъ Тобою: по даждь ми по благодати Твоей положити начало благое. Господи, окропи въ сердцѣ моемъ росу благодати Твоея. Господи небесе и земли, помяни мя грѣшнаго раба Твоего, студнаго и нечистаго, во Царствіи Твоемъ. Аминь.

Господи, въ покаяніи пріими мя. Господи, не остави мене. Господи, не введи мене въ напасть. Господи, даждь ми мысль бла́гу. Господи, даждь ми сле́зы, и память смертную, и умиленіе. Господи, даждь ми помыслъ исповѣданія грѣховъ моихъ. Господи, даждь ми смиреніе, цѣломудріе и послушаніе. Господи, даждь ми терпѣніе, великодушіе и кротость. Господи, всели въ мя корень благихъ, страхъ Твой въ сердце мое. Господи, сподоби мя любити Тя отъ всея души моея и помышленія, и творити во всемъ волю Твою. Господи, покрый мя отъ человѣкъ нѣкоторыхъ, и бѣсо́въ, и страстей, и отъ всякія иныя неподобныя вещи. Господи, вѣ́си яко твориши, якоже Ты во́лиши, да будетъ воля Твоя и во мнѣ грѣшнѣмъ: яко благословенъ еси во вѣки. Аминь.

Молитва девятая ко Господу нашему Іисусу Христу.

Многомилостиве и всемилостиве Боже мой, Господи Іисусе Христе, многія ради любве сшелъ и воплотился еси, яко да спасеши всѣхъ. И паки, Спа́се, спаси́ мя по благодати, молю Тя: аще бо отъ дѣлъ спасеши мя, нѣсть се благодать и даръ, но долгъ паче. Ей, мно́гій въ щедротахъ и неизрѣченный въ милости! вѣруяй бо въ Мя, реклъ еси, о Христе мой, живъ будетъ, и не у́зритъ смерти во вѣки. Аще убо вѣра, яже въ Тя, спасаетъ отчаянныя, се вѣрую, спаси́ мя, яко Богъ мой еси Ты и Создатель. Вѣра же вмѣсто дѣлъ да вмѣни́тся мнѣ, Боже мой (не обрящеши бо отнюдъ дѣлъ оправдающихъ мя), но та вѣра моя да довлѣетъ вмѣсто всѣхъ, та́ да отвѣщаетъ, та́ да оправдитъ мя, та́ да покажетъ мя причастника славы Твоея вѣчныя: да не убо похититъ мя сатана, и похва́лится, Сло́ве, еже отторгнути мя отъ Твоея руки и ограды: но или́ хощу, спаси́ мя, или́ не хощу, Христе Спа́се мой, предвари скоро, скоро, погибохъ: Ты бо еси Богъ мой, отъ чрева матере моея. Сподоби мя, Господи, нынѣ возлюбити Тя, якоже возлюбихъ иногда той самый грѣхъ: и паки порабо́тати Тебѣ безъ лѣности тощно [4], якоже порабо́тахъ прежде сатанѣ льстивому. Наипаче же порабо́таю Тебѣ Господу и Богу моему Іисусу Христу, во вся дни живота моего, нынѣ и присно, и во вѣки вѣковъ. Аминь.

Молитва десятая ко святому Ангелу хранителю.

Ангеле Христовъ святый, къ тебѣ припа́дая молюся, хранителю мой святый, преда́нный мнѣ на соблюденіе души и тѣлу моему грѣшному, отъ святаго крещенія: азъ же своею лѣностію и своимъ злымъ обычаемъ, прогнѣвахъ твою пречистую свѣтлость, и отгнахъ тя отъ себе всѣми студными дѣлы, лжами, клеветами, завистію, осужденіемъ, презорствомъ [5], непокорствомъ, братоненавидѣніемъ и злопомнѣніемъ, сребролюбіемъ, прелюбодѣяніемъ, яростію, скупостію, объяденіемъ безъ сытости и опивствомъ, многоглаголаніемъ, злыми помыслы и лукавыми, гордымъ обычаемъ и блуднымъ возбѣшеніемъ, имый самохотѣніе на всякое плотское вожделѣніе. О, злое мое произволеніе, егоже и ско́ти безсловесніи не творятъ! да како возможеши воззрѣти на мя, или́ приступити ко мнѣ, аки ко псу смердящему? Которыма очима, Ангеле Христовъ, воззри́ши на мя, оплетшася злѣ во гнусныхъ дѣлѣхъ? Да како уже возмогу отпущенія просити горькимъ и злымъ моимъ и лукавымъ дѣяніемъ, въ няже впадаю по вся дни и но́щи, и на всякъ часъ? Но молюся ти припа́дая, хранителю мой святый: умилосердися на мя грѣшнаго и недостойнаго раба твоего (имя рекъ): бу́ди ми помощникъ и заступникъ на злаго моего сопротивника, святыми твоими молитвами, и Царствія Божія причастника мя сотвори со всѣми святыми, всегда, нынѣ и присно, и во вѣки вѣковъ. Аминь.

Молитва перваянадесять ко Пресвятѣй Богородицѣ.

Пресвятая Владычице моя Богородице, святыми Твоими и всесильными мольбами, отжени отъ мене смиреннаго и окаяннаго раба Твоего, уныніе, забвеніе, неразуміе, нерадѣніе и вся скверная, лукавая и хульная помышленія, отъ окаяннаго моего сердца и отъ помраченнаго ума моего: и погаси пламень страстей моихъ, яко нищь есмь и окаяненъ: и избави мя отъ многихъ и лютыхъ воспоминаній, и предпріятій, и отъ всѣхъ дѣйствъ злыхъ свободи мя: яко благословенна еси отъ всѣхъ родовъ, и славится пречестно́е имя Твое, во вѣки вѣковъ. Аминь.

Таже: Достойно есть яко воистинну блажи́ти Тя Богородицу, присноблаже́нную и пренепоро́чную и Матерь Бога нашего. Честнѣйшую Херувимъ и сла́внѣйшую безъ сравненія Серафимъ, безъ истлѣнія Бога Слова рождшую, сущую Богородицу, Тя величаемъ. Поклонъ.

Слава, и нынѣ: Господи помилуй, трижды. Господи благослови.

И отпустъ: Господи Iисусе Христе, Сыне Божій, молитвъ ра́ди Пречистыя Твоея Ма́тере, преподобныхъ и богоносныхъ отецъ нашихъ и всѣхъ святыхъ, помилуй насъ. Аминь.

Примѣчанія:
[1] Внезапно.
[2] Отчаяніи, безнадежности.
[3] Отчаяніи, безнадежности.
[4] Усердно.
[5] Гордостію, высокомѣріемъ.

Источникъ: Акаѳісты съ каноны и прочая душеполезная моленія. — Изданіе первое, съ шестнадцатью священными изображеніями. — СПб.: Въ Сѵнодальной Тѵпографіи, 1887. — С. 397-410.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.