Церковный календарь
Новости


2017-03-29 / russportal
Славянское житіе преп. Маріи Египетской (изъ Постной Тріоди 1650 г.) (1650)
2017-03-28 / russportal
Славянское житіе преп. Маріи Египетской (изъ кн. житій святыхъ свт. Димитрія) (1875)
2017-03-27 / russportal
"Каноны или Книга Правилъ". Правила 6-го Вселенскаго Собора (1974)
2017-03-27 / russportal
"Каноны или Книга Правилъ". Правила 4-го Вселенскаго Собора (1974)
2017-03-26 / russportal
Слова преп. Симеона Новаго Богослова. Слово 20-е (1882)
2017-03-26 / russportal
Слова преп. Симеона Новаго Богослова. Слово 19-е (1882)
2017-03-26 / russportal
Преп. Іоаннъ, иг. Синайскій. «Лѣствица». Слово 29-е (1898)
2017-03-26 / russportal
Преп. Іоаннъ, иг. Синайскій. «Лѣствица». Слово 28-е (1898)
2017-03-26 / russportal
Архіеп. Иннокентій (Борисовъ). Слово (8-е) о грѣхѣ и его послѣдствіяхъ (1908)
2017-03-26 / russportal
Прав. Іоаннъ Кронштадтскій. Слово въ 4-ю недѣлю Великаго поста (1894)
2017-03-26 / russportal
Свт. Ѳеофанъ Затворникъ. Слово (4-е) въ 4-ю недѣлю Великаго поста (1869)
2017-03-26 / russportal
Свт. Ѳеофанъ Затворникъ. Слово (3-е) въ 4-ю недѣлю Великаго поста (1869)
2017-03-26 / russportal
Свт. Ѳеофанъ Затворникъ. Слово (2-е) въ 4-ю недѣлю Великаго поста (1869)
2017-03-26 / russportal
Свт. Ѳеофанъ Затворникъ. Слово (1-е) въ 4-ю недѣлю Великаго поста (1869)
2017-03-26 / russportal
Преп. Іоаннъ, иг. Синайскій. «Лѣствица». Слово 27-е (1898)
2017-03-26 / russportal
Преп. Іоаннъ, иг. Синайскій. «Лѣствица». Слово 26-е (1898)
Новости въ видѣ
RSS-канала: .
Сегодня - среда, 29 марта 2017 г. Сейчасъ на порталѣ посѣтителей - 14.

ПРАВОСЛАВНЫЙ МОЛИТВОСЛОВЪ

Канонъ покаянный ко Господу нашему Іисусу Христу, гласъ 6.

Пѣснь 1.

Ирмосъ. Яко по су́ху пѣшеше́ствовавъ Изра́иль, по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Припѣвъ: Поми́луй мя, Бо́же, поми́луй мя.

Ны́нѣ приступи́хъ азъ, грѣ́шный и обремене́нный, къ Тебѣ́, Влады́цѣ и Бо́гу моему́; не смѣ́ю же взира́ти на не́бо, то́кмо молю́ся, глаго́ля: да́ждь ми, Го́споди, умъ, да пла́чуся дѣлъ моихъ го́рько.

Припѣвъ: Поми́луй мя, Бо́же, поми́луй мя.

О, го́ре мнѣ, грѣ́шному! Па́че всѣхъ человѣ́къ окая́ненъ есмь, покая́нія нѣ́сть во мнѣ; даждь ми, Го́споди, сле́зы, да пла́чуся дѣлъ мои́хъ го́рько.

Слава: Безу́мне, окая́нне человѣ́че, въ лѣ́ности вре́мя губи́ши; помы́сли житіе́ твое́, и обрати́ся ко Го́споду Бо́гу, и пла́чися о дѣ́лѣхъ твои́хъ го́рько.

И нынѣ: Ма́ти Бо́жія Пречи́стая, воззри́ на мя, грѣ́шнаго, и отъ сѣ́ти діа́воли изба́ви мя, и на путь покая́нія наста́ви мя, да пла́чуся дѣлъ мои́хъ го́рько.

Пѣснь 3.

Ирмосъ. Нѣ́сть святъ, я́коже Ты, Го́споди Бо́же мой, вознесы́й рогъ вѣ́рныхъ Твои́хъ, Бла́же, и утверди́вый насъ на ка́мени исповѣ́данія Твоего́.

Припѣвъ: Поми́луй мя, Бо́же, поми́луй мя.

Внегда́ поста́влени бу́дутъ престо́ли на суди́щи стра́шнѣмъ, тогда́ всѣхъ человѣ́къ дѣла́ облича́тся; го́ре та́мо бу́детъ грѣ́шнымъ, въ му́ку отсыла́емымъ; и то вѣ́дущи, душе́ моя́, пока́йся отъ злыхъ дѣлъ твои́хъ.

Припѣвъ: Поми́луй мя, Бо́же, поми́луй мя.

Пра́ведницы возра́дуются, а грѣ́шніи воспла́чутся, тогда́ никто́же возмо́жетъ помощи́ намъ, но дѣла́ на́ша осу́дятъ насъ; тѣ́мже пре́жде конца́ пока́йся отъ злыхъ дѣлъ твои́хъ.

Слава: Увы́ мнѣ, великогрѣ́шному, и́же дѣ́лы и мы́сльми оскверни́вся, ни ка́пли слезъ име́ю отъ жестосе́рдія; ны́нѣ возни́кни отъ земли́, душе́ моя, и пока́йся отъ злыхъ дѣ́лъ твои́хъ.

И нынѣ: Се взыва́етъ, Госпоже́, Сынъ Твой, и поуча́етъ насъ на до́брое, азъ же, грѣ́шный, добра́ всегда́ бѣ́гаю; но Ты, Ми́лостивая, поми́луй мя, да пока́юся отъ злы́хъ мои́хъ дѣлъ.

Сѣдаленъ, гласъ 6.

Помышля́ю день стра́шный и пла́чуся дѣя́ній мои́хъ лука́выхъ: ка́ко отвѣща́ю Безсме́ртному Царю́, или́ ко́имъ дерзнове́ніемъ воззрю́ на Судію́, блу́дный азъ? Благоутро́бный Отче, Сы́не Единоро́дный и Ду́ше Святы́й, поми́луй мя.

Слава, и нынѣ: Свя́занъ мно́гими ны́нѣ плени́цами грѣхо́въ и содержи́мь лю́тыми страстьми́ и бѣда́ми, къ Тебѣ́ прибѣга́ю, моему́ спасе́нію, и вопію́: помози́ ми, Дѣ́во, Ма́ти Бо́жія.

Пѣснь 4.

Ирмосъ. Христо́съ моя си́ла, Богъ и Госпо́дь, честна́я Це́рковь боголѣ́пно поѣ́тъ, взыва́ющи отъ смы́сла чи́ста, о Го́сподѣ пра́зднующи.

Припѣвъ: Поми́луй мя, Бо́же, поми́луй мя.

Широ́къ путь здѣ и уго́дный сла́сти твори́ти, но го́рько бу́детъ въ послѣ́дній день, егда́ душа́ отъ тѣ́ла разлуча́тися бу́детъ: блюди́ся отъ сихъ, человѣ́че, Ца́рствія ра́ди Бо́жія.

Припѣвъ: Поми́луй мя, Бо́же, поми́луй мя.

Почто́ убо́гаго оби́диши, мзду́ нае́мничу уде́ржуеши, бра́та твоего́ не лю́биши, блудъ и го́рдость го́ниши? Оста́ви у́бо сія́, душе́ моя́, и пока́йся Ца́рствія ра́ди Бо́жія.

Слава: О, безу́мный человѣ́че, доко́лѣ углѣба́еши, я́ко пчела́, собира́ющи бога́тство твое́? Вско́рѣ бо поги́бнетъ, я́ко прахъ и пе́пелъ: но бо́лѣе взыщи́ Ца́рствія Бо́жія.

И нынѣ: Госпоже́ Богоро́дице, поми́луй мя, грѣ́шнаго, и въ добродѣ́тели укрѣпи́, и соблюди́ мя, да на́глая смерть не похи́титъ мя негото́ваго; и доведи́ мя, Дѣ́во, Ца́рствія Бо́жія.

Пѣснь 5.

Ирмосъ. Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́ве Бо́жій, и́стиннаго Бо́га, отъ мра́ка грѣхо́внаго взыва́юща.

Припѣвъ: Поми́луй мя, Бо́же, поми́луй мя.

Воспомяни́, окая́нный человѣ́че, ка́ко лжа́мъ, клевета́мъ, разбо́ю, не́мощемъ, лю́тымъ звѣре́мъ, грѣхо́въ ра́ди порабоще́нъ еси́; душе́ моя́ грѣ́шная, того́ ли восхотѣ́ла еси́?

Припѣвъ: Поми́луй мя, Бо́же, поми́луй мя.

Трепе́щутъ ми у́ди, всѣ́ми бо сотвори́хъ вину́: очи́ма взира́яй, уши́ма слы́шай, язы́комъ зла́я глаго́ляй, всего́ себе́ гее́ннѣ предая́й; душе́ моя́ грѣ́шная, сего́ ли восхотѣ́ла еси́?

Слава: Блудника́ и разбо́йника ка́ющася прія́лъ еси́, Спа́се, а́зъ же еди́нъ лѣ́ностію грѣхо́вною отягчи́хся и злы́мъ дѣло́мъ порабо́тихся; душе́ моя́ грѣ́шная, сего́ ли восхотѣ́ла еси́?

И нынѣ: Ди́вная и ско́рая помо́щнице всѣмъ человѣ́комъ, Ма́ти Бо́жія, помози́ мнѣ, недосто́йному, душа́ бо моя́ грѣ́шная того́ восхотѣ́.

Пѣснь 6.

Ирмосъ. Жите́йское мо́ре воздвиза́емое зря напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли живо́тъ мой, Многоми́лостиве.

Припѣвъ: Поми́луй мя, Бо́же, поми́луй мя.

Житіе́ на земли́ блу́дно пожи́хъ и ду́шу во тму́ преда́хъ, ны́нѣ у́бо молю́ Тя, Ми́лостивый Влады́ко: свободи́ мя отъ рабо́ты сея́ вра́жія, и да́ждь ми ра́зумъ твори́ти во́лю Твою́.

Припѣвъ: Поми́луй мя, Бо́же, поми́луй мя.

Кто́ твори́тъ такова́я, я́коже азъ? Якоже бо свинія́ лежи́тъ въ калу́, та́ко и азъ грѣху́ служу́. Но Ты́, Го́споди, исто́ргни мя отъ гню́са сего́ и да́ждь ми се́рдце твори́ти за́повѣди Твоя́.

Слава: Воспряни́, окая́нный человѣ́че, къ Бо́гу, воспомяну́въ своя́ согрѣше́нія, припа́дая ко Творцу́, слезя́ и стеня́; То́й же, я́ко милосе́рдъ, да́стъ ти умъ зна́ти во́лю Свою́.

И нынѣ: Богоро́дице Дѣ́во, отъ ви́димаго и неви́димаго зла́ сохрани́ мя, Пречи́стая, и пріими́ моли́твы моя́, и донеси́ я́ Сы́ну Твоему́, да да́стъ ми умъ твори́ти во́лю Свою́.

Кондакъ:

Душе́ моя́, почто́ грѣха́ми богатѣ́еши, почто́ во́лю діа́волю твори́ши, въ чесо́мъ наде́жду полага́еши? Преста́ни отъ сихъ и обрати́ся къ Богу съ пла́чемъ, зову́щи: милосе́рде Го́споди, поми́луй мя, грѣ́шнаго.

Икосъ: Помы́сли, душе́ моя, го́рькій часъ сме́рти и стра́шный судъ Творца́ твоего́ и Бо́га: а́нгели бо гро́зніи по́ймутъ тя, душе́, и въ вѣ́чный о́гнь введу́тъ; у́бо пре́жде сме́рти пока́йся, вопію́щи: Го́споди, поми́луй мя, грѣ́шнаго.

Пѣснь 7.

Ирмосъ. Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Припѣвъ: Поми́луй мя, Бо́же, поми́луй мя.

Не надѣ́йся, душе́ моя́, на тлѣ́нное бога́тство и на непра́ведное собра́ніе, вся́ бо сія́ не вѣ́си кому́ оста́виши, но возопі́й: поми́луй мя, Христе́ Бо́же, недосто́йнаго.

Припѣвъ: Поми́луй мя, Бо́же, поми́луй мя.

Не упова́й, душе́ моя́, на тѣле́сное здра́віе и на скоромимоходя́щую красоту́, ви́диши бо, я́ко си́льніи и младі́и умира́ютъ; но возопі́й: поми́луй мя, Христе́ Бо́же, недосто́йнаго.

Слава: Воспомяни́, душе́ моя́, вѣ́чное житіе́, Ца́рство Небе́сное, угото́ванное святы́мъ, и тму кромѣ́шнюю и гнѣвъ Бо́жій злымъ, и возопі́й: поми́луй мя, Христе́ Бо́же, недосто́йнаго.

И нынѣ: Припади́, душе́ моя́, къ Бо́жіей Ма́тери и помоли́ся Той, е́сть бо ско́рая помо́щница ка́ющимся, умо́литъ Сы́на Христа́ Бо́га, и поми́луетъ мя, недосто́йнаго.

Пѣснь 8.

Ирмосъ. Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя превозно́симъ во вся́ вѣ́ки.

Припѣвъ: Поми́луй мя, Бо́же, поми́луй мя.

Ка́ко не и́мамъ пла́катися, егда́ помышля́ю смерть, ви́дѣхъ бо во гро́бѣ лежа́ща бра́та моего́, безсла́вна и безобра́зна? Что́ убо ча́ю, и на что́ надѣ́юся? То́кмо да́ждь ми, Го́споди, пре́жде конца́ покая́ніе. Дважды.

Слава: Вѣ́рую, я́ко пріи́деши суди́ти живы́хъ и ме́ртвыхъ, и вси́ во свое́мъ чи́ну ста́нутъ, ста́ріи и младі́и, влады́ки и кня́зи, дѣ́вы и свяще́нницы; гдѣ обря́щуся азъ? Сего́ ра́ди вопію́: да́ждь ми, Го́споди, пре́жде конца́ покая́ніе.

И нынѣ: Пречи́стая Богоро́дице, пріими́ недосто́йную моли́тву мою́ и сохрани́ мя отъ на́глыя сме́рти, и да́руй ми пре́жде конца́ покая́ніе.

Пѣснь 9.

Ирмосъ. Бо́га человѣ́комъ не возмо́жно ви́дѣти, на Него́же не смѣ́ютъ чи́ни а́нгельстіи взира́ти: Тобо́ю же, Всечи́стая, яви́ся человѣ́комъ Сло́во Воплоще́нно, Его́же велича́юще, съ небе́сными во́и Тя ублажа́емъ.

Припѣвъ: Поми́луй мя, Бо́же, поми́луй мя.

Ны́нѣ къ вамъ прибѣга́ю, а́нгели, арха́нгели и вся небе́сныя си́лы, у престо́ла Бо́жія стоя́щіи, моли́теся ко Творцу́ своему́, да изба́витъ ду́шу мою́ отъ му́ки вѣ́чныя.

Припѣвъ: Поми́луй мя, Бо́же, поми́луй мя.

Ны́нѣ пла́чуся къ вамъ, святі́и патріа́рси, ца́ріе и проро́цы, апо́столи и святи́тели и вси избра́нніи Христо́вы: помози́те ми на судѣ́, да спасе́тъ ду́шу мою отъ си́лы вра́жія.

Слава: Ны́нѣ къ ва́мъ воздѣжу́ ру́цѣ, святі́и му́ченицы, пусты́нницы, дѣ́вственницы, пра́ведницы и вси святі́и, моля́щіися ко Го́споду за ве́сь мі́ръ, да поми́луетъ мя въ часъ сме́рти моея́.

И нынѣ: Ма́ти Бо́жія, помози́ ми, на Тя́ си́льнѣ надѣ́ющемуся, умоли́ Сы́на Своего́, да поста́витъ мя, недосто́йнаго, одесну́ю Себе́, егда́ ся́детъ судя́й живы́хъ и ме́ртвыхъ. Ами́нь.

Молитва по канонѣ.

Влады́ко Христе́ Бо́же, Иже страстьми́ Твои́ми стра́сти моя́ исцѣли́вый и я́звами Твои́ми я́звы моя́ уврачева́вый, да́руй мнѣ, мно́го Тебѣ́ прегрѣши́вшему, сле́зы умиле́нія; сраствори́ моему́ тѣ́лу отъ обоня́нія Животворя́щаго Тѣ́ла Твоего́, и наслади́ ду́шу мою́ Твое́ю Честно́ю Кро́вію отъ го́рести, е́юже мя сопроти́вникъ напои́; возвы́си мой умъ къ Тебѣ́, до́лу пони́кшій, и возведи́ отъ про́пасти поги́бели: я́ко не и́мамъ покая́нія, не и́мамъ умиле́нія, не и́мамъ слезы́ утѣ́шительныя, возводя́щія ча́да ко своему́ наслѣ́дію. Омрачи́хся умо́мъ въ жите́йскихъ страсте́хъ, не могу́ воззрѣ́ти къ Тебѣ́ въ болѣ́зни, не могу́ согрѣ́тися слеза́ми, я́же къ Тебѣ́ любве́. Но, Влады́ко Го́споди Іису́се Христе́, сокро́вище благи́хъ, да́руй мнѣ покая́ніе всецѣ́лое и се́рдце люботру́дное во взыска́ніе Твое́, да́руй мнѣ благода́ть Твою́ и обнови́ во мнѣ зра́ки Твоего́ о́браза. Оста́вихъ Тя, не оста́ви мене́; изы́ди на взыска́ніе мое́, возведи́ ко па́жити Твое́й и сопричти́ мя овца́мъ избра́ннаго Твоего́ ста́да, воспита́й мя съ ни́ми отъ зла́ка Боже́ственныхъ Твои́хъ Та́инствъ, моли́твами Пречи́стыя Твоея́ Ма́тере и всѣхъ святы́хъ Твои́хъ. Ами́нь.

Источникъ: Правило молитвенное, готовящимся ко Святому Причащенію и ежедневное вечернее и утреннее. — М.: Въ Сѵнодальной Тѵпографіи, 1893. — Л. 122 об.- 129.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.