Церковный календарь
Новости


2017-12-17 / russportal
П. Н. Красновъ. Очеркъ "Борьба съ Китаемъ". Глава 8-я (1901)
2017-12-17 / russportal
П. Н. Красновъ. Очеркъ "Борьба съ Китаемъ". Глава 7-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 6-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 5-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 4-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 3-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 2-я (1901)
2017-12-16 / russportal
П. Н. Красновъ. Очеркъ "Борьба съ Китаемъ". Глава 1-я (1901)
2017-12-16 / russportal
Указъ Архіер. Сѵнода РПЦЗ отъ 30 авг. 1938 г. о положеніи Правосл. Церкви въ Польшѣ
2017-12-16 / russportal
К. Н. Николаевъ. Къ положенію Православной Церкви въ Польшѣ (1938)
2017-12-15 / russportal
П. Н. Красновъ. Рождественскій разсказъ "Письма матери" (1899)
2017-12-15 / russportal
П. Н. Красновъ. Повѣсть "Въ манчжурской глуши". Глава 23-я (1904)
2017-12-15 / russportal
П. Н. Красновъ. Повѣсть "Въ манчжурской глуши". Глава 22-я (1904)
2017-12-15 / russportal
П. Н. Красновъ. Повѣсть "Въ манчжурской глуши". Глава 21-я (1904)
2017-12-15 / russportal
Дѣянія 2-го Всезарубежн. Собора РПЦЗ. Протоколъ №2 (2/15 августа 1938 г.)
2017-12-15 / russportal
Дѣянія 2-го Всезарубежн. Собора РПЦЗ. Протоколъ №1 (1/14 августа 1938 г.)
Новости въ видѣ
RSS-канала: .
Сегодня - понедѣльникъ, 18 декабря 2017 г. Сейчасъ на порталѣ посѣтителей - 13.

ПРАВОСЛАВНЫЙ МОЛИТВОСЛОВЪ

Канонъ молебный ко Пресвятой Богородицѣ, поемый во всякой скорби душевнѣй, и обстояніи.

Къ Богоро́дицѣ прилѣ́жно ны́нѣ притеце́мъ грѣ́шніи и смире́нніи, и припаде́мъ, въ покая́ніи зову́ще изъ глубины́ души́: Влады́чице, помози́, на ны милосе́рдовавши, потщи́ся, погиба́емъ отъ мно́жества прегрѣше́ній: не отврати́ Твоя́ рабы́ тщи, Тя́ бо и еди́ну наде́жду и́мамы. Дважды.

Слава, и нынѣ: Не умолчи́мъ никогда́, Богоро́дице, си́лы Твоя́ глаго́лати недосто́йніи: а́ще бо Ты не бы предстоя́ла моля́щи, кто́ бы насъ изба́вилъ отъ толи́кихъ бѣдъ? Кто́ же бы сохрани́лъ до ны́нѣ свобо́дны? Не отсту́пимъ, Владычице, отъ Тебе́: Твоя́ бо рабы́ спаса́еши при́сно отъ вся́кихъ лю́тыхъ.


Канонъ молебный ко Пресвятой Богородицѣ. Твореніе Ѳеостири́кта мона́ха. Гласъ 8.

Пѣснь 1.

Ирмосъ: Во́ду проше́дъ я́ко су́шу, и Еги́петскаго зла избѣжа́въ, Израильтянинъ вопія́ше: Изба́вителю и Бо́гу на́шему пои́мъ.

Припѣвъ: Пресвята́я Богоро́дице, спаси́ насъ.

Мно́гими содержи́мь напа́стьми, къ Тебѣ́ прибѣга́ю спасе́нія искі́й, о Ма́ти Сло́ва и Дѣ́во! отъ тя́жкихъ и лю́тыхъ мя спаси́.

Припѣвъ: Пресвята́я Богоро́дице, спаси́ насъ.

Страсте́й мя смуща́ютъ прило́зи [1], мно́гаго уны́нія испо́лнити мою ду́шу: умири́, Отрокови́це, тишино́ю [2] Сы́на и Бо́га Твоего́, Всенепоро́чная.

Слава: Спа́са ро́ждшую Тя и Бо́га, молю́, Дѣ́во, изба́витися ми лю́тыхъ: къ Тебѣ́ бо ны́нѣ прибѣга́я, простира́ю и ду́шу и помышле́ніе.

И нынѣ: Неду́гующа тѣ́ломъ и душе́ю, посѣще́нія Боже́ственнаго, и промышле́нія отъ Тебе́ сподо́би, еди́на Богома́ти, я́ко Блага́я, Блага́го же Роди́тельнице.

Пѣснь 3.

Ирмосъ: Небе́снаго кру́га верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Припѣвъ: Пресвята́я Богоро́дице, спаси́ насъ.

Предста́телство и покро́въ жи́зни моея́ полага́ю Тя, Богороди́тельнице Дѣ́во, Ты мя окорми́ [3] ко приста́нищу Твоему́, благи́хъ вино́вна, вѣ́рныхъ утвержде́ніе, еди́на Всепѣ́тая.

Припѣвъ: Пресвята́я Богоро́дице, спаси́ насъ.

Молю́, Дѣ́во, душе́вное смуще́ніе, и печа́ли моея́ бу́рю разори́ти: Ты́ бо, Богоневѣ́стная, нача́лника тишины́ [4] Христа́ родила́ еси́, еди́на Пречи́стая.

Слава: Благодѣ́теля ро́ждши, до́брыхъ вино́внаго, благодѣя́нія бога́тство всѣ́мъ источи́: вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

И нынѣ: Лю́тыми неду́ги и болѣ́зненными страстьми́ истяза́ему, Дѣ́во, Ты́ ми помози́: исцѣле́ній бо неоску́дное Тя зна́ю сокро́вище, Пренепоро́чная, неиждива́емое.

Инъ кондакъ, гласъ 6.

Не и́мамы ины́я по́мощи, не и́мамы ины́я наде́жды, ра́звѣ Тебе́, Влады́чице. Ты́ на́мъ помози́, на Тебе́ надѣ́емся, и Тобо́ю хва́лимся: Твои́ бо есмы́ раби́, да не постыди́мся.

Слава, и нынѣ. Сѣдаленъ, гласъ 2: Моле́ніе те́плое, и стѣна́ необори́мая, ми́лости исто́чниче, мі́рови прибѣ́жище, прилѣ́жно вопіе́мъ Ти: Богоро́дице Влады́чице, предвари́, и отъ бѣ́дъ изба́ви насъ, еди́на вско́рѣ предста́телствующая.

Пѣснь 4.

Ирмосъ: Услы́шахъ, Го́споди, смотрѣ́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божество́.

Припѣвъ: Пресвята́я Богоро́дице, спаси́ насъ.

Страсте́й мои́хъ смуще́ніе, ко́рмчію ро́ждшая Го́спода, и бу́рю ути́ши мои́хъ прегрѣше́ній, Богоневѣ́стная.

Припѣвъ: Пресвята́я Богоро́дице, спаси́ насъ.

Милосе́рдія Твоего́ бе́здну призыва́ющу пода́ждь ми, Яже благосе́рдаго ро́ждшая, и Спа́са всѣхъ пою́щихъ Тя.

Припѣвъ: Пресвята́я Богоро́дице, спаси́ насъ.

Наслажда́ющеся, Пречи́стая, Твои́хъ дарова́ній, благода́рственное воспѣва́емъ пѣ́ніе, вѣ́дуще Тя Богома́терь.

Слава: На одрѣ́ болѣ́зни моея́, и не́мощи низлежа́щу ми, я́ко благолюби́ва, помози́, Богоро́дице, еди́на Приснодѣ́во.

И нынѣ: Наде́жду и утвержде́ніе, и спасе́нія стѣ́ну недви́жиму, иму́ще Тя, Всепѣ́тая, неудо́бства вся́каго избавля́емся.

Пѣснь 5.

Ирмосъ: Просвѣти́ насъ повелѣ́ніи Твои́ми, Го́споди, и мыш́цею Твое́ю высо́кою, Твой миръ пода́ждь намъ, Человѣколю́бче.

Припѣвъ: Пресвята́я Богоро́дице, спаси́ насъ.

Испо́лни, Чи́стая, весе́лія се́рдце мое́, Твою́ нетлѣ́нную даю́щи ра́дость, весе́лія ро́ждшая вино́внаго.

Припѣвъ: Пресвята́я Богоро́дице, спаси́ насъ.

Изба́ви насъ отъ бѣдъ, Богоро́дице Чи́стая, вѣ́чное ро́ждши избавле́ніе, и миръ всякъ умъ преиму́щій.

Слава: Разрѣши́ мглу прегрѣше́ній моихъ, Богоневѣ́сто, просвѣще́ніемъ Твоея́ свѣ́тлости, Свѣтъ ро́ждшая Боже́ственный и превѣ́чный.

И нынѣ: Исцѣли́, Чи́стая, души́ моея́ неможе́ніе, посѣще́нія Твоего́ сподо́бльши, и здра́віе моли́твами Твои́ми пода́ждь ми.

Пѣснь 6.

Ирмосъ: Моли́тву пролію́ ко Го́споду, и Тому́ возвѣщу́ печа́ли моя́, я́ко золъ душа́ моя испо́лнися, и живо́тъ мой а́ду прибли́жися, и молю́ся, я́ко Іо́на: отъ тли, Бо́же, возведи́ мя.

Припѣвъ: Пресвята́я Богоро́дице, спаси́ насъ.

Сме́рти и тли́ я́ко спа́слъ есть, Са́мъ Ся́ изда́въ сме́рти, тлѣ́ніемъ и сме́ртію мое́ естество́ я́то [5] бы́вшее, Дѣ́во, моли́ Го́спода и Сы́на Твоего́, враго́въ злодѣ́йствія мя изба́вити.

Припѣвъ: Пресвята́я Богоро́дице, спаси́ насъ.

Предста́тельницу Тя живота́ вѣмъ, и храни́тельницу тве́рду, Дѣ́во, и напа́стей рѣша́щу молвы́, и нало́ги [6] бѣсо́въ отгоня́ющу: и молю́ся всегда́, отъ тли́ страсте́й мои́хъ изба́вити мя.

Слава: Яко стѣ́ну прибѣ́жища стяжа́хомъ, и душъ всесоверше́нное спасе́ніе, и простра́нство въ ско́рбехъ, Отрокови́це, и просвѣще́ніемъ Твоимъ при́сно ра́дуемся: о Влады́чице, и ны́нѣ насъ отъ страсте́й и бѣдъ спаси́.

И нынѣ: На одрѣ́ ны́нѣ немощству́яй лежу́, и нѣсть исцѣле́нія пло́ти мое́й, но Бо́га и Спа́са мі́ру, и Изба́вителя неду́говъ ро́ждшая, Тебѣ́ молю́ся Благо́й: отъ тли неду́гъ возста́ви мя.

Кондакъ, гласъ 6.

Предста́телство христіа́нъ непосты́дное, хода́тайство ко Творцу́ непрело́жное, не пре́зри грѣ́шныхъ моле́ній гла́сы, но предвари́, я́ко Блага́я на по́мощь насъ, вѣ́рно зову́щихъ Ти: ускори́ на моли́тву, и потщи́ся на умоле́ніе, предста́телствующи при́сно, Богоро́дице, чту́щихъ Тя.

Икосъ: Простри́ дла́ни Твоя́, и́миже всѣхъ Влады́ку я́ко младе́нца прія́ла еси́, за мно́жество бла́гости, не оста́ви насъ всегда́ надѣ́ющихся на Тя. Бо́дренною Твое́ю моли́твою, и неизче́тною просты́нею уще́дри насъ, и пода́ждь душа́мъ на́шимъ милосе́рдіе Твое́, во вѣ́ки источа́ющи: Тебе́ бо и́мамы грѣ́шніи Засту́пницу, отъ находя́щихъ на ны́ бѣдъ и золъ. Но яко́ иму́щи милосе́рдія щедро́ты, ускори́ на моли́тву, и потщи́ся на умоле́ніе, предста́телствующи при́сно, Богоро́дице, чту́щихъ Тя.

Пѣснь 7.

Ирмосъ: Отъ Іуде́и доше́дше, о́троцы въ Вавило́нѣ иногда́ вѣ́рою Тро́ическою пла́мень пе́щный попра́ша пою́ще: отцевъ Бо́же, благослове́нъ еси́.

Припѣвъ: Пресвята́я Богоро́дице, спаси́ насъ.

На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́выя всели́лся еси́, Юже мі́ру предста́тельницу показа́лъ еси́: отецъ на́шихъ Бо́же, благослове́нъ еси́.

Припѣвъ: Пресвята́я Богоро́дице, спаси́ насъ.

Воли́теля [7] ми́лости, Его́же родила́ еси́, Ма́ти Чи́стая, умоли́ изба́витися отъ прегрѣше́ній, и душе́вныхъ скве́рнъ, вѣ́рою зову́щимъ: отецъ на́шихъ, Бо́же, благослове́нъ еси́.

Слава: Сокро́вище спасе́нія, и исто́чникъ нетлѣ́нія, Тя ро́ждшую, и сто́лпъ утвержде́нія, и дверь покая́нія зову́щимъ показа́лъ еси́: отецъ на́шихъ Бо́же, благослове́нъ еси́.

И нынѣ: Тѣле́сныя сла́бости и душе́вныя неду́ги, Богороди́тельнице, любо́вію приступа́ющихъ ко кро́ву Твоему́, Дѣ́во, исцѣли́ти сподо́би, Спа́са Христа́ намъ ро́ждшая.

Пѣснь 8.

Ирмосъ: Царя́ Небе́снаго, Его́же пою́тъ во́и Ангельстіи, хвали́те и превозноси́те во вся вѣ́ки.

Припѣвъ: Пресвята́я Богоро́дице, спаси́ насъ.

По́мощи я́же отъ Тебе́ тре́бующія, не пре́зри, Дѣ́во, пою́щія и превознося́щія Тя во вѣ́ки.

Припѣвъ: Пресвята́я Богоро́дице, спаси́ насъ.

Неможе́ніе души́ моея́ исцѣля́еши, и тѣле́сныя болѣ́зни, Дѣ́во, да Тя просла́влю, Чи́стая, во вѣ́ки.

Слава: Исцѣле́ній бога́тство излива́еши вѣ́рно пою́щимъ Тя, Дѣ́во, и превознося́щимъ неизрѣче́нное Твое́ рождество́.

И нынѣ: Напа́стей Ты прило́ги [8] отгоня́еши, и страсте́й нахо́ды, Дѣ́во: тѣ́мже Тя пое́мъ во вся вѣ́ки.

Пѣснь 9.

Ирмосъ: Вои́стинну Богоро́дицу Тя исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя велича́юще.

Припѣвъ: Пресвята́я Богоро́дице, спаси́ насъ.

То́ка слезъ мои́хъ не отврати́ся, Яже отъ вся́каго лица́ вся́ку сле́зу отъе́мшаго, Дѣ́во, Христа́ ро́ждшая.

Припѣвъ: Пресвята́я Богоро́дице, спаси́ насъ.

Ра́дости мое́ се́рдце испо́лни, Дѣ́во, Яже ра́дости пріе́мшая исполне́ніе, грѣхо́вную печа́ль потребля́ющи.

Припѣвъ: Пресвята́я Богоро́дице, спаси́ насъ.

Приста́нище и предста́телство къ Тебѣ́ прибѣга́ющихъ бу́ди, Дѣ́во, и стѣна́ неруши́мая, прибѣ́жище же и покро́въ, и весе́ліе.

Слава: Свѣ́та Твоего́ заря́ми просвѣти́, Дѣ́во, мракъ невѣ́дѣнія отгоня́ющи, благовѣ́рно Богоро́дицу Тя исповѣ́дающихъ.

И нынѣ: На мѣ́стѣ озлобле́нія не́мощи смири́вшагося, Дѣ́во, исцѣли́, изъ нездра́вія во здра́віе претворя́ющи.

Молитва ко Пресвятѣй Богородицѣ.

Пренепоро́чная Госпоже́, небесе́ и земли́ Цари́це, Пречи́стая Дѣ́во Богоро́дице, смире́нно припа́дая молю́тися: помози́ ми, еди́на многомо́щная Влады́чице, еди́ному грѣ́шному, пріими́ недосто́йное мое́ моле́ніе, и принеси́ единоро́дному Ти [9] Сы́ну, Бо́гу моему́, я́ко да ми́лостивъ бу́детъ стра́стнѣй и ско́рбнѣй души́ мое́й: самъ бо за мно́жество беззако́ній мои́хъ не смѣ́ю просте́ртися и проси́ти проще́нія, но Тебе́ предлага́ю хода́таицу и те́плую моли́твенницу, я́ко ма́тернее къ ро́ждшемуся изъ Тебе́ Бо́гу и́маши дерзнове́ніе, и ничто́же Тебѣ́ не возмо́жно, а́ще то́чію восхо́щеши: не пре́зри мои́хъ слезъ, не возгнуша́йся воздыха́нія моего́, не отри́ни серде́чныя ми [10] болѣ́зни, оживи́ умерщвле́ннаго мя страстьми́, Свѣтъ Невече́рній возсія́вшая намъ, ду́шу мою́, омраче́нную злодѣя́ньми, просвѣти́: Врача́ ро́ждшая, уврачу́й души́ моея́ неисцѣ́льныя я́звы: волну́ющагося жите́йскою бу́рею, на стезю́ мя покая́нія напра́ви. Пріими́, Госпоже́ всеми́лостивая, моле́бную сію слу́жбу мою́, и человѣколю́бивому Бо́гу принеси́. О прекра́сная пала́то Влады́чня, сотвори́ мя домъ Боже́ственнаго Ду́ха: свѣтоно́сная сѣ́не небе́сная, духо́вную благода́ть во мнѣ грѣ́шнѣмъ напра́ви. Ру́цѣ мои́ недосто́йныя воздѣва́ю, и се́рдце и устнѣ́ скве́рныя, ко хвале́нію Тебе́, Всенепоро́чная, исправля́ю, да душетлѣ́нныхъ мя па́костей изба́виши. Вся́кія нечи́стыя по́мыслы отъ се́рдца моего́ отжени́, язы́къ мой поле́зная глаго́лати испра́ви, очесе́мъ мои́мъ пода́ждь сле́зы, на омы́тіе скве́рны грѣхо́вныя, но́зѣ мои́ устро́й непреткнове́нно къ дѣ́ланію за́повѣдей Боже́ственныхъ ходи́ти, ру́цѣ мои́ содѣ́лай къ Вы́шнему на воздѣя́ніе благопрія́тное, слухъ мой отве́рзи ко усе́рдному слы́шанію за́повѣдей Боже́ственнаго Ева́нгелія, я́ко да и твори́ти я́ возмогу́, Тобо́ю, всеси́льная Цари́це, укрѣпля́емь: и пода́ждь ми вре́мя покая́нія, и напра́сныя сме́рти свободи́ мя. На кончи́нѣ же предста́ни ми, всеми́лостивая Ма́ти, въ разлуче́ніи души́ отъ стра́стнаго ми [11] тѣ́ла, возду́шныхъ мытаре́й и князе́й те́мныхъ изъима́ющи мя, и рукописа́нія мно́гихъ грѣхо́въ мои́хъ раздира́ющи, одесну́ю же блаже́ннаго стоя́нія на стра́шнѣмъ судѣ́ сподо́би мя. Ты́ свѣтъ омраче́ннаго ума́ моего́, Ты́ утѣше́ніе души́ мое́й, Ты́ упова́ніе спасе́нія моего́, Ты́ еди́на непосты́дная предста́тельница къ Бо́гу: Его́же ми́лостива мнѣ сотвори́, Влады́чице, и присносу́щныхъ благъ наслѣ́дника яви́ мя въ бу́дущей жи́зни, идѣ́же есть всѣхъ веселя́щихся жили́ще: я́ко да и та́мо Тя, преми́лостивая моли́твеннице, сподо́блюся велича́ти, и сла́вити великолѣ́пое и́мя Сы́на Твоего́, Христа́ Спаси́теля и Бо́га на́шего, со безнача́льнымъ Его Отце́мъ, и всесвяты́мъ и благи́мъ и животворя́щимъ Ду́хомъ, во вѣ́ки вѣко́въ. Аминь.

Примѣчанія:
[1] Ухищренія, уловленія.
[2] Миромъ, смиреніемъ.
[3] Путеводствуй, будь кормчимъ.
[4] Мира, смиренія.
[5] Взято.
[6] Тягости, утѣсненія, лихвы.
[7] Склонность имѣющаго, приверженца.
[8] Ухищренія, уловленія.
[9] Твоему.
[10] Моея.
[11] Моего.

Источникъ: Акаѳісты съ каноны и прочая душеполезная моленія. — Изданіе первое, съ шестнадцатью священными изображеніями. — СПб.: Въ Сѵнодальной Тѵпографіи, 1887. — С. 309-328.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2017 г.