Церковный календарь
Новости


2018-12-12 / russportal
Свт. Іоаннъ Златоустъ. Бесѣды на псалмы. На псаломъ 126-й (1899)
2018-12-12 / russportal
Свт. Іоаннъ Златоустъ. Бесѣды на псалмы. На псаломъ 125-й (1899)
2018-12-11 / russportal
Прот. Михаилъ Помазанскій. Православное Догмат. Богословіе митр. Макарія (1976)
2018-12-11 / russportal
Прот. Михаилъ Помазанскій. Свт. Тихонъ Задонскій, еп. Воронежскій (1976)
2018-12-10 / russportal
Лактанцій. Книга о смерти гонителей Христовой Церкви (1833)
2018-12-10 / russportal
Евсевій, еп. Кесарійскій. Книга о палестинскихъ мученикахъ (1849)
2018-12-09 / russportal
Архіеп. Аверкій (Таушевъ). Истинное христіанство есть несеніе креста (1975)
2018-12-09 / russportal
Архіеп. Аверкій (Таушевъ). Сознаемъ ли мы себя православными? (1975)
2018-12-08 / russportal
Преп. Ефремъ Сиринъ. О томъ, какъ душѣ обрѣсти Бога (1895)
2018-12-08 / russportal
Преп. Ефремъ Сиринъ. О томъ, что не должно соблазнять ближняго (1895)
2018-12-07 / russportal
Тихонія Африканца Книга о семи правилахъ для нахожд. смысла Св. Писанія (1891)
2018-12-07 / russportal
Архим. Антоній. О правилахъ Тихонія и ихъ значеніи для совр. экзегетики (1891)
2018-12-06 / russportal
Свт. Василій, еп. Кинешемскій. Бесѣда 16-я на Евангеліе отъ Марка (1996)
2018-12-06 / russportal
Свт. Василій, еп. Кинешемскій. Бесѣда 15-я на Евангеліе отъ Марка (1996)
2018-12-05 / russportal
Духовныя бесѣды (26-30) преп. Макарія Египетскаго (1904)
2018-12-05 / russportal
Духовныя бесѣды (21-25) преп. Макарія Египетскаго (1904)
Новости въ видѣ
RSS-канала: .
Сегодня - четвергъ, 13 декабря 2018 г. Сейчасъ на порталѣ посѣтителей - 51.

СЛУЖБЫ НОВОПРОСЛАВЛЕННЫМЪ СВЯТЫМЪ

Служба святымъ новомученикомъ и исповѣдникомъ Россійскимъ.

Соверша́ется па́мять и́хъ въ недѣ́лю, ближа́йшую къ 25-му Іаннуа́рія. И а́ще бу́детъ 25-е Іаннуа́рія въ понедѣ́льникъ, вто́рникъ или́ сре́ду, пое́мъ новому́ченикомъ въ недѣ́лю, я́же е́сть предъ си́мъ, а́ще ли бу́детъ въ четверто́къ, пято́къ или суббо́ту, пое́мъ и́мъ въ недѣ́лю послѣ́дующую. А́ще прилучи́тся 25-е Іаннуа́рія въ де́нь недѣ́льный [воскре́сный], пое́мъ слу́жбу новому́ченикомъ въ то́й же де́нь, слу́жбу же свято́му Григо́рію Богосло́ву въ 27-й де́нь Іаннуа́рія ку́пно со слу́жбою святи́телю Іоа́нну Златоу́сту. Предваря́етъ тогда́ слу́жба святи́телю Григо́рію. Вѣ́домо бу́ди и сіе́: слу́жба сія́ быва́етъ, наче́нши отъ 22-го и восходя́щи до 28-го Іаннуа́рія. И а́ще прилучи́тся тогда́ недѣ́ля мытаря́ и фарисе́я, или́ блу́днаго, или́ мясопу́стная, пое́мъ новому́ченикомъ съ Тріо́дію, я́коже тріе́мъ святи́телемъ по Ма́рковой главѣ́. А́ще прилучи́тся въ то́йже де́нь па́мять вели́каго свята́го, пое́мъ свято́му вели́кому въ суббо́ту ближа́йшую, или́ въ ины́й де́нь. А́ще же бу́детъ гдѣ́ въ то́й де́нь хра́мъ, пое́мъ слу́жбу хра́ма съ Тріо́дію непремѣ́нно, святы́мъ же новому́ченикомъ во гряду́щую недѣ́лю.




На Ма́лѣй вече́рни,

На Го́споди, воззва́хъ: стихи́ры воскре́сны 4.

Сла́ва, новому́чениковъ, гла́съ 8:

Земля́ Ру́сская не́бо земно́е бы́сть: / въ свои́хъ разсѣ́линахъ тѣлеса́ новому́чениковъ и исповѣ́дниковъ сокры́вши / и тѣ́хъ небе́сною сла́вою просія́вши, / и́же свои́ми кровьми́ ороси́ша ю́, / пострада́вше отъ слу́гъ сатани́нскихъ за вѣ́ру Христо́ву / во искупле́ніе грѣхо́въ богоотступле́нія.

И ны́нѣ, Богоро́диченъ, гла́са ма́лыя вече́рни.


На стихо́внѣ стихи́ра воскре́сна еди́на.

И стихи́ры новому́чениковъ, гла́съ 1:

О вели́цыи страстоте́рпцы новому́ченицы Россі́йстіи, / съ любо́вію припа́даемъ къ ва́мъ, / и прославля́юще ва́ша по́двиги, / благоговѣ́йно лобыза́емъ ра́ны ва́ша, / моли́те, мо́лимся, о душа́хъ на́шихъ.

Стихъ: Разже́глъ ны́ еси́, / я́коже разжиза́ется сребро́.

О сла́вніи новому́ченицы Россі́йстіи, / егда́ оскудѣва́ше вѣ́ра, / укрѣпля́сте ю́ исповѣ́даніемъ ва́шимъ, / егда́ изсяка́ше любы́, / любве́ ра́ди ко Христу́ да́сте себе́ на му́ки и сме́рть, / егда́ колеба́шеся наде́жда, / утвержда́сте ю́ ва́шимъ упова́ніемъ на Бо́га, / Его́же моли́те, / да укрѣпи́тъ въ на́съ вѣ́ру, наде́жду и любо́вь.

Сти́хъ: Воззва́ша пра́ведніи / и Госпо́дь услы́ша и́хъ.

Не человѣ́цы спаса́ютъ Це́рковь, / и ничто́же по́льзуетъ согла́сіе со враги́ Ея́, / но Це́рковь спаса́етъ человѣ́ки си́лою Христо́вою, / я́коже по́двигъ ва́шъ показа́. / О непоколеби́міи новому́ченицы Россі́йстіи, / вои́стину есте́ сла́ва Це́ркве, / о не́йже приле́жно моли́теся, / да непоколе́блему утверди́тъ ю́ Христо́съ.

Сла́ва, гла́съ 2.

О ди́вное во́инство но́выхъ страда́льцевъ Россі́йскихъ! / Кто́ возмо́жетъ досто́йно просла́вити ва́съ! / Вои́стину блаже́нна земля́, напи́вшаяся кровьми́ ва́шими, / гра́ды же и ве́си ея́ та́йно освяти́шася, / воспріи́мше честні́и оста́нки ва́ша, / мно́жицею безъ пѣ́нія церко́внаго, / та́кожде же и безъ погребе́нія честна́го. / Но моли́теся, святі́и, о странѣ́ ва́шей / и о всѣ́хъ чту́щихъ ва́съ.

И ны́нѣ, Богоро́диченъ, гла́съ то́йже.

Кто́ Тя́ по достоя́нію похва́литъ и ублажи́тъ, Отрокови́це Богоневѣ́стная, о е́же Тобо́ю бы́вшемъ мі́рови избавле́ніи? Благодаря́ще у́бо зове́мъ Ти́, глаго́люще: ра́дуйся, Я́же Ада́ма обожи́вшая, и разстоя́щая совокупи́вшая. Ра́дуйся, просвѣти́вшая ро́дъ на́шъ свѣтоно́снымъ Воскресе́ніемъ Сы́на Твоего́ и Бо́га на́шего: Тя́ бо христіа́нскій ро́дъ непреста́нно ублажа́етъ.

По Ны́нѣ отпуща́еши: и по О́тче на́шъ: тропа́рь воскре́сенъ.

Сла́ва, тропа́рь новому́чениковъ, гла́съ 4:

Цвѣ́ти Россі́йскаго лу́га духо́внаго / въ годи́ну лю́тыхъ гоне́ній ди́вно процвѣ́тшіи / новому́ченицы и исповѣ́дницы безчи́сленніи: / святи́теліе, ца́рственніи страстоте́рпцы и па́стыріе, / мона́си и мірсті́и, му́жіе, жены́ же и дѣ́ти, / до́брый пло́дъ въ терпѣ́ніи Христу́ прине́сшіи, / моли́теся Ему́, я́ко насади́телю ва́шему, / да изба́витъ лю́ди Своя́ отъ безбо́жныхъ и злы́хъ, / да утвержда́ется же Це́рковь Ру́сская / кровьми́ и страда́ніи ва́шими / во спасе́ніе ду́шъ на́шихъ.

И ны́нѣ:

Е́же отъ вѣ́ка утае́нное, и А́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся: Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.




На Вели́цѣй вече́рни,

по каѳи́змѣ, на Го́споди, воззва́хъ: стихи́ры воскре́сны 4 и новому́ченикомъ на 6, гла́съ 1:

Нача́ло ны́нѣ положи́мъ, о бра́тіе, / моле́ніемъ те́плымъ къ но́вымъ уго́дникомъ Бо́жіимъ: / ті́и бо стра́шными муче́ніи очища́еми, / ро́ждіе плодоно́сныя лозы́ Христо́вы яви́шася, / сла́достію благода́ти оби́льно напоя́еміи, / во благоуха́ніи свя́тости и́хъ на́мъ предлага́еміи, / да со умиле́ніемъ назида́ющеся по́двигомъ и́хъ, / принесе́мъ Бо́гу и мы́ пло́дъ покая́нія.

Нача́ло креще́нія стра́шнаго, / и́мже па́ки крести́ся земля́ Ру́сская, / восхвали́те, о го́ры Кі́евскія, / кресто́мъ Апо́стола Андре́я благослове́нныя. / Идѣ́же бо благода́ть возсія́ ро́ду на́шему / отъ воды́ же и Ду́ха во отверзе́ніе Ца́рствія Бо́жія, / та́мо подоба́ше нача́тися и сему́ обновле́нію / кро́вію первозакла́ннаго отъ святи́телей ру́сскихъ, / тезоиме́ннаго просвѣти́телю на́шему. / Се́й бо Влади́міръ но́вый, / изъ виногра́дника своего́ изведе́нъ / за врата́ свяще́нныя Ла́вры Пече́рскія, / вѣнча́нія Стефа́нова сподобля́ется, / проща́я и благословля́я убива́ющихъ его́, / я́ко кро́ткій моли́твенникъ о душа́хъ на́шихъ.

Рыда́ніе, жа́лость и го́ре: / се́ сви́токъ Іезекі́илевъ, насы́тивый ду́шу твою́, / свя́те Ти́хоне, Патріа́рше на́шъ! / Да услы́шится и ны́нѣ гла́съ тво́й: / бра́тіе, архипа́стыріе и па́стыріе, / зови́те ча́да ва́ша на защи́ту Це́ркве правосла́вныя. / Да услы́шатъ же и разори́тели хра́мовъ Бо́жіихъ о́гненное сло́во твое́: / а́ще еще́ то́кмо и́менемъ христіа́нскимъ нарица́етеся, / вла́стію на́мъ отъ Бо́га да́нною анаѳема́тствуемъ ва́съ. / О стра́шнаго отлуче́нія вѣ́чнаго! / Се́ ана́ѳема ники́мже разрѣша́ема! / Се́ дерзнове́ніе патріа́ршее!

Неблагода́рными еди́ни оста́вленніи, / свя́те царю́ на́шъ страстоте́рпче Нико́лае, / свята́я цари́це Алекса́ндро Но́вая, / небе́сныхъ же наслѣ́дниче о́троче Алексі́е, / ца́рственніи дѣ́вственницы О́льго, Татіа́но, Марі́е и Анастасі́е, / седмери́це свята́я, мно́гими униже́ніи восхо́дъ обрѣ́тшая, / сострада́льцы четы́ре съ собо́ю привле́кшая, / моли́теся съ ни́ми Всеблаго́му Бо́гу, / да проще́нія сподо́битъ многопрегрѣши́вшія лю́ди Россі́йскія, / умири́тъ же мі́ръ и спасе́тъ ду́ши на́ша.

И́ны стихи́ры, гла́съ 4-й:

Кро́токъ, но непоколе́блемъ бы́лъ еси́, / Петро́ва гра́да избра́нниче, / священному́чениче Веніами́не, / копрони́мы но́выми обрече́нный, / лжепа́стырьми пре́данный вла́сти богобо́рнѣй. / Тогда́ же яви́ тя́ Бо́гъ учи́теля безбоя́зненна, / и се́ завѣ́тъ тво́й, изъ заточе́нія возвѣще́нный: / да не пощади́мъ мы́ себе́ Це́ркве ра́ди / и не предади́мъ Святу́ю Це́рковь себе́ ра́ди. / На судѣ́ же беззако́ннѣмъ твое́ сло́во бы́сть всѣ́мъ ди́вно: / Жи́знь ли или́ сме́рть ны́нѣ возвѣстите́ ми, / а́зъ же зна́меновавъ себе́ святы́мъ кресто́мъ, реку́: / сла́ва Тебѣ́, Го́споди, Бо́же, о всѣ́хъ.

Же́ртвы Бо́гу живопогребе́нныя / въ кладезеподо́бный ро́въ низри́нутыя: / пре́жде всѣ́хъ Елисаве́та страстоте́рпица, / къ го́рнимъ устремле́нная княги́ня милосе́рдная, / би́серъ правосла́вія въ но́вѣмъ оте́чествѣ обрѣ́тшая, / ева́нгельски убі́йцу му́жа своего́ прости́вшая, / моли́твою и благотворе́ніемъ Бо́гу угоди́вшая, / безбо́жными же непощажде́нная. / Помоли́теся за на́съ святі́и кня́зіе, / помоли́теся за всѣ́хъ преподо́бніи страстоте́рпицы, / Елисаве́то съ Варва́рою вѣ́рною. / Услы́шите на́съ, въ ве́си Геѳсимані́йстѣй погребе́нныя, / услы́шите на́съ и ті́и, и́хже погребе́ніе невѣ́домо. / Услы́шите на́съ па́ки вку́пе прія́тыя во Оби́тели небе́сныя, / свята́я осмери́це, моли́те Бо́га о на́съ.

Сла́ва, гла́съ 8:

Адама́нтово му́жество ва́ше / сла́ва е́сть Це́ркве Россі́йскія, / страстоте́рпцы и исповѣ́дницы но́віи, / ученицы́ бо есте́ Фили́пповы и Ермоге́новы, / при́сніи же многострада́льному Патріа́рху Ти́хону, / и́же и даде́ ва́мъ и́мя свое́. / Пребы́сте терпѣ́ніемъ въ бѣда́хъ, / гони́ми и убива́еми. / Но кто́ изочте́тъ и му́ки, го́ршія сме́рти? / Оба́че яви́стеся и проповѣ́дателіе / су́щимъ съ ва́ми во у́захъ, / просвѣти́теліе прежденевѣ́рующихъ, / строи́теліе святы́хъ та́инствъ; / ве́лія е́сть ко Христу́ любы́ ва́ша, / ве́лія вѣ́ра ва́ша. / Во все́мъ яви́сте себе́, я́ко Бо́жіи слуги́.

И ны́нѣ, догма́тикъ гла́са.

Вхо́дъ, проки́менъ, и чте́нія 3.

Проро́чества Иса́іина чте́ніе (глава́ 43):

Та́ко глаго́летъ Госпо́дь: / вси́ язы́цы собра́шася вку́пѣ, / и соберу́тся кня́зи отъ ни́хъ, / кто́ возвѣсти́тъ сія́ въ ни́хъ? / Или́ я́же отъ нача́ла, кто́ слы́шана сотвори́тъ ва́мъ? / Да приведу́тъ свидѣ́тели своя́ и оправдя́тся, / и да услы́шатъ, и да реку́тъ и́стину. / Бу́дите Ми́ свидѣ́тели, и А́зъ Свидѣ́тель, / глаго́летъ Госпо́дь Бо́гъ, и о́трокъ его́же избра́хъ, / да позна́ете и вѣ́руете Ми́, и разумѣ́ете, я́ко А́зъ е́смь; / пре́жде Мене́ не бы́сть и́нъ бо́гъ и по Мнѣ́ не бу́детъ. / А́зъ е́смь Бо́гъ, и нѣ́сть, ра́звѣ Мене́, спаса́яй.  А́зъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. / Вы́ Мнѣ́ свидѣ́тели, и А́зъ Госпо́дь Бо́гъ. / И еще́ отъ нача́ла А́зъ е́смь, / и нѣ́сть отъ ру́къ Мои́хъ избавля́яй; / сотворю́, и кто́ отврати́тъ то́? / Си́це глаго́летъ Госпо́дь Бо́гъ, / избавля́яй ва́съ Святы́й Изра́илевъ.

Прему́дрости Соломо́новы чте́ніе (глава́ 3):

Пра́ведныхъ ду́ши въ руцѣ́ Бо́жіей, / и не прико́снется и́хъ му́ка. / Непщева́ни бы́ша во очесѣ́хъ безу́мныхъ умре́ти, / и вмѣни́ся озлобле́ніе исхо́дъ и́хъ, / и е́же отъ на́съ ше́ствіе сокруше́ніе; / они́ же су́ть въ ми́рѣ. / И́бо предъ лице́мъ человѣ́ческимъ а́ще и му́ку пріи́мутъ, / упова́ніе и́хъ безсме́ртія испо́лнено. / И вма́лѣ нака́зани бы́вше, вели́кими благодѣ́тельствовани бу́дутъ, / я́ко Бо́гъ искуси́ я́ и обрѣ́те и́хъ досто́йны Себѣ́. / Я́ко зла́то въ горни́лѣ, искуси́ и́хъ / и, я́ко всепло́діе же́ртвенное, прія́тъ я́. / И во вре́мя посѣще́нія и́хъ возсія́ютъ / и, я́ко и́скры по сте́блію, потеку́тъ: / су́дятъ язы́комъ и облада́ютъ людьми́, / и воцари́тся Госпо́дь въ ни́хъ во вѣ́ки. / Надѣ́ющіися На́нь разумѣ́ютъ и́стину / и вѣ́рніи въ любви́ пребу́дутъ Ему́, / я́ко благода́ть и ми́лость въ преподо́бныхъ Его́ / и посѣще́ніе во избра́нныхъ Его́.

Прему́дрости Соломо́новы чте́ніе (глава́ 4):

Пра́ведникъ а́ще пости́гнетъ сконча́тися, въ поко́и бу́детъ. / Ста́рость бо честна́ не многолѣ́тна, / ниже́ въ числѣ́ лѣ́тъ исчита́ется. / Сѣди́на же е́сть му́дрость человѣ́комъ, / и во́зрастъ ста́рости, житіе́ нескве́рное. / Благоуго́денъ Бо́гови бы́въ, возлю́бленъ бы́сть / и живы́й посредѣ́ грѣ́шникъ, преста́вленъ бы́сть. / Восхище́нъ бы́сть, да не зло́ба измѣни́тъ ра́зума его́, / или́ ле́сть прельсти́тъ ду́шу его́. / Раче́ніе бо зло́бы помрача́етъ до́брая / и паре́ніе по́хоти премѣня́етъ у́мъ незло́бивъ. / Сконча́вся вма́лѣ, испо́лни лѣ́та до́лга, / уго́дна бо бѣ́ Го́сподеви душа́ его́, / сего́ ра́ди потща́ся отъ среды́ лука́вствія. / Лю́діе же, ви́дѣвше и не разумѣ́вше, / ниже́ поло́жше въ помышле́ніи таково́е, / я́ко благода́ть и ми́лость въ преподо́бныхъ Его́, / и посѣще́ніе во избра́нныхъ Его́.

Стихи́ра на литі́и, гла́съ 8:

А́нгели Бо́жіи ра́достніи / призыва́ютъ, да возра́дуемся вси́! / Сі́и бо ра́дующеся и о еди́номъ грѣ́шницѣ ка́ющемся, / ликовству́ютъ о мно́жествѣ но́выхъ святы́хъ, / о му́ченицѣхъ и исповѣ́дницѣхъ Це́ркве Россі́йскія, / блиста́ющіяся страда́ньми и́хъ: / се́ Ца́рь, и су́щіи отъ До́ма его́, / Патріа́рхъ, іера́рси, свяще́нницы, мона́си / и мно́жество человѣ́къ вся́каго зва́нія, / у́зами и лише́ньми искуше́нніи, / муче́ньми же лю́тыми и многообра́зными / и сме́ртію, я́же введе́ и́хъ въ жи́знь безконе́чную. / Сего́ же ра́ди по́двига и́хъ / даде́ся и́мъ благода́ть моли́тися за ны́, / ца́рское бо су́ть ті́и свяще́ніе, / наде́жда ро́да на́шего обновле́нія, / возвѣсти́тели ми́лости Спа́са на́шего, / призва́вшаго и́хъ въ Сво́й чу́дный свѣ́тъ.

Сла́ва, и ны́нѣ: Богоро́диченъ, гла́съ то́йже:

Засту́пнице усе́рдная, / скорбя́щихъ при́сное ра́дованіе, / утѣ́шительница еси́ призыва́ющихъ Тя́ въ ча́съ испыта́нія, / Пресвята́я Влады́чице Богоро́дице, / ви́ждь хра́мы Сы́на Твоего́ разоре́нныя, / воззри́ на поруга́ніе безбо́жными / смире́нныхъ служи́телей Его́, / услы́ши стена́нія рабо́въ Твои́хъ, / и Сама́ со страстоте́рпцы святы́ми / заступи́ и поми́луй на́съ.

На стихо́внѣ стихи́ры воскре́сны.

Сла́ва, гла́съ 6.

О святі́и смире́ннѣйшіе свяще́нницы исповѣ́дницы, / зри́мъ ва́съ, ка́ко въ стра́шную годи́ну гоне́ній / дале́че отъ домо́въ ва́шихъ со́слани бы́сте. / Зри́мъ ва́съ, гла́дныхъ, цынго́тныхъ, ви́да своего́ лише́нныхъ, / стру́піями кровоточа́щими покрове́нныхъ, / приста́вники біе́мыхъ и сна́ лиша́емыхъ, / пла́чущихъ о ча́дѣхъ оста́вленныхъ / и о ма́терехъ и́хъ беззащи́тныхъ. / И кто́ испи́шетъ имена́ ва́ша! / Кто́ повѣ́даетъ мі́ру вся́ претерпѣ́нная ва́ми! / Оба́че вѣ́даетъ Бо́гъ избра́нныя Своя́, / сохрани́вшія зало́гъ, вруче́нный и́мъ да́же до сме́рти, / и сего́ ра́ди дерзнове́ніе иму́щія моли́тися о на́съ.

И ны́нѣ, Богоро́диченъ, гла́съ то́йже.

Богоро́дице, безпо́мощнымъ по́моще! / Помози́ и ны́нѣ стра́ждущимъ лю́демъ страны́ Россі́йскія, / въ заточе́ніи, въ му́кахъ, или́ въ тя́жкихъ обстоя́ніихъ су́щимъ. / Тебѣ́ мо́лимся, моли́ся Влады́чице / со святы́ми новому́чениками и исповѣ́дниками ро́да на́шего, / изба́витися отъ бѣ́дъ мно́зѣхъ рабо́мъ Твои́мъ.

Тропа́рь, гла́съ 4:

Цвѣ́ти Россі́йскаго лу́га духо́внаго / въ годи́ну лю́тыхъ гоне́ній ди́вно процвѣ́тшіи / новому́ченицы и исповѣ́дницы безчи́сленніи: / святи́теліе, ца́рственніи страстоте́рпцы и па́стыріе, / мона́си и мірсті́и, му́жіе, жены́ же и дѣ́ти, / до́брый пло́дъ въ терпѣ́ніи Христу́ прине́сшіи, / моли́теся Ему́, я́ко насади́телю ва́шему, / да изба́витъ лю́ди Своя́ отъ безбо́жныхъ и злы́хъ, / да утвержда́ется же Це́рковь Ру́сская / кровьми́ и страда́ніи ва́шими / во спасе́ніе ду́шъ на́шихъ.

И ны́нѣ, Богоро́диченъ, гла́съ то́йже: Е́же отъ вѣ́ка утае́нное:





На У́трени:

На Бо́гъ Госпо́дь: тропа́рь воскре́сенъ [два́жды].

Сла́ва, гла́съ 4:

Цвѣ́ти Россі́йскаго лу́га духо́внаго / въ годи́ну лю́тыхъ гоне́ній ди́вно процвѣ́тшіи / новому́ченицы и исповѣ́дницы безчи́сленніи: / святи́теліе, ца́рственніи страстоте́рпцы и па́стыріе, / мона́си и мірсті́и, му́жіе, жены́ же и дѣ́ти, / до́брый пло́дъ въ терпѣ́ніи Христу́ прине́сшіи, / моли́теся Ему́, я́ко насади́телю ва́шему, / да изба́витъ лю́ди Своя́ отъ безбо́жныхъ и злы́хъ, / да утвержда́ется же Це́рковь Ру́сская / кровьми́ и страда́ніи ва́шими / во спасе́ніе ду́шъ на́шихъ.

И нынѣ: Богородиченъ, гласъ тойже:

Е́же отъ вѣ́ка утае́нное, и А́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся: Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

Поліеле́й и велича́ніе:

Велича́емъ ва́съ, святі́и новому́ченицы и исповѣ́дницы Россі́йстіи, и чте́мъ честна́я страда́нія ва́ша, я́же за Христа́ претерпѣ́ли есте́.

Псало́мъ избра́нный: Бо́гъ на́мъ прибѣ́жище и си́ла.


А́нгельскій собо́ръ: посе́мъ ектенія́ ма́лая и возгла́съ:

Я́ко благослови́ся и́мя Твое́:


По поліеле́и ипакои́ гла́са, та́же сѣда́ленъ святы́хъ, гла́съ 1:

Проидо́сте сквозѣ́ о́гнь муче́нія и во́ду сле́зъ, изведе́ вы́ Госпо́дь въ поко́й святы́хъ, новому́ченицы и исповѣ́дницы Россі́йстіи, хода́таи воззва́нія къ Бо́гу разумѣ́ющимъ и лобыза́ющимъ по́двигъ ва́шъ. Сла́ва Предувѣ́дѣвшему произволе́ніе ва́ше, сла́ва Предуста́вившему ва́съ къ сла́вѣ Небе́снѣй, сла́ва Подаю́щему на́мъ ва́ми ве́лію ми́лость.

И́нъ сѣда́ленъ, гла́съ то́йже.

Я́ко лю́бящимъ Бо́га, ва́мъ, о страстоте́рпцы, вся́ претерпѣ́нная на земли́ бы́ша во благо́е. И прешли́ есте́, я́ко избра́нніи, къ обѣ́щанному наслѣ́дію вѣ́чныхъ бла́гъ. Сла́ва Да́вшему ва́мъ въ тя́жкихъ му́кахъ крѣ́пость, сла́ва Вѣнча́вшему ва́съ, сла́ва Дѣ́йствующему ва́ми спасе́ніе на́ше.

Сла́ва, гла́съ 3.

Возсія́ли есте́ на тве́рди церко́внѣй, святи́теліе престо́ловъ Россі́йскихъ пе́рвѣйшихъ: Ти́хоне святѣ́йшій Патріа́рше, ана́ѳему враго́мъ Креста́ пла́меннѣ изрекі́й, Влади́міре святи́телю Кі́евскій, зрѣ́лѣйшій нача́токъ но́выхъ плодо́въ са́да Ру́сскаго и Веніами́не свѣти́льниче Петрогра́дскій, издѣ́тска возжелѣ́вый за Христа́ страда́ти, е́же и бы́сть. Сла́вятся же съ ва́ми и вси́ страстоте́рпцы но́віи. Мы́ же со умиле́ніемъ ва́мъ си́це рце́мъ: ра́дуйся, собо́ре крѣ́пкій терпѣли́вый! Бу́дите моли́твенницы дерзнове́нніи о всѣ́хъ моля́щихся ва́мъ.

И ны́нѣ, Богоро́диченъ, гла́съ то́йже:

Красотѣ́ дѣ́вства Твоего́ и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? что́ же возимену́ю Тя́? недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная.

Та́же степе́нна гла́са, проки́менъ и Ева́нгеліе воскре́сное.


З р и́: А́ще хра́мъ святы́мъ:

Проки́менъ, гла́съ 4: Тебѣ́ ра́ди, Го́споди, / умерщвля́еми есмы́ ве́сь де́нь.

Сти́хъ: Вмѣни́хомся я́ко о́вцы заколе́нія.

Ева́нгеліе отъ Матѳе́я, зача́ло 36-е.

По 50-мъ псалмѣ́ стихи́ра, гла́съ 6:

Воскресе́нія Христо́ва и́стинніи свидѣ́тели / яви́шася но́віи страстоте́рпцы и исповѣ́дницы, / и́мже пра́здникъ се́й соста́вихомъ / ка́ко бы ті́и понесли́ кре́стъ сво́й, / а́ще не бы́ зна́ли, / я́ко недосто́йни су́ть страда́нія ны́нѣшняго вре́мене, / къ хотя́щей сла́вѣ яви́тися въ ни́хъ.

Да́же до здѣ́ хра́ма святы́мъ.


Кано́ны:

Воскре́сный и Богоро́дицы гла́са. А́ще въ недѣ́лю мытаре́ву, или́ блу́днаго, или́ мясопу́стную, смотри́ Ма́ркову главу́ Іаннуа́рія въ 30-й де́нь. Та́же новому́чениковъ кано́нъ, гла́съ 6:


Пѣ́снь 1.

Ирмо́съ: Волно́ю морско́ю Скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́, я́ко отрокови́цы, Го́сподеви пои́мъ, сла́вно бо просла́вися.

Припѣвъ: Святі́и новому́ченицы и исповѣ́дницы Россі́йстіи, моли́те Бо́га о на́съ.

Го́споди Бо́же мо́й, помози́ ми́ смире́нно воспѣ́ти сла́ву новому́чениковъ и исповѣ́дниковъ Россі́йскихъ, и́мже за тя́жкія страда́нія любо́вію отве́рзлъ еси́ две́ри небе́сныя.

Го́споди Бо́же на́шъ, сла́ву сію́ му́ченикомъ отъ вѣ́ка бы́вшимъ дарова́вый, я́ко мо́щи и́хъ сѣ́ются во хра́мѣхъ обновле́нія на́шего ра́ди, пода́ждь сла́ву сію́ и страстоте́рпцемъ но́вымъ, а́ще и невѣ́дома су́ть мѣ́ста погребе́нія и́хъ.

Ца́рства земна́го лише́нный, Царю́ же Небе́сному и въ бѣ́дствіяхъ свои́хъ до конца́ вѣ́рный, моли́ся Ему́, святы́й царю́ му́чениче Нико́лае, е́же не лиши́тися и на́мъ утѣше́нія благода́тнаго въ бѣда́хъ на́шихъ.

Отъ руки́ священному́ченика Влади́міра древя́нный по́сохъ первопресто́льника святи́теля Петра́ пріе́мый, взыщи́ мя, овцу́ заблу́дшую, горохи́щную, о святы́й Патріа́рше и о́тче на́шъ Ти́хоне, обличи́телю сыно́въ противле́нія.

Богоро́диченъ: Во успе́ніи Твое́мъ мі́ра не оста́вила еси́, Влады́чице! Не оста́вила еси́ и страну́ Россі́йскую, но благоволи́ла еси́ прія́ти хвалу́ отъ но́выхъ святы́хъ страстоте́рпцевъ.

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь ви́дѣвши на ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Ку́ю да́нь сло́ва принесе́мъ ва́мъ, вѣ́рніи свидѣ́теліе сло́ва, до́бліи страстоте́рпцы и па́стыре, вмѣни́вшійся, я́ко о́вцы заколе́нія.

Тебѣ́, о Влади́міре, первосвяти́телю дре́влія Кі́евскія Це́ркве, соиме́нне свято́му просвѣти́телю Руси́, подоба́ше преднача́ти сла́вное по́прище боре́нія и страда́ній. Прево́диши ты́ боговѣнча́нный по́лкъ страстоте́рпцевъ, и да возда́стся ти́ пе́рвый вѣне́цъ похвалы́.

Посредѣ́ ополче́нія до́бляго зри́мъ и тя́, свяще́нная главо́, первосвяти́телю гра́да свята́го Петра́, святи́телю Веніами́не, возлю́бленный па́ствою твое́ю, я́коже Іа́ковомъ тезоимени́тый ти́ дре́влій патріа́рхъ.

Пе́рвый въ чи́нѣ пресви́терстѣмъ новому́чениковъ ты́ яви́лся еси́, Іоа́нне пресви́тере, во Аме́рицѣ пре́жде престо́лу Бо́жію предстоя́вый. Я́ко лю́тыхъ безбо́жникъ въ Ца́рскомъ Селѣ́ обличи́теля, вѣнча́ тя Госпо́дь вѣнце́мъ му́ченическимъ, я́коже и друга́го Іоа́нна восторгоиме́ннаго, въ сло́вѣ и въ му́жествѣ пре́дъ мучи́тели ди́внаго, съ ни́ми же, вси священному́ченицы но́віи, заступи́те на́съ.

Богоро́диченъ: Премилосе́рдая Ма́ти, Пречи́стая Дѣ́во, споболѣ́вшая Сы́ну и Спа́су Своему́, вѣ́мы Тя́ Утѣ́шительницу чадолюби́ву: и оста́вльшимся во странѣ́ Россі́йстѣй и въ разсѣ́яніи су́щимъ рабо́мъ Твои́мъ.

Конда́къ, гла́съ 2.

Но́віи страстоте́рпцы Россі́йстіи, / исповѣ́днически по́прище земно́е прете́кшіи, / страда́ньми дерзнове́ніе пріи́мшіи, / моли́теся Христу́, ва́съ укрѣпи́вшему, / да и мы́, егда́ на́йдетъ на ны́ испыта́нія ча́съ, / му́жества да́ръ Бо́жій воспріи́мемъ. / О́бразъ бо есте́ лобыза́ющимъ по́двигъ ва́шъ, / я́ко ни ско́рбь, ни тѣснота́, ни сме́рть / отъ любве́ Бо́жія разлучи́ти ва́съ не возмого́ша.

И́косъ.

Егда́ начина́хуся дні́е о́гненнаго искуше́нія Це́ркве Россі́йскія и не благоволи́ Госпо́дь прія́ти отъ на́съ всесожже́нія и же́ртвы, тогда́ мно́зи архіере́е и свяще́нницы не приложи́шася пло́ти и кро́ви, но уразумѣ́вше во́лю Госпо́дню, са́ми себе́ принесо́ша, я́ко непоро́чное заколе́ніе. И вслѣ́дъ Первосвяще́нника вѣ́чнаго и Хода́тая Но́ваго Завѣ́та внидо́ша сі́и во святи́лище съ кро́вію свое́ю, да очи́стятся грѣси́ людсті́и. Сла́вни су́ть имена́ ва́ша, му́жественніи страстоте́рпцы, о́бразъ бо на́мъ есте́, лобыза́ющимъ по́двигъ ва́шъ, я́ко ни ско́рбь, ни тѣснота́, ни сме́рть отъ любве́ Бо́жія разлучи́ти ва́съ не возмого́ша.

Сѣда́ленъ, гла́съ 8.

Не́мощію пло́ти на́мъ подобостра́стніи, ду́хомъ въ мѣ́ру дре́влихъ отце́въ тща́лися есте́, о непрекло́нніи священноисповѣ́дницы Россі́йстіи, и́же въ разоре́нную оби́тель Солове́цкую и во ина́я мѣ́ста заточе́нія ссыла́еміи. Умножа́ющимся же страда́ніемъ ва́шимъ, избы́точествоваше та́йно и утѣше́ніе отъ Го́спода, и́мъ же ны́нѣ и́стѣе утѣша́етеся, въ невече́рній де́нь дости́гше Ца́рствія Христо́ва, въ не́мъ же не преста́йте, мо́лимъ ва́съ, моля́щеся о спасе́ніи ду́шъ на́шихъ.

Сла́ва, гла́съ 1.

Пресви́теръ Алексі́й отъ ро́да крестозва́ннаго, ста́ростію А́ннѣ проро́чицѣ ра́вный, во́лею за ю́на па́стыря соу́зника своего́ сме́рть пріе́млетъ, я́ко Ева́нгелія послу́шатель. Пе́тръ же іере́й скиптроиме́нный во уста́ своя́ отъ увѣща́емаго и́мъ застрѣля́ется. Сла́ва Да́вшему мно́зѣмъ свяще́нникомъ на безбо́жники крѣ́пость, сла́ва Наста́вившему и діа́коны му́ченики, сла́ва Да́рствующему таковы́мъ сугу́бую благода́ть моли́тися за ны́.

И ны́нѣ: Гряду́щаго предпра́зднства, гла́съ то́йже.

Ра́дуются новому́ченицы и исповѣ́дницы ро́да на́шего, срѣта́юще Го́спода и Влады́ку своего́, Его́же иногда́ срѣ́те святы́й ста́рецъ Симео́нъ, прирекі́й: Ны́нѣ отпуща́еши раба́ Твоего́, Влады́ко. Сподо́би, Го́споди, и на́мъ въ ча́съ исхо́да отъ жи́зни сея́ вре́менныя проще́ннымъ бы́ти и отпуще́ннымъ съ ми́ромъ, моли́твами Пречисты́я Влады́чицы на́шея Богоро́дицы и ны́нѣ воспѣва́емыхъ уго́дниковъ Твои́хъ и всѣ́хъ святы́хъ.

Пѣ́снь 4.

Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Оскверне́нная дѣ́лы безбо́жникъ земля́ кропле́ніемъ крове́й ва́шихъ па́ки благословля́ется. Во́ды же морскі́я и рѣ́чныя тѣлеса́ потопля́емыхъ святы́хъ, я́ко свяще́ніе, влага́емое въ ты́я, воспрія́ша.

Ермоге́ну Моско́вскому тезоимени́те, свѣти́льниче Тобо́льскій священному́чениче но́вый, все́ житіе́ твое́, я́ко пла́мень, его́же рѣка́ Ту́ра ника́коже угаси́. Потопля́емъ бо возше́лъ еси́ ко Го́споду твоему́, біе́мъ же по устна́ма до конца́ немо́лчно моли́лся еси́, мо́лишися же и ны́нѣ за ны́.

Стра́шно е́сть слы́шимое о муче́ніихъ свята́го архипа́стыря Пе́рмскаго Андрони́ка, и́же не боя́ся му́къ, повеле́ кля́тву изрещи́ на безбо́жную вла́сть. Святи́тель же Черни́говскій Васи́лій со ины́ми по́сланными отъ Всероссі́йскаго Собо́ра увѣ́дѣти о убіе́ніи Андрони́ковомъ, тогда́ съ ни́ми пострада́, вку́пѣ же вси́ Го́споду предстоя́тъ.

Святи́теля Іо́сифа дре́вле отъ ра́зинцевъ убіе́ннаго просла́вивый, архипа́стырь Митрофа́нъ же́стоко но́щію умерщвля́ется. Тогда́ же и соепи́скопъ его Лео́нтій пострада́. Та́ко еди́нѣмъ свѣ́томъ Ца́рствія Небе́снаго сі́и тріе́ священному́ченицы Астраха́нстіи озари́шася.

Богоро́диченъ: О, ко́ль мно́зи святы́я ико́ны ны́нѣ рука́ми безбо́жныхъ отъя́ты отъ вѣ́рныхъ, но не исто́ргнется о́бразъ Благі́я Утѣ́шительницы изъ серде́цъ моля́щихся, свобо́ды лише́нныхъ исповѣ́дниковъ святы́я вѣ́ры.

Пѣ́снь 5.

Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ взыва́ше: воскре́снутъ ме́ртвіи, и воста́нутъ су́щіи во гробѣ́хъ, и вси́ земноро́дніи возра́дуются.

Пе́тре и Кири́лле, исповѣ́дницы вели́цыи и непрекло́нніи, нра́вомъ разли́чніи, но еди́ни въ вѣ́рѣ и тве́рдости ду́ха, а́ще и со́слани бы́сте, оба́че всю́ пра́вду церко́вную удержа́ли есте́, ны́нѣ же, я́ко наслѣ́дницы Ца́рства Небе́снаго, моли́те Бо́га о е́же сохрани́тися и на́мъ въ пра́вдѣ се́й.

Агаѳа́нгеле, а́нгеле Яросла́вльскія це́ркве, ра́дуйся со дру́ги свои́ми. Отложе́ніе бо ва́ше отъ собра́тій, въ пра́вдѣ церко́внѣй не устоя́вшихъ, ра́дость а́нгеломъ бы́сть. Не восхотѣ́ли есте́ покори́ти себе́ нече́стію: сего́ ра́ди и изыдо́сте, на ско́рбь и лише́нія, кре́стъ сво́й нося́ще.

Арсе́ніе, вели́каго Нова́града сла́во, еди́не отъ столпо́въ Собо́ра Всероссі́йскаго, приско́рбна бѣ́ привре́менно душа́ твоя́, въ темни́цѣ ти́ су́шу, но просія́ вско́рѣ побѣ́дно вѣ́ра твоя́, побѣжда́ющая вся́ искуше́нія: и яви́лся еси́ до конца́ непрекло́ненъ.

Дамаски́ново житіе́ да умили́тъ вся́ чту́щія. Ка́ко бѣ́ и на о́стровѣхъ Солове́цкихъ, и въ Казахста́нѣ и во странѣ́ Сиби́рской, восходя́ къ Голго́ѳѣ свое́й. Ка́ко мра́зомъ сиби́рскимъ томи́мъ, при брѣ́зѣ рѣки́ неиму́щему іере́ю ве́рхнюю ря́су свою́ отдаде́. Са́мъ же въ сту́жѣ зи́мнѣй на плоту́ Бо́гу ду́хъ предаде́, еди́нъ отъ тѣ́хъ, и́хже мі́ръ ве́сь недосто́инъ бѣ́.

Богоро́диченъ: Наста́внице святи́телей тве́рдыхъ, Пречи́стая Дѣ́во, наста́ви на́съ мы́слити и глаго́лати, и дѣ́яти то́чію пра́вая, ревну́юще не пожалѣ́вшимъ себѣ́ исповѣ́дникомъ.

Пѣ́снь 6.

Ирмо́съ: Я́тъ бы́сть, но не удержа́нъ въ пе́рсѣхъ ки́товыхъ Іо́на: Тво́й бо о́бразъ нося́, Страда́вшаго и погребе́нію да́вшагося, я́ко отъ черто́га, отъ звѣ́ря изы́де. Приглаша́ше же кустоді́и: храня́щіи су́етная и ло́жная, ми́лость сію́ оста́вили есте́.

Еде́ма сладча́йшаго наслѣ́дницы показа́стеся, новому́ченицы земли́ Ру́сскія: блаже́ни есте́, я́ко отъ пла́ча ва́шего утѣ́шистеся на Небеси́: возжада́ли есте́ пра́вды, ея́же насыща́етеся изоби́льно въ Ца́рствіи Небе́снѣмъ.

Дще́ри царе́вы съ ма́терію свято́ю въ заточе́ніи суро́вѣмъ утѣше́ніе себѣ́ отъ писа́ній святы́хъ оте́цъ почерпа́ху и та́ко Христу́ уневѣ́стившася. Алексі́й же о́трокъ, бра́тъ и́хъ, рука́ма царя́ му́ченика внесе́нъ бы́сть та́мо, идѣ́же сі́и ца́рственніи съ четвери́цею сострада́льцевъ убіе́ни бы́вше, я́ко же́ртвы одушевле́нніи за ро́дъ на́шъ Бо́гу предста́ша.

Ша́хта гро́бъ бы́сть, въ не́й же Елисаве́та преподобному́ченица сконча́ ца́рственный пу́ть сво́й съ Варва́рою о Го́сподѣ сестро́ю и съ про́чими шестію́. Та́можде княги́ня страстоте́рпцу кня́зю Іоа́нну ра́ну обяза́. О святі́и Алапа́евстіи му́ченицы осмочи́сленніи, уврачу́йте ны́нѣ ра́ны ду́шъ на́шихъ.

Въ стра́шныя дни́ сі́и пострада́вшіи во странѣ́ на́шей Россі́йстѣй уго́дницы Бо́жіи, знамени́тіи и невѣ́доміи, мона́си, и́нокини, му́жи и жены́ со ча́ды, укрѣпи́те ны́ моли́твами ва́шими, е́же исправля́ти на́мъ пути́ на́ша пре́дъ Го́сподемъ, помина́юще по́двигъ ва́шъ.

Богоро́диченъ: Мно́жицею изба́вися отъ бѣ́дъ и зо́лъ ро́дъ на́шъ, моля́щимся лю́демъ пре́дъ Твои́ми, о Богома́ти, святы́ми ико́нами; совокупи́ и ны́нѣ, Влады́чице, вся́ моле́нія на́ша о избавле́ніи отъ лютѣ́йшія бѣды́, предста́тельствомъ Твои́мъ.

По 6-й пѣ́сни конда́къ воскре́сный и и́косъ его́.


Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене во Гро́бѣ ме́ртвъ, бездыха́ненъ полага́ется во спасе́ніе на́съ, пою́щихъ: Изба́вителю Бо́же, благослове́нъ еси́.

Страда́ньми ва́шими Це́рковь Ру́сская сла́вится, му́ченицы но́віи, сро́дницы на́ши чи́на и сосло́вія вся́каго, за Христа́ отъ безбо́жныхъ убіе́нніи, во спасе́ніе на́съ пою́щихъ: Изба́вителю Бо́же, благослове́нъ еси́.

Ору́жіе кре́стъ и щи́тъ вѣ́ру во Христа́, страда́нія же и сме́рть прія́ли есте́, во спасе́ніе на́съ пою́щихъ: Изба́вителю Бо́же, благослове́нъ еси́.

Зло́бу слу́гъ сатани́нскихъ, сожже́нную со́вѣсть иму́щихъ, обличи́ сожига́емый си́ми святи́тель Іоа́ннъ Ри́жскій, та́кожде и повѣ́шенніи: святи́тель Воро́нежскій Ти́хонъ, и пресви́теръ Симферо́польскій Алексі́й и про́чіи звѣронра́внѣ уму́ченніи. Тебѣ́ же, о Го́споди, сі́и въ Ца́рствѣ Твое́мъ свѣ́тлемъ взыва́ютъ: Изба́вителю Бо́же, благослове́нъ еси́.

Страстоте́рпцы младе́нцы убіе́нныя, я́ко пти́цы чи́стыя въ гнѣ́зда небе́сныя пріе́млетъ Госпо́дь, непреста́нно въ раи́ воспѣва́ющія: Изба́вителю Бо́же, благослове́нъ еси́.

Богоро́диченъ: Изба́вительнице люде́й Твои́хъ при́сная, умоли́ Сы́на и Бо́га Твоего́ па́ки изба́вити до́мъ Тво́й отъ лютѣ́йшія всѣ́хъ пре́жде бы́вшихъ бѣды́, да со умиле́ніемъ возглаго́лемъ Ему́, спасе́нніи Тобо́ю: Изба́вителю Бо́же, благослове́нъ еси́.

Пѣ́снь 8.

Ирмо́съ: Ужасни́ся боя́йся, Не́бо, и да подви́жатся основа́нія земли́: се́ бо въ ме́ртвецѣхъ вмѣня́ется въ Вы́шнихъ Живы́й и во Гро́бъ ма́лъ страннопріе́млется. Его́же о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Испра́сте ри́зы ва́ша кровьми́ свои́ми, убѣли́сте же и́хъ кро́вію А́гнца, за человѣ́ки закла́ннаго, Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Ублажи́мъ святи́теля Іо́сифа Петрогра́дскаго, непоро́чности Це́ркве та́йныя ревни́теля, въ прогна́ніи ло́же свое́ ме́жду сви́ніями нечи́стыми имѣ́вшаго; и слы́шимъ его́ на́мъ въ слу́хъ се́рдца глаго́люща: страда́ньми свои́ми и вѣ́рностію превозноси́те Христа́ во вся́ вѣ́ки.

Сла́вны и въ житіи́ и въ кончи́нѣ свое́й святи́тели Серафи́мъ У́гличскій и Макси́мъ Серпухо́вскій, о́нъ же и вра́чь, на та́йное епи́скопство благослове́нный. Многотру́дно е́сть служе́ніе Це́ркве гони́мыя, его́же и соверши́вше сі́и, предста́ша Христу́ Бо́гу, моля́ще Его́ о ста́дѣ свое́мъ, сла́вяще же Его́ при́сно во вѣ́ки.

Небе́сныя хвалы́ ли́че неусы́пный, новому́ченицы добропобѣ́дніи земли́ Ру́сскія, ны́нѣ при́сно причаща́етеся А́гнца присноживо́тнаго, за Него́же отъ безбо́жныхъ убіе́ни бы́сте, Его́же о́троцы благослови́те, свяще́нницы воспо́йте, лю́діе превозноси́те во вся́ ве́ки.

Богоро́диченъ: Пресвята́я Влады́чице, спаси́, свободи́ и поны́нѣ стра́ждушія рабы́ Твоя́, да́руй и́мъ терпѣ́ніе и крѣ́пость; въ Тебѣ́ полага́емъ наде́жду всю́, блажи́мъ Тя́ при́сно и превозно́симъ Сы́на Твоего́ и Бо́га во вѣ́ки.

Пѣ́снь 9.

Ирмо́съ: Не рыда́й Мене́, Ма́ти, зря́щи во Гро́бѣ, Его́же во чре́вѣ безъ сѣ́мене зачала́ еси́, Сы́на: воста́ну бо, и просла́влюся, и вознесу́ со сла́вою непреста́нно я́ко Бо́гъ, вѣ́рою и любо́вію Тя́ велича́ющія.

О но́віи страстоте́рпцы, и́же по́двигъ проти́ву зло́бы безбо́жныхъ подъя́ша, вѣ́ру Христо́ву я́ко щи́тъ пре́дъ уче́ніи мі́ра сего́ держа́ще и на́мъ о́бразъ терпѣ́нія и злострада́нія досто́йно явля́юще.

О тве́рдости и му́жества полка́ му́ченикъ Христо́выхъ, за Христа́ убіе́нныхъ! Ті́и Це́рковь правосла́вную украси́ша и въ странѣ́ свое́й кро́ви своя́, я́ко сѣ́мя вѣ́ры, да́ша; ку́пно со всѣ́ми святы́ми досто́йно да почту́тся.

Слы́шимъ вси́, ка́ко чу́дная Лиді́я, въ страда́ніихъ, а́ще и пла́чущи, тве́рдая, на сострада́ніе Кири́лла подви́же, и́же и бы́сть е́й щи́тъ, ме́чъ же мучи́телемъ звѣ́рствовавшимъ. И спасе́ Христо́съ Кири́лла купе́лію кро́ве его́. Сія́ пове́давый Це́ркви Але́ксій и са́мъ пострада́. Моли́твами си́хъ тріе́хъ, Бо́же, поми́луй на́съ.

О святі́и, и́хже здѣ́ помяну́хомъ, и мно́жайшее мно́жество невѣ́домыхъ! Прости́те убо́жество слове́съ си́хъ, да напи́шутся еще́ похвалы́, ва́мъ подоба́ющія. Исчи́слити ва́съ невозмо́жно е́сть. Всѣ́хъ же моли́твами, да пріи́мутъ чту́щія ва́съ отъ Го́спода и Влады́ки живота́ на́шего благода́ть и ве́лію ми́лость.

Богоро́диченъ: О Всепѣ́тая Ма́ти! А́ще и разори́ся отъ злы́хъ вели́кая це́рковь Твоя́ Пече́рская, въ не́й же священному́ченикъ Влади́міръ прибли́зившуся дни́ убіе́нія его́, со мно́гимъ умиле́ніемъ ака́ѳистъ чты́й, Тебѣ́ моля́шеся, но не оскудѣ́етъ во вѣ́къ къ лю́демъ ка́ющимся ми́лость Твоя́. Ра́дуйся, Обра́дованная, во Успе́ніи Твое́мъ на́съ не оставля́ющая!

Свѣти́ленъ:

Вельми́ свѣ́телъ яви́ся на́мъ по́двигъ ва́шъ, святі́и новому́ченицы и исповѣ́дницы во дни́ сія́, малоду́шіемъ омраче́нныя, оскудѣ́ бо вѣ́ра за умноже́ніе беззако́ній на́шихъ, охладѣ́ любы́, поколеба́ся наде́жда, до́блесть же ва́ша озари́ сла́вою но́вою Ру́сскую Це́рковь.

На хвали́техъ стихи́ры воскре́сны Окто́иха,

та́же святы́хъ новому́чениковъ, гла́съ 6.

Подо́бенъ: Все́ отло́жше:

Слы́ша стра́шну вѣ́сть / о гоне́ніихъ, на Це́рковь Бо́жію воздви́гнутыхъ, / Всероссі́йскій на́шъ Собо́ръ, свяще́нный и вели́кій, / во еди́ну мы́сль собо́рну вся́ совокупи́ / и моле́нія уста́ви о гони́мыхъ / и о убіе́нныхъ исповѣ́дницѣхъ и му́ченицѣхъ / въ де́нь святи́теля Влади́міра страда́нія и сме́рти. / Му́дрствуяй се́й де́нь со Це́рковію му́дрствуетъ: / дні́е преставле́нія отше́дшихъ къ Бо́гу въ му́кахъ / де́ньми рождества́ и́хъ нарече́ни бы́ша. / Сего́ ра́ди соверша́емъ пра́здникъ се́й, / я́ко рождество́ Россі́йскихъ но́выхъ страстоте́рпцевъ.

Первоубіе́нніи за Вѣ́ру и Це́рковь, / пе́рвіи по и́мени поминове́нніи Святѣ́йшимъ Патріа́рхомъ: / о святи́телю Влади́міре, Пече́рскій а́гнче, / и пресви́теры старѣ́йшіи сі́и: / Іоа́нне, Пе́тре же Іо́сифе и Па́вле, / препопобному́ченицы же Герва́сіе, Гера́симе, / па́ки же священному́ченицы Па́вле, Пе́тре и Ѳео́доре, / Михаи́ле, и Влади́міре и Константи́не, / діа́коне Іоа́нне, послу́шниче Анто́ніе и смотри́телю Іоа́нне / со мно́гимъ мно́жествомъ свяще́нныхъ, и мона́ховъ, и мірски́хъ, / и́хже имена́ вся́ вѣ́сть Госпо́дь, моли́те Его́ о е́же спасти́ся на́мъ.

Сти́хъ: Блаже́нъ му́жъ боя́йся Го́спода, въ за́повѣдехъ Его́ восхо́щетъ зѣло́.

Вку́пѣ со святы́мъ царе́мъ на вся́къ де́нь оскорбля́еми, / о святі́и цари́це страстоте́рпице и дѣ́вы ца́рственніи, / о́троче же ца́рственный святы́й / и послужи́вшіи ва́мъ сострада́льцы вѣ́рніи, / но́щію непра́веднѣ вси́ убіе́ни бы́сте, / та́же, я́ко же́ртвы пра́вды всесожже́ни / хода́таи есте́ о на́съ, я́ко кади́ло Бо́гу благово́нное. / Съ ва́ми же и во другі́й де́нь въ стра́шныхъ му́кахъ живопогребе́нніи / со княги́нею свято́ю и други́нею ея́. / Ны́нѣ же всѣ́хъ спострада́вшихъ предваря́яй, о царю́ Нико́лае, / ро́да на́шего святы́й печа́льниче, / я́ко но́вый І́овъ, Го́спода моли́ прости́ти всѣ́хъ.

Сти́хъ: Свяще́нницы Твои́ облеку́тся въ пра́вду и преподо́бніи Твои́ возра́дуются.

Гла́съ 8.

Отреко́шася проси́ти ми́лости / осужде́нніи отъ безбо́жникъ свяще́нницы Бо́жіи / и́хже благослови́ святы́й Патріа́рхъ, / на му́ки и на сме́рть за Христа́. / Егда́ же воу́тріе ведо́ми бы́ша на ка́знь, / не вѣ́дяху стра́жіе, ка́ко срѣ́тшія и́хъ вѣ́рныя отгони́ти. / Лобыза́ху бо лю́діе обрече́ннымъ сме́ртникомъ / и свяще́нныя ру́цѣ и́хъ и оде́жды кра́й, / о́нѣмъ побѣ́дно пою́щимъ: / Христо́съ воскре́се изъ ме́ртвыхъ, / сме́ртію сме́рть попра́въ! / — Го́споди моли́твами священному́чениковъ си́хъ поми́луй на́съ!

Сла́ва: Стихи́ра Ева́нгельская [или́ Тріо́ди].


З р и́: А́ще хра́мъ новому́чениковъ, Сла́ва: стихи́ра святы́хъ, гла́съ 1-й: Не человѣ́цы спаса́ютъ Це́рковь: [на ма́лѣй вече́рни].

И ны́нѣ: Богоро́диченъ, гла́съ 2-й: Преблагослове́нна еси́, Богоро́дице Дѣ́во:




На Литургі́и:

Блаже́нна гла́са на 6 и святы́хъ новому́чениковъ на 4:

Помяни́ Го́споди, стра́шная муче́нія, и́миже о Тебѣ́ пострада́ша страстоте́рпцы но́віи, отъ ро́да на́шего ны́нѣ прозя́бшіи, и пріими́ моле́нія и́хъ о спасе́ніи на́шемъ.

Отве́рзлъ еси́, Судіе́ пра́ведный, Ца́рство Небе́сное исповѣ́дникомъ Це́ркве Россі́йскія. Услы́ши, Го́споди, пра́вду и́хъ, вонми́ моле́нію и́хъ о спасе́ніи ду́шъ на́шихъ.

Сла́ва: О Тро́ице Пребоже́ственная! Возврати́ плѣне́ніе на́ше; вѣ́мы, я́ко умно́жися я́коже николи́же пре́жде грѣ́хъ въ странѣ́ на́шей, но возсія́ и благода́ть въ по́двизѣ но́выхъ святы́хъ, и́же и мо́лятъ Тя́, Трисвяты́й Бо́же, о спасе́ніи ду́шъ на́шихъ.

И ны́нѣ: Расточе́нныя собери́, малоду́шныя возста́ви, отре́кшіяся же отъ святы́я вѣ́ры призови́ и обрати́, о Благода́тная и Пречи́стая Дѣ́во Марі́е, со святы́ми новому́ченики и исповѣ́дники Христа́ Спа́са умоля́ющи о проще́ніи и спасе́ніи ду́шъ на́шихъ.

По вхо́дѣ тропари́ по уста́ву святы́хъ, иму́щихъ бдѣ́ніе, прилучи́вшихся въ недѣ́лю. А́ще же Тріо́дь, смотри́ Ма́ркову главу́ Іаннуа́рія въ 30-й де́нь.

Проки́менъ гла́са [или́ по Тріо́ди] и святы́хъ, гла́съ 7-й:

Тебе́ ра́ди Го́споди, умерщвля́еми есмы́ ве́сь де́нь.

Апо́столъ рядовы́й и святы́хъ къ Ри́мляномъ зача́ло 99.


Аллилу́ія гла́са и святы́хъ гла́съ 4:

Воззва́ша пра́ведніи и Госпо́дь услы́ша и́хъ и отъ всѣ́хъ скорбе́й изба́ви и́хъ.

Ева́нгеліе рядово́е и святы́хъ отъ Луки́ зача́ло 106.

Прича́стенъ: Хвали́те Го́спода съ небе́съ:

И святы́хъ: Ра́дуйтеся пра́ведніи о Го́сподѣ:

На моле́бномъ пѣ́ніи то́йже проки́менъ: Тебе́ ра́ди Го́споди: но гла́съ 4-й: [смотри́ сти́хъ на У́трени]. Ева́нгеліе отъ Матѳе́я зач. 36-е.




Молитва святымъ новомученикомъ и исповѣдникомъ Россійскимъ:

Святі́и новому́ченицы и исповѣ́дницы Це́ркве Россі́йскія, услы́шите усе́рдную мольбу́ на́шу! Вѣ́мы, я́ко нѣ́ціи отъ ва́съ, еще́ о́троцы су́ще, послу́шающе о дре́влихъ страстоте́рпцѣхъ, въ се́рдцѣ свое́мъ помы́слиша, коли́ко прелюбе́зно и доброхва́льно е́сть таковы́мъ подража́ти, и́хже ни му́ки, ни сме́рть не разлучи́ша отъ любве́ Бо́жія. Бла́го же ва́мъ, я́ко послѣ́довали есте́ вѣ́рѣ и терпѣ́нію тѣ́хъ, о ни́хже слы́шасте и и́хже возлюби́сте. А поне́же на вся́кое вре́мя возмо́жно е́сть наити́ на ны́ испыта́ніемъ неча́яннымъ, испроси́те отъ Го́спода на́мъ му́жества да́ръ, и́же толи́ко благопотре́бенъ е́сть въ житіи́ человѣ́честемъ. Вся́ концы́ оте́чества на́шего страда́ньми свои́ми освяти́вшіи, я́ко о́бщіи за вся́ ны́ моли́твенницы, умоли́те Бо́га, изба́вити лю́ди Своя́ отъ и́га, ужа́снѣйшаго па́че вся́каго ино́го. И да отпу́стится на́мъ и всему́ ро́ду на́шему грѣ́хъ, на наро́дѣ Россі́йскомъ тяготѣ́ющій: убіе́ніе царя́, пома́занника Бо́жія, святи́телей же и па́стырей съ па́ствою, и страда́нія исповѣ́дниковъ, и оскверне́ніе святы́нь на́шихъ. Да упраздня́тся раско́лы въ Це́ркви на́шей, да бу́дутъ вси́ еди́но, и да изведе́тъ Госпо́дь на жа́тву дѣ́латели Своя́, сі́есть да не оскудѣва́етъ Це́рковь па́стырьми до́брыми, и́же и́муть просвѣща́ти свѣ́томъ и́стинныя вѣ́ры сто́ль вели́кое мно́жество люде́й, вѣ́рѣ ненауче́нныхъ, или́ отъ вѣ́ры отврати́вшихся. Недосто́йни есмы́ ми́лости Бо́жія, оба́че страда́ній ра́ди ва́шихъ Христо́съ Бо́гъ на́шъ да уще́дритъ и поми́луетъ всѣ́хъ на́съ, въ по́мощь ва́съ призыва́ющихъ. Мы́ же Ему́, Спаси́телю на́шему, со Отце́мъ и со Святы́мъ Ду́хомъ сокруше́ніе о грѣсѣ́хъ и благодаре́ніе за вся́ всегда́ да прино́симъ, сла́вяще Его́ во вѣ́ки вѣко́въ. Ами́нь.

Источникъ: Служба святымъ новомученикомъ и исповѣдникомъ Россійскимъ. — Джорданвиллъ: Типографія Пр. Іова Почаевскаго, 1983. — 40 С.

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.