Церковный календарь
Новости


2018-11-14 / russportal
Архіеп. Филаретъ (Гумилевскій). Бесѣда (2-я) въ день Срѣтенія Господня (1883)
2018-11-14 / russportal
Архіеп. Филаретъ (Гумилевскій). Бесѣда (1-я) въ день Срѣтенія Господня (1883)
2018-11-14 / russportal
Архіеп. Никонъ (Рклицкій). Евангеліе въ церкви (1975)
2018-11-14 / russportal
Архіеп. Никонъ (Рклицкій). Новый храмъ въ Бруклинѣ (1975)
2018-11-14 / russportal
Свт. Василій, еп. Кинешемскій. Бесѣда 4-я на Евангеліе отъ Марка (1996)
2018-11-14 / russportal
Свт. Василій, еп. Кинешемскій. Бесѣда 3-я на Евангеліе отъ Марка (1996)
2018-11-14 / russportal
Еп. Григорій (Граббе). Отвѣтъ (1-й) архіеп. Іоанну Шаховскому (1996)
2018-11-14 / russportal
Еп. Григорій (Граббе). Неправильный отвѣтъ (1996)
2018-11-13 / russportal
Ген. П. Н. Красновъ. "За чертополохомъ". Часть 2-я. Глава 37-я (1922)
2018-11-13 / russportal
Ген. П. Н. Красновъ. "За чертополохомъ". Часть 2-я. Глава 36-я (1922)
2018-11-13 / russportal
Архіеп. Филаретъ (Гумилевскій). Слово въ день Богоявленія (1883)
2018-11-13 / russportal
Архіеп. Филаретъ (Гумилевскій). Слово въ навечеріе Новаго года (1883)
2018-11-13 / russportal
"Книга Правилъ". Правила св. Кирилла, архіеп. Александрійскаго (1974)
2018-11-13 / russportal
"Книга Правилъ". Правила Ѳеофила, архіеп. Александрійскаго (1974)
2018-11-13 / russportal
Свт. Василій, еп. Кинешемскій. Бесѣда 2-я на Евангеліе отъ Марка (1996)
2018-11-13 / russportal
Свт. Василій, еп. Кинешемскій. Бесѣда 1-я на Евангеліе отъ Марка (1996)
Новости въ видѣ
RSS-канала: .
Сегодня - среда, 14 ноября 2018 г. Сейчасъ на порталѣ посѣтителей - 5.

ПСАЛТИРЬ

Дави́да проро́ка и царя́ пѣ́снь.

Каѳизма 1-я.


Псало́мъ Дави́ду, не надпи́санъ у евре́й, 1.

1. Блаже́нъ му́жъ, и́же не и́де на совѣ́тъ нечести́выхъ и на пути́ грѣ́шныхъ не ста́, и на сѣда́лищи губи́телей не сѣ́де,

2. но въ зако́нѣ Госпо́дни во́ля eго́, и въ зако́нѣ Его́ поучи́тся де́нь и но́щь.

3. И бу́детъ я́ко дре́во насажде́нно при́ исхо́дищихъ во́дъ, е́же пло́дъ сво́й да́стъ во вре́мя свое́, и ли́стъ eго́ не отпаде́тъ; и вся́, ели́ка а́ще твори́тъ, успѣ́етъ.

4. Не та́ко нечести́віи, не та́ко: но я́ко пра́хъ, eго́же возмета́етъ вѣ́тръ отъ лица́ земли́.

5. Сего́ ра́ди не воскре́снутъ нечести́віи на су́дъ, ниже́ грѣ́шницы въ совѣ́тъ пра́ведныхъ.

6. Я́ко вѣ́сть Госпо́дь пу́ть пра́ведныхъ, и пу́ть нечести́выхъ поги́бнетъ.

Псало́мъ Дави́ду, 2.

1. Вску́ю шата́шася язы́цы, и лю́діе поучи́шася тще́тнымъ́?

2. Предста́ша ца́ріе зе́мстіи и кня́зи собра́шася вку́пѣ на Го́спода и на Христа́ Его́.

3. Расто́ргнемъ у́зы и́хъ и отве́ржемъ отъ на́съ и́го и́хъ.

4. Живы́й на небесѣ́хъ посмѣе́тся и́мъ, и Госпо́дь поруга́ется и́мъ.

5. Тогда́ возглаго́летъ къ ни́мъ гнѣ́вомъ Свои́мъ и я́ростію Свое́ю смяте́тъ я́.

6. А́зъ же поста́вленъ е́смь Ца́рь отъ Него́ надъ Сіо́номъ, горо́ю свято́ю Его́,

7. возвѣща́яй повелѣ́ніе Госпо́дне. Госпо́дь рече́ ко Мнѣ́: Сы́нъ Мо́й еси́ Ты́, А́зъ дне́сь роди́хъ Тя́.

8. Проси́ отъ Мене́, и да́мъ Ти́ язы́ки достоя́ніе Твое́ и одержа́ніе Твое́ концы́ земли́.

9. Упасе́ши я́ жезло́мъ желѣ́знымъ, я́ко сосу́ды скуде́льничи сокруши́ши я́.

10. И ны́нѣ, ца́ріе, разумѣ́йте, накажи́теся вси́ судя́щіи земли́.

11. Рабо́тайте Го́сподеви со стра́хомъ и ра́дуйтеся Ему́ съ тре́петомъ.

12. Пріими́те наказа́ніе, да не когда́ прогнѣ́вается Госпо́дь, и поги́бнете отъ пути́ пра́ведного, егда́ возгори́тся вско́рѣ я́рость Его́. Блаже́ни вси́, надѣ́ющіися На́нь.

Псало́мъ Дави́ду, внегда́ отбега́ше отъ лица́ Авессало́ма, сы́на своего́, 3.

2. Го́споди, что́ ся́ умно́жиша стужа́ющіи ми? Мно́зи востаю́тъ на мя́,

3. мно́зи глаго́лютъ души́ мое́й: нѣ́сть спасе́нія eму́ въ Бо́зѣ eго́.

4. Ты́ же, Го́споди, засту́пникъ мо́й еси́, сла́ва моя́ и вознося́й главу́ мою́.

5. Гла́сомъ мои́мъ ко Го́споду воззва́хъ, и услы́ша мя́ отъ горы́ свя́тыя Своея́.

6. А́зъ усну́хъ и спа́хъ; воста́хъ, я́ко Госпо́дь засту́питъ мя́.

7. Не убою́ся отъ те́мъ люде́й, о́крестъ напа́дающихъ на мя.

8. Воскресни́, Го́споди, спа́си мя́, Бо́же мо́й; я́ко Ты́ порази́лъ еси́ вся́ вражду́ющыя ми́ всу́е, зу́бы грѣ́шниковъ сокруши́лъ еси́.

9. Госпо́дне е́сть спасе́ніе, и на лю́дехъ Твои́хъ благослове́ніе Твое́.

Сла́ва:


Въ коне́цъ, въ пѣ́снехъ, пса́ломъ Дави́ду, 4.

2. Внегда́ призва́ти ми́, услы́ша мя́ Бо́гъ пра́вды моея́; въ ско́рби распространи́лъ мя́ еси́, уще́дри мя́ и услы́ши моли́тву мою́.

3. Сы́нове человѣ́честіи, доко́лѣ тяжкосе́рдіи? Вску́ю лю́бите суету́ и и́щете лжи?

4. И увѣ́дите, я́ко удиви́ Госпо́дь преподо́бнаго Своего́: Госпо́дь услы́шитъ мя́, внегда́ воззва́ти ми́ къ Нему́.

5. Гнѣ́вайтеся, и не согрѣша́йте, я́же глаго́лете въ сердца́хъ ва́шихъ, на ло́жахъ ва́шихъ умили́теся.

6. Пожри́те же́ртву пра́вды и упова́йте на Го́спода.

7. Мно́зи глаго́лютъ: кто́ яви́тъ на́мъ блага́я? Зна́менася на на́съ свѣ́тъ лица́ Твоего́, Го́споди.

8. Да́лъ еси́ весе́ліе въ се́рдцѣ мое́мъ; отъ плода́ пше́ницы, вина́ и еле́я своего́ умно́жишася.

9. Въ ми́рѣ вку́пѣ усну́ и почи́ю, я́ко Ты́, Го́споди, еди́наго на упова́ніи все́лилъ мя́ еси́.

О наслѣ́дствующемъ, псало́мъ Дави́ду, 5.

2. Глаго́лы моя́ внуши́, Го́споди, разу́мѣй зва́ніе мое́.

3. Вонми́ гла́су моле́нія моего́, Царю́ мо́й и Бо́же мо́й, я́ко къ Тебе́ помолю́ся, Го́споди.

4. Зау́тра услы́ши гла́съ мо́й, зау́тра предста́ну Ти́, и у́зриши мя́.

5. Я́ко Бо́гъ не хотя́й беззако́нія, Ты́ еси́: не присели́тся къ Тебѣ́ лука́внуяй,

6. ниже́ пребу́дутъ беззако́нницы пре́дъ очи́ма Твои́ма: возненави́дѣлъ еси́ вся́ дѣ́лающія беззако́ніе.

7. Погуби́ши вся́ глаго́лющыя лжу́: му́жа крове́й и льсти́ва гнуша́ется Госпо́дь.

8. А́зъ же мно́жествомъ ми́лости Твоея́, вни́ду въ до́мъ Тво́й, поклоню́ся ко хра́му свято́му Твоему́, въ стра́сѣ Твое́мъ.

9. Го́споди, наста́ви мя́ пра́вдою Твое́ю, вра́гъ мои́хъ ра́ди испра́ви пре́дъ Тобо́ю пу́ть мо́й.

10. Я́ко нѣ́сть во устѣ́хъ и́хъ и́стины, се́рдце и́хъ су́етно, гро́бъ отве́рстъ горта́нь и́хъ: язы́ки свои́ми льща́ху.

11. Суди́ и́мъ, Бо́же, да отпаду́тъ отъ мы́слей свои́хъ, по мно́жеству нече́стія и́хъ изри́ни я́, я́ко преогорчи́ша Тя́, Го́споди.

12. И да возвеселя́тся вси́ упова́ющіи на Тя́, во вѣ́къ возра́дуются, и всели́шися въ ни́хъ, и похва́лятся о Тебѣ́ лю́бящіи и́мя Твое́.

13. Я́ко Ты́ благослови́ши пра́ведника, Го́споди: я́ко ору́жіемъ благоволе́нія вѣнча́лъ еси́ на́съ.

Въ коне́цъ, въ пѣ́снехъ о осмо́мъ, псало́мъ Дави́ду, 6.

2. Го́споди, да не я́ростію Твое́ю обличи́ши мене́, ниже́ гнѣ́вомъ Твои́мъ нака́жеши мене́.

3. Поми́луй мя́, Го́споди, я́ко не́мощенъ е́смь, исцѣли́ мя́, Го́споди, я́ко смято́шася ко́сти моя́.

4. И душа́ моя́ смяте́ся зѣло́: и Ты́, Го́споди, доко́лѣ?

5. Обрати́ся, Го́споди, изба́ви ду́шу мою́: спаси́ мя́ ра́ди ми́лости Твоея́.

6. Я́ко нѣ́сть въ сме́рти помина́яй Тебе́: во а́дѣ же кто́ исповѣ́стся Тебѣ?

7. Утруди́хся воздыха́ніѣмъ мои́мъ, измы́ю на вся́ку но́щь ло́же мое́, сле́зами мои́ми посте́лю мою́ омочу́.

8. Смяте́ся отъ я́рости о́ко мое́, обетша́хъ во всѣ́хъ вразѣ́хъ мои́хъ.

9. Отступи́те отъ мене́, вси́ дѣ́лающіи беззако́ніе, я́ко услы́ша Госпо́дь гла́съ пла́ча моего́:

10. услы́ша Госпо́дь моле́ніе мое́, Госпо́дь моли́тву мою́ прія́тъ.

11. Да постыдя́тся и смяту́тся вси́ врази́ мои́, да возвратя́тся и устыдя́тся зѣло́ вско́рѣ.

Сла́ва:


Псало́мъ Дави́ду, его́же воспѣ́тъ Го́сподеви о словесѣ́хъ Хусíевыхъ, сы́на Іеменíина, 7.

2. Го́споди Бо́же мо́й, на Тя́ упова́хъ, спаси́ мя́ отъ всѣ́хъ гоня́щихъ мя́ и изба́ви мя́:

3. да не когда́ похи́титъ я́ко ле́въ ду́шу мою́, не су́щу избавля́ющу, ниже́ спа́сающу.

4. Го́споди Бо́же мо́й, а́ще сотвори́хъ сіе́, а́ще е́сть непра́вда въ руку́ мое́ю,

5. а́ще возда́хъ воздаю́щымъ ми́ зла́, да отпаду́ у́бо отъ вра́гъ мои́хъ то́щъ.

6. Да пожене́тъ у́бо вра́гъ ду́шу мою́ и да пости́гнетъ, и попере́тъ въ зе́млю живо́тъ мо́й, и сла́ву мою́ въ пе́рсть всели́тъ.

7. Воскресни́, Го́споди, гнѣ́вомъ Твои́мъ, вознеси́ся въ конца́хъ вра́гъ Твои́хъ, и воста́ни, Го́споди Бо́же мо́й, повелѣ́ніемъ, и́мже заповѣ́далъ еси́.

8. И со́нмъ люде́й обы́детъ Тя́, и о то́мъ на высоту́ обрати́ся.

9. Госпо́дь су́дитъ лю́демъ: суди́ ми́, Го́споди, по пра́вдѣ мое́й, и по незло́бѣ мое́й на мя́.

10. Да сконча́ется зло́ба грѣ́шныхъ, и испра́виши пра́веднаго, испыта́яй сердца́ и утро́бы, Бо́же, пра́ведно.

11. По́мощь моя́ отъ Бо́га, спаса́ющаго пра́выя се́рдцемъ.

12. Бо́гъ суди́тель пра́веденъ и крѣ́покъ, и долготерпѣли́въ, и не гнѣ́въ наводя́й на вся́къ де́нь.

13. А́ще не обратите́ся, ору́жіе Свое́ очи́ститъ, лу́къ Сво́й напряже́ и угото́ва и́

14. и въ не́мъ угото́ва сосу́ды сме́ртныя, стрѣ́лы Своя́ сгара́емымъ содѣ́ла.

15. Се́ болѣ́ непра́вдою, зача́тъ болѣ́знь, и роди́ беззако́ніе:

16. ро́въ изры́, и ископа́ и́, и паде́тъ въ я́му, ю́же содѣ́ла.

17. Обрати́тся болѣ́знь eго́ на главу́ eго́, и на ве́рхъ eго́ непра́вда eго́ сни́детъ.

18. Исповѣ́мся Го́сподеви по пра́вдѣ Его́ и пою́ и́мени Го́спода Вы́шняго.

Въ коне́цъ, о точи́лѣхъ, псало́мъ Дави́ду, 8.

2. Го́споди, Госпо́дь на́шъ, я́ко чу́дно и́мя Твое́ по все́й земли́, я́ко взя́тся великолѣ́піе Твое́ превы́ше небе́съ.

3. Изъ у́стъ младе́нецъ и ссу́щихъ соверши́лъ еси́ хвалу́, вра́гъ Твои́хъ ра́ди, е́же разруши́ти врага́ и ме́стника.

4. Я́ко узрю́ небеса́, дѣла́ пе́рстъ Твои́хъ, луну́ и звѣ́зды, я́же Ты́ основа́лъ еси́.

5. Что́ е́сть человѣ́къ, я́ко по́мниши eго? Или́ сы́нъ человѣ́чь, я́ко посѣща́еши eго?

6. Ума́лилъ еси́ eго́ ма́лымъ чи́мъ отъ а́нгелъ, сла́вою и че́стію вѣнча́лъ еси́ eго́.

7. И поста́вилъ еси́ eго́ надъ дѣ́лы руку́ Твое́ю, вся́ покори́лъ еси́ подъ но́зѣ eго́.

8. О́вцы и волы́ вся́, еще́ же и скоты́ польскíя,

9. пти́цы небе́сныя, и ры́бы морскíя, преходя́щія стези́ морскíя.

10. Го́споди, Госпо́дь на́шъ, я́ко чу́дно и́мя Твое́ по все́й земли́.

Сла́ва:



По 1-й каѳизмѣ,


Трисвято́е. И по О́тче на́шъ:
Та́же тропари́ сія́, гла́съ 1.

Въ беззако́ніихъ зача́вся а́зъ, блу́дный, не дерза́ю взира́ти на высоту́ Небе́сную, но, дерза́я на человѣколю́біе Твое́, зову́: Бо́же, очи́сти мя́, грѣ́шнаго, и спаси́ мя́.

А́ще пра́ведникъ едва́ спаса́ется, а́зъ гдѣ́ явлю́ся, грѣ́шный; Тяготы́ и зно́я дневна́го не понесо́хъ, но съ нае́мники единонадеся́того часа́ сопричти́ мя́, Бо́же, и спаси́ мя́.

Сла́ва: Объя́тія О́тча отве́рсти ми́ потщи́ся, блу́дно мое́ ижди́хъ жити́е, на бога́тство неиждива́емое взира́яй щедро́тъ Твои́хъ, Спа́се, ны́нѣ обнища́вшее мое́ да не пре́зриши се́рдце. Тебѣ́ бо, Го́споди, умиле́ніемъ зову́: согрѣши́хъ на Не́бо и пре́дъ Тобо́ю.

И ны́не: Упова́ніе христіа́нъ, Пресвята́я Дѣ́во, Его́же родила́ еси́ Бо́га па́че ума́ же и сло́ва, непреста́нно моли́ съ го́рними си́лами да́ти оставле́ніе грѣхо́въ на́мъ всѣ́мъ, и исправле́ніе житія́, вѣ́рою и любо́вію при́сно Тя́ чту́щимъ.

Го́споди, поми́луй, 40. И моли́тва:

Влады́ко Вседержи́телю, Непостижи́ме, нача́ло свѣ́та и преу́мная си́ло, И́же Ѵпоста́сного Сло́ва Оте́цъ и единоси́льнаго Твоего́ Ду́ха Испусти́тель: милосе́рдныя ра́ди ми́лости и неизрече́нныя бла́гости не презрѣ́вый человѣ́ческого естества́, тьмо́ю грѣха́ содержи́маго, но Боже́ственными свѣ́ты свяще́нныхъ Твои́хъ уче́ній, зако́номъ и проро́ки свѣти́вый мíру, послѣди́ же́ на́мъ того́, Единоро́дного Твоего́ Сы́на благоволи́вый пло́тію возсія́ти и ко осія́нію на́съ Твоего́ просвѣще́нія наста́вити: да бу́дутъ у́ши Твои́ вне́млющѣ гла́су моле́нія на́шего, и да́руй на́мъ, Бо́же, во бдѣ́нномъ и тре́звенномъ се́рдцѣ, всю́ настоя́щаго житíя но́щь прейти́, ожида́ющимъ прише́ствія Сы́на Твое́го и Бо́га на́шего, судіи́ всѣ́хъ, да не возлежа́ще и спя́ще, но бо́дрствующе и воздви́жени въ дѣ́ланіе за́повѣдей Твои́хъ обря́щемся и въ ра́дость Его́ совни́демъ, идѣ́же пра́знующихъ гла́съ непреста́нный, и неизрече́нная сла́дость зря́щихъ Твоего́ лица́ добро́ту неизглаго́ланную. Я́ко Бла́гъ и Человѣколю́бецъ Бо́гъ еси́, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ, ами́нь.

Источникъ: Псалтирь. — СПб., 1904. — С.???

/ Къ оглавленію раздѣла /


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2018 г.