Церковный календарь
Новости
2019-02-22 / russportal
Житіе свят. Василія Кинешемскаго (1988) 2019-02-22 / russportal Нормальный Приходскій Уставъ (1971) 2019-02-21 / russportal Преп. Антоній Великій. Письмо 8-е къ монахамъ (1828) 2019-02-21 / russportal Преп. Антоній Великій. Письмо 7-е къ монахамъ (1828) 2019-02-21 / russportal Свт. Аѳанасій Великій. Посланіе къ аввѣ Орсисію (1903) 2019-02-21 / russportal Свт. Аѳанасій Великій. Посланіе къ Максиму философу (1903) 2019-02-20 / russportal Свт. Іоаннъ Златоустъ. Бесѣда на псаломъ 140-й (1899) 2019-02-20 / russportal Свт. Іоаннъ Златоустъ. Бесѣда на псаломъ 139-й (1899) 2019-02-19 / russportal Еп. Митрофанъ (Зноско-Боровскій). "За все благодарите" (1985) 2019-02-19 / russportal Еп. Митрофанъ (Зноско-Боровскій). "Слава Богу за все!" (1985) 2019-02-19 / russportal Еп. Митрофанъ (Зноско-Боровскій). День Благодаренія (1985) 2019-02-19 / russportal Еп. Митрофанъ. Слово на крещеніи А. В. Алферьевой (1985) 2019-02-19 / russportal Еп. Митрофанъ. Два слова новобрачнымъ (1985) 2019-02-19 / russportal Еп. Митрофанъ (Зноско-Боровскій). "Я Свѣтъ міру" (1985) 2019-02-18 / russportal Еп. Митрофанъ Бостонскій. Память св. Апостола Андрея Первозваннаго (1985) 2019-02-18 / russportal Еп. Митрофанъ Бостонскій. Воздвиженіе Честнаго и Животвор. Креста (1985) Новости въ видѣ RSS-канала: ![]() |
Духовные журналы Русскаго ЗарубежьяЕжемѣсячное приложеніе къ журналу «Православная Русь». Молитвы Пресвятѣй Приснодѣвѣ Маріи Богородицѣ, составленныя по подобію ветхозавѣтныхъ псалмовъ.
Пресвятая Владычице моя Богородице, прошу и молю Тя усердно: избави мя отъ внезапныя и лютыя смерти, наипаче же въ часъ кончины моея милостива предстани ми и руки бѣсовскія исхити, суда, прѣнія и страшнаго истязанія, и мытарствъ горкихъ, и князя лютаго, и вѣчнаго осужденія всесильною Твоею помощію свободи мя.
Небеса повѣдаютъ славу Божію, повѣдаютъ и Твою славу, Приснодѣво Маріе; мастями благодатнаго благовонія Твоего вси концы земли облагоухани суть. Воздыхайте къ Ней, обуреваеміи беззаконіями; грѣшницы, ищите Ея помощи и приведетъ васъ къ тихому пристанищу Божія милосердія; пѣсньми псаломскими толцыте утробы щедротъ Ея и одождитъ вамъ благодать милости Своея; прославите Ю, праведніи, предъ престоломъ Божіимъ; хвалите Ю небеса небесъ и святѣйшее имя Ея да ублажаетъ вся земля.
Услыши насъ, Госпоже, въ печали и на молитвы наши обрати матернее лице Твое; не отвержи насъ въ страшный часъ смерти, но предстани душѣ нашей, внегда разлучатися ей отъ тѣла; посли Ангела мирна въ срѣтеніе ея, имъ же отъ злыхъ духовъ безопасно да соблюдется, покажи ей милостива и благоувѣтлива правосуднаго Судію вѣковъ, Иже предстательствомъ Твоимъ прощеніе ей подастъ и удостоитъ вѣчнаго покоя съ избранными Божіими.
Госпоже, силою Твоею возвеселится сердце наше и сладостію имени Твоего утѣшится душа наша; отъ престола Царя славы посли намъ премудрость, еюже во всякой истинѣ просвѣтимся, отъ плотскихъ страстей сподоби благодатію Твоею воздержатися, яко да свѣтъ благодати Твоея въ сердцахъ нашихъ возсіяетъ. Коль сладки любящимъ словеса Твоя, Дѣво Пресвятая, и коль благовонны капли благодати Твоея; славу и честь воспѣваемъ Тебѣ и о преславномъ имени Твоемъ славимся и мы во вѣки. Слава Тебѣ, вѣрныхъ скорая Заступнице.
Радуйся Маріе Приснодѣво, преукрашенный раю, паче солнца свѣтлѣйшая, паче звѣздъ блистающая, паче всѣхъ ароматъ благовоннѣйшая, паче всякаго сельнаго цвѣта краснѣйшая, Юже Богъ, по смиренію Ея, избра въ возлюбленную Невѣсту Себѣ. О, Владычице! не отвратися отъ мене, недостойнаго грѣшника, но отъ гнусной скверны сотвори чиста, беззаконнаго — праведна, лѣниваго — усердна, яко да Тебѣ, Госпоже, работати и Тя хвалити возмогу во вѣки вѣковъ, аминь.
Боже, Боже мой, да призритъ на мя щедротами Своими Преблагословенная Приснодѣва Марія. Небеснымъ Ея благословеніемъ спасеніе вѣчное обрѣтохъ. Сего ради и взываю къ Тебѣ, Госпоже моя, во дни и въ нощи: да внидетъ предъ Тя молитва моя, и Ты, Владычице, приклони ухо Твое къ моленію моему. Мене искаша душевніи врази мои вездѣ, но крѣпкою десницею Твоею защищенъ есмь и подъ сѣнію милости Твоея обрѣтохъ пресладкій покой. Слава Тебѣ, недремлющая моя Хранительнице.
Господь пасетъ мя и Ты, Богородице Приснодѣво, умоляеши Его, да обратитъ Онъ Божественное лице Свое на мя. Слава Его благоутробію! Слава Твоему матернему предстательству! Да будутъ благословенни очи Твои, ихже милостивно обращаеши на кающихся грѣшниковъ; благословенно да будетъ сіяніе лица Твоего, благословенна да будетъ благодать святаго образа Твоего, благословенна буди скорая милость рукъ Твоихъ; благословенъ да будетъ Сынъ Твой и Богъ; да благословятъ Тя апостолы и пророцы Божіи, мученицы, исповѣдницы, и дѣвственніи лицы да поютъ Тя.
Господня есть земля и исполеніе ея, Ты же, Владычице, соцарствуеши съ Нимъ на небеси и Ангелъ хранитель намъ еси Ты и на земли. Лучше есть угаснути солнцу, неже намъ лишитися Твоего за насъ къ Богу ходатайства. Славою и красотою облеклася еси, всякой драгоцѣнности предражайшее есть одѣяніе ризъ Твоихъ, сіяніе солнца на главѣ Твоей и свѣтлость луны подъ ногами Твоими; звѣздами украшенъ престолъ Твой и ненасытимо взираютъ на Тя вси праведніи дуси. О, пресвѣтлая звѣздо утренняя, помяни насъ, Госпоже, во благоволеніи Твоемъ и сотвори насъ достойны быти, еже славити святое имя Твое. Слава Тебѣ, всѣхъ вѣрныхъ скорая помощнице и заступнице.
Радуйся, отчаянныхъ надеждо благонадежная и помощь безпомощныхъ скорая; аще что просиши у возлюбленнаго Сына Твоего, скоро пріемлеши; аще чего отъ Него хощеши, бываетъ Тебѣ; прошу и молю Тя, всемилостивая Госпоже, спаси мя, и спасуся, и Тя благословлю во вся вѣки вѣковъ, аминь.
Стѣну нерушиму, твердое основаніе, пристанище небурное, стяжавше Тя, Всепѣтая, въ пучинѣ страстей обуреваеміи въ благоутишное заступленіе Твое прибѣгаемъ, ниспосли намъ миръ и велію милость. Престолъ всезлатый Царя и рай процвѣтшій показалася еси, Пречистая; Бога бо во чревѣ Твоемъ носивши, благовонствуеши насъ божественными благодатьми, отонудуже вси Божію воистинну Матерь Тя проповѣдуемъ присно, подающую намъ велію милость. Утѣшеніе скорбящихъ, очищеніе согрѣшающихъ Ты еси, Мати Дѣво Владычице; человѣковъ бо спасеніе рождши, столпъ крѣпости вѣрнымъ содѣлался еси, тѣмже зовемъ Ти: Христа Бога моли, даровати намъ велію милость.
Въ Твое заступленіе и крѣпкую помощь нынѣ прибѣгохъ, Пречистая Госпоже Богородице! Весь есмь скверненъ; не сохранихъ заповѣдей Сына Твоего и Бога моего, да яко и на небо очима воззрѣти не смѣю, ибо тѣло злобою уязвихъ; ни руцѣ воздѣти на высоту: полнѣ бо еста лихоимства; ни устна отверсти на молитву: яко злогласованіемъ слѣпистася. Воздыханія во мнѣ нѣсть отъ нечувствія; сердце отягчихъ величаніемъ; душу омрачихъ немилосердіемъ; тѣло ослабихъ лѣностію; нозѣ преткнухъ о камень сластолюбія; уши отверзохъ на слышаніе маловременныя похвалы; лице мое безстудіемъ повлекохъ; смрадъ дѣлъ моихъ обоняста ноздрѣ мои; и весь быхъ, яко древо неплодно или яко храмина пуста, еяже на разореніе вси поучаются. Тать же души моея, діаволъ, крыется въ гнѣздѣ сердца моего, видитъ бо мя неограждена и тщится малое имѣніе вѣры моея восхитити и, аки плѣнника, грѣховными узами связавъ, къ своему хотѣнію мя нудитъ. Что убо содѣю — не вѣмъ; самовластенъ Богомъ сотворенъ быхъ, обаче волею поработихся похотному бѣсу и умножишася грѣси мои паче песка морскаго. Како могу умолити Творца моего и Господа, или како надѣюся помилованъ быти? Волею вдахся на оскверненіе плоти и по вся часы приближаюся къ грѣховнымъ сластемъ; плоть убо моя осквернися блудомъ, языкъ срамословіемъ распростреся; внутренняя же моя исполнихъ смрадныхъ помыслъ и отнюдь весь мой разумъ попустихъ въ сопротивная Божію закону. И того ради тужу, и скорблю, и печалуюся, по вся часы припадаю къ щедротамъ Твоимъ, Госпоже Богородице! Не прогнѣвайся на мя, грѣшнаго, да не всуе жизнь моя сократится; но призри, Владычице, на мя унылаго, умоли Рождшагося отъ Тебе, да не преданъ буду въ жребій грѣшныхъ. Ты бо еси Божія Мати и азъ, рабъ Твой, всегда на Тя надѣюся; за мене, твоего раба, умоли Сына Твоего и Бога моего, Емуже слава съ Отцемъ и Святымъ Духомъ нынѣ, и присно, и во вѣки вѣковъ. Аминь.
Источникъ: «Православная жизнь» (Orthodox life). Ежемѣсячное приложеніе къ журналу «Православная Русь». №10 (418). Октябрь 1984 года. — Jordanville: Типографія преп. Іова Почаевскаго. Свято-Троицкій монастырь, 1984. — С. 10-13.
|